Kristə-lò mə̂ sə́ pyà ǹ dõ wu-nyɔ̃̀
15
Nə́myɛ̌ byɛ̀bɛ́ nə́ zhí Yi ni kẽkẽ mó,
mə̂ sə nə́ sɛ̃ byɛ̀bɛ́ bə̀ Yi-ni-zhú mú də̀ kẽkẽ mó ne.
Nə́ bə mə̂ sə nə́ pyà wu-nyɔ̃̀ nə́ cìn yil yé.
2 Nə́ mə̀dù mə̀dù gakó mə̂ sə́ pyà kɔn dɛ̀bɛ́ rə̀ bʼa pə wu-nyɔ̃̀ ǹ dwã bɛ́ nɛ,
bə̀ cìn-zɛlɛ́ y yilə,
mùnì ga bə̀ Yi-ni-zhú mú yə̀ kẽkẽ.
3 Kristə yə̀ ń cìcì wu-nyɔ̃̀ pyà yé.
Bə̀ kɛ̃ Yi zɔ̀mɛ̀ rɛ́ sɛ́bɛ́ rɛ́ wẽ́ bə̀ Yi wòwə̀:
“Lyì bí tùùrhí tɛ̀bɛ́ bə̀ nʼê tùrh mó mó,
wɔ́ àmyɛ́ bə̀ ba.”
4 Kɔn dɛ̀bɛ́ gakó bə̀ kɛ̃ Yi zɔ̀mɛ̀ rɛ́ sɛ́bɛ́ rɛ́ wẽ́ kùr-ju yi ní ga mɔ́,
wɔ́ nə́myɛ̌ yil bə̀ kɛ̃ dɛ,
mùnì ga rə byili nə́ba sɔ́má kɛ̀bɛ́ è càn.
Wɔ́ rə̀myɛ́ rə̀ nʼê pɛ nə́ba cìn-pyɔ́nɔ́ ǹdə́ wu-jɔ̀ nə́ mʼé dɛ̃̀ Yi nyì-bwelé y pyǐrh mó.
5 Wɔ́ Yi rə̀ nʼê pɛ nə́ba wu-jɔ̀ ǹdə́ cìn-pyɔ́nɔ́.
Rə̀ bʼa ce á zə nyì-dwìì ǹdə́ dwã,
á wɛ̀rhɛ́ ǹdə Yezu Kristə ta,
6 mùnì ga á mù dwã nɛ á púr á nyí á cèrhé Yi rí rə̀ wɔ́ nə́ Cinu Yezu Kristə Da mɔ́.
Kristə tú Zhwifubá ǹdə́ byɛ̀bɛ́ bə̀ də̀ Zhwifubá gakó vwârh yilə
7 Zwẽnə á dwã bɛ́ cɛ̀nɛ̀,
ǹdə Kristə gə́ zwẽ ámyɛ nɛ́,
Yi còrhó yilə.
8 Zhə̀nà,
à nʼâ wə̀l ába,
Kristə jǐrh tùntùnnə̀ Zhwifubá yilə,
n mə n pyìrh Yi nyì-bwelé y rə̀ yʼà bwəl nə́ nàmbala bɛ́ nɛ mɔ́.
Ń tó rə̀myɛ́ dɛnnɛ n byili bə̀ Yi nyì-bwelé y tʼâ kwàrh yé.
9 Kristə tú mùnì ga byɛ̀bɛ́ bə̀ də̀ Zhwifubá mó myɛ cèrhé Yi rə̀ wu-bɔ̀nɔ̀ w yilə.
Bə̀ kɛ̃ Yi zɔ̀mɛ̀ rɛ́ sɛ́bɛ́ rɛ́ wẽ́ bə wɔ̀:
“Wɔ́ rə̀myɛ́ yilə,
à bʼa cèrhé mó nunə dwí gakó cəcəl wə;
à bʼa nún a cèrhé ǹ yil lé.”
10 Bə̀ kɛ̃ rə̀ wẽ́ kə́dò bə wɔ̀:
“Ámyɛ̌ tənèsé dwã bɛ́ lyì bí,
zɛ̃̀nà á tó Cinu lyì bí ni á fùù ǹdə́ wu-nyɔ̃̀.”
11 Bə̀ kʼe kɛ̃ kə́dò bə wɔ̀:
“Tənə̀rh gakó lyì,
zɛ̃̀nà á cèrhé Cinu.
Cɛmɛ gakó lyì,
cèrhénə mo.”
12 Ezəyi myɛ kɛ̃ n wɔ̀:
“Bə̀ mʼa lù lò mə̀dù Zhese dwí rí wẽ́,
ń mà n zɛ̃̀ n cìní tənèsé dwã bɛ́ lyì bí,
sə bə̀ mʼa zhí mu ǹdə́ bə̀ wun gakó,
bə mʼe dɛ̃̀ ń sɛ̃ɛ̃´.”
