Yi ce nə́ tó Kristə né nə́ bwìrhì
2
Shãã ga á dwə́ə́ré ǹdʼá yə̀-bəlwàálɛ́ yʼà ce á cì.
2 Á yʼâ nʼá nyǐ lũ w kɔ̀bɔ́ lyì bí tùntwə̃̀ə̃̀ né nə̀ wɔ́ lwɛlɛ nyə̀ná mɔ́,
á zɛ̃̀ á tó á nʼá wɛ̀rhɛ́ ǹdə bə̀ ta.
Á yʼâ nʼá wɛ̀rhɛ́ jàn cìnə́ námməlwâlsɛ́ sə̀ ŋwɛ́nɛ́ dɛ̃̌ mɔ́ yó-cə́bal mɔ́ pùbùlə̀.
Wɔ́ ńmyɛ̌ ń ŋwɛ́nɛ́ lyì bí byɛ̀bɛ́ bə̀ tʼâ wɛ̀rhɛ́ Yi pùbùlə̀ mó wẽ́ èlâsɛ̃´ ń nə́ ń twĩ̀.
3 Shãã ga nə́myɛ̌ gakó yʼâ wɔ́ ǹdə lũ w lyì bí ta.
Nə́ tùntwə̃̀ə̃̀ né yʼà wɔ́ ǹdə nə́ wun ní gə́ nʼê yâl nɛ́.
Èta,
nə́ yʼâ nʼé tó nə́ shilə námməlwâlsɛ ǹdə́ nə́ wun bùlə̀ námməlwâlsɛ gə́ nʼê yâl nɛ́.
Nə́myɛ̌ gə́ yʼâ wɔ́ èta mɔ́ ce,
Yi lyim yʼà zɛ̃̀ ǹdə́ nə́ba rə̀ la nə́ba còrhò-tum pɔ ǹdə bə̀ ta.
4 Sə Yi nɔ̀nɔ̀-dǔr mó já dɛ̃´dɛ̃´.
Rə̀ só nə́ba kɔn lyɛ̃ cɛ nɛ.
5 Nə́ dwə́ə́ré yʼà ce nə́ cì,
sə Yi ce nə́ tó Kristə né nə́ bwìrhì.
Wɔ́ rə̀ gə́ só ába dɛ̃´dɛ̃´ mɔ́ è ce rə vwârh ába.
6 Rə̀ tó Yezu Kristə dɛnnɛ rə bwìrhì nə́ba,
mùnì nə́ tó mo nə́ jòm Arəzana w nə́ jí pyɛ̀lɛ̀.
7 Èta,
Yi wɛ̀rhɛ́ cɛ̀nɛ̀ ǹdə́ nə́ba Kristə jàn yilə,
mùnì ga byinə né nyɛ̀bɛ́ nə̀ bàn mɔ́ gakó wẽ́,
lyì dwí gakó lwar bə̀ rə̀ tó Yezu Kristə dɛnnɛ rə byili rə̀ nɔ̀nɔ̀-dǔr mó ǹdə́ rə̀ sónó wə́.
8 Wɔ́ Yi gə́ só ába dɛ̃´dɛ̃´ mɔ́ è ce rə vwârh ába,
á gə́ zhí Kristə ne mó yilə.
Rə̀myɛ́ wɔ́ Yi pɛnɛ́.
È də̀ ámyɛ̌ sõ rə̀myɛ́ shí ní yé.
9 È də̀ á tùm-ècɛ̀nà nə̀ ce á nə vwârh yé.
Èta,
lò lò wàr ń mà n zhẽ̌ ń cìn dɛ̃̌ yé.
10 Wɔ́ Yi rə̀ wɛ̀rhɛ́ nə́ba.
Rə̀ wɛ̀rhɛ́ nə́ba Yezu Kristə jàn yilə,
mùnì ga nə́ twĩ̀ tùntũ̀-ècɛ̀nà.
Wɔ́ rə̀myɛ́ cìcì rə̀ dámâ rə tɛnɛ tùntwə̃̀ə̃̀ né nə̀myɛ́ rə cĩ́ nə́ba.
Kristə cu mú ce Zhwifubá ǹdə́ byɛ̀bɛ́ bə̀ də̀ Zhwifubá mó ga jǐrh kɔn rə̀dù
11 Ámyɛ̌ byɛ̀bɛ́ bə̀ yə̀ lùl Zhwifubá dwí rí wẽ́ mó,
bə̀ yʼà tʼâ gòm ába yé.
Sə bə̀ gə́ yʼà nʼê gòm Zhwifubá mó ce,
bə̀ tə̀ rə̀myɛ́ yil bə̀ nʼê byẽ̀ ába bə̀ “lyì byɛ̀bɛ́ bə̀ yə̀ gòm”,
bə zɛ̃̀ bə̀ nʼê byẽ̀ bə̀ cìn bə̀ “lyì byɛ̀bɛ́ bə̀ gòmə̀”,
kɔn dɛ́ dɛ̀bɛ́ bə̀ nʼê gòm bə̀ yala nɛ mɔ́ yilə.
