Pwəə nə́ ń byili kɛ̃-jú gə́ wɔ́ kɔn ná-dwí yilə
7
Da-byâ,
è gə wɔ́ kɔn dɛ́ dɛ̀bɛ́ á kɛ̃ á sɛ́bɛ́ rɛ́ wẽ́ á pɛ̃ mɔ́ yilə,
á byili bə̀ kɔn mə̂ bə̀ bal bə̀ká n jí kɛ̃ yé.
2 Wɔ́ zhə̀nà.
Sə fwə̂l mó gə́ já dɛ̃´dɛ̃´ mɔ́ ce,
bal mə̂ sə n zə ń sə̀pwà kɛ̃,
kɛ̃ myɛ mə̂ sə n zə ń sə̀pwà byal,
bə mʼe cə̀r fwə̂l mó yé ne.
3 Bal mɔ́ mə̂ sə n wɛ̀rhɛ́ byaalɛ tum ǹdə́ ń kɛ̃ mɔ́,
kɛ̃ mɔ́ myɛ mə̂ sə n wɛ̀rhɛ́ kɛ̃dɛ tum ǹdə́ ń byal mɔ́.
4 Kɛ̃ mɔ́ wàr ń mà n zə ń yala nɛ́ n wɛ̀rhɛ́ ń gə́ nə́ ń yâl nɛ́ yé,
bə̀ ń yala nɛ́ wɔ́ ń byal mɔ́ ń cǐ ni.
Byal mɔ́ myɛ wàr ń mà n zə ń yala nɛ́ n wɛ̀rhɛ́ ń gə́ nə́ ń yâl nɛ́ yé,
bə̀ ń yala nɛ́ wɔ́ ń kɛ̃ mɔ́ ń cǐ ni.
5 Á bə̀kʼá cẽ dwã yò yé.
Rə̀myɛ́ wɔ́ á gə zɔ̀m á ló dwã yó,
á yẽ̌ bwə̂l ne námpɔ́lɛ́ á bʼá ce Yi.
Rə̀myɛ́ kwã nɛ́,
á zɛ̃̀ á kʼá yə̀ nɛ́ ǹdə́ dwã.
È gə də̀ rə̀myɛ́,
dɛ̀ga á bʼâ pyɛ́nɛ́ pyɛ́nɛ́ á cìn á ga,
Shətana zɛ̃̀ e tó rə̀myɛ́ dɛnnɛ e swèlè ába.
6 Tɛ̀bɛ́ à nʼâ byili mú wɔ́ àmyɛ gə́ nʼâ bùl né.
Sə è də̀ nyí à nʼâ pɛ yé.
7 Zhə̀nà,
à yʼà nʼâ yâl sə lyì bí gakó yə̀ ǹdə àmyɛ́ ta.
Sə lò gakó zhe ń pɛnɛ́ Yi pɔ mɔ.
Rə̀ pɔ pɛnɛ́ èdù mɔ̀bɔ́ nɛ,
rə pə è dõ mɔ̀bɔ́ myɛ nɛ.
8 È gə wɔ́ ámyɛ̌ byɛ̀bɛ́ á gwẽ̌ yə̀ kana ráá byə́nə́ jí mú,
ǹdʼámyɛ̌ byɛ̀bɛ́ á kana ráá á byə́nə́ cù mú yilə,
à nʼâ byili ába:
kɔn yʼà mə̂ sʼá jʼá yẽ̌ á yə̀ ǹdə àmyɛ́ ta.
9 Sə á gə wàr á la pyɔ́nɔ́,
sə bala bɛ́ jí kana,
sə kana bɛ́ myɛ jí byə́nə́.
Rə̀myɛ́ cɔ̃̀ yala nɛ́ myǐn ju mú.
10 Ámyɛ̌ bala bɛ́ byɛ̀bɛ́ á jú kana mɔ́,
ǹdʼámyɛ̌ kana bɛ́ byɛ̀bɛ́ á jú byə́nə́ mó,
à nʼâ pɛ ába nyí,
sə nyí rí rə̀myɛ́ də̀ àmyɛ́ nyân yé.
Wɔ́ Cinu nyí:
kɛ̃ mɔ̀bɔ́ ǹ jú byal,
ǹ bə mə̂ sə́ zhɛ̃̀ ǹ byal mɔ́ yé.
11 Sə dɛ̀ga ǹ gə zhɔ̃̀ mɔ̀ myɛ,
sə ǹ bə̀ká kə́ jí byal yé,
ráá sə ǹmyɛ́ ǹdə́ ǹ byal mɔ́ kʼá ló dwã yó.
