6
Nə́myɛ̌ byɛ̀bɛ́ nə́ rʼé tó Yi ni nə́ twĩ̀ mú nʼé lwə̀l ába:
bə̀kʼá shɛ̀nɛ́ pansɛ́ Yi pɔ ába mɔ́ yə̀ nánfò yé.
2 Bə̀ kɛ̃ Yi zɔ̀mɛ̀ rɛ́ sɛ́bɛ́ ré wẽ́ bə̀ Yi wòwə̀:
“Yi rí tɛ̀bɛ́ à só mó gə́ tú e yí,
à zwẽ ǹ lwə̂l mó;
vwârh mɔ́ dɛ̃ rɛ́ gə́ tú e yí,
à tú a sɛ̃ mɔ́.”
Nyǐnə,
yi rí yúwə́;
nyǐnə,
dɛ̃ rɛ́ tɛ̀bɛ́ á mə̂ sʼá nə vwârh mɔ́ yúwə́.
3 Nə́ rʼé dɛ̃̀ nə́ cìnə̀,
mùnì ga lò lò bə̀ká ń tu tɛ̃´,
bə zɛ̃̀ bə tó rə̀myɛ́ dɛnnɛ bə zɔ̀m nə́ sõ nə́ tum dí shò-kwã nɛ́ yé.
4 Nə́ rʼé byili kɔn gakó wẽ́ bə̀ nə́ wɔ́ Yi tùntùnnə̀.
Nə́ rʼé pyɛ́nɛ́ nə́ cìn yò-cə̀ə̀lè ǹdə́ zwini ǹdə́ nɔ̀nɔ̀ dwí gakó wẽ́.
5 Bə̀ nʼê mà nə́ba;
bə̀ nʼê ce nə́ba byə̀nə́-jù wə̀;
bə́ nʼê ce lyì bí zɛ̃̀ búlə́ ne ǹdə́ nə́ba;
bə̀ nʼê ce nə́ twĩ̀ tùm-kùlə̀;
nə́ tʼá dɛ̀ɛ̀ nə́ swí yé;
nə́ tʼá jí nə́ swí yé.
6 Nə́ wɔ́ wu-põ cìnə́;
nə́ yě Yi zhə̀n dɛ́;
nə́ zhe cìn-pyɔ́nɔ́;
nə́ zhe wu-bɔ̀nɔ̀;
Eshirhə náàcɛ̀nɛ́ ŋwɛ́nɛ́ ǹdə́ nə́ba;
nə́ zhe sónó zhə̀n zhə̀nà.
7 Yi nʼê pɛ nə́ba jàn nə́ mʼé bwə̀l zhə̀n dé nə́ byili.
Cángá nyə̀ná nɛ́ nə̀ wɔ́ nə́ búlə́ wẽ̀ nə́ mʼé bwí nə́ jʼâ mʼé cə̀r nə́ cìn yé ne.
8 Bə̀ nʼê cèrhé nə́ba,
bə̀ jʼà nʼê ce nə́ba cìzhìlə̀.
Bə̀ nʼê zɔ̀m nə́ yil náàcɛ̀nɛ́,
bə̀ jʼà nʼê zhìlì nə́ yilə.
Bə̀ nʼê nyǐ nə́ba ǹdə kɔ̀mdɛ̀ ta,
e jà wɔ́ zhə̀n nə́ rʼé zɔ̀mà.
9 Bə̀ nʼê wɛ̀rhɛ́ ǹdə bə̀ yə̀l nə́ pár ta,
lyì bí gakó jʼà yě nə́ pár náàcɛ̀nɛ́.
Bə̀ nʼê nyǐ nə́ba ǹdə cùùrì ta,
nə́ jʼâ yə̀ cì yé.
Bə̀ pɔ nə́ba còrhò-tum,
sə bə̀ yə̀ nə́ba gwi yé.
10 Bə̀ nʼê nyǐ nə́ba ǹdə lyì byɛ̀bɛ́ bə̀ wun zhìlì ta,
nə́ wun jʼà nyɛ̀ twéé twéé.
Bə̀ nʼê nyǐ nə́ba ǹdə nə̀mwà ta,
e jà lyì nánzhəzhɔ̌ tó nə́ dɛnnɛ bə jǐrh nə̀cɛ̀nà.
Bə̀ nʼê nyǐ nə́ba ǹdə nə́ bə kaka zhe ta,
e jà nə́ zhe kɔn gakó.
11 Da-byâ Kɔrɛ̃tɛ lyì,
nə́ pul nə́ wun nə́ zɔ̀m ǹdʼába pamparɛ̃ɛ̃.
12 Nə́ yə̀ kaka shèè nə́ wẽ́ yé.
Wɔ́ ámyɛ̌ á yə̀ á wun ní pul ǹdə́ nə́ba yé.
13 À nʼâ zɔ̀m ǹdʼába ǹdə lò gə́ nə́ ń zɔ̀m ǹdə́ ń byâ nɛ́.
Wɛ̀rhɛ́na ǹdə nə́myɛ ta:
pulnə á wun ní pamparɛ̃ɛ̃ ǹdə́ nə́ba.
Nə́ bə̀kʼá wɛ̀rhɛ́ ǹdə lyì byɛ̀bɛ́ bə̀ yə̀ Kristə zwì ta yé
14 Á bə̀kʼá tó lyì byɛ̀bɛ́ bə̀ yə̀ Yi ni zhí ni á wɛ̀rhɛ́ ǹdə bə̀ ta yé.
Kɔn dɛ̀bɛ́ rə̀ wɔ́ cángá ǹdə́ dɛ̀bɛ́ rə̀ də̀ cángá wɔ̌ rə̀ bʼa tó dwã?
Pwẽ̀ ǹdə́ cə-byín wɔ̌ rə̀ zhə̀l ǹdə́ dwã?
15 Kristə ǹdə́ Shətana nyí wɔ̌ è mʼa yə̀ rə̀dù?
Ráá lò mɔ̀bɔ́ ń zù Kristə ǹdə́ mɔ̀bɔ́ ń yə̀ Kristə zwì tùntwĩ̀ĩ̀ wɔ̌ è yàl rə̀dù?
16 Yi jì y ǹdə́ wẽ̀ tɛ̀bɛ́ rə̀ də̀ Yi mú jààsɛ́ wɔ̌ è yàl rə̀dù?
Nə́myɛ̌ wɔ́ Yi nã́nyì y jì.
Yi cìcì wòwə̀:
“À bʼa yə̀ nɛ́ ǹdə́ bɛ a tó be à nʼâ zhə̀lə̀,
a yə̀ bə̀ Yi,
sə bə̀ mʼa yə̀ à lyì.”
17 Wɔ́ rə̀myɛ́ yil Cinu kə́ n wɔ̀:
“Dunə á yẽ̌ be,
á vò á jòm kwã nɛ́.
Á bə̀kʼá dwə̀rh kɔn dɛ̀bɛ́ rə̀ zhe jìmdì yé.
Rə̀myɛ́ yi ní,
à mʼa zwẽ ába.
18 À mʼa yə̀ á Da,
sə ámyɛ mʼâ yə̀ à byâ ǹdə́ à bə̀kwá.
Wɔ́ Cinu jàn-bə-swɛ̃´-zhe cə́bal mɔ́ ń zɔ̀m èta.”