Pyɛɛrɛ
sɛ́bɛ́ rɛ́ nã́yéé ré ń kɛ̃ mɔ́
Pyɛɛrɛ nə́ ń ce lyì bí byɛ̀bɛ́ Yi cír mó
1
Àmyɛ́ Yezu Kristə tùntúm Pyɛɛrɛ,
à nʼâ kɛ̃ sɛ́bɛ́ rɛ́ tɛ̀bɛ́ à la ámyɛ̌ byɛ̀bɛ́ Yi cír mó ne pɔ.
Á làà dɛ̃̌ á vò á wɔ́ zhələ Pɔ̃ ǹdə́ Galəshi ǹdə́ Kapadɔɔsɛ ǹdə́ Azhi,
e súlí Byitini tənèsé wẽ́.
2 Nə́ Da Yi cír ába ǹdə rə̀ gə́ yʼà dámâ rə kə́ rə cĩ́ ní.
Rə ce á jǐrh rə̀ sə̀pwà lyì rə̀ Eshirhə y jàn yilə,
mùnì á zwẽ Yezu Kristə nyí ni,
sə ń jal mɔ́ vùr á yə̀-bəlwàálɛ́ á jǐrh wárhgáá.
Yi bʼa cĩ́ bwəl á yó,
sə rə̀ yə̀-zùlə́ né jʼâ nʼê súlí á yó w twéé twéé!
Nə́ rʼé dɛ̃̀ nə̀cɛ̀ndɛ́ tɛ̀bɛ́ Yi tɛnɛ rə cĩ́ nə́ba rə̀ tʼâ cɔ̀ mɔ́
3 Bànà nə́ cèrhé nə́ Cinu Yezu Kristə Da Yi rí!
Rə̀ nɔ̀nɔ̀-dǔr mó já.
Rə̀myɛ́ ce,
rə̀ tó Yezu Kristə bùrhù mú dɛnnɛ rə ce bə kwɛrhɛ bə lù nə́ba.
Èta,
rə̀ ce nə́ rʼé dɛ̃̀ kɔn dɛ́ tɛ̀bɛ́ rə̀ la nə́ba pɔ rə̀ tʼâ cɔ̀ mɔ́.
4 Sə nə́ wun nyɛ̀ nə̀cɛ̀ndɛ́ tɛ̀bɛ́ Yi tɛnɛ rə cĩ́ nə́myɛ̌ byɛ̀bɛ́ nə́ wɔ́ rə̀ lyì ni mú yilə.
Nə̀cɛ̀ndɛ́ rə̀myɛ́ wàr rə̀ la cɔ̌,
rə̀ wàr rə̀ la jìmdì zal,
rə̀ wàr rə̀ la zhɔ̌ myɛ yé.
Yi tɛnɛ rɛ rə cĩ́ ába Arəzana wa.
5 Sə á gə́ zhí Yi ni mú ce,
rə̀ nʼê yìlì ába ǹdə́ rə̀ jàn dɛ́,
kɔn la mʼe yí á nə rə̀ vwârh mɔ́.
Sə lũ zhɔ̌ dɛ̃ rɛ́ yùwə̀,
rə̀ bʼa ce lò gakó nə rə̀ vwârh mɔ́ ǹdə́ ń yírhə́.
6 Wɔ́ rə̀myɛ́ è ce á wun nyɛ̀ dɛ̃´dɛ̃´,
ǹdʼá yě bə̀ wẽ̀ nánzhəzhɔ̌ bʼa ce á nə wu-zhìlù námpɔ́lɛ́ ga.
7 Wẽ̀ dé rə̀myɛ́ wɔ́ zhẽ́ rə̀ nʼê zhẽ̀ ába,
mùnì bə lwar ǹdʼá gə zhí Yi ni kẽkẽ.
Sánə́má wɔ̌ mə̀ cɔ̀,
sə ǹdə́ rə̀myɛ́ ga,
bə̀ yʼa ce mo myǐn w bə nyǐ ǹdə́ mə̀ gə càn.
Sə ámyɛ̌ Yi-ni-zhú mú zhe kùr dɛ̃´dɛ̃´ du sánə́má.
