Pwəə sɛ́bɛ́ rɛ́ ń kɛ̃ n pə
Orɔm
Kristə-lyì bí ni mú
Pwəə nə́ ń ce Orɔm Kristə-lyì bí
1
Wɔ́ àmyɛ́ Pwəə à nʼâ kɛ̃ sɛ́bɛ́ rɛ́ tɛ̀bɛ́ à la ába pɔ.
À wɔ́ Yezu Kristə tùntùnnə̀.
Yi byẽ̀ nè bʼà yál ń tùntúm,
rə̀ cír ne rə̀ yò-ècɔ̀nɔ̀ nyí rí bwə̂l yilə.
2 Rə̀ tó rə̀ nyì-zwennə bé dɛnnɛ rə bwəl yò-ècɔ̀nɔ̀ nyí rí rə̀myɛ́ mɔ́ nyí shãã shãã ga rə̀ zɔ̀mɛ̀ rɛ́ sɛ́bɛ́ rɛ́ wẽ́.
3 Yi zɔ̀mɛ̀ rɛ́ nʼê zɔ̀m Yi Byǐ nə́ Cinu Yezu Kristə yò.
Ń kwè numbyíní yala,
bə lù mù Dəvyidi dwí rí wẽ́.
4 Sə ń gə́ bwìrhì Eshirhə náàcɛ̀nɛ́ jàn yil mó nʼê byili bə̀ ń wɔ́ Yi Byǐ ń zhe jàn nánfɔ̀lɔ̀.
5 Yi sɛ̃ nɛ,
rə ce a jǐrh rə̀ tùntúm,
Yezu Kristə jàn yilə,
mùnì ga tənə̀rh dwí gakó lyì ŋwɛ̀nɛ́ bə zwẽ nyí bə zù mù,
sə bə wɛ̀rhɛ́ ń pùbùlə̀,
ń yil lé còrhó yilə.
6 Yi gə́ byẽ̀ ámyɛ á jǐrh Yezu Kristə lyì mú ce,
á ŋwɛ́nɛ́ lyì bí bə̀myɛ́ wẽ́.
7 Ámyɛ̌ byɛ̀bɛ́ gakó á ŋwɛ́nɛ́ Orɔm nɛ́ mɔ́,
Yi só ába,
rə byẽ̀ ába á jǐrh rə̀ lyì.
Nə́ Da Yi ǹdə́ Cinu Yezu Kristə bʼa cĩ́ bwəl á yó,
sə bə pə ába yə̀-zùlə́!
Pwəə nə́ ń yâl n vò n gwɛ̃ Orɔm Kristə-lyì bí ni
8 À bʼa jɛ̀rɛ̀ a tó Yezu Kristə dɛnnɛ a ce à Yi rí nə̀bán á gakó yilə,
bə̀ lyì bí nʼê zɔ̀m á Yi-ni-zhú mú yò lũ w púlə́púlə́ wẽ́.
9 À nʼâ bwə̀l yò-ècɔ̀nɔ̀ nyí rí à mʼâ twĩ̀ Yi tum dí ǹdə́ à wu gakó.
À gə nʼâ lwə̀l lè gakó,
à tʼâ swě á yò yé,
sə Yi cìcì yě bə̀ wɔ́ zhə̀n à nʼâ zɔ̀mà.
10 À nʼâ lwə̀l lè twéé twéé,
ǹdə́ kɔn gə wɔ́ rə̀myɛ́ pùbùlə̀,
sʼa ŋwɛ̀nɛ́ a bə̀ á sono.
11 À nʼâ yâl ǹdə́ à wu gakó a bà,
mùnì ga Eshirhə náàcɛ̀nɛ́ tó à dɛnnɛ e pə ába è pansɛ́,
mùnì á ŋwɛ̀nɛ́ á zhí Yi ni kẽkẽ.
12 Kɔn du,
à yě bə̀ à gə tú á sono,
á Yi-ni-zhú mú bʼa pɛ̃ wu-jɔ̀,
sə àmyɛ nyân mɔ́ bʼa pə wu-jɔ̀ ámyɛ nɛ.
13 Da-byâ,
à nʼâ yâl bʼâ lwar bə̀ twər nánzhəzhɔ̌ à yʼà nʼâ yâl a bə̀ á sõ,
sə wɔ́ kɔn rə̀ cə̀r nè;
wɔ́ rə̀myɛ́ è ce à gwẽ̌ yə̀ ŋwɛ̀nɛ́ a bə̀ yé.
À yʼà nʼâ yâl bʼà tum dí zə kùr á sõ ǹdə cɛmɛ nɛ́ dwã bɛ́ wẽ́ mó ta.
