Kristə zwẽ nə́ba, nə́ zɛ̃̀ nə́ cǐ nə́ cìnə̀
5
Kristə zwẽ nə́ba,
mùnì ga nə́ cìní nə́ cìn zhə̀n zhə̀nà.
Rə̀myɛ́ ce,
zhǐnə kẽkẽ,
á bə̀kʼá shɛ̀nɛ́ á kʼá ce á cìn yómdé jɔ̃̀ w yé.
2 Cilinə kɔn dɛ̀bɛ́ àmyɛ́ Pwəə la ába byilu:
á gə ce bə̀ nʼê gòm ába,
sʼá lwar bə̀ Kristə nyə̀ná nɛ́ kʼê tʼâ la kùr zal á yil yé.*
3 À gwẽ̌ nʼâ bwérhé à byili ába bə̀ lò mɔ̀bɔ́ gakó ǹ nə́ ǹ ce bə gòm mó,
kɔn wɔ́ nyɔ́ɔ́ sə́ zwẽ Muyiisi nyə́ né gakó.
4 Ámyɛ̌ byɛ̀bɛ́ á nʼá yâl á zwẽ Muyiisi nyə́ né mùnì ga á bə̀kʼá kʼá zə dwə́ə́re mó,
á pɔr Kristə kwã nɛ́,
ce á kʼá wàr á bʼâ nə Yi pɛnɛ́ y yé.
5 Sə è gə wɔ́ nə́myɛ̌ yilə,
Yi bʼa ce nə́ kʼé tʼá la dwə́ə́re zal yé.
Wɔ́ rə̀myɛ́ nə́ rʼé dɛ̃̀ ǹdə́ Eshirhə náàcɛ̀nɛ́ jàn,
nə́ gə́ zhí Kristə ne mó yilə.
6 Lò ǹ gə zù Yezu Kristə,
ǹ gə gòm ráá ǹ yə̀ gòm,
rə̀myɛ́ də̀ kaka yé.
Tɛ̀bɛ́ rə̀ zhe kùr du mú,
wɔ́ ǹ gə zhí Yi ni ń zɛ̃̀ ǹ nə́ ǹ twĩ̀ sónó tumə.
7 Á ju kùr cɛ̀nɛ̀.
È nə wɔ́ yẽ̀ lò ń ce á yẽ̌ zhə̀n dɛ́ zõ mó ne?
8 Bùlə̀ né nə̀myɛ́ mɔ́ yə̀ Yi rí tɛ̀bɛ́ rə̀ byẽ̀ ába mó sõ shí yé.
9 Bə̀ yʼa wɔ̀ bə̀ sã̀-nə̀byẽ̌ námpɔ́lɛ́ gə co mún wẽ́,
mə̀ gakó nʼê zɛ̃̀.
10 Sə Cinu jàn yil à zhe á zhə̀nà.
Ń ce à yě pamparɛ̃ɛ̃ bʼâ bùlə̀ né ǹdə́ à nyə̀ná nɛ́ ga wɔ́ rə̀dù.
Sə è gə wɔ́ lò mó mɔ̀bɔ́ ń nə́ ń zhízhǐ á wun ní mú yilə,
ń gə wɔ́ mámá myɛ,
Yi bʼa pɔ̃ còrhò-tum.
11 Da-byâ,
lwarna bʼè gə wɔ́ àmyɛ́ cìcì mú yilə,
à gə yʼà gwẽ̌ nʼâ bwə̀l à byili lyì bí ni bə̀ kɔn wɔ́ nyɔ́ɔ́ sə bə gõ bè,
wɔ́ bə̀kɔ́n yil bə̀ yʼà mʼa cə̀ə̀lè bə̀ nʼê nwɛ̀nɛ̀ nɛ̀?
À gə yʼà nʼâ byili èta,
Kristə də̀-jɔrhɔ́ w nyə̀ná nɛ́ yʼà kʼê tʼâ la yò yál lò lò sõ yé.
12 Sə è gə wɔ́ lyì bí byɛ̀bɛ́ bə̀ ŋwɛ́nɛ́ á wẽ́ bə̀ nʼê zhizhiri á wun ní mú yilə,
bə̀ mə̂ sə bə ce bə kɔkwa bɛ!
Yẽ̌nə á cìn nì á ce Eshirhə náàcɛ̀nɛ́ jɔ̃̀ wà
13 Da-byâ,
è gə wɔ́ ámyɛ̌ yilə,
Yi byẽ̀ ába mùnì ga á cìní á cìnə̀,
sə á bə mə̂ sʼá zə á cìn-cìnú mú mə̀myɛ́ á bʼá twĩ̀ á yala nɛ́ pùbùlə̀ yé.
Zəna zɔ̀mɛ̀ rɛ́ rə̀myɛ́ á mʼá sɛ̃ dwã nɛ ǹdə́ sónó.
14 Kɔn dɛ̀bɛ́ Muyiisi nyə́ né nʼê byili mú gakó ŋwɛ́nɛ́ zɔ̀mɛ̀ rə̀dù wẽ́.
Zɔ̀mɛ̀ rɛ́ rə̀myɛ́ nʼê wə̀lə̀:
“Swéné ǹ dõ ǹdə ǹ cìcì ta.”
