16
A nyɛ̀ɛ̀ cəl rə̀ zhì Yi jù w rə bya rə ce màlɛ́kabá bwàlpyɛ̀ y nɛ rə wɔ̀:
“Zhəlnə á ló Yi lyim dí nə̀zhĩ̌sí shàlpyɛ̀ y wẽ́ mó tɛ̃´ cɛ y yó.”
2 Màlɛ́ka y nã́yə́ə́ y vò e ló è nə̀zhĩ̌ y nyân dɛ́ cɛ y yó.
Nyəla námməlwâlsɛ jʼa fwər lyì bí byɛ̀bɛ́ bǔ-ku w myɔrhɔ w ŋwɛ́nɛ́ bə̀ yala nɛ,
bə jʼà nʼê cèrhé ò nyɔrhɔ w bə̀ mɔ mɔ́,
sə nə̀ yʼà nʼê yì dɛ̃´dɛ̃´.
3 Màlɛ́kabá bə̀lyè nyâ y vò e ló è nə̀zhĩ̌ y nyân dɛ́ nə̀-fɔ̀lɔ̀ w wẽ́.
Nɛ̃̌ mɔ́ gakó jʼa jǐrh jal ǹdə cùù jal ta.
Wẽ̀ dé tɛ̀bɛ́ rə̀ yʼà ŋwɛ́nɛ́ mə̀ wẽ́ mó gakó jʼa cì.
4 Màlɛ́kabá bə̀tɔ̀ nyâ y vò e ló è nə̀zhĩ̌ y nyân dɛ́ bwǐsí ǹdə́ sə̀ nə̀-bùlsí wẽ́.
Sə̀myɛ nàná bɛ́ jǐrh jal.
5 A zɛ̃̀ a nyɛ̀ɛ̀ màlɛ́ka y kɛ̀bɛ́ è cǐ nɛ̃̌ mɔ́ mɔ́ cəl è wòwə̀:
“Ǹmyɛ́ mɔ̀bɔ́ ǹ yà ǹ ŋwɛ́nɛ́,
ń jà ǹ gwẽ̌ ŋwɛ́nɛ́ mɔ́,
ǹ gə́ bùr ǹ bùrsí sə̀ yé mó nʼê byili bə̀ ǹ wɔ́ cɛ̀nɛ̀ cə́bal,
ǹ wɔ́ cángá cí.
6 Lyì gu ǹ lyì bí ǹdə́ ǹ nyì-zwennə bé,
sə ǹ pɔ rə̀-ná-cìnə́ bé jal bə nyɔ̀.
Wɔ́ rə̀myɛ́ rə̀ wɔ́ bə̀ kwândɛ.”
7 A zɛ̃̀ a nyɛ̀ɛ̀ cəl rə̀ zhì vwĩ̀-jìlú w yó rə wɔ̀:
“Zhə̀nà,
Cinu Yi,
jàn-bə-swɛ̃´-zhe cə́bal,
ǹ nə́ ǹ bùr ǹ bùrsí cángá ǹdə́ zhə̀nà.”
8 Màlɛ́kabá bə̀na nyâ y ló è nə̀zhĩ̌ y nyân dɛ́ nə̀nyɔ́nɔ́ w yó.
O zɛ̃̀ o nə sɔ́má ò la zə ò myǐn mú o mɔ̌r lyì bí.
9 Sə ò mɔ̌r lyì bí dɛ̃´dɛ̃´ ǹdə́ ò lumi rí,
bə zɛ̃̀ bə̀ nʼê tùrh Yi rí tɛ̀bɛ́ rə̀ zhe ŋwɔ̀nɔ́ zwini rí yó w mó,
bə jʼà bə shɛ̀ bə̀ wun pyìrhú bə yẽ̌ bə̀ lwɛlɛ rɛ́ nɛ sə bə cèrhé Yi yé.
10 Màlɛ́kabá bə̀nu nyâ y vò e ló è nə̀zhĩ̌ y nyân dɛ́ bǔ-ku w pyɛ̀lɛ̀ də̀gwã́ y yó.
Rə̀myɛ́ yó,
cɛ y jʼa yìì bǔ-ku w gə́ cǐ mə̀gã̌ nyí rí gakó.
Lyì bí zɛ̃̀ bə̀ nʼê nwɛ̀nɛ̀,
bə̀ mʼê dɔ̀m bə̀ mə̀jə̀ə̀lè.
11 Bə zɛ̃̀ bə̀ nʼê tùrh Yi rí rə̀ ŋwɛ́nɛ́ dɛ̃̌ mɔ́ bə̀ nɔ̀nɔ̀ w ǹdə́ bə̀ nyəla nɛ́ nə̀ fwər be mó yilə.
Sə ǹdə́ rə̀myɛ́ ga,
bə cə̀ə̀lè bə̀ gwẽ̌ nʼê wɛ̀rhɛ́ lwɛlɛ.
