Yi kɔ́ Babyəlɔnɛ bùrsì
17
Rə̀myɛ́ yó,
màlɛ́kabá bwàlpyɛ̀ y nə̀zhĩ̌sí shàlpyɛ̀ y ŋwɛ́nɛ́ bə̀ jɔ̃̀ w mɔ́ èdù zɛ̃̀ e yí à nyí ni,
e wɔ̀ nɛ̀:
“Bà,
à mʼa byili mú cɔ w nánfɔ̀lɔ̀ w ò wɔ́ ǹdə kə-nə̀fòló ta,
ò jě bǔrh nánzhəzhɔ̌ yó mó bùrsí gə́ la nɛ́ tó.
2 Lũ w pyâ bɛ́ twĩ̀ ywâl tumə ǹdə́ wa.
O pə ò sɛ̃´ mɔ́ lũ w lyì bí ni bə nyɔ̀ dɛ̃´dɛ̃´.
Sɛ̃´ mɔ́ mə̀myɛ́ wɔ́ ò ywâl tumə né.”
3 Eshirhə náàcɛ̀nɛ́ bə̀ e só à yó.
Màlɛ́ka y kwè nè e mʼe vò gɔ-elũ èpòlò wə̀.
A nə kɛ̃ mə̀dù ń jě bǔ-ku nánshɔ̃̀ yó.
Bǔ-ku w òmyɛ́ ywẽ́ né wɔ́ nyàlpyɛ̀,
ò nyimə né wɔ́ shíyə́,
sə yilə nyɛ̀bɛ́ nə̀ nʼê tùrh Yi yʼà kɛ̃ ò yala nɛ́ gakó ne.
4 Kɛ̃ mɔ́ yà ń co gɔ̀nɔ̀ nánshɔ̃̀ ò càn,
n ce sánə́má cìbyǔr ń jɛ̀rh nɛ̀,
n ce nə́kulə dɔ̀msɛ̀ náncə̀cânsɛ dwə́ nánzhəzhɔ̌.
Sə wẽ̀ námməywààlɛ̀ yʼà ŋwɛ́nɛ́ sánə́má nə̀zhĩ̌ ń jɔ̃̀ w mɔ́ wa.
Wẽ̀ dé rə̀myɛ́ mɔ́ yʼà wɔ́ ń ywâl mɔ́ tùntwə̃̀ə̃̀ né.
5 Bə̀ yʼà kɛ̃ yil rə̀dù rə̀ kùr nɔ zum bə dɛ̃ ń cíl ne bə wɔ̀:
“À wɔ́ Babyəlɔnɛ,
cɔ nánfɔ̀lɔ̀,
lũ w kə-nə̀fwə̀ə́lé ǹdə́ wẽ̀ dé tɛ̀bɛ́ numbyíní bə mə̂ sʼe wɛ̀rhɛ́ mɔ́ ná.”
6 A zɛ̃̀ à la kɛ̃ mɔ́ nyǔ,
a pwírí ń bə ń cìn cǐ yé,
bə̀ ń nyɔ̀ Yi lyì bí bə̀ gu mú jal mɔ́ dɛ̃´dɛ̃´.
Lyì bí bə̀myɛ́ mɔ́ wɔ́ Yezu zhə̀n-cínnə.
À gə nɔ mɔ,
à wu zɛ̃̀ dɛ̃´dɛ̃´.
7 Màlɛ́ka y zɛ̃̀ e bwə̀rh nè e wɔ̀:
“Byè yil ǹ wu zɛ̃̀ èta mɔ́?
Lwar bə̀ kɛ̃ mɔ́ ń jě bǔ-ku w ò ywẽ́ né nyàlpyɛ̀ y ò nyimə né shí y mú:
à mʼa byili mú ńmyɛ̌ ǹdə́ òmyɛ́ ga gə́ wɔ́ kɔn ná-dwí yilə.
8 Bǔ-ku w kɔ̀bɔ́ ǹ nɔ mɔ́ yʼà ŋwɛ́nɛ́ shãã ga,
sə ò kʼô tɛ̀nɛ́ yé.
Ò bʼa du gɔ́rɔ́ w nánlyilyìmú w wẽ́ ò yò zhìlì.
Cɛ yó lyì bí byɛ̀bɛ́ bə̀ yilə né yə̀ nyǔ sɛ́bɛ́ rɛ́ wẽ́ kɛ̃ lũ w kùr-ju yi ní ga mɔ́ gə nɔ bǔ-ku wə́,
bə̀ wun bʼa zɛ̃̀,
bʼò yʼà ŋwɛ́nɛ́,
sə ò kʼô tɛ̀nɛ́ yé,
o jʼà kʼâ bànà.