Bal myɛ bə mə̂ sə́ zhɛ̃̀ ǹ kɛ̃ yé.
12 È gə wɔ́ lyì bí dwã bɛ́ yilə,
à nʼâ pɛ nyí,
sə nyí rí rə̀myɛ́ də̀ Cinu nyân yé:
Kristə-lò gə zhe kɛ̃ ń də̀ Kristə-lò,
kɛ̃ mɔ́ gə só mó ń nə́ ń yâl n jòm ǹdə́ mɔ́,
sə bə̀ká zhɛ̃̀ mɔ̀ yé.
13 Kɛ̃ gə wɔ́ Kristə-lò,
ǹ byal mɔ́ zɛ̃̀ ń də̀ Kristə-lò,
n jà ń só mó ń nə́ ń yâl n jòm ǹdə́ mɔ́,
sə ǹmyɛ bə̀ká zhɛ̃̀ mɔ̀ yé.
14 Bə̀ bal gə də̀ Kristə-lò,
ǹ kɛ̃ mɔ́ jà ń wɔ́ Kristə-lò,
ǹ tó ǹ kɛ̃ mɔ́ dɛnnɛ ǹ bwə́l Yi ni.
Sə kɛ̃ gə də̀ Kristə-lò,
ǹ byal mɔ́ jà ń wɔ́ Kristə-lò,
ǹmyɛ tó ǹ byal mɔ́ dɛnnɛ ǹ bwə́l Yi ni.
È gə yʼà də̀ rə̀myɛ́,
á bə̀sɔ́ná bɛ́ yʼà tʼâ la Yi ni bwəlse yé.
Sə pamparɛ̃ɛ̃ mɔ́ bə̀ bwə́l Yi ni.
15 E jà lò mó mɔ̀bɔ́ ń də̀ Kristə-lò mó gə nə́ ń yâl n shə́r,
ń wɔ̌ ń shə́rə́.
Èta,
è gə wɔ́ kɛ̃ mɔ́ ń wɔ́ Kristə-lò,
ráá è gə wɔ́ bal mɔ́ ń wɔ́ Kristə-lò myɛ,
bə̀ kʼê tɛ̀nɛ́ ǹdə́ dwã yé.
Bə̀ Yi byẽ̀ ába bʼâ jǒm ǹdə́ yə̀-zùlə́.
16 Ǹmyɛ́ mɔ̀bɔ́ ǹ wɔ́ kɛ̃,
ń jà ǹ wɔ́ Kristə-lò mó,
etər ǹ bʼâ tó né ń lwar bə̀ ǹ bʼâ vwârh ǹ byal mɔ́?
Sə ǹmyɛ́ mɔ̀bɔ́ ǹ wɔ́ bal,
ń jà ǹ wɔ́ Kristə-lò mó,
etər ǹ bʼâ tó né ń lwar bə̀ ǹ bʼâ vwârh ǹ kɛ̃ mɔ́?
Lò gakó mə̂ sə́ yə̀ dɛ̀bɛ́ ǹ yà ǹ wɔ́ Yi bʼe byẽ̀ mó mó
17 Kɔn gə lyɛ̃ dɛ̀bɛ́ à byili mú,
Yi gə́ byẽ̀ ába mó,
ǹdʼá yʼâ ŋwɛ́nɛ́ jàà y kɛ̀bɛ́ Cinu yà ń pɔ ába mɔ́ wẽ́,
lò gakó mə̂ sə́ zhì Cinu gə́ byẽ̀ mó ǹdə́ ǹ ŋwɛ́nɛ́ mə̀gã̌ mɔ́.
Wɔ́ nyí rí rə̀myɛ́ à nʼâ pɛ Kristə-lyì gùúlí gakó wẽ́.
18 Yi gə byẽ̀ mó ǹdə́ bə̀ gòm mó,
sə́ já yə̀ lò mɔ̀bɔ́ bə̀ gòmə̀.
Sə Yi gə byẽ̀ mó ǹdə́ bə̀ yə̀ mó gòm,
sə ǹ bə̀ká ce bə gõ mó yé.
19 Bə̀ gə gòm mó,
bə̀ gə yə̀ mó gòm myɛ,
rə̀myɛ́ gakó wɔ́ nánfò.
Tɛ̀bɛ́ rə̀ zhe kùr mó,
wɔ́ Yi pùbùlə̀ né wɔ̀rhɔ́.