15 Sə dɛ̃̌na á cìnə̀.
Á gə zɛ̃̀ á nʼá vwar dwã ǹdə kǔlsi ta,
á nʼá nwɛ̀nɛ̀ dwã,
á nʼá cɛ̀mɛ̀ dwã,
lwarna bʼâ mʼâ zhìlì dwã yò.
16 Wɔ́ rə̀myɛ́ è ce,
à nʼâ wə̀l ába:
yẽ̌nə á cìn nì á ce Eshirhə náàcɛ̀nɛ́ jɔ̃̀ wà,
e zə ába e mʼe vò.
Èta,
á kʼá tʼá la á yala nɛ́ shilə námməlwâlsɛ́ pùbùlə̀ wɔ̀rhɔ́ yé.
17 Lwarna bə̀ kɔn dɛ̀bɛ́ á yala nɛ́ shilə né nʼê yâl mɔ́,
Eshirhə náàcɛ̀nɛ́ tʼâ yâl lɛ yé.
Tɛ̀bɛ́ Eshirhə náàcɛ̀nɛ́ myɛ nʼê yâl mɔ́,
á yala nɛ́ shilə né tʼâ yâl lɛ yé.
Yala nɛ́ shilə né ǹdə́ Eshirhə náàcɛ̀nɛ́ nʼê bwí dwã.
Wɔ́ rə̀myɛ́ è ce,
cɛ̀nɛ̀ rɛ́ á nʼá yâl á wɛ̀rhɛ́ mɔ́,
á wàr rɛ̀ sʼá wɛ̀rhɛ́ yé.
18 Sə è gə wɔ́ Eshirhə náàcɛ̀nɛ́ è nʼê zə ába è zhə̀lə̀,
á kʼá tʼá la nyə́ né yómə́ yál yé.
19 Á cìcì mú yě kɔn ná-dwí yil yala nɛ́ shilə né námməlwâlsɛ́ nʼê ce lyì bí wɛ̀rhɛ́.
Sə̀ nʼê ce bə̀ wɛ̀rhɛ́ fwə̂l tumə;
bə̀ nʼê twĩ̀ tùntùm-bəywààlɛ̀;
bə̀ nʼê twĩ̀ ǹdə bə̀ gə́ só né;
20 bə̀ nʼê wùlì tɛ̃´ bə̀ cèrhé wẽ̀ tɛ̀bɛ́ rə̀ də̀ Yi;
bə̀ nʼê wɛ̀rhɛ́ cə́mə́ námməlwâlsɛ;
bə̀ nʼê súl dwã;
bə̀ nʼê bwí dwã;
bə̀ nʼê dùr dwã bwɛ̃̌;
bə̀ nʼê kwè lyimə ǹdə́ dwã;
bə̀ nʼê yâl sə lyì bí gakó nə bɛ́;
bə̀ nʼê pɔr dwã nɛ kùkùl kùkùl,
bə̀ gə́ bə dwã zɔ̀mà kùr nyɛ̌ yilə;
21 bə̀ nʼê dùr bə̀ dwã bɛ́ wẽ̀ dé bwɛ̃̌;
bə̀ nʼê nywɛ̀ sɛ̃´ kɔn lyɛ̃ cɛ nɛ;
bə̀ nʼê jí dɛ̃´dɛ̃´.
Wẽ̀ dé rə̀myɛ́ dwí rí dwã myɛ súlí rə̀ ŋwɛ́nɛ́ bə̀ nʼê wɛ̀rhɛ́.
À kʼâ nʼâ byili ába,
ǹdə à gə́ jɛ̀rɛ̀ a byili ní:
lyì bí byɛ̀bɛ́ bə̀ nʼê wɛ̀rhɛ́ tumə né nə̀myɛ́ mɔ́ dwí rí gakó tʼâ la jàà nɔ Yi tənà y wẽ́ yé.
22 Sə kɔn dɛ̀bɛ́ Eshirhə náàcɛ̀nɛ́ nʼê pɛ mɔ́,
wɔ́ dwã sónó,
wu-nyɔ̃̀,
yə̀-zùlə́,
yala nɛ zhìlù,
cɛ̀nɛ̀ wɔ̀rhɔ́,
dwã nɛ sãɔ̃,
e zə dwã zhə̀nà,
23 wu-bɔ̀nɔ̀,
ǹdə́ cìn-zal.
Muyiisi nyə́ né tʼâ cẽ rə̀myɛ́ yò yé.
24 Byɛ̀bɛ́ bə̀ zù Yezu Kristə mó,
bə̀ pəpa bə̀ yala nɛ́ shilə námməlwâlsɛ́ sə̀ nʼê zə bɛ sə̀ zhə̀l mó də̀-jɔrhɔ́ yó.
25 Wɔ́ Eshirhə náàcɛ̀nɛ́ è ce nə́ ŋwɛ́nɛ́.
Rə̀myɛ́ ce,
yẽ̌nə e zə nə́ba e mʼe vò.
26 Nə́ bə̀kʼá yə̀ cìn-byilu cìnə́ yé.
Nə́ bə̀kʼá bú dwã yé,
sə nə́ bə̀kʼá dùr dwã bwɛ̃̌ myɛ yé.