Dɛ̃̌na á cìn ǹdə́ byɛ̀bɛ́ bə̀ nʼê gòm kɔma bə̀ bə̀ wɔ́ Kristə tùntúmə́ mó
11
À yʼà só sʼá shɛ̀nɛ́ bʼà zɔ̀mà nɛ́ wɔ́ ǹdə nyə̀nyà zɔ̀mà ta!
Zhə̀nà,
shɛ̀nɛ́na!
2 Á nyɛ̌ ǹdə kɛ̃-byǐ kɛ̀bɛ́ è yə̀l bal pár ta,
à kwè à la byal nɛ pɔ.
Byal mɔ́ ńmyɛ̌ mɔ́ wɔ́ Kristə.
À só ába dɛ̃´dɛ̃´,
sə sónó w kɔ̀bɔ́ à zhe ǹdʼába mɔ́ wɔ́ Yi sõ ò nʼô shí ní.
3 Ywẽ zhe ne,
dɛ̀ga lyì bʼa jə́jɛ̀rɛ́ ába á wun pyìrhí,
á zɛ̃̀ á yẽ̌ á gə́ ju kùr á zhí Kristə ne ǹdə́ wu-põ mó ne,
ǹdə Awa gə́ yẽ̌ ń cìn nì n pə dɔm mɔ́ nɛ mə jə́jɛ̀rɛ́ ǹdə́ mə̀ kɔma bɛ́ nɛ́.
4 Lò dõ gə tú ń bwə̀l Yezu dõ,
mɔ̀bɔ́ nə́myɛ̌ yə̀ bwə̀l nə́ byili ába gaga mɔ́ yò ń byili ába,
á zɛ̃̀ á nʼá zwẽ nyí,
ráá á shɛ̀nɛ́ á zwẽ éshìrhə́ kɛ̀bɛ́ á gwẽ̌ yə̀ zwẽ gaga.
Bə̀ gə bwə̀l yò-ècɔ̀nɔ̀ nyí tɛ̀bɛ́ á gwẽ̌ yə̀ rə̀ yò nyɛ̀ɛ̀ gaga bə byili ába,
á nʼá shɛ̀nɛ́ á zwẽ nyí.
5 À tʼâ bùl bʼà yə̀ yírh swí á tùntúmə́ bé nánfwààlɛ́ kùr w yé.
6 Dɛ̀ga,
wɔ́ à nyí rə̀ wàr zɔ̀mà yé.
Sə ǹdə́ rə̀myɛ́ ga,
à yě kɔn dɛ̀bɛ́ à nʼâ zɔ̀m mɔ́ kùrə̀.
Nə́ ce á lwar rə̀myɛ́ pamparɛ̃ɛ̃ twéé gakó kɔn dɛ̀bɛ́ nə́ wɛ̀rhɛ́ gakó wẽ́.
7 À gə́ tú a bwə̀l Yi yò-ècɔ̀nɔ̀ nyí rí á sõ yi ní,
à lwəl à cìn tɛ̃´,
mùnì ga a zhẽ̌ á yó dɛ̃̌.
À bwə̀l lè nánfò.
À gə́ wɛ̀rhɛ́ èta mɔ́ wɔ́ dóó nà?
8 À shɛ̀nɛ́ a yẽ̌ Kristə-lyì gùúli dwã kwɛ̃̌ nɛ.
Wɔ́ bə̀myɛ́ jɛ̃̀-kɔn à zwẽ a mʼa sɛ̃ ába.
9 À gə́ yʼà ŋwɛ́nɛ́ á sõ yi ní,
à yʼà tú à zhe wɛ́rɛ́ tum,
sə à yə̀ lò yó w nyǐ yé.
Wɔ́ nə́ da-byâ bɛ́ bə̀ shí Masɛdwanɛ mɔ́ bə̀ sɛ̃ nɛ ǹdə́ kɔn dɛ̀bɛ́ gakó à yʼà zhe rə̀ tum mú.
À zɔ à cìnə̀,
mùnì à bə̀kʼa nyǐ á yó w kɔn dɛ̀bɛ́ gakó à zhe rə̀ tum yil yé.
À nʼâ yâl a jʼa zhe à cìn èta twéé gakó.
10 Lò lò wàr ń la nɛ cə̂r Akəyi tənà y vɔ̃̀ òdù ga wẽ́ ǹdə́ wu-nyɔ̃̀ w òmyɛ́ byilu yé.
Rə̀myɛ́ wɔ́ zhə̀n à nʼâ byili Kristə jàn yilə.
11 À gə́ nʼâ wɛ̀rhɛ́ èta mɔ́,
wɔ́ só à bə ába só?
È də̀ èta yé;
Yi cìcì yě bʼà só ába.
