Yi nʼê bùr lyì bí gakó bùrsì ǹdə́ zhə̀nà
2
Ǹmyɛ́ mɔ̀bɔ́ ǹ nə́ ǹ kɛ́ ǹ dwã bɛ́ bùrsì bə̀ bə̀ dó mó,
wɔ́ ǹ cìcì nyɛ̌sɛ́ ǹ nə́ ǹ kɛ́.
Bá ǹ gə wɔ́ nɛ́ yil myɛ,
ǹ gə nə́ ǹ kɛ́ ǹ dwã bɛ́ bùrsì,
ǹmyɛ́ ǹdə́ bə̀myɛ́ ga tùntwə̃̀ə̃̀ né jʼà wɔ́ rə̀dù mú ce,
ǹ tá ǹ la bwìrì nɔ yé.
2 Nə́ yě bə̀ Yi nʼê bùr lyì bí byɛ̀bɛ́ bə̀ nʼê wɛ̀rhɛ́ èta mɔ́ bùrsí ǹdə́ zhə̀nà.
3 Ǹ nə́ ǹ bùl bə̀ ǹ gə nə́ ǹ kɛ́ ǹ dwã bɛ́ byɛ̀bɛ́ bə̀ nʼê wɛ̀rhɛ́ èta mɔ́ bùrsì,
ǹmyɛ́ ǹdə́ bə̀myɛ́ ga tùntwə̃̀ə̃̀ né jʼà wɔ́ rə̀dù,
ǹ bʼâ lú Yi bùrsí yé né?
4 Yi wɔ́ wu-bɔ̀nɔ̀ cí,
rə̀ tʼâ pɔpwɛrɛ ǹdə́ yò yé.
Sə ǹ nə bə̀ká tə̀ rə̀myɛ́ yil ń fulsi ri yé.
Lwar bə̀ rə̀ gə́ nʼê wɛ̀rhɛ́ wu-bɔ̀nɔ̀ èta mɔ́,
wɔ́ yál rə̀ nʼê yâl bə̀ ǹ pyìrhí ǹ wu.
5 Sə ǹ nə́ ǹ wɛ̀rhɛ́ yó-kùlù,
ǹ bə shɛ̀ ǹ wu pyìrhú yé.
Wɔ́ rə̀myɛ́ è ce,
Yi lyim bʼa zɛ̃̀ ǹdə́ mɔ́ dɛ̃ rɛ́ tɛ̀bɛ́ rə̀ la bùrsí kɔ́ ǹdə́ zhə̀n mɔ́ yùwə̀.
6 Rə̀ bʼa kwɛ̃̌ lò gakó kɔn mɛrhɛ ǹdə́ ǹ tùntwə̃̀ə̃̀ né.
7 Rə̀ bʼa pə nyǔ mə̀ tʼâ la zhɔ̌ byɛ̀bɛ́ bə̀ nʼê ce jàn nɛ́ ǹdə́ cɛ̀nɛ̀ wɔ̀rhɔ́,
bə̀ mʼê pyà zùwə́ ǹdə́ còrhó ǹdə́ nyǔ mə̀ tʼâ la zhɔ̌.
8 Sə rə̀ lyim bʼa cààsɛ̀ ǹdə́ byɛ̀bɛ́ bə̀ tʼâ shɛ̀nɛ́ rə̀ nyí ni,
bə jʼà bə shɛ̀ zhə̀n dɛ́ yò mó,
bə̀ gə́ nʼê yẽ̌ bə̀ cìn nì bə̀ pɛ lwɛlɛ rɛ́ nɛ mɔ́ yilə.
9 Lò mɔ̀bɔ́ gakó ǹ nə́ ǹ twĩ̀ lwɛlɛ,
zwini ǹdə́ wu-zhìlù bʼa zə mɔ́,
sə wɔ́ Zhwifubá bə̀ mʼa yə̀ nã́yə́ə́ bé,
lyì bí dwã bɛ́ zɛ̃̀ bə pú.
10 Sə Yi bʼa pə zùwə́ ǹdə́ còrhó ǹdə́ yə̀-zùlə́ byɛ̀bɛ́ bə̀ nʼê wɛ̀rhɛ́ cɛ̀nɛ̀ mɔ́ mə̀dù mə̀dù gakó ne,
sə wɔ́ Zhwifubá bə̀ mʼa kʼe yə̀ nã́yə́ə́ bé,
lyì bí dwã bɛ́ zɛ̃̀ bə pú.
