Wɔ́ Yi rə̀ ce Pwəə nə́ ń bwə̀l yò-ècɔ̀nɔ̀ nyí rí ń byili byɛ̀bɛ́ bə̀ də̀ Zhwifubá mó ne
3
Wɔ́ rə̀myɛ́ è ce àmyɛ́ Pwəə nʼâ lwə̀l Yi á yilə.
Bə̀ co ne byə̀nə́-jù wə̀,
à gə́ nʼâ twĩ̀ Yezu Kristə tum dí à pɛ ámyɛ̌ byɛ̀bɛ́ á də̀ Zhwifubá ne mó yilə.
2 Zhə̀nà,
à yě pamparɛ̃ɛ̃ bʼâ nyɛ̀ɛ̀ tum dí tɛ̀bɛ́ Yi tó rə̀ sónó w dɛnnɛ rə pɛ̃ bʼà twĩ̌ á yil mó.
3 Yi byili ni kɔn dɛ́ dɛ̀bɛ́ rə̀ yʼà nʼê yâl rə wɛ̀rhɛ́ mɔ́.
Rə̀ jʼa yə̀ ce lò lò lwar rə̀myɛ́ shãã ga yé.
À zɔ̀m kɔn dɛ́ rə̀myɛ́ mɔ́ yò ǹdʼába námpɔ́lɛ́.
4 Á gə kàrmə̀ à sɛ́bɛ́ rɛ́,
á bʼâ pwírí à lwar kɔn dɛ́ dɛ̀bɛ́ Yi byili ni rə̀ yʼà shèè Kristə shò-kwã nɛ́ mɔ́ kùrə̀.
5 Shãã ga,
Yi yə̀ ce lyì bí lwar kɔn dɛ́ rə̀myɛ́ kùr yé.
Sə èlâsɛ̃´,
rə̀ byili ri rə̀ tùntúmə́ bé ǹdə́ rə̀ nyì-zwennə bé rə̀ cír mó ne ǹdə́ Eshirhə náàcɛ̀nɛ́ jàn.
6 Kɔn dɛ́ rə̀myɛ́ mɔ́ wɔ́:
byɛ̀bɛ́ bə̀ də̀ Zhwifubá mó gə́ tó yò-ècɔ̀nɔ̀ nyí rí dɛnnɛ bə zù Yezu Kristə mó ce,
bə̀myɛ bʼa nə cəl kɔn dɛ́ dɛ̀bɛ́ Yi yʼà bwəl rə̀ nyí rə̀ la rə̀ lyì bí ni pɔ mɔ́ wẽ́.
Bə̀myɛ́ ǹdə́ Zhwifubá ga jǐrh kɔn rə̀dù.
Bə̀myɛ twə́r ŋwɛ́nɛ́ kɔn dɛ́ dɛ̀bɛ́ Yi bwəl rə̀ nyí rə̀ la pɔ mɔ́ wẽ́.
7 Wɔ́ Yi rə̀ ce à nʼâ bwə̀l yò-ècɔ̀nɔ̀ nyí rí.
Wɔ́ rə̀myɛ́ rə̀ tó rə̀ sónó w ǹdə́ rə̀ jàn dɛ́ nánfɔ̀lɔ̀ w dɛnnɛ rə pɛ̃ tum dí rə̀myɛ́.
8 Àmyɛ́ à wɔ́ Kristə-lyì bí gakó námpɔ́lɛ́.
Sə ǹdə́ rə̀myɛ́ ga,
Yi pɔ nɛ sɔ́má à nʼâ bwə̀l Kristə yò-ècɔ̀nɔ̀ nyí rí à byili byɛ̀bɛ́ bə̀ də̀ Zhwifubá mó ne.
Kɔn dɛ́ dɛ̀bɛ́ yò-ècɔ̀nɔ̀ nyí rí nʼê pɛ mɔ́ wɔ́ nə̀cɛ̀ndɛ̀ nánfɔ̀lɔ̀;
rə̀ kùr nyɔ̀ɔ̀ zum ǹdə́ lyì bí.