13 Á gə́ zhí Yi ni mú ce,
rə̀ bʼa pə ába yə̀-zùlə́ ǹdə́ wu-nyɔ̃̀ námpúm,
bə̀ kɔn dɛ́ dɛ̀bɛ́ á nʼá dɛ̃̀ mɔ́,
wɔ́ Yi sõ rə̀ la nɛ́ shú.
Èta,
á bʼâ dɛ̃̀ kɔn dɛ́ dɛ̀bɛ́ Yi bwəl rə̀ nyí mú,
Eshirhə náàcɛ̀nɛ́ jàn yilə.
Pwəə nə́ ń zɔ̀m ń cìcì tum dí yò
14 Da-byâ,
à cìcì mú yě pamparɛ̃ɛ̃ bʼâ wɔ́ yò-cɔ̀nɔ̀ cìnə́ twéé twéé,
á yě wẽ̀ nánzhəzhɔ̌,
á jʼâ wɔ̌ dwã á mʼâ cící.
15 Sə ǹdə́ rə̀myɛ́ ga,
à zɔ̀m à sɛ́bɛ́ rɛ́ tɛ̀bɛ́ jààsɛ̀ jàlà wẽ́ pamparɛ̃ɛ̃,
à mʼâ lyǐrh ába kɔn dɛ́ dɛ̀bɛ́ á jɛ̀rɛ̀ á yě mó.
Wɔ́ Yi gə́ só ne mó è ce a ŋwɛ̀nɛ́ a zɔ̀m zɔ̀mà nɛ́ nyɛ̀bɛ́ èta mɔ́.
16 Rə̀ ce a jǐrh Yezu Kristə tùntùnnə̀ lyì bí byɛ̀bɛ́ bə̀ də̀ Zhwifubá mó yilə.
Rə̀ cír ne rə pɛ̃ ŋwɔ̀nɔ́,
mùnì a bwə̀l rə̀ yò-ècɔ̀nɔ̀ nyí rí a byili byɛ̀bɛ́ bə̀ də̀ Zhwifubá mó ne,
mùnì ga bə jǐrh vwĩ̀-kɔn dɛ̀bɛ́ rə̀ sú Yi yírh.
Vwĩ̀-kɔn dɛ́ rə̀myɛ́ jǐrh Yi kɔn Eshirhə náàcɛ̀nɛ́ jàn yilə.
17 Rə̀myɛ́ ce,
à wɔ̌ à bʼa zhẽ̌ à cìn Yezu Kristə wẽ́ Yi yé né.
18 Sə à gə púr à nyí a zɔ̀m zɔ̀mɛ̀,
sə́ nyǐ è də̀ kɔn dõ yò à nʼâ zɔ̀m yé.
Wɔ́ tɛ̀bɛ́ Kristə tó à dɛnnɛ n wɛ̀rhɛ́ mɔ́ dúdú.
Wɔ́ àmyɛ́ dɛnnɛ ń tó né n ce byɛ̀bɛ́ bə̀ də̀ Zhwifubá mó zù Yi,
bə̀ nʼê wɛ̀rhɛ́ rə̀ pùbùlə̀.
Sə wɔ́ à zɔ̀mà nɛ́ ǹdə́ à tùntwə̃̀ə̃̀ né,
19 ǹdə́ màmyaarhɛ nánfwààlɛ̀,
ǹdə́ wò-jààrɛ̀;
wɔ́ rə̀myɛ́ gakó dɛnnɛ ń ce a tó né a twĩ̀ èta,
ǹdə́ Yi Eshirhə y jàn.
Sə kɔn ju kùr Zhərəzalɛm nɛ́ e mʼe vò Yiliri tənà y wa,
à bwə̀l Kristə yò-ècɔ̀nɔ̀ nyí rí námpúm jààsɛ́ sə̀myɛ́ gakó wẽ́.
20 Èta,
à gə la yò-ècɔ̀nɔ̀ nyí rí bwə̂l gakó,
à só sʼa vò a bwə̀l lè a byili cɛmɛ nɛ́ nyɛ̀bɛ́ bə̀ gwẽ̌ yə̀ Kristə yò zɔ̀m nə̀ wẽ́ mó lyì bí ni,
mùnì ga à bə̀kʼa twĩ̀ a pyɛ̀lɛ́ lò dõ tum yó yé.
21 À nʼâ wɛ̀rhɛ́ ǹdə Yi zɔ̀mɛ̀ rɛ́ sɛ́bɛ́ rɛ́ gə́ byili ní.
Bə̀ kɛ̃ rə̀ wẽ́ bə wɔ̀:
“Lyì bí byɛ̀bɛ́ bə̀ yʼà yə̀ ń yò bwə̀l bə byili bi gaga mɔ́,
bʼa nə mɔ ǹdə́ bə̀ yírhə́,
sə byɛ̀bɛ́ ń yò yə̀ bə̀ zhɛ̃̌ w twi mú bʼa nyɛ̀ɛ̀ rə̀ kùrə̀.”