9 “Nyɔ̀nɔ̀ wɔ́ surhə ǹdə́ lárma cìnə́ bə̀ wɔ̌ bə̀ mʼa lwar ywẽ̀ né nyɛ̀bɛ́ kùrə̀.
Ywẽ́ né nyàlpyɛ̀ y wɔ́ pyààrɛ́ tàlpyɛ̀ y kɛ̃ mɔ́ jě rə̀ yó mó.
Nə jʼà wɔ́ pyâ bwàlpyɛ̀ myɛ.
10 Sə bə̀ ló pyâ bɛ́ bə̀myɛ́ mɔ́ bə̀nu tɛ̃´,
bə̀ kʼê tɛ̀nɛ́ yé.
Wɔ́ bwə̀ldù nyân mɔ́ ń cǐ èlâsɛ̃´,
sə bwàlpyɛ̀ nyân mɔ́ gwẽ̌ yə̀ twí yé.
Sə ń gə túwə́,
ń tá ń la dɔnɔ yé.
11 Wɔ́ bǔ-ku w ò yʼà ŋwɛ́nɛ́ shãã ga,
o zɛ̃̀ ò kʼô tɛ̀nɛ́ mɔ́,
ò wɔ́ pyâ lyɛlɛ nyân mɔ́.
O jʼà wɔ́ pyâ bɛ́ bwàlpyɛ̀ y myɛ mə̀dù,
sə ò la ò yò zhìlù jàà wà.
12 “Nyimə né shí y ǹ nɔ mɔ́,
wɔ́ pyâ bə̀ gwẽ̌ bə tənə̀rh cǐ yé,
sə bə̀ mʼa bʼe nə ŋwɔ̀nɔ́ bə tó bǔ-ku w ni bə cìní tənə̀rh lù òdù sásá.
13 Sə kɔn dɛ́ dɛ̀bɛ́ pyâ bɛ́ bə̀myɛ́ gakó nʼê bùl mó wɔ́ rə̀dù;
bə̀ nʼê yâl bə zə bə̀ jàn dɛ́ ǹdə́ bə̀ ŋwɔ̀nɔ́ w bə sɛ̃ bǔ-ku w ni.
14 Bə̀ mʼa zɛ̃̀ búlə́ ne ǹdə́ Pyì-bwɛ̀lɛ́ yá,
sə è bʼa ŋwɛ̀nɛ́ bɛ,
bə̀ wɔ́ èmyɛ́ è cǐ cǐnnə bé gakó,
e jʼà wɔ́ pyâ bɛ́ gakó pyɔ̌.
Sə è lyì bí byɛ̀bɛ́ è byẽ̀ e cír bə̀ zhǐ bə̀ nà èdù yó mó bʼa tó y bə jí bɛlɛ.”
15 Màlɛ́ka y kʼe wɔ̀ nɛ̀:
“Bwǐsí shɛ̀bɛ́ ǹ nɔ kə-nə̀fòló w jě sə̀ yó mó wɔ́ dwə́ kùrə̀ gakó lyì,
bə̀ wɔ́ nunə nánjə̀jóló,
bə̀ shí lũ w tənèsé gakó wə,
bə̀ zɔ̀mà nɛ́ wɔ́ dúdúmə́ dúdúmə́.
16 Nyimə né shí y ǹ nɔ mɔ́ ǹdə́ bǔ-ku w cìcì mú bʼa jí zùùrì ǹdə́ kə-nə̀fòló wə́,
bə zwẽ ò wẽ̀ dé gakó,
bə lwə̂r ò gàndɛ́ bə yẽ̌ w nánlwè.
Bə̀ mʼa dɔ̃̀ ò gaga mɔ́,
bə ji ò wẽ́ dé tɛ̀bɛ́ rə̀ dàl mɔ́ myǐn rə jí dɔ́dɔ́.
17 Wɔ́ Yi cìcì rə̀ co rə̀ pùbùlə̀ né pyǐrh mó nyimə né wẽ́,
mùnì ga nə wɛ̀rhɛ́ nyí rə̀dù nə zə nə̀ ŋwɔ̀nɔ́ w nə sɛ̃ bǔ-ku w ni,
kɔn mʼe yí Yi zɔ̀mà nɛ́ pyǐrh mó dɛ̃ rɛ́.
18 Sə kɛ̃ mɔ́ ǹ nɔ mɔ́ wɔ́ cɔ w nánfɔ̀lɔ̀ w ò cǐ cɛ yó pyâ bɛ́ mɔ́.”