Kristə-lyì gə zhe zɔ̀mɛ̀, sə bə kwɛrhɛ yò w bə̀ cəcəl wə
6
Ámyɛ̌ mə̀dù gə tú ń zhe zɔ̀mɛ̀ ǹdə́ ń dõ,
ń mà n yẽ̌ mo byõ̌ Yi lyì bí yé né ne,
n zɛ̃̀ n ká n vò n byẽ̀ mò lũ w lyì bí bùrsì cìnə́ sõ?
Rə̀myɛ́ də̀ cìzhìlə̀?
2 Á yə̀l bə̀ Yi lyì bí mʼa bùr lũ w lyì bí bùrsì nà?
È gə wɔ́ ámyɛ̌ á la lũ w lyì bí bùrsí bǔr,
á nə zɛ̃̀ á wàr zɔ̀mà námpɔ́lsɛ́ shɛ̀bɛ́ sə̀ nʼê twí mú bùrsì á la bǔr?
3 Á yə̀l bə̀ nə́ mʼâ bùr màlɛ́kabá myɛ cìcì bùrsì nà?
Sʼe bʼe zɔ̀m zɔ̀mà nyɛ̀bɛ́ nə̀ nʼê twí nə́ cəcəl w lũ w kɔ̀bɔ́ wẽ́ mó yò!
4 Á zɛ̃̀ á gə zhe lũ w kɔ̀bɔ́ zɔ̀mà,
á kʼá nʼá zə nɛ á zhə̀l byɛ̀bɛ́ Kristə-lyì gùlú w yə̀l bə̀ yò mó sono!
5 À nʼâ wə̀l èta a mʼa ce ába cìzhìlə̀.
Lò mə̀dù ga tɛ̀nɛ́ á wẽ́ ń yě zɔ̀mɛ̀ kùr ń wɔ̌ ń mà n kwɛrhɛ zɔ̀mɛ̀ tɛ̀bɛ́ rə̀ ŋwɛ́nɛ́ Kristə-lyì bə̀lyè cəcəl wə?
6 Bə̀ mə̂ sə bə zə dwã bə vò lyì byɛ̀bɛ́ bə̀ də̀ Kristə-lyì yé né?
7 Á gə́ nʼá byẽ̀ dwã bùrsì mú myɛ cìcì nʼê byili bʼâ tu á tum dí wẽ́.
Byè yil á tʼá pyɛ́nɛ́ á yẽ̌ bə̀ wɛ̀rhɛ́ ába kɔn dɛ̀bɛ́ rə̀ bə mâ?
Byè yil á tʼá yẽ̌ bə̀ ŋwɔ̀l á wẽ̀ dé?
8 Kʼâ wɔ́ ámyɛ̌ cìcì á nʼá wɛ̀rhɛ́ kɔn dɛ̀bɛ́ rə̀ bə mâ,
wɔ́ ámyɛ̌ á nʼá ŋwɔ̀l lyì bí dwã bɛ́;
bə̀ jʼà wɔ́ á da-byâ.
9 Á yə̀l bə̀ byɛ̀bɛ́ bə̀ nʼê wɛ̀rhɛ́ kɔn dɛ̀bɛ́ rə̀ bə mâ,
tʼâ la jàà nɔ Yi tənà y wẽ́ nà?
Á bə̀kʼá jə́jɛ̀rɛ́ á cìn yé.
Byɛ̀bɛ́ bə̀ nʼê fwə̀lə́,
ǹdə́ byɛ̀bɛ́ bə̀ nʼê zwə́l vwə̃̀ wẽ̀ tɛ̀bɛ́ rə̀ də̀ Yi yó mó,
ǹdə́ byɛ̀bɛ́ bə̀ nʼê wɛ̀rhɛ́ fwə̂l tumə dwí gakó,
ǹdə́ byɛ̀bɛ́ bə̀ nʼê zə bə̀ dwã bala bə̀ zwì ǹdə kana ta mɔ́,
10 ǹdə́ ŋwɔ̀là bɛ́,
ǹdə́ bəcàncàlà bɛ́,
ǹdə́ byɛ̀bɛ́ bə̀ nʼê nywɛ̀ sɛ̃´ dɛ̃´dɛ̃´ kɔn lyɛ̃ cɛ nɛ mɔ́,
ǹdə́ byɛ̀bɛ́ bə̀ nʼê tùrh bə̀ dwã bɛ́ mɔ́,
ǹdə́ byɛ̀bɛ́ bə̀ nʼê cə̀r bə̀ dwã bɛ́ sɔ́msɛ́ yó bə̀ vwârh bə̀ wẽ̀ dé mó,
tʼâ la jàà nɔ Yi tənà y wẽ́ yé.