Wẽ̀ dé gə nʼê zhẽ̀ ába,
bə̀ mʼa tó rə̀myɛ́ dɛnnɛ bə lwar ǹdʼá Yi-ni-zhú mú gə wɔ́ kẽkẽ.
Èta,
Yezu Kristə gə túwə́,
á bʼâ tó á nə Yi còrhó w ǹdə́ rə̀ zùwə́ yə́.
8 Á yə̀ mɔ nɛ yé,
á jʼâ só mo;
á zhí mu,
á yírhə́ jʼà bə mɔ nɛ èlâsɛ̃´ yé,
á nʼá fùù ǹdə́ wu-nyɔ̃̀ nánfɔ̀lɔ̀ kɔ̀bɔ́ lò wàr ń la byilu ǹdə́ ń nyí,
9 bə̀ ń nə́ ń vwârh ába.
Wɔ́ rə̀myɛ́ rə̀ wɔ́ á Yi-ni-zhú mú kùr ré.
10 Yi nyì-zwennə bé yʼà jɛ̀rɛ̀ bə zɔ̀m vwârh mɔ́ mə̀ wɔ́ pɛnɛ́ y Yi tɛnɛ á yil mó yò.
Sə bə̀ yʼà nʼê pyà ǹdə́ bə̀ wun gakó sə bə lwar rə̀ gə́ la lyì bí ní vwârh.
11 Kristə Eshirhə y yʼà ŋwɛ́nɛ́ ǹdə́ bɛ,
e dámâ e byili bi nɔ̀nɔ̀ w kɔ̀bɔ́ Kristə mó la nɔ̀nɔ̀ mɔ́,
ǹdə́ zùwə́ y kɛ̀bɛ́ ń la tà-kwã n nə nɔ̀nɔ̀ w kwã nɛ́ mɔ́ yò.
Sə bə̀ yʼà nʼê pyà sə bə lwar yi rí tɛ̀bɛ́ ywẽ̀ né nə̀myɛ́ la wɔ̀rhɔ́ mɔ́,
ǹdə́ nə̀ gə́ la nɛ́ tó mó.
12 Sə Yi ce rə̀ nyì-zwennə bé lwar bə̀ ywẽ̀ né nyɛ̀bɛ́ bə̀ byili èta mɔ́ də̀ bə̀myɛ́ cìcì yil yé;
wɔ́ ámyɛ̌ yilə.
Sə èlâsɛ̃´,
byɛ̀bɛ́ bə̀ bwə̀l yò-ècɔ̀nɔ̀ nyí rí bə byili ába mó,
tó rə̀ dɛnnɛ bə byili ába ywẽ̀ né nə̀myɛ́ ǹdə́ Eshirhə náàcɛ̀nɛ́ y è shí dɛ̃̌ Arəzana w mɔ́ jàn.
Màlɛ́kabá cìcì mú nʼê yâl ǹdə́ bə̀ wun gakó sə bə lwar nə̀ kùrə̀.
Nə́ mə̂ sə nə́ ce nə́ tùntwə̃̀ə̃̀ né gakó yə̀ náàcɛ̀nà
13 Rə̀myɛ́ ce,
zəna á surhə né nə zhì kẽkẽ,
sʼá zə á cìn á mʼá dɛ̃̀ pɛnɛ́ y nánfwɛ̀lɛ̀ y kɛ̀bɛ́ Yi la ába pɔ Yezu Kristə twírí y yù w mú.
14 Zwẽnə Yi nyí ni,
sʼá bə̀kʼá tó shilə námməlwâlsɛ́ sə̀ yʼà ŋwɛ́nɛ́ á wun ní wẽ́ shãã ga,
ǹdʼá gwẽ̌ yə̀l Kristə pár mɔ́ nɛ yé.
15 Yálna náàcɛ̀nà á tùntwə̃̀ə̃̀ né gakó wẽ́ ǹdə mɔ̀bɔ́ ń byẽ̀ ába mó gə́ wɔ́ náàcɛ̀nɛ́ nɛ́.
16 Bə̀ kɛ̃ Yi zɔ̀mɛ̀ rɛ́ sɛ́bɛ́ rɛ́ wẽ́ bə̀ Yi wòwə̀:
“Yálna náàcɛ̀nà,
bʼàmyɛ́ wɔ́ náàcɛ̀nɛ́.”