20 Lò gakó mə̂ sə́ zhì Yi gə́ byẽ̀ mó ǹdə́ ǹ ŋwɛ́nɛ́ mə̀gã̌ mɔ́.
21 Yi gə byẽ̀ mó ǹdə́ ǹ wɔ́ yóm,
sə ǹ wu bə̀kʼa zhìlì rə̀myɛ́ yil yé.
Sə ǹ gə wɔ̌ ǹ bʼâ cìní ǹ cìnə̀,
sə́ cìní ǹ cìnə̀.
22 Lwarna bə̀ yóm mɔ̀bɔ́ Cinu byẽ̀,
ń nɔ cìn-cìnú,
n jǐrh Cinu lò;
sə Cinu gə byẽ̀ lò mɔ̀bɔ́ ń cǐ ń cìnə̀,
rə̀-ná-cí jǐrh Kristə yóm.
23 Yi wɛ̀rhɛ́ kɔn nánfɔ̀lɔ̀ rə mʼe zwẽ ába.
Rə̀myɛ́ ce,
á bə̀kʼá shɛ̀nɛ́ á yə̀ numbyínsi yómə́ yé.
24 Da-byâ,
lò gakó mə̂ sə́ zhì Yi yé né jàà y kɛ̀bɛ́ rə̀ byẽ̀ mó ǹdə́ ǹ ŋwɛ́nɛ́ è wẽ́ mó wə.
Bala byɛ̀bɛ́ bə̀ yə̀ kana jí ǹdə́ kana byɛ̀bɛ́ bə̀ yə̀ byə́nə́ jí
25 Cinu yə̀ nɛ nyí pɛ bala bɛ́ byɛ̀bɛ́ bə̀ yə̀ kana jí ǹdə́ kana bɛ́ byɛ̀bɛ́ bə̀ yə̀ byə́nə́ jí mú yil yé.
Sə à mʼa byili kɔn dɛ̀bɛ́ à nʼâ bùlə̀.
À wɔ́ lò mɔ̀bɔ́ á mə̂ sʼá cili ń zɔ̀mà nɛ́,
bə̀ Cinu dùr à nɔ̀nɔ̀.
26 Kɔn gə́ zum èlâsɛ̃´ mɔ́ ce,
à nʼâ bùl bə̀ lò gakó gə já ǹ yàl ǹdə ǹ gə́ wɔ́ nɛ́ mɔ́ cɔ̃̀.
27 Ǹ gə zhe kɛ̃,
sə ǹ bə̀ká vùr mò yé.
Ǹ gə bə kɛ̃ zhe,
sə ǹ bə̀ká pyà kɛ̃ yé.
28 Sə ǹ gə jú kɛ̃ myɛ,
rə̀ də̀ dóó yé.
Kɛ̃-byǐ gə jú byal,
è yə̀ dwé yé.
Sə bala bɛ́ byɛ̀bɛ́ bə̀ jú kana mɔ́,
ǹdə́ kana bɛ́ byɛ̀bɛ́ bə̀ jú byə́nə́ mó,
bʼa nə zwini lũ w kɔ̀bɔ́ wẽ́.
Sə à nʼâ yâl bʼâ lú zwini rí rə̀myɛ́ yé né.
29 Da-byâ,
à nʼâ wə̀l ába:
kɔn kʼê bə nyɛ yé.
Kɔn zhí zà,
byɛ̀bɛ́ bə̀ jú kana,
sə bə yə̀ ǹdə bə̀ yə̀ kana jí ta;
30 byɛ̀bɛ́ bə̀ nʼê kúrhə́,
sə bə yə̀ ǹdə bə̀ tʼâ kúrh ta;
byɛ̀bɛ́ bə̀ zhe wu-nyɔ̃̀,
sə bə yə̀ ǹdə bə̀ bə wu-nyɔ̃̀ zhe ta;
byɛ̀bɛ́ bə̀ nʼê yè wẽ̀,
sə bə yə̀ ǹdə bə̀ bə tɛ̀bɛ́ bə̀ nʼê yè mó cǐ ta;
31 byɛ̀bɛ́ bə̀ zhe lũ w wẽ̀ nánzhəzhɔ̌ bə̀ mʼê twĩ̀ mú,
sə bə yə̀ ǹdə bə̀ tʼâ zə kaka bə̀ twĩ̀ ta.
Nyǐnə lũ w kɔ̀bɔ́ kʼô tʼâ la dɔnɔ yé.