11 Á jàlà yʼâ wɔ́ èta shãã ga,
sə Yi shàrh á lwɛlɛ rɛ́,
rə̀ tó Eshirhə náàcɛ̀nɛ́ dɛnnɛ rə cír ába bʼâ yál rə̀ lyì,
rə ce á jǐrh lyì byɛ̀bɛ́ bə̀ bə dwə́ə́re zhe,
Cinu Yezu Kristə yil yilə.
Nə́ mə̂ sə nə́ zə nə́ yala nɛ́ nə́ cèrhé Cinu
12 Á jàlà nʼá wə̀lə̀:
“À zhe sɔ́má à wɔ̌ à wɛ̀rhɛ́ kɔn gakó.”
Wɔ́ zhə̀nà.
Sə è də̀ rə̀ gakó rə̀ càn á yil yé.
À wɔ̌ à wə̀l bʼà zhe sɔ́má à wɔ̌ à wɛ̀rhɛ́ kɔn gakó,
sə à tʼâ yâl a yə̀ kɔn də̀ldə̀l yóm yé.
13 Á nʼá wə̀l myɛ:
“Kùjú ŋwɛ́nɛ́ sùlú yilə,
sùlú myɛ ŋwɛ́nɛ́ kùjú yilə.”
Rə̀myɛ́ wɔ́ zhə̀nà,
sə Yi bʼa zhìlì kùjú w ǹdə́ sùlú w ga.
Kɔn súlí myɛ,
lò bə mə̂ sə́ zə ǹ yala nɛ́ ń wɛ̀rhɛ́ yààyàà yé;
bə̀ nə́ yala nɛ́ ŋwɛ́nɛ́ Cinu yilə,
Cinu myɛ ŋwɛ́nɛ́ nə́ yala nɛ́ yilə.
14 Yi bwìrhì Cinu n zɛ̃̀ n du cùùrì wẽ́.
Rə̀myɛ́ ce,
rə̀ mʼa bwìrhì nə́myɛ ǹdə́ rə̀ jàn dɛ́.
15 Á yə̀l bʼâ yala nɛ́ wɔ́ Kristə yala nɛ́ kə̀kàlsɛ̀ nà?
À nə mʼa zɛ̃̀ a kwè Kristə yala nɛ́ kə̀kàlà a mʼa wɛ̀rhɛ́ kə-nə̀fòló yala kə̀kàlà?
Kɔn wàr yé.
16 Á yə̀l bə̀ bal mɔ̀bɔ́ ń ŋwɛ́nɛ́ ǹdə́ kə-nə̀fòló,
ńmyɛ̌ ǹdə́ òmyɛ́ ga jǐrh kɔn rə̀dù nà?
Bə̀ kɛ̃ Yi zɔ̀mɛ̀ rɛ́ sɛ́bɛ́ rɛ́ wẽ́ bə wɔ̀:
“Bə̀myɛ́ bə̀lyè y ga bʼa mù dwã nɛ bə jǐrh kɔn rə̀dù.”
17 Sə lò mɔ̀bɔ́ ǹ ŋwɛ́nɛ́ ǹdə́ Cinu ǹ wu w wẽ́,
ǹmyɛ́ ǹdə́ ńmyɛ̌ ga jǐrh kɔn rə̀dù.
18 Dɛ̃̌na á cìnə̀,
bə̀kʼá fwə̂l yé.
Yə̀-bəlwàálɛ́ dwã bɛ́ tɛ̀bɛ́ lò wɔ̌ ń wɛ̀rhɛ́ mɔ́,
tʼâ zhìlì ń yala nɛ́ yò yé.
Sə lò mɔ̀bɔ́ ń nə́ ń fwə̀lə́,
rə̀-ná-cí wɔ́ ń cìcì yala nɛ́ ń nə́ ń cɔ̀.
19 Á yə̀l bʼâ yala nɛ́ wɔ́ Eshirhə náàcɛ̀nɛ́ jì nà?
Wɔ́ Yi rə̀ pɔ ába rə̀ Eshirhə yə́.
È ŋwɛ́nɛ́ á wẽ́.
Á bə á cìn cǐ yé.
20 Yi wɛ̀rhɛ́ kɔn nánfɔ̀lɔ̀ rə mʼe zwẽ ába.
Rə̀myɛ́ ce,
zəna á yala nɛ́ á cèrhé Yi.