12 À mʼa jʼâ nʼâ wɛ̀rhɛ́ kɔn dɛ̀bɛ́ à nʼâ wɛ̀rhɛ́ mɔ́ gaga,
mùnì ga lyì bí byɛ̀bɛ́ bə̀ nʼê yâl bə zhẽ̌ bə̀ cìn dɛ̃̌ bə wɛ̀rhɛ́ ǹdə nə́ ta mɔ́ lyɛ̃̀ bɔ̀l.
13 Lyì bí bə̀myɛ́ də̀ Kristə tùntúmə́ yé.
Bə̀ wɔ́ tùntùnnə̀ byɛ̀bɛ́ bə̀ nyɛ̌ yǔyǔ.
Bə̀ nʼê zə bə̀ cìn bə̀ yàl ǹdə Kristə tùntúmə́ ta.
14 Rə̀myɛ́ tʼâ jàr lò yé,
bə̀ Shətana cìcì nʼê zə è cìn è yàl ǹdə màlɛ́ka kɛ̀bɛ́ è shí pwẽ̀ wẽ́ ta.
15 Rə̀myɛ́ ce,
è kwã-lyì bí gə nʼê wɛ̀rhɛ́ ǹdə bə̀ tùntwə̃̀ə̃̀ né wɔ́ cángá ta,
rə̀ tʼâ jàr lò yé.
Sə bə̀ yó-gurə́ yə́,
wɔ́ tɛ̀bɛ́ bə̀ twĩ̀ mú bə̀ mʼa na.
Pwəə nə́ ń zɔ̀m nɔ̀nɔ̀ w kɔ̀bɔ́ ò zɔ mɔ ń gə́ wɔ́ Kristə tùntúm mú yil mó yò
16 À kʼa bwérhé à nʼâ wə̀l ába:
bə̀kʼá bù bʼà wɔ́ nyə̀nyà yé.
Á gə cẽ,
sʼá nyǐ ni ǹdə nyə̀nyà ta,
mùnì ga àmyɛ ŋwɛ̀nɛ́ a zhẽ̌ à cìn dɛ̃̌ námpɔ́lɛ́.
17 Zhə̀nà,
à tʼâ zɔ̀m ǹdə Cinu gə́ nə́ ń yâl nɛ́ yé.
À nʼâ zɔ̀m ǹdə nyə̀nyà ta,
mùnì ga a tó rə̀myɛ́ dɛnnɛ a zhẽ̌ à cìn dɛ̃̌.
18 Lyì nánzhəzhɔ̌ ŋwɛ́nɛ́ bə̀ nʼê tó numbyínsí tùntwə̃̀ə̃̀ né dúdú dɛnnɛ bə̀ zhẽ̌ bə̀ cìn dɛ̃̌.
19 Ámyɛ̌ byɛ̀bɛ́ á zhe surhə mó zɛ̃̀ á shɛ̀nɛ́ á ŋwɛ́nɛ́ ǹdə́ nyə̀nyə̀rh!
20 Á yẽ̌ bə̀ nʼê wɛ̀rhɛ́ ába ǹdə yómə́ ta,
bə̀ nʼê myìnì ába,
bə̀ nʼê zwẽ á wẽ̀ dé,
bə̀ nʼê tùrh ába,
bə̀ nʼê mà ába jə̀-sə̂rh!
21 È gə wɔ́ nə́myɛ̌ yilə,
nə́ yə̀ wu-jɔ̀ zal ǹdə́ rə̀myɛ́ wɔ̀rhɔ́ yé.
Cìzhìl zhe ne ǹdə́ rə̀ zɔ̌m.
Ǹdə́ rə̀myɛ́ ga,
kɔn gə ŋwɛ́nɛ́ lò wɔ̌ ń zhẽ̌ ń cìn rə̀ yilə,
sə́ nyǐ àmyɛ wɔ̌ à zhẽ̌ à cìnə̀,
bá ǹdə́ à gə nʼâ zɔ̀m ǹdə nyə̀nyà ta,
22 Bə̀ wɔ́ Ebərəbá?
Àmyɛ wɔ́ Ebərə.
Bə̀ wɔ́ Esərayɛl lyì?
Àmyɛ wɔ́ Esərayɛl lò.
Bə̀ wɔ́ Abəraham dwí rí lyì?
Àmyɛ wɔ́ Abəraham dwí rí lò.
23 Bə̀ wɔ́ Kristə tùntùnnə̀?
Àmyɛ́ wɔ́ Kristə tùntùnnə̀ du bi.
À gə́ nʼâ byili rə̀myɛ́ mɔ́,
wɔ́ zɔ́m à nʼâ zɔ̀m ǹdə nyə̀nyà ta kɔn lyɛ̃ cɛ nɛ.
