Màlɛ́kabá bwàlpyɛ̀ y zwini kùrə̀ nyàlpyɛ̀ ŋwɛ́nɛ́ bə̀ jɔ̃̀ w mɔ́
15
À kʼa nə myɔrhɔ dõ nánfɔ̀lɔ̀ dɛ̃̌ yi wə,
ò nʼô zɛ̃̀ wu ni:
màlɛ́kabá bwàlpyɛ̀,
zwini kùrə̀ nyàlpyɛ̀ ŋwɛ́nɛ́ bə̀ jɔ̃̀ wà.
Wɔ́ zwini rí kùrə̀ né nyàlpyɛ̀ y nə̀myɛ́ nə̀ bʼa yə̀ Yi lyim dí yó-gurə́.
2 A nə nə̀-fɔ̀lɔ̀ ò nʼô jə́jɛ̀mɛ́ ǹdə zhə̀zhé ta,
ò gùlí ǹdə́ myǐn.
A nə byɛ̀bɛ́ bə̀ jú bɛlɛ bǔ-ku w ǹdə́ ò myɔrhɔ w bə̀ mɔ mɔ́,
ǹdə́ ò yil lé gál-byâ bɛ́ yó mó.
Yi dàkɔ̌ndɛ́ ŋwɛ́nɛ́ bə̀ jɔ̃̀ w bə̀ mʼê zhǐ nə̀-fɔ̀lɔ̀ w yó.
3 Bə̀ nʼê nún Yi tùntùnnə̀ Muyiisi nwə̃́ y ǹdə́ Pyì-bwɛ̀lɛ́ y nwə̃́ y bə̀ zhe:
“Cinu Yi jàn-bə-swɛ̃´-zhe cə́bal,
Ǹ tumə né wɔ́ tùm-fwààlɛ̀,
nə̀ jʼà wɔ́ cɛ̀nɛ̀ dúdú.
Tənə̀rh pyɔ̌,
ǹ tumə né sɔ́msɛ́ wɔ́ cángá,
sə jʼà wɔ́ zhə̀nà.
4 Mɔ̌ ń mà n wɔ̀ bə̀ ń tá ń la ǹmyɛ́ nyám ǹdə́ ń wu gakó?
Mɔ̌ lò ń mà n wɔ̀ bə̀ ń tá ń la ǹmyɛ́ còrhó?
Zhə̀nà,
ǹmyɛ́ dúdú ǹ wɔ́ cɛ̀nɛ̀ cə́bal.
Cɛmɛ nɛ́ gakó lyì bí mʼa bə̀ bə wùlì tɛ̃´ ǹ yé né bə cèrhé mó,
bə̀ bə̀ gakó yírhə́ nɔ ǹ cángá tumə né.”
5 Rə̀myɛ́ kwã nɛ́,
à nɔ Yi jì y è ŋwɛ́nɛ́ dɛ̃̌ yi w mú è pul.
Yi jì y èmyɛ́ mɔ́ wɔ́ kòrhó w ò nʼô myɛrhɛ dɔbrɛ́ Yi zɔ ǹdə́ rə̀ lyì bí mú.
6 Màlɛ́kabá bwàlpyɛ̀ y zwini kùrə̀ nyàlpyɛ̀ y ŋwɛ́nɛ́ bə̀ jɔ̃̀ w mɔ́ shí Yi jì y wẽ́ bə du.
Bə̀ zù kàmə̀-zù-pwə̀rh sə̀ bə jìmdì zhe,
sə̀ nʼê jə́jɛ̀mɛ́,
bə lyẽ sánə́má cã̌-tàndɛ̀ bə̀ cə̂rh né.
7 Wò-nyùùrí rə̀na y òdù kwè sánə́má nə̀zhǐrh shàlpyɛ̀ o pə màlɛ́kabá bwàlpyɛ̀ y nɛ.
Yi rí rə̀ ŋwɛ́nɛ́ twéé twéé mó lyim dí yʼà sú nə̀zhĩ̌sí.
8 Yi zùwə́ y ǹdə́ rə̀ jàn dɛ́ ce nyɛ̀ɛ̀sɛ̀ jʼa sú Yi jì yə́,
sə lò kə́ ń yə̀ ŋwɛ̀nɛ́ n zù Yi jù w kɔn mʼe yí zwini rí kùrə̀ né nyàlpyɛ̀ y màlɛ́kabá yʼà mʼe bə̀ mɔ́ yó-gurə́.