Sɛ̃na dwã nɛ á yò-cə̀ə̀lé wẽ́
6
Da-byâ,
wɔ́ Eshirhə náàcɛ̀nɛ́ è nʼê zə ába è zhə̀lə̀.
Rə̀myɛ́ ce,
á gə nɔ lò mɔ̀bɔ́ ń nə́ ń dwé,
sʼá kʼá zə mɔ ǹdə́ wu-bɔ̀nɔ̀ á cĩ́ sɔ́má kɛ̀bɛ́ è càn yó.
Sə à nʼâ wə̀l ámyɛ̌ cìcì mú mə̀dù mə̀dù gakó ne:
á yʼâ dɛ̃̀ á cìnə̀,
bə̀ ǹ cìcì mú wɔ̌ ǹ twi sòlò wẽ́.
2 Sɛ̃na dwã nɛ á yò-cə̀ə̀lé wẽ́.
Á gə nʼá wɛ̀rhɛ́ èta,
wɔ́ Kristə nyə́ né á nʼá zwẽ.
3 Lò mɔ̀bɔ́ ǹ nə́ ǹ bùl bə̀ ǹ wɔ́ kɔna,
ń jà ǹ də̀ kaka,
wɔ́ ǹ cìn ǹ nə́ ǹ jə́jɛ̀rɛ́.
4 Lò gakó mə̂ sə́ nyǐ tɛ̀bɛ́ ǹ nə́ ǹ wɛ̀rhɛ́ mɔ́ cɛ̀nɛ̀.
Rə̀ gə bʼa pɔ̃́ wu-nyɔ̃̀,
sʼe yə̀ ǹ dúdú wẽ́,
sə ǹ bə̀ká zə rɛ ń myɛrhɛ ǹ dõ nyân nɛ yé,
5 bə̀ lò gakó mə̂ sə́ cili ǹ cìcì nyə̀ná nɛ́ sõ.
6 Lò mɔ̀bɔ́ bə̀ nʼê cèrhè kàrmɔ̀,
ń mə̂ sə n vùr ń jɛ̃̀-kɔn n pə mɔ̀bɔ́ ń nə́ ń cèrhè mò mó ne.
7 Á bə̀kʼá jə́jɛ̀rɛ́ á cìn yé.
Zhə̀nà,
Yi bə shɛ̀ rə̀ mɔ̌n yò yé.
Kɔn dɛ̀bɛ́ lò dùwə̀,
wɔ́ rə̀myɛ́ ń la jə̂r.
8 Lò ǹ gə dù ǹ yala nɛ́ shilə né,
wɔ́ ǹ yò zhìlù nə̀ bʼa ce rə yə̀ ǹ lyààrɛ́ kɔn ń jə̀r.
Sə ǹ gə dù tɛ̀bɛ́ rə̀ wɔ́ Eshirhə náàcɛ̀nɛ́ pùbùlə̀ mó,
è mʼa ce ń jə̀r nyǔ mə̀ tʼâ la zhɔ̌.
9 Bànà nə́ bə̀kʼá gá lyààrɛ̀ nɛ̀ ǹdə́ cɛ̀nɛ̀ wɔ̀rhɔ́ yé.
Zhə̀nà,
nə́ gə pyɛ́nɛ́ dɛ̃ rɛ́ bʼe yí,
nə́ bʼâ nə kwândɛ.
10 Rə̀myɛ́ ce,
bànà nə́ zə bɔ̀l mɔ́ mɔ̀bɔ́ mə̀ dàl nə́ yil mó,
nə́ mʼé twĩ̀ cɛ̀nɛ̀ lyì bí gakó ne,
sə kɔn du,
nə́ twĩ̀ cɛ̀nɛ̀ byɛ̀bɛ́ bə̀ wɔ́ nə́ da-byâ Kristə-lyì mú ni.
Pwəə nə́ ń cící Galəshi Kristə-lyì bí ń mə́ ń gwi ń sɛ́bɛ́ rɛ́ yó
11 Á gə la nyǔ èlâsɛ̃´,
á mʼâ pwírí kəkɛ̃ɛ̃ rɛ́ tɛ̀bɛ́ nyɛ̌ nánfwààlɛ̀,
bə̀ wɔ́ àmyɛ́ cìcì à nʼâ kɛ̃ dɛ.
12 Byɛ̀bɛ́ bə̀ nʼê yâl bə nyɛ́ɛ́ ába bə ce góm mó wẽ́ mó,
wɔ́ cìn-byilu bə̀ nʼê yâl bə tó numbyínsí nyə̀ná nɛ́ dɛnnɛ bə wɛ̀rhɛ́.
Tɛ̀bɛ́ bə̀ nʼê pyà mɔ́,
wɔ́ bə cə̀r nɔ̀nɔ̀ w kɔ̀bɔ́ bə̀ la nɔ Kristə də̀-jɔrhɔ́ w yil mó yé ne.
13 Bə̀myɛ́ byɛ̀bɛ́ bə̀ nʼê ce bə̀ gòm bè mó cìcì tʼâ zwẽ Muyiisi nyə́ né yé.
Bə jʼà nʼê yâl sə bə gõ ába,
sə bə zɛ̃̀ bə zə rə̀myɛ́ bə̀ mʼê zhẽ̌ bə̀ cìn dɛ̃̌.
14 Sə è gə wɔ́ àmyɛ́ yilə,
à zhe nə́ Cinu Yezu Kristə də̀-jɔrhɔ́ w zhə̀nà,
bə̀ ò ce a zɛ̃̀ à nʼâ nyǐ lũ w ǹdə wɔ́ cú ò cù ta à yilə,
ǹdə wɔ́ cú àmyɛ cù ta lũ w yilə.
15 Bə̀ gə gòm lò,
bə̀ gə yə̀ mɔ̀ gòm myɛ,
rə̀myɛ́ də̀ kaka yé.
Tɛ̀bɛ́ rə̀ zhe kùr mó,
wɔ́ ǹ gə jǐrh lyì-dùl.
16 Yi bʼa dùr byɛ̀bɛ́ bə̀ nʼê zwẽ nyí rí rə̀myɛ́ mɔ́,
ǹdə́ rə̀ dwí rí púlə́púlə́ nɔ̀nɔ̀,
sə rə̀ yə̀-zùlə́ né yə̀ nɛ́ ǹdə́ bɛ!
17 Sə kɔn zhí zà,
lò bə̀ká n kə́ n bə̀ n nwɛ̀nɛ̀ nɛ̀ yé,
bə̀ Yezu nɔ̀nɔ̀ w dɛ̃ nɛ à mʼâ zhə̀lə̀.
Sə rə̀myɛ́ nʼê byili bʼà wɔ́ ń tùntùnnə̀.
18 Da-byâ,
nə́ Cinu Yezu Kristə mà n cĩ́ bwəl á yó!
Amɛ̀n!