22 Wɔ́ tum dí rə̀myɛ́ rə̀ cə̀r nè twər nánzhəzhɔ̌,
rə ce à yə̀ ŋwɛ̀nɛ́ a bə̀ á sõ yé,
23 sə à twĩ̀ à tum dí ga a zhɛ̀ cɛmɛ nɛ́ nə̀myɛ́ wẽ́ èlâsɛ̃´.
Á sõ twírí y yò gə́ zù nì dɛ̃´dɛ̃´ mɔ́ byinə né já.
24 À nʼâ yâl a vò Esəpanyɛ;
sə à gə tú à la gàà yi ní,
à bʼa tó á sõ.
Zhə̀nà,
à nʼâ bùl bə̀ à gə tú à la,
à bʼa tó á sõ,
a wɛ̀rhɛ́ dwã màngɛlɛ́,
mùnì ga á sɛ̃ nɛ a mʼa vò.
25 Sə è gə wɔ́ èlâsɛ̃´-lâsɛ̃´ mɔ́ yilə,
à la Zhərəzalɛm a sɛ̃ Yi lyì bí bə̀ ŋwɛ́nɛ́ gàà mɔ́ nɛ,
26 bə̀ Masɛdwanɛ ǹdə́ Akəyi Kristə-lyì bí zɔ̀m nyí rə̀dù bə ji bə̀ jɛ̃̀-kɔn dwã yó bə̀ la Kristə-lyì bí byɛ̀bɛ́ bə̀ wɔ́ nə̀mwà Zhərəzalɛm nɛ́ mɔ́ nɛ pɔ.
27 Bə̀ shɛ̀nɛ́ ǹdə́ bə̀ pùbùlə̀ bə̀ la bɛ sãɔ̃;
e jà bə̀ gə la nyǔ,
bə̀ mʼa pwírí bə̀ mə̂ sə bə sɛ̃ bɛ.
Zhwifubá byɛ̀bɛ́ bə̀ jǐrh Kristə-lyì Zhərəzalɛm nɛ́ mɔ́ sɛ̃ byɛ̀bɛ́ bə̀ də̀ Zhwifubá mó ne ǹdə́ Yi nyə̀ná nɛ́,
ce byɛ̀bɛ́ bə̀ də̀ Zhwifubá mɔ́ myɛ mə̂ sə bə sɛ̃ Zhwifubá byɛ̀bɛ́ bə̀ jǐrh Kristə-lyì mú ni ǹdə́ bə̀ jɛ̃̀-kɔna.
28 À gə kwɛrhɛ yò w òmyɛ́,
a pə kɔn dɛ́ dɛ̀bɛ́ bə̀ pɔ nɛ bʼà zhəl a pə Zhərəzalɛm Kristə-lyì bí ni mú à zhɛ̀,
rə̀myɛ́ kwã nɛ́,
à bʼa zɛ̃̀ a tó á sõ a mʼa lyɛ̃ a vò Esəpanyɛ.
29 Sə à yě bʼà gə tú á sõ,
Kristə bà n tó à dɛnnɛ n pə ába ń pansɛ́ dwí gakó.
30 Da-byâ,
á gə nʼá lwə̀l Yi à yilə,
sə àmyɛ́ ǹdə́ ámyɛ̌ ga wu yə̀ òdù nə́ mʼé lwə̀l lè ǹdə́ nə́ wun gakó.
À nʼâ lwə̀l ába rə̀myɛ́,
nə́ Cinu Yezu Kristə yil lé yilə,
ǹdə́ sónó w kɔ̀bɔ́ ò nʼô shí Eshirhə náàcɛ̀nɛ́ sõ mó jàn yilə.
31 Lwə̂lnə Yi à yilə,
mùnì ga lyì bí byɛ̀bɛ́ bə̀ ŋwɛ́nɛ́ Zhide né,
bə̀ bə shɛ̀ Kristə zɔ̀mɛ̀ rɛ́ zõ mó bə̀kʼa wɛ̀rhɛ́ nɛ lwɛlɛ yé.
Lwə̂lnə Yi á súlí,
mùnì ga à gə yú Zhərəzalɛm ǹdə́ sɛ̃ɛ̃´ yá,
sə Yi lyì bí pwèlè bə̀ wun bə zwẽ yə.
32 Èta,
ǹdə́ Yi gə pɔ sɔ́má,
à mʼa ŋwɛ̀nɛ́ a yí á sono ǹdə́ wu-nyɔ̃̀,
a mɛ̃ á sono a shǐrh námpɔ́lɛ́.
33 Wɔ́ Yi rə̀ nʼê pɛ yə̀-zùlə́.
Rə̀ mʼa yə̀ nɛ́ ǹdə́ á gakó!
Amɛ̀n!