Pwəə nə́ ń ce Orɔm Kristə-lyì bí
16
À nʼâ yâl a ce á lwar bə̀ wɔ́ àmyɛ́ cìcì à twĩ̀ nə́ nəkɔ́ Febe á sõ.
Ń ŋwɛ́nɛ́ Kristə-lyì gùlú w Shənkəre né mó wẽ́ ń nə́ ń twĩ̀.
2 Zwẽnə ń zhəəlé Cinu yil lé yilə,
ǹdə Kristə-lyì gə́ mə̂ sə bə wɛ̀rhɛ́ nɛ́.
Ń gə zhe kɔn tum á sõ gakó,
sʼá sɛ̃ mɔ,
bə̀ ń sɛ̃ lyì nánzhəzhɔ̌ nɛ,
sə ń sɛ̃ àmyɛ́ nɛ kɔn du.
3 Cenə Pərshii ǹdə́ Akəlaasɛ á pɛ̃.
Bə̀ tó ne bə twĩ̀ Yezu Kristə tum dí.
4 Bə̀ zhɔ̃̀ bə̀ myə̀lə́ né bə mʼe zwẽ à nyân dɛ́.
È də̀ àmyɛ́ dúdú ni bə̀ wɛ̀rhɛ́ cɛ̀nɛ̀ yé.
Bə̀ wɛ̀rhɛ́ cɛ̀nɛ̀ Kristə gùúlí lyì bí bə̀ də̀ Zhwifubá mó gakó myɛ nɛ.
Rə̀myɛ́ ce,
wɔ́ nə́ gakó nə́ rʼé ce bə̀ nə̀báná.
5 Cenə Kristə-lyì bí bə̀ nʼê gùlí dwã bə̀ sõ kɛ̀lɛ́ w mɔ́ myɛ á pɛ̃.
Cenə à da-byǐ Epənɛɛtɛ.
Wɔ́ ńmyɛ̌ ń yàl nã́yə́ə́ mó Azhi tənà y wẽ́ n zù Kristə.
6 Cenə Marɛ,
bə̀ ń twĩ̀ dɛ̃´dɛ̃´ n pə ába.
7 Cenə Andəronikuusi ǹdə́ Zhənyaasɛ.
Àmyɛ́ ǹdə́ bə̀myɛ́ wɔ́ dwí.
Nə́ tó dwã nə́ twĩ̀ byə̀nə́-jì.
Bə̀ jɛ̀rɛ̀ nɛ bə zù Kristə,
sə bə̀ jǐrh ń tùntúmə́.
Lyì bí nʼê zɔ̀m bə̀ yil náàcɛ̀nɛ́.
8 Cenə Ampəlyətuusi.
Ń wɔ́ à dɔwa Cinu wẽ́.
9 Cenə nə́ tó-dõ Yərəbɛ̃ mɔ́ nə́ ga nʼé twĩ̀ Kristə tum dí mú,
e súlí nə́ da-byǐ nántwə̂ Sətəciisi.
10 Cenə Apɛlɛsɛ.
Ń tumə né nʼê byili bə̀ ń zhí Kristə ne zhə̀nà.
Cenə Arəsətobuuli kɛ̀lɛ́ y lyì bí.
11 Cenə Erɔjɔɔnɛ.
Àmyɛ́ ǹdə́ ńmyɛ wɔ́ dwí.
Cenə Narshiisi kɛ̀lɛ́ y lyì bí byɛ̀bɛ́ bə̀ zù Cinu mú.
12 Cenə Tərəfɛɛnɛ ǹdə́ Tərəfɔɔsɛ.
Bə̀ twĩ̀ dɛ̃´dɛ̃´ Cinu yilə.
Cenə à nəkɔ́ nántwə̂ Pərshiidi.
Ńmyɛ twĩ̀ dɛ̃´dɛ̃´ Cinu yilə.
13 Cenə Orofyiisi.
Ń wɔ́ Cinu tùntùnnə̀ námpúm.
Cenə ń ná mɔ́ myɛ,
bə̀ ń ná mɔ́ wɔ́ nə́ ga ná.
14 Cenə Asə̃kiriiti ǹdə́ Fələgɔ̃ ǹdə́ Erəmɛɛsɛ ǹdə́ Pətərəbaasɛ ǹdə́ Erəmaasɛ,
e súlí nə́ da-byâ bɛ́ dwã bɛ́ bə̀ ŋwɛ́nɛ́ bə̀ sõ mó.
15 Cenə Shələlooge ǹdə́ Zhəli ǹdə́ Nere,
e súlí ń nəkɔ́ mɔ́,
ǹdə́ Olɛ̃paasɛ,
e súlí Kristə-lyì bí dwã bɛ́ bə̀ ŋwɛ́nɛ́ bə̀ sõ mó gakó.
16 Cenə dwã,
á kwə̀ə̀lè dwã náàcɛ̀nɛ́ ǹdə da-byâ ta.