14 Kɔn wɔ́ nyɔ́ɔ́ ǹdə́ nɛ bʼà twĩ̌ byɛ̀bɛ́ bə̀ yírhə́ púr bə̀ yě sɛ́bɛ́ mɔ́,
ǹdə́ byɛ̀bɛ́ bə̀ yírhə́ yə̀ púr bə̀ yə̀l sɛ́bɛ́ mɔ́ ga yilə.
15 Wɔ́ rə̀myɛ́ è ce,
à nʼâ yâl a bə̀ a bwə̀l yò-ècɔ̀nɔ̀ nyí rí a byili ámyɛ̌ byɛ̀bɛ́ á ŋwɛ́nɛ́ Orɔm nɛ́ mɔ́ myɛ nɛ.
Yò-ècɔ̀nɔ̀ nyí rí zhe jàn
16 À tʼâ dùr cìzhìl ǹdə́ yò-ècɔ̀nɔ̀ nyí rí bwə̂l yé,
bə̀ rə̀ wɔ́ Yi jàn rə̀ mʼê vwârh lò mɔ̀bɔ́ gakó ǹ zhí Yi ni,
e ji kùr ǹdə́ Zhwifubá e mʼe yí byɛ̀bɛ́ bə̀ də̀ Zhwifubá mó.
17 Yò-ècɔ̀nɔ̀ nyí rí nʼê byili bə̀ lò gə zhí Yi ni,
rə̀ nʼê vùr ǹ dwə́ə́ré,
bə̀ kɔn gakó wɔ́ ǹdə́ Yi-ni-zhú mú jàn.
Bə̀ kɛ̃ Yi zɔ̀mɛ̀ rɛ́ sɛ́bɛ́ rɛ́ wẽ́ bə wɔ̀:
“Lò mɔ̀bɔ́ ǹ zhí Yi ni,
ǹ kə́ ǹ bə dóó zhe yé.
Ǹ bʼâ zə nyǔ.”
Lyì bí gakó wɔ́ yə̀-bəlwàálɛ cìnə́
18 Yi zhǐ Arəzana w rə̀ lyim nʼê yì lyì bí yə̀-bəlwàálɛ́ ǹdə́ lwɛlɛ tɛ̀bɛ́ gakó bə̀ nʼê wɛ̀rhɛ́ mɔ́,
ǹdə́ bə̀ tùntùm-bəywààlɛ́ rə̀ nʼê cə̀r zhə̀n dɛ́ yé ne mó yilə.
19 Lò gə́ wɔ̌ ń mà n tó né n lwar Yi gə́ wɔ́ nɛ́ mɔ́ wɔ́ pamparɛ̃ɛ̃ ǹdə́ bɛ,
bə̀ rə̀ cìcì mú byili ri bi.
20 Rə̀ jàn dɛ́ rə̀ bə swɛ̃´ zhe mó ǹdə́ rə̀ gə́ wɔ́ nɛ́ mɔ́ yʼà shèè,
sə lũ w kùr-ju yi ní ga,
lyì bí wɔ̌ bə tó wẽ̀ dé tɛ̀bɛ́ rə̀ wɛ̀rhɛ́ mɔ́ dɛnnɛ bə nə tɛ̀bɛ́ rə̀ yʼà shèè mó ǹdə́ bə̀ surhə.
Rə̀myɛ́ ce,
lò ǹ gə zɛ̃̀ ǹ wò bə̀ ǹ bə rə̀myɛ́ nɛ,
wɔ́ ǹmyɛ́ yò.
21 Lyì bí yě Yi párá,
sə ǹdə́ rə̀myɛ́ ga,
bə̀ tʼâ cèrhé re,
bə̀ jʼà tʼâ ce rə̀ nə̀bán ǹdə bə̀ gə́ yʼà mə̂ sə bə wɛ̀rhɛ́ nɛ́ yé.
Bə̀ surhə né gə́ yə̀ pul,
kɔn dɛ́ dɛ̀bɛ́ bə̀ nʼê bùl bə̀ wẽ́ mó myɛ jʼà bə kùr zhe mó ce,
bə̀ ŋwɛ́nɛ́ cə-byṹ wẽ́.
22 Bə̀ zhe bə̀ bə̀myɛ́ lɔ́wá,
bə jʼà yə̀ lɛ́ yé.
23 Bə̀ tʼâ cèrhé Yi rí tɛ̀bɛ́ rə̀ də̀ cu kɔn gaga mɔ́ ǹdə bə̀ gə́ yʼà mə̂ sə bə cèrhé re né yé.
Bə̀ kʼâ nʼê wɛ̀rhɛ́ wẽ̀ rə̀ nyɛrhɛ numbyíní y è tʼâ mɛ̃ nɛ́ mɔ́,
bə̀ wɛ̀rhɛ́ wẽ̀ rə̀ nyɛrhɛ kúmsi myɛ,
rə̀ tɛ̀ nyɛrhɛ nə̀rh sə̀na wẽ̀,
rə̀ tɛ̀ nyɛrhɛ dɔma,
bə̀ nʼê cèrhé.