À twĩ̀ dɛ̃´dɛ̃´ du bi.
Bə̀ co ne byə̀nə́-jù w twər nánzhəzhɔ̌ du bi.
Bə̀ mà nɛ̀ dɛ̃´dɛ̃´ du bi.
Twər nánzhəzhɔ̌ myɛ kɔn yʼà dàl námpɔ́lɛ́ y sə bə gu ni.
24 Zhwifubá zɔ nɛ bə mà dàməshɔ̀rɔ́ yírhə́ shə́-ètɔ̀ ǹdə́ nə̀bɔ́ nə̀bɔ́ kùrə̀ nə̀nu.
25 Orɔm lyì bí myɛ zə nɛ bə mà ǹdə́ də̀-dààlɛ̀ twər rə̀tɔ̀.
Dɛ̃ rə̀dù,
bə̀ yʼà zɔ nə́kuuli bə dul ne bə̀ la gu.
À zù bǔ-bwəl rə gə nɛ̃̌ mɔ́ wẽ́ twər rə̀tɔ̀.
Sə dɛ̃ rə̀dù,
à mɛ̃ nɛ̃̌ mɔ́ wẽ́ a zɔ̃̀.
26 À zhə̀l jààsɛ̀ nánzhəzhɔ̌ wẽ́.
À yʼà dàl námpɔ́lɛ́ y sʼa mɛ̃ bǔrh wẽ́.
Èmà-byâ yʼà la nɛ gu.
À da-byâ Zhwifubá ǹdə́ byɛ̀bɛ́ bə̀ də̀ Zhwifubá ga yʼà nʼê pyà à gu.
Bə̀ yʼà nʼê pyà nɛ̀ cɛmɛ nɛ́ wẽ́ ǹdə́ gɔ nɛ́ bə̀ la gu.
À yʼà dàl námpɔ́lɛ́ y sʼa mɛ̃ nə̀-fɔ̀lɔ̀ w wẽ́.
Byɛ̀bɛ́ bə̀ nʼê gòm kɔma bə̀ bə̀ wɔ́ Kristə-lyì mú myɛ yʼà nʼê pyà à gu.
27 À twĩ̀ tumə nyɛ̀bɛ́ nə̀ jɛ̀,
nə̀ nʼê lyɛ̀ɛ̀ numbyíní.
Dədɛ̃̌nɛ,
à tʼâ dɛ̀ɛ̀ yé.
Nɔrh ǹdə́ nə̀nyɛ̀lsɛ̀ zɔ nɛ.
Dədɛ̃̌nɛ,
kɔn wɔ́ nyɔ́ɔ́ sʼa zhɛ̃̀ kùjú.
Dədɛ̃̌nɛ,
wàr yʼà zə nɛ,
gɔ̀nɔ̀ myɛ jʼa tɛ̀nɛ́ yé.
28 Sə kɔn dɛ́ dɛ̀bɛ́ rə̀ yò zù nì du rə̀myɛ́ gakó mó,
wɔ́ Kristə-lyì gùúlí.
Wɔ́ rə̀myɛ́ yò ò zù nì dɛ̃ gakó.
29 Lò gə yə̀ Yi ni zhí kẽkẽ,
àmyɛ yʼa yə̀ ǹdə ń ta.
Lò gə tu yə̀-bəlɔ̀lɔ́ wẽ́,
à wu yʼa zhìlì dɛ̃´dɛ̃´.
30 È gə wɔ́ cìn-dɛ̃̌-zhõ̌ yilə,
wɔ́ à gə́ bə kùr zhe yil à nʼâ zhẽ̌ à cìnə̀.
31 Nə́ Cinu Yezu Da Yi yě bə̀ wɔ́ zhə̀n à nʼâ zɔ̀mà.
Ń yil lé bʼa nə còrhó twéé gakó!
32 À gə́ yʼà ŋwɛ́nɛ́ Damaasɛ nɛ́ yi ní,
cɔ w yó-cə́bal mɔ́,
pyɔ̌ Arətaasɛ yà ń cĩ́ gàà mɔ́,
ce lyì zɛ̃̀ bə cə̀r cɔ w jààsɛ́ gakó ne,
mùnì ga bə zə nɛ.
33 Rə̀myɛ́ yó,
bə̀ zɛ̃̀ bə ce a zù sə́yâ wa,
bə kwè nè bə tó byílí y bə̀ lù bə mʼe kə́kɛ́lɛ́ cɔ w mɔ́ túkwə́rə́ èdù,
bə cĩ́ pwẽ̀ nè.
Wɔ́ gàà mɔ́ à tó né a lù cɔ w cə́bal mɔ́ yé né.*