11 Zhə̀nà,
bə̀myɛ́ ga wɔ́ kɔn rə̀dù Yi yé né.
12 Byɛ̀bɛ́ gakó bə̀ nʼê wɛ̀rhɛ́ yə̀-bəlwàálɛ ǹdə́ bə̀ yə̀l Muyiisi nyə́ né ga mɔ́ myɛ bʼa cì,
ǹdə́ nyə́ né yə̀ bə̀ bùrsì kɛ́ yé.
Sə byɛ̀bɛ́ bə̀ yě ne,
bə jʼà nʼê wɛ̀rhɛ́ yə̀-bəlwàálɛ mɔ́,
Yi bʼa kə́ bə̀ bùrsì ǹdə nyə́ né gə́ nʼê byili ní.
13 È də̀ byɛ̀bɛ́ bə̀ só Muyiisi nyə́ né cilu mú bə̀ kʼê bə dóó zhe yé.
Wɔ́ byɛ̀bɛ́ bə̀ nʼê cili ni,
bə zɛ̃̀ bə̀ nʼê wɛ̀rhɛ́ ǹdə nə̀ gə́ nʼê byili ní mú bə̀ bə dóó zhe yé.
14 Byɛ̀bɛ́ bə̀ də̀ Zhwifubá,
bə̀ yə̀l Muyiisi nyə́ né,
bə̀ jʼà nʼê wɛ̀rhɛ́ ǹdə nə̀ gə́ nʼê byili ní mú,
ǹdə́ bə̀ yə̀l nè ga,
wɔ́ bə̀ cìcì mú bə̀ jʼâ wɔ́ nɛ.
15 Sə bə̀ nʼê tó bə̀ tùntwə̃̀ə̃̀ né nə̀myɛ́ dɛnnɛ bə̀ byili bə̀ Yi nyə́ né kɛ̃ bə̀ wun ní wẽ́.
Bə̀ yě rə̀myɛ́ bə̀ wẽ́ pamparɛ̃ɛ̃.
Bə̀ zhe surhə né nyɛ̀bɛ́ nə̀ ce,
bə̀ gə dó myɛ,
bə̀ yě,
bə̀ gə yə̀ dwé myɛ,
bə̀ yě.
Rə̀myɛ́ cìcì nʼê byili bə̀ nyə́ né kɛ̃ bə̀ wẽ́.
16 Rə̀myɛ́ gakó bʼa yə̀ pamparɛ̃ɛ̃ dɛ̃ rɛ́ tɛ̀bɛ́ Yi la tó Yezu Kristə dɛnnɛ rə kə́ kɔn dɛ̀bɛ́ rə̀ shèè numbyíní wu w wẽ́ mó bùrsí mú,
ǹdə yò-ècɔ̀nɔ̀ nyí rí à nʼâ bwə̀l mó gə́ nʼê byili ní.
Mɔ̌ ń wɔ́ Zhwifu páá?
17 Ǹmyɛ́ mɔ̀bɔ́ ǹ nə́ ǹ wə̀l bə̀ ǹ wɔ́ Zhwifu,
ǹ zhí Muyiisi nyə́ né ne,
ǹ nə́ ǹ zhẽ̌ ǹ cìn dɛ̃̌ bə̀ ǹ wɔ́ Yi lò,
18 ǹ yě rə̀ pùbùlə̀ né,
ǹ nə́ ǹ tó kɔn dɛ̀bɛ́ nyə́ né nʼê byili mú dɛnnɛ ǹ cír tɛ̀bɛ́ rə̀ mâ.
19 Ǹ nə́ ǹ bùl bə̀ ǹ wɔ́ lyìlyə̂r vwanna,
bə̀ ǹ wɔ́ pwẽ̀ lyì bí byɛ̀bɛ́ bə̀ ŋwɛ́nɛ́ cə-byín wẽ́ mó yilə,
20 bə̀ ǹ nə́ ǹ pul yə̀l-nə̀-kùrə̀ cìnə́ surhə,
bə̀ ǹ wɔ́ byɛ̀bɛ́ bə̀ wɔ́ ǹdə bə̀sɔ́ná ta mɔ́ cə̀rhnə̀.
Ǹ nə́ ǹ bùl ǹdə́ ǹ wu gakó bə̀ nyə́ né pul zhə̀n ǹdə́ kɔn gakó lwar sɔ́má nə pɔ̃́.