24 Wɔ́ rə̀myɛ́ è ce,
Yi yẽ̌ be bə jʼâ nʼê twĩ̀ tùntùm-bəywààlɛ́ ǹdə bə̀ gə́ nʼê yâl nɛ́,
bə̀ mʼê cɔ̀ bə̀ yala nɛ́ bə̀ cìcì nì ǹdə́ bə̀ cìzhìl tumə né.
25 Bə̀ kwè zhə̀n dɛ́ bə mʼe lyə́r kɔma,
bə̀ kʼâ nʼê wùlì tɛ̃´ bə̀ cèrhé wẽ̀ tɛ̀bɛ́ Yi wɛ̀rhɛ́ mɔ́,
bə yẽ̌ rə̀ Wârhna mɔ́ cìcì mú ni.
E jà wɔ́ ńmyɛ̌ ń mə̂ dwã ǹdə́ còrhó byinə nə̀ bə zhɔ̌ zhe yilə!
Amɛ̀n!
26 Wɔ́ rə̀myɛ́ è ce,
Yi yẽ̌ be bə̀ cìzhìl tùntwə̃̀ə̃̀ né shilə né wẽ́.
Bə̀ kana bɛ́ yẽ̌ bə̀ gə́ yʼà mə̂ sə bə pyẽ̀ né ǹdə́ bə̀ byə́nə́ bé mó ne,
bə̀ kʼâ nʼê zə dwã bə̀ pyẽ̀.
Numbyíní jʼà bə mə̂ sʼe wɛ̀rhɛ́ èta yé.
27 Bə̀ bala bɛ́ myɛ yẽ̌ kana bɛ́ nɛ,
kʼâ wɔ́ bə̀ dwã bala bɛ́ shil rə̀ zù bì,
bə̀ nʼê zə dwã bə̀ pyẽ̀.
Bə̀ nʼê twĩ̀ tùm-bəywààlɛ̀ ǹdə́ dwã,
e jà numbyíní bə mə̂ sʼe wɛ̀rhɛ́ èta yé.
Sə bə̀ cìcì tùm-bəywààlɛ́ ce bə̀ nʼê nɛ còrhò-tum.
28 Bə̀ gə́ yə̀ shɛ̀nɛ́ bə tó Yi ni mú ce,
Yi yẽ̌ be bə tó bə̀ surhə né námbəjə́ə́lé kùrə̀,
bə̀ nʼê wɛ̀rhɛ́ kɔn dɛ̀bɛ́ bə̀ bə mə̂ sə bə wɛ̀rhɛ́.
29 Bə̀ wun ní sú ǹdə́ tùntùm-bəjə́ə́le dwí gakó.
Bə̀ nʼê twĩ̀ lwɛlɛ;
bə̀ wɔ́ sə̀cír-nyəla;
bə̀ nʼê dùr bə̀ dwã bɛ́ bwɛ̃̌.
Bə̀ wun nyɛ̌ bárhɛ́;
bə̀ wɔ́ lyì-gurnə;
bə̀ wɔ́ búlə́ cìnə́;
bə̀ nʼê myìnì bə̀ dwã bɛ́;
bə̀ nʼê wɛ̀rhɛ́ yààyàà.
30 Bə̀ nʼê shèè bə̀ dwã bɛ́,
bə̀ mʼê zɔ̀m bə̀ sõ.
Bə̀ wɔ́ Yi zwə̀.
Bə̀ nʼê fulsi bə̀ dwã bɛ́;
bə̀ zhe cìn-còrhó;
bə̀ nʼê zhẽ̌ bə̀ cìn dɛ̃̌.
Bə̀ wɔ́ surhə námməlwâlsɛ cìnə́;
bə̀ tʼâ zwẽ bə̀ dabá ǹdə́ bə̀ nábá nyí ni yé.
31 Bə̀ wɔ́ bə-surhə-zhe cìnə́;
bə̀ tʼâ pyìrh bə̀ nyì-bwelé yé.
Bə̀ wɔ́ bə-wun-zhe cìnə́;
bə̀ wɔ́ wu-kùùlì cìnə́.
32 Ǹdə́ bə̀ yě bə̀ nyǐ Yi bʼa kə́ lyì bí byɛ̀bɛ́ bə̀ nʼê wɛ̀rhɛ́ èta mɔ́ bùrsì ǹdə́ cu ga,
bə̀myɛ́ cìcì mú nʼê wɛ̀rhɛ́ èta,
bə jʼà só lyì bí dwã bɛ́ byɛ̀bɛ́ bə̀myɛ nʼê wɛ̀rhɛ́ èta mɔ́.