9 Yi ce à nʼâ byili lyì bí gakó ne kɔn dɛ́ dɛ̀bɛ́ rə̀ yʼà shèè shãã ga mɔ́ gə́ la nɛ́ wɔ̀rhɔ́.
Wɔ́ Yi rí tɛ̀bɛ́ rə̀ wɛ̀rhɛ́ kɔn gakó mó rə̀ yʼà shèè kɔn dɛ́ rə̀myɛ́ kɔn mʼe yí zà.
Lyì bí yə̀ rə̀ kùr lwar yé.
10 Yi wɛ̀rhɛ́ èta mùnì ga,
èlâsɛ̃´,
jàn cìnə́ byɛ̀bɛ́ bə̀ ŋwɛ́nɛ́ dɛ̃̌ bə̀ zhe ŋwɔ̀nɔ́ mɔ́ dwí gakó tó Kristə-lyì gùlú w dɛnnɛ bə lwar bə̀ Yi surhə né já dɛ̃´dɛ̃´.
11 Rə̀ tó nə́ Cinu Yezu Kristə dɛnnɛ rə wɛ̀rhɛ́ rə̀myɛ́ ǹdə rə̀ gə́ nʼê yâl bə̀ kɔn tó né ǹdə́ lũ w yʼà gwẽ̌ yə̀ kùr ji yé.
12 Nə́ gə́ mù dwã nɛ ǹdə́ Kristə,
nə́ zhí mu mú ce,
nə́ wɔ̌ nə́ bwəlse Yi ni ǹdə́ nə́ wun gakó,
ywẽ kʼê bə nə́ba zhe yé.
13 Wɔ́ rə̀myɛ́ è ce,
à nʼâ lwə̀l ába,
á bə̀kʼá tə̀ nɔ̀nɔ̀ w kɔ̀bɔ́ à nʼâ nwɛ̀nɛ̀ á yil mó yil á gə á wun yé.
Nɔ̀nɔ̀ w òmyɛ́ bʼa ce á nə cəl Yi zùwə́ y wẽ́.
Pwəə nə́ ń lwə̀l Yi bə̀ rə̀ ce Kristə-lyì bi lwar Kristə sónó w gə́ wɔ́ nɛ́
14 Wɔ́ rə̀myɛ́ è ce,
à nʼâ wùlì nə́ Da Yi yé né.
15 Ń ce dwí tɛ̀bɛ́ gakó rə̀ ŋwɛ́nɛ́ dɛ̃̌ ǹdə́ cɛ yó zhe rə̀ yilə.
16 Yi zhe zùwə́ dɛ̃´dɛ̃´,
rə̀ zhe kɔn gakó.
Wɔ́ rə̀myɛ́ yil à nʼâ lwə̀l lè bə̀ rə̀ pə ába wu-jɔ̀,
mùnì á tó rə̀ Eshirhə y dɛnnɛ á zə jàn nánfɔ̀lɔ̀,
17 sə Kristə yə̀ á wun ní wẽ́,
á gə́ zhí mu mú yilə.
Zhǐnə kẽkẽ,
á swéné dwã,
á nə̀rh pə tɛ̃´,
á bə̀kʼá zhízhǐ yé.
18 Èta,
á bʼâ ŋwɛ̀nɛ́ á tó Yi lyì bí dwã bɛ́ gakó ne á lwar Kristə sónó w ò já dɛ̃´dɛ̃´,
ò də̀ zhɔ̌ kɔn mɔ́ gə́ wɔ́ nɛ́.
19 Á bʼâ lwar ń sónó w ò kùr lwar zum mú gə́ wɔ́ kɔn ná-dwí yilə;
e jʼà wɔ́ kɔn dɛ̀bɛ́ numbyíní wàr è kùr è nʼê swí yé.
Èta,
Yi cìcì bʼa yə̀ á wẽ́ námpúm.