32 À tʼâ yâl bʼâ cĩ́ kaka twə́lə́ á wẽ́ yé.
Lò mɔ̀bɔ́ ń yə̀ kɛ̃ jí,
wɔ́ Cinu nyə̀ná nɛ́ yò ò zù mù.
Kɔn dɛ̀bɛ́ ń nə́ ń pyà,
wɔ́ Cinu pùbùlə̀ wɔ̀rhɔ́.
33 Sə lò mɔ̀bɔ́ ń jú kɛ̃,
wɔ́ lũ w nyə̀ná nɛ́ yò ò zù mù.
Kɔn dɛ̀bɛ́ ń nə́ ń pyà,
wɔ́ ń kɛ̃ mɔ́ pùbùlə̀ wɔ̀rhɔ́.
34 Èta mɔ́,
è jǐrh wɔ́ wẽ̀ rə̀lyè yò ò zù mù.
Kɛ̃ mɔ̀bɔ́ ń yə̀ byal jí,
ráá kɛ̃-byǐ kɛ̀bɛ́ è yə̀ byal jí,
wɔ́ Cinu nyə̀ná nɛ́ yò ò zù mù.
Kɔn dɛ̀bɛ́ ń nə́ ń pyà,
wɔ́ n pə ń cìn námpúm Cinu ni,
n yə̀ ń lò.
Sə kɛ̃ mɔ̀bɔ́ ń jú byal,
wɔ́ lũ w nyə̀ná nɛ́ yò ò zù mù.
Kɔn dɛ̀bɛ́ ń nə́ ń pyà,
wɔ́ ń byal mɔ́ pùbùlə̀ wɔ̀rhɔ́.
35 À nʼâ byili ába rə̀myɛ́ ámyɛ̌ cìcì nì sãɔ̃ yilə.
Sə è də̀ zhẽ́ à nʼâ yâl a zhẽ̀ ába yé.
À nʼâ yâl bʼâ cír kɔn dɛ̀bɛ́ rə̀ mâ,
mùnì á zhí Cinu dúdú ni ǹdʼá wun gakó.
36 Bal-byǐ gə pyà è bóm,
e zɛ̃̀ e pwírí è gə yẽ̌ mo,
wɔ́ lwɛlɛ è wɛ̀rhɛ́ mɔ,
è gə nʼê bùl bə̀ bə̀ mə̂ sə bə jí dwã,
sə e wɛ̀rhɛ́ ǹdə è gə́ nʼê yâl nɛ́;
bə jí dwã.
Rə̀myɛ́ də̀ yə̀-bəlɔ̀lɔ́ yé.
37 Sə bal-byǐ y gə gu è wẽ́ bʼè tʼâ la è bóm mó jú,
e jʼà də̀ lò ń nə́ ń nyɛ́ɛ́ y bʼè bə̀kʼa jí mu;
è gə yě bʼè wɔ̌ è la pyɔ́nɔ́,
è gə gu rə̀myɛ́ è wẽ́ zhə̀n zhə̀nà,
è gə yə̀ bóm mó jí,
sə́ nyǐ è wɛ̀rhɛ́ cɛ̀nɛ̀.
38 Èta,
lò mɔ̀bɔ́ ń gə pyà ń bóm,
ń gə jú mu,
ń wɛ̀rhɛ́ cɛ̀nɛ̀.
Sə lò mɔ̀bɔ́ ń pyà ń bóm,
n zɛ̃̀ ń yə̀ mɔ jí,
ńmyɛ̌ wɛ̀rhɛ́ cɛ̀nɛ̀ du.
39 Kɛ̃ gə jú byal,
ń kə́ ń bə ń cìn cǐ yé.
Ń mə̂ sə n jòm ǹdə́ mɔ twéé twéé,
kɔn bʼe yí byal mɔ́ cu.
Sə byal mɔ́ gə tú ń cùwə̀,
n zɛ̃̀ ń cǐ ń cìnə̀.
Ń wɔ̌ ń jí byal mɔ̀bɔ́ ń nə́ ń yàlá,
ǹdə́ bal mɔ́ ńmyɛ̌ mɔ́ gə wɔ́ Kristə-lò.
40 E jà àmyɛ́ nʼâ bùl bə̀ ń gə kə́ ń yə̀ byal jí,
ń mà n nə ń cìn du.
À nʼâ bùl bə̀ Yi Eshirhə y ŋwɛ́nɛ́ ǹdə́ àmyɛ.