Kristə gùúlí gakó lyì bí nʼê ce ába.
Pwəə nə́ ń cící Kristə-lyì bí
17 Da-byâ,
à nʼâ lwə̀l ába:
dɛ̃̌na á cìn ǹdə́ lyì bí byɛ̀bɛ́ bə̀ nʼê zə pɔrá bə̀ twí mú.
Lyì bí bə̀myɛ́ mɔ́ bə shɛ̀ kɔn dɛ́ dɛ̀bɛ́ bə̀ byili ába á zwẽ rə̀ nyí mú yò yé.
Èta,
bə̀ nʼê dwĩ̀ Kristə-lyì bí.
Rə̀myɛ́ ce,
á bə̀kʼá tó bə̀ kùr yé.
18 Lyì bí bə̀myɛ́ mɔ́ dwí rí tʼâ twĩ̀ nə́ Cinu Kristə yil yé.
Wɔ́ bə̀ sə̀pwà sǔlné yil bə̀ nʼê twĩ̀.
Bə̀ nʼê jə́jɛ̀rɛ́ lyì bí byɛ̀bɛ́ bə̀ bəbwàl nyí zõ mó ǹdə́ nyì-gwàl ǹdə́ zɔ̀m-fwààlɛ́ tɛ̀bɛ́ lyì bí só cilu mú.
19 Lyì bí gakó yě bʼâ nʼá twĩ̀ ǹdə Cinu gə́ byili ní.
Rə̀myɛ́ ce,
à wu nyɛ̀ á yilə.
Sə à nʼâ yâl bʼâ zə surhə á mʼá twĩ̀ cɛ̀nɛ̀,
sʼá dɛ̃̀ á cìn twéé twéé á bə̀kʼá zù lwɛlɛ wẽ́ yé.
20 Kɔn kʼê tʼâ la dɔnɔ yé,
Yi rí rə̀ nʼê pɛ yə̀-zùlə́ né mó bʼa zhìlì Shətana yò á nə̀rh kùr wə.
Cinu Yezu mà n cĩ́ bwəl á yó!
21 Timote mó àmyɛ́ ǹdə́ ńmyɛ̌ nʼé twĩ̀ Cinu tum dí mú nə́ ń ce ába.
Lushuusi ǹdə́ Zhasɔ̃ ǹdə́ Sɔsəpatɛɛrɛ myɛ nʼê ce ába,
bʼàmyɛ́ ǹdə́ bə̀myɛ́ wɔ́ dwí.
22 Wɔ́ àmyɛ́ Tərəcuusi Pwəə ce a kɛ̃ sɛ́bɛ́ rɛ́ tɛ̀bɛ́,
à nʼâ ce ába Cinu mú ń ce nə́ mù dwã nɛ́ mɔ́ yil lé yilə.
23 Gəyuusi nə́ ń ce ába.
Wɔ́ ńmyɛ̌ sõ à nʼâ zwɛ̃̀ nɛ́.
Wɔ́ ńmyɛ̌ sõ byɛ̀bɛ́ bə̀ zù Kristə mó myɛ gakó nʼê gùlí dwã nɛ́.
Eraasɛ mɔ́ ń nə́ ń nyǐ cɔ w sə̀byǐ mú yò mó ǹdə́ nə́ da-byǐ Kərətuusi nʼê ce ába.
24 [Cinu Yezu Kristə mà n cĩ́ bwəl á gakó yó!]
Pwəə nə́ ń cèrhé Yi ń mə́ ń gwi ń sɛ́bɛ́ rɛ́ yó
25 Cèrhénə nə́ cèrhé Yi.
Wɔ́ rə̀myɛ́ rə̀ wɔ̌ rə̀ bʼa tó Yezu Kristə yò-ècɔ̀nɔ̀ nyí rí à bwə̀l a byili ába mó dɛnnɛ rə ce á zhí mu kẽkẽ.
Rə̀ tó yò-ècɔ̀nɔ̀ nyí rí rə̀myɛ́ mɔ́ dɛnnɛ rə byili kɔn dɛ̀bɛ́ rə̀ yʼà shèè shãã ga mɔ́.
26 Sə èlâsɛ̃´,
Yi nyì-zwennə bé byili kɔn dɛ́ rə̀myɛ́ mɔ́ kùr pamparɛ̃ɛ̃ bə̀ sábá nɛ́ wẽ́,
ǹdə Yi rí rə̀ ŋwɛ́nɛ́ twéé twéé mó gə́ pɔ nyí ní,
mùnì ga tənə̀rh dwí gakó lyì bí lwar rɛ,
sə bə shɛ̀nɛ́ bə zwẽ nyí bə zù mù.
27 Yi dúdú rə̀ wɔ́ surhə cə́bal.
Bànà nə́ tó Yezu Kristə dɛnnɛ nə́ cèrhé re twéé twéé byinə nə̀ bə zhɔ̌ zhe yilə!
Amɛ̀n!