17 Yi tʼâ zə rə̀ yírhə́ rə̀ cír lyì bí yé.
Rə̀ nʼê kɛ́ lò gakó bùrsì kɔn myɛrhɛ dwã ǹdə́ ǹ tùntwə̃̀ə̃̀ né.
Wɔ́ Yi rí rə̀myɛ́ á nʼá byẽ̀ bʼâ Da á Yi-co wẽ́ mó.
Rə̀myɛ́ ce,
á mə̂ sʼá tó á tùntwə̃̀ə̃̀ né dɛnnɛ á byili,
ǹdʼá gwẽ̌ ŋwɛ́nɛ́ cɛ yó,
bʼâ nʼá nyàm dɛ̀.
18 Lwarna bʼè də̀ sánə́má,
ǹdə́ wársɛ,
ǹdə́ wẽ̀ tɛ̀bɛ́ gakó rə̀ nʼê cɔ̀ mɔ́,
Yi bʼe zwẽ ába tùntwə̃̀ə̃̀ né nyɛ̀bɛ́ á dabá cèrhè ába nə̀ bə kùr zhe mó wẽ́ yé.
19 Wɔ́ kɔn dɛ̀bɛ́ rə̀ zhe kùr dɛ̃´dɛ̃´ du mú Yi zɔ rə mʼe vwârh ába.
Sə kɔn dɛ́ rə̀myɛ́ mɔ́ wɔ́ Kristə jal mɔ́ mə̀ ló tɛ̃´ mɔ́.
Ń wɔ́ ǹdə pyì-bwɛ̀lɛ́ kɛ̀bɛ́ è bə yò zhe,
e jʼà bə jìmdì zhe ta.
20 Yi cír mo ǹdə́ rə̀ gwẽ̌ yə̀ lũ w wɛ̀rhɛ́ yé.
Wɔ́ ámyɛ̌ yil Yi twĩ̀ mù n bə̀ dwã nɛ́ nánkwaá nɛ́ wẽ́ èlâsɛ̃´,
rə ce á lwar ń párá.
21 Wɔ́ ńmyɛ̌ jàn yil á zù Yi rí rə̀ bwìrhì mù,
rə pɔ̃ zùwə́ mó;
á zhí ri,
á mʼá dɛ̃̀ rə̀ nyì-bwelé y pyǐrh mó.
22 Á gə́ zwẽ zhə̀n dɛ́ mɔ́ ce,
á yò kwɛrhɛ á jǐrh wárhgáá,
á mʼá ŋwɛ̀nɛ́ á swéné á da-byâ bɛ́ zhə̀n zhə̀nà.
Rə̀myɛ́ yilə,
swénénə dwã ǹdʼá wun gakó.
23 Yi zɔ̀mɛ̀ rɛ́ ce bə kʼa kwɛrhɛ bə lù ába,
sə Yi zɔ̀mɛ̀ rɛ́ də̀ ǹdə jíjí byǐ ta rə̀ yʼa lyĩ rə kʼa cì yé.
Rə̀ wɔ́ nã́nyì,
rə̀ tʼâ cì yé.
Rə̀ jʼâ ŋwɛ́nɛ́ gaga byinə nə̀ bə zhɔ̌ zhe yilə.
24 Bə̀ kɛ̃ Yi zɔ̀mɛ̀ rɛ́ sɛ́bɛ́ rɛ́ wẽ́ bə wɔ̀:
“Numbyíní wɔ́ ǹdə gɔ ta.
È zùwə́ y myɛ wɔ́ ǹdə gɔ pùnə́ ta.
Gɔ w nʼô kùlə̀,
ò pùnə́ né nʼê shìl tɛ̃´,
25 sə Cinu zɔ̀mɛ̀ rɛ́ jʼâ ŋwɛ́nɛ́ byinə nə̀ bə zhɔ̌ zhe yilə.”
Zɔ̀mɛ̀ rɛ́ rə̀myɛ́ mɔ́ wɔ́ yò-ècɔ̀nɔ̀ nyí rí bə̀ bwə̀l bə byili ába mó.