7
À lyì nántwə̂rh,
nyə́ né nyɛ̀bɛ́ Yi bwəl èta mɔ́ gakó zhe kùr nə́ yilə.
Wɔ́ rə̀myɛ́ è ce,
nə́ mə̂ sə nə́ kwɛrhɛ kɔn dɛ̀bɛ́ gakó rə̀ nʼê pɛ jìmdì nə́ yala nɛ́ ǹdə́ nə́ ywə́lsé ne mó yò ǹdə́ Yi,
sə nə́ zɛ̃̀ nə́ ce jàn nɛ́ nə́ yə̀ náàcɛ̀nà námpúm nə́ wɛ̀rhɛ́ Yi pùbùlə̀.
Pwəə nə́ ń byili bə̀ ń wu nyɛ̀ Kɔrɛ̃tɛ Kristə-lyì bí yilə
2 Pulnə á wun ní ǹdə́ nə́ba,
bə̀ nə́ yə̀ lò lò gwar yé,
nə́ yə̀ lò lò Yi-ni-zhú cɔ̀ yé,
nə́ yə̀ lò lò kɔn zwẽ nə́ jí yé.
3 À tʼâ zɔ̀m èta à la mʼa cĩ́ yò á yó w yé.
À jɛ̀rɛ̀ a byili bə̀ nyǐ nə́ só ába dɛ̃´dɛ̃´;
è gə wɔ́ cu myɛ,
nə́ ŋwɛ́nɛ́ ǹdə́ dwã;
è gə də̀ cu myɛ,
nə́ ŋwɛ́nɛ́ ǹdə́ dwã twéé twéé.
4 À zhe á zhə̀n námpúm;
à só á yò dɛ̃´dɛ̃´.
À wu zɔ kẽkẽ;
à wu nyɛ̀ dɛ̃´dɛ̃´ nə́ yò-cə̀ə̀lè ga yírh wə.
5 Zhə̀nà,
nə́ gə́ tú nə́ yí Masɛdwanɛ nə́ zhɛ̀,
nə́ yə̀ shìrhə́ nɛ gaga yé.
Nə́ nɔ zwini dwí gakó:
lyì pyà zɔ̀mà nə́ nyí ni,
ywẽ myɛ yʼà zhe nə́ba.
6 Sə Yi nʼê swẽ́ wu-zhìlù cìnə́ wun ni.
Rə̀ tó Titi twírí y dɛnnɛ rə swẽ́ nə́myɛ wun ni.
7 È də̀ ń twírí y dúdú yil nə́ wun swẽ́ yé.
Ń byili nə́ba myɛ bʼâ zɔ ń wu ni.
Wɔ́ rə̀myɛ́ gakó rə̀ swẽ́ nə́ wun ní.
Ń byili myɛ bʼâ nʼá yâl á nə nɛ ǹdʼá wun gakó.
Ń zɔ̀m á wu-zhìlù w yò n byili nə́ba;
n byili myɛ bʼâ só à yò dɛ̃´dɛ̃´ èlâsɛ̃´.
Rə̀myɛ́ ce à wu zɛ̃̀ o kwɛrhɛ ò nyɛ̀.
8 Sɛ́bɛ́ rɛ́ dõ mó à kɛ̃ a pə ába mɔ́ gə zhìlì á wun ni myɛ,
à tʼâ gá rə̀myɛ́ nɛ kə́dò yé.
Á gə́ nɔ rɛ yi ní,
rə̀ yʼà zhìlì á wun ni námpɔ́lɛ́.
Wɔ́ rə̀myɛ́ yó à yʼà nʼâ gá nɛ́.
9 Sə èlâsɛ̃´,
à wu nyɛ̀.
Sə è də̀ á wun ní gə́ zhìlì yil à wu nyɛ̀ yé.
Wɔ́ á wu-zhìlù w gə́ ce á wun kʼa pyìrhí mú yilə.
Wɔ́ wu-zhìlù w òmyɛ́ dwí rí ò nʼô tó ǹdə Yi pùbùlə̀ né gə́ nʼê yâl nɛ́.
Rə̀myɛ́ nʼê byili bə̀ nə́ yə̀ lwɛlɛ wɛ̀rhɛ́ á mə̀dù ga nɛ yé.
10 Zhə̀nà,
wu-zhìlù w òmyɛ́ dwí rí tʼâ yàl kɔn nánfò numbyíní yil yé.
Ò nʼô ce è wu pyìrhí e nə vwârh.
Sə wu-zhìlù kɔ̀bɔ́ ò nʼô tó ǹdə lũ w pùbùlə̀ né gə́ nʼê yâl nɛ́ mɔ́,
òmyɛ́ nʼô zə numbyíní ò zhə̀l è cu sɔ́má yó.
11 Á wu-zhìlù w tó ǹdə Yi pùbùlə̀ né gə́ nʼê yâl nɛ́ zhə̀n zhə̀nà.
Wɔ́ rə̀myɛ́ rə̀ co yə̀wâl á wẽ́ á pú á lwar làlà bʼâ dówə́.
Á wun zhìlì,
ywẽ zə ába;
á zɛ̃̀ á nʼá yâl á nə nɛ;
á jʼâ nʼá yâl á pə còrhò-tum mɔ̀bɔ́ ń dó mó myɛ nɛ ǹdʼá wun gakó.
Zhə̀nà,
á tó rə̀myɛ́ gakó dɛnnɛ á byili bə̀ dóó dwí-byǐ yə̀ ába gùlí yé.
12 È də̀ lò mó mɔ̀bɔ́ ń dó mó yil à kɛ̃ sɛ́bɛ́ rɛ́ yé,
e jʼà kʼê də̀ mɔ̀bɔ́ bə̀ dó mo mó myɛ yil yé.
À kɛ̃ dɛ mùnì a byili Yi yé né bə̀ nyǐ á shɛ̀nɛ́ á zwẽ nyí,
á nʼá ce jàn nɛ́ á twĩ̀ nə́ yilə.
13 Wɔ́ rə̀myɛ́ è ce nə́ wun swẽ́.
È də̀ rə̀myɛ́ dúdú rə̀ swẽ́ nə́ wun ni yé.
Á gə́ zɔ Titi wu ni,
ń wu yə̀ nyɛ̀n mɔ́,
súlí e pə nə́ba wu-nyɔ̃̀ nánfɔ̀lɔ̀.
14 Zhə̀nà,
à byili Titi ni bə̀ nyǐ à wu nyɛ̀ dɛ̃´dɛ̃´ ǹdʼába.
Sə á yə̀ nɛ̀ cìzhìl pɛ yé.
Nə́ rʼé zɔ̀m zhə̀n nə́ byili ába twéé twéé.
Rə̀myɛ́ ce à zhe bwìrì a mʼa byili Titi ni bə̀ nyǐ à wu nyɛ̀ dɛ̃´dɛ̃´ á yilə.
15 Titi gə lyǐrh á gə́ zwẽ mo á sono ǹdə́ ywẽ ǹdʼá nʼá kəkə,
á gakó zɛ̃̀ á shɛ̀nɛ́ á zwẽ nyí mú,
ń wu kwɛrhɛ o nyɛ̀ ǹdʼába.
16 À wu nyɛ̀ dɛ̃´dɛ̃´ bʼà nʼâ nyǐ á yó w kɔn gakó wẽ́.