12 Màlɛ́kabá bwə̀ldù nyâ y vò e ló è nə̀zhĩ̌ y nyân dɛ́ bwǐ y nánfwɛ̀lɛ̀ y bə̀ nʼê byẽ̀ bə̀ Efəratɛ mɔ́ wẽ́.
È nɛ̃̌ mɔ́ ŋwĩ.
Èta,
pyâ bɛ́ bə̀ nʼê shí yi-pwírhí səta mɔ́ ŋwɛ̀nɛ́ bə lyɛ̃.
13 A zɛ̃̀ a nə nə̀cílsi námməlwâlsɛ sə̀tɔ̀.
Èdù shí dɔm mɔ́ nánjə́gɔ́rɔ́ w nyǔ w e du.
È dõ mó shí bǔ-ku w nyǔ w e du.
È kɛ̀bɛ́ zɛ̃̀ e shí mɔ̀bɔ́ ń nə́ ń gòm kɔma bə̀ ń wɔ́ Yi nyì-zwennə mó nyǔ w e du.
Nə̀cílsí sə̀myɛ́ nyɛ̌ ǹdə nyànswəəle ta.
14 Nə̀cílsí sə̀myɛ́ wɔ́ Shətana è twĩ̀ sì.
Sə̀ nʼê wɛ̀rhɛ́ wò-jààrɛ̀,
sə vò sə nə lũ w pyâ bɛ́ gakó,
mùnì ga bə wɛ̀rhɛ́ nyí rə̀dù bə mʼe bú ǹdə́ Yi jàn-bə-swɛ̃´-zhe cə́bal mɔ́ búlə́ né nánfɔ̀lɔ̀ w dɛ̃ rɛ́ yùwə̀.
15 Cinu zɛ̃̀ n wɔ̀:
“Nyǐnə à mʼa bə̀ ǹdə ŋwɔ̀l-bal ta.
Sə lò mɔ̀bɔ́ ǹ zɔ ǹ yírhə́ ǹ yə̀ dɛ̀ɛ̀,
ń zù ǹ gàndɛ́ ǹ mə́ ǹ zhǐ,
ǹ mʼâ yə̀ wu-nyɔ̃̀ cí.
Ǹ tá ǹ la zhəl nánlwè yé,
e jà lyì bí gə nɔ mɔ́ myɛ,
cìzhìl tʼâ la mɔ́ zal yé.”
16 Nə̀cílsí námməlwâlsɛ́ ce pyâ bɛ́ gakó jòm jàà èdù wẽ́.
Bə̀ nʼê byẽ̀ jàà èmyɛ́ ǹdə́ ebərə́ bə̀ Arəməgədɔnɛ.
17 Màlɛ́kabá bwàlpyɛ̀ nyâ y vò e ló è nə̀zhĩ̌ y nyân dɛ́ dɛ̃̌ yi wə.
Cəl nánfɔ̀lɔ̀ shí Yi jì y Yi gə́ jě mə̀gã̌ mɔ́,
rə wɔ̀:
“Èlâsɛ̃´,
kɔn gakó wɛ̀rhɛ́ rə zhɛ̀.”
18 Rə̀myɛ́ yi ní,
dweme ce,
ǹdə wɔ́ dwà è bya,
e lyə́lyɔ̌,
e ce sɔ̀ ta,
cɛ y zhízhǐ dɛ̃´dɛ̃´.
Numbyínə́ bé gə́ ŋwɛ́nɛ́ cɛ y yó yi ní ga,
bə̀ gwẽ̌ yə̀ cɛ y zhízhǔ mú mə̀myɛ́ dwí rí nɛ yé.
19 Cɔ w nánfɔ̀lɔ̀ w bɔ̀n dwã w kùkùlə̀ nə̀tɔ̀.
Tənèsé dwã bɛ́ cɛmɛ nɛ́ gakó jʼa wǔr nə ló tɛ̃´.
Sə Yi yə̀ cɔ w nánfɔ̀lɔ̀ w bə̀ nʼê byẽ̀ bə̀ Babyəlɔnɛ mó yò swě yé.
Rə zɛ̃̀ rə kwè rə̀ lyim dí sɛ̃´ kâ-zɔ̌m mɔ́ rə pə cɔ w òmyɛ́ lyì bí ni bə nyɔ̀.
20 Cɛmɛ nɛ́ nə̀ ŋwɛ́nɛ́ nə̀-fɔ̀lɔ̀ cəcəl w mó gakó jʼa jé.
Bə̀ kʼê yə̀ pyɔ̀ òdù ga nɛ yé.
21 Bədũ̀kwələ nánfwààlɛ̀ shí dɛ̃̌ rə ló lyì bí yó,
bə zɛ̃̀ bə̀ nʼê tùrh Yi,
bədũ̀kwələ né gə́ nʼê nwɛ̀nɛ̀ bɛ mɔ́ yilə,
bə̀ zwini rí rə̀myɛ́ yʼà já dɛ̃´dɛ̃´.