Nə́ nyɛ̌ ǹdə dɔ nə̀zhẽ̌ ta Yi co rə̀ pɛnɛ́ y nə́ wẽ́
4
Wɔ́ Yi gə́ wɔ́ nɔ̀nɔ̀-dǔr cə́bal mɔ́ è ce rə pə nə́ba tum dí rə̀myɛ́.
Rə̀myɛ́ yilə,
nə́ wun tʼâ gɛ yé.
2 Nə́ zhɔ̃̀ tùntwə̃̀ə̃̀ né nyɛ̀bɛ́ gakó nə̀ wɔ́ cìzhìl nyə̀ná bə̀ nʼê shèè bə̀ twĩ̀ mú.
Nə́ tʼá wɛ̀rhɛ́ yǔyǔ yé,
nə́ tʼá lyə́r Yi zɔ̀mɛ̀ rɛ́ rə̀ gùlí kɔma nɛ yé.
Nə́myɛ̌ gaga mɔ́ nʼé byili rə̀ zhə̀n dɛ́ pamparɛ̃ɛ̃,
mùnì ga lò gakó tó ń wu-cəl lé dɛnnɛ n lwar bə̀ nə́ wɔ́ zhə̀n-cìnə́ Yi yé né.
3 Sə yò-ècɔ̀nɔ̀ nyí rí nə́ rʼé bwə̀l mó gə shèè,
wɔ́ lyì byɛ̀bɛ́ bə̀ yò la zhìlù mú yil rə̀ shèè.
4 Bə̀ yə̀ Yi ni zhí yé,
bə̀ lũ w kɔ̀bɔ́ lwɛlɛ cə́bal mɔ́ pyi bə̀ surhə né,
bə zɛ̃̀ bə̀ kʼê bə yò-ècɔ̀nɔ̀ nyí rí pwẽ̀ dé nɛ yé.
Yò-ècɔ̀nɔ̀ nyí rí rə̀myɛ́ nʼê byili Kristə mó ń wɔ́ Yi nyɔrhɔ mɔ́ zùwə́ yə́.
5 Nə́myɛ̌ də̀ nə́ cìcì yò nə́ rʼé bwə̀l nə́ byili yé.
Wɔ́ Yezu Kristə ń wɔ́ Cinu mú nə́ rʼé bwə̀lə̀.
Nə́myɛ̌ zɛ̃̀ nə́ rʼé byili bə̀ nə́ wɔ́ á tùntùnnə̀ ńmyɛ̌ yil yilə.
6 Yi rí tɛ̀bɛ́ rə̀ wò bə̀ pwẽ̀ yə̂r cə-byṹ wẽ́ mó,
wɔ́ rə̀myɛ́ cìcì rə̀ zə rə̀ pwẽ̀ dé rə yə̂r nə́ wun ní,
rə ce nə́ wɔ̌ nə́ rʼé nɛ rə̀ zùwə́ y è nʼê jə́jɛ̀mɛ́ Kristə yé-zwã̌ w mɔ́.
7 Sə nə́myɛ̌ byɛ̀bɛ́ nə́ zhe Yi pɛnɛ́ y nánfwɛ̀lɛ̀ y èmyɛ́ mɔ́,
nə́ nyɛ̌ ǹdə dɔ nə̀zhẽ̌ ta Yi co rə̀ pɛnɛ́ y nə́ wẽ́,
rə mʼe byili bə̀ wɔ́ rə̀ jàn dɛ́ nánfɔ̀lɔ̀ w ò ŋwɛ́nɛ́ ǹdə́ nə́ba,
sə è də̀ nə́ sə̀pwà jàn yé.
8 Lyì bí nʼê jí zùùrì dwí gakó ǹdə́ nə́ba,
sə bə̀ tʼâ ŋwɛ̀nɛ́ nə́ba yé.
Yò-cə̀ə̀lè nʼê zal nə́ba,
sə nə́ wun tʼâ gɛ yé.
9 Bə̀ nʼê nwɛ̀nɛ̀ nə́ba,
sə Yi tʼâ yẽ̌ nə́ba yé.
Bə̀ nʼê zal nə́ba bə̀ fwàl tɛ̃´,
sə rə̀myɛ́ tʼâ gwi nə́ba yé.
10 Yezu cu mú nɔ̀nɔ̀ w dɛ̃ nə́ba nə́ mʼé zhə̀l twéé twéé,
mùnì bə nə ń nyǔ mú myɛ nə́ yala nɛ́ wẽ́.
11 Nə́ ŋwɛ́nɛ́ lũ ní,
sə ǹdə́ rə̀myɛ́ ga,
nə́ nyɛ̌ ǹdə wɔ́ cu nyí ni nə́ zhǐ ní dɛ̃ gakó Yezu yil ta.
Kɔn wɔ́ èta mùnì ga bə ŋwɛ̀nɛ́ bə nə ń nyǔ mú myɛ nə́ yala nɛ́ nə̀ la cú mú wẽ́.
12 Èta,
cu mú nʼê twĩ̀ mə̀ tum nə́myɛ̌ wẽ́;
nyǔ mú zɛ̃̀ mə̀ nʼê twĩ̀ mə̀ tum ámyɛ̌ wẽ́.
13 Bə̀ kɛ̃ Yi zɔ̀mɛ̀ rɛ́