21 Ǹmyɛ́ yě ǹ dwã bɛ́ còrhò,
byè yil ǹ nə zɛ̃̀ ǹ wàr ǹ cìn ǹ nə́ ǹ cèrhè?
Ǹ zhe bə̀ lò bə̀ká n ŋwɔ̀ yé,
ǹmyɛ́ cìcì mú jà ǹ nə́ ǹ ŋwɔ̀là.
22 Ǹ nə́ ǹ byili bə̀ lò bə̀ká n fwə̂l yé,
ǹmyɛ́ cìcì mú jà ǹ nə́ ǹ fwə̀lə́.
Wẽ̀ tɛ̀bɛ́ rə̀ də̀ Yi mú zwə́l wɔ́ súsúlú ǹ sõ,
ń jà ǹ nə́ ǹ ŋwɔ̀l wẽ̀ tɛ̀bɛ́ rə̀ ŋwɛ́nɛ́ wẽ̀ dé rə̀myɛ́ mɔ́ jìsí wẽ́ mó ǹ yè.
23 Ǹ nə́ ǹ zhẽ̌ ǹ cìn dɛ̃̌ bə̀ ǹ yě nyə́ né,
ń jà ǹ tá ǹ wɛ̀rhɛ́ ǹdə nə̀ gə́ nʼê byili ní yé.
Lwar bə̀ èta mɔ́ wɔ́ Yi ǹ nə́ ǹ fulsi.
24 Bə̀ kɛ̃ Yi zɔ̀mɛ̀ rɛ́ sɛ́bɛ́ rɛ́ wẽ́ bə wɔ̀:
“Wɔ́ ámyɛ̌ Zhwifubá á ce byɛ̀bɛ́ bə̀ də̀ Zhwifubá mó nʼê tùrh Yi.”
25 Ǹ gə nə́ ǹ wɛ̀rhɛ́ ǹdə nyə́ né gə́ nʼê byili ní,
ǹ góm mó zhe kùrə̀,
sə ǹ gə tá ǹ wɛ̀rhɛ́ ǹdə nə̀ gə́ nʼê byili ní,
ǹmyɛ́ ǹdə́ lò mɔ̀bɔ́ ń yə̀ gòm ga wɔ́ kɔn rə̀dù.*
26 Lò mɔ̀bɔ́ ń yə̀ gòm,
n jà ń nə́ ń wɛ̀rhɛ́ ǹdə nyə́ né gə́ nʼê byili ní,
Yi tʼâ la mɔ nyǔ ǹdə lò mɔ̀bɔ́ ń gòm ta?
27 Mɔ̀bɔ́ ń yə̀ gòm,
n jà ń nə́ ń wɛ̀rhɛ́ ǹdə nyə́ né gə́ nʼê byili ní mú,
ń mà n byili ǹmyɛ́ mɔ̀bɔ́ ǹ tá ǹ wɛ̀rhɛ́ ǹdə nyə́ né gə́ nʼê byili ní mú ni bə̀ ǹ dówə́,
ń jʼâ gõ,
ǹ zhe nyə́ né sɛ́bɛ́ rɛ́.
28 È də̀ lò mɔ̀bɔ́ ń tùntwə̃̀ə̃̀ né wɔ́ ǹdə Zhwifu ta lyì bí yírhə́ w mó ń wɔ́ Zhwifu páá yé.
È də̀ góm mó mɔ̀bɔ́ lyì bí yírhə́ nə mɔ́ mə̀ wɔ́ góm mó páá mɔ́ yé.
29 Zhwifu páá mɔ́,
wɔ́ mɔ̀bɔ́ ń wɔ́ Zhwifu ń wu w wẽ́ mó.
Góm mó páá mɔ́ myɛ wɔ́ mɔ̀bɔ́ mə̀ ŋwɛ́nɛ́ ǹ wu w wẽ́,
mə̀ nʼê shí Eshirhə náàcɛ̀nɛ́ sõ mó,
sə è də̀ mɔ̀bɔ́ bə̀ wɛ̀rhɛ́ ǹdə bə̀ gə́ kɛ̃ nyə́ né sɛ́bɛ́ rɛ́ wẽ́ mó ta mɔ́ yé.
Zhwifu páá tá ń pyà còrhó numbyínsí sõ yé.
Wɔ́ Yi sõ ń nə́ ń nɛ còrhó né.