Lyǐrhnə bə̀ wɔ́ èta á yʼâ wɔ́ nɛ́ shãã ga.
12 Lwarna bə̀,
rə̀myɛ́ yi ní,
á yʼâ gwẽ̌ yə̀ Kristə zwì yé;
á yʼâ wɔ́ zhələ;
á yʼâ tɛ̀nɛ́ Yi lyì bí rə̀ cír mó wẽ́ yé.
Yi yʼà zɔ dɔbrɛ ǹdə́ rə̀ lyì bí,
rə bwəl be nyí,
sə ámyɛ̌ twə́r yʼà tɛ̀nɛ́ nyì-bwelé y èmyɛ́ wẽ́ yé.
Á yʼâ ŋwɛ́nɛ́ lũ w wẽ́,
á yə̀l Yi párá,
á tʼá dɛ̃̀ kɔn rə̀ sõ myɛ yé.
13 Sə èlâsɛ̃´,
á gə́ zù Yezu Kristə mó ce,
á tó ń jal mɔ́ mə̀ ló tɛ̃´ mɔ́ dɛnnɛ á bwəlse Yi ni,
e jà shãã ga á yʼâ nyɛ ǹdə́ rɛ.
14 Wɔ́ Kristə cìcì ń pɔ ń myə̂l,
n mə n ce yə̀-zùlə́ jòm Zhwifubá ǹdə́ byɛ̀bɛ́ bə̀ də̀ Zhwifubá mó bwə̂l wə.
N vùr kɔn dɛ́ dɛ̀bɛ́ rə̀ yʼà ŋwɛ́nɛ́ bə̀ cəcəl w rə̀ nʼê pɔr bɛ dwã nɛ,
e ce zùùrì ŋwɛ́nɛ́ bə̀ bwə̂l w mó.
N ce bə̀myɛ́ kùrə̀ nə̀lyè y ga dwã yó bə jǐrh dwí rə̀dù.
15 N ce Zhwifubá nyə́ né ǹdə́ nə̀ gə́ nʼê byili ní mú gakó kʼê bə kùr zhe yé.
Ń wɛ̀rhɛ́ èta,
n mə n ce dwə́ né nə̀myɛ́ kùrə̀ nə̀lyè y ga jǐrh dwí nándùl kùr rə̀dù,
bə̀ gə́ zù mù mú yilə.
Wɔ́ èta ń tó né n ce yə̀-zùlə́ né ŋwɛ́nɛ́ bə̀ bwə̂l wə.
16 Ń cù də̀-jɔrhɔ́ yó n mə n vùr kɔn dɛ̀bɛ́ rə̀ yʼà ce bə̀ nʼê súl dwã mɔ́,
bə zɛ̃̀ bə jǐrh kɔn rə̀dù.
Ń ce bə̀myɛ́ kùrə̀ nə̀lyè y ga yò kʼa kwɛrhɛ ǹdə́ Yi.
17 Èta ń zɔ yə̀-zùlə́ nyí rí n mə n bə̀ n byili ámyɛ̌ byɛ̀bɛ́ á yʼâ nyɛ ǹdə́ Yi mú,
ǹdə́ byɛ̀bɛ́ bə̀ yʼà bwə́l le mó ne.
18 Wɔ́ ńmyɛ̌ dɛnnɛ nə́myɛ̌ byɛ̀bɛ́ nə́ wɔ́ Zhwifubá mó,
ǹdʼámyɛ̌ byɛ̀bɛ́ á də̀ Zhwifubá mó bʼâ tó né nə́ bwəlse Yi ni,
Eshirhə náàcɛ̀nɛ́ y èdù y jàn yilə.
19 Wɔ́ rə̀myɛ́ è ce,
á kʼá də̀ zhələ yé.
Á kʼá də̀ lyì byɛ̀bɛ́ bə̀ shí kwã nɛ́ yé.
Á zù Yi dwí rí wẽ́ èlâsɛ̃´.
Ámyɛ̌ ǹdə́ rə̀ dwí rí ga jǐrh kɔn rə̀dù.
20 Bə̀ zə ámyɛ bə súlí bə̀ mʼê lwì Yi dwí rí jì yə́,
sə wɔ́ Kristə tùntúmə́ bé ǹdə́ Yi nyì-zwennə bé bə̀ mʼe cĩ́ jì y kùr ré.
Wɔ́ Yezu Kristə cìcì mú ń wɔ́ jì-byòló w nə́kulu wə́.
21 Wɔ́ ńmyɛ̌ yó bə̀ nʼê zhílí jì y bəkwâ bɛ́ nɛ bə̀ lwì,
mùnì ga e zə è jàn nɛ̀,
e yə̀ Cinu nyâ.
22 Á gə́ zù mù mú ce,
bə̀ zə ámyɛ bə súlí bə̀ mʼê lwì jì y kɛ̀bɛ́ Yi tó rə̀ Eshirhə y dɛnnɛ rə̀ ŋwɛ́nɛ́ è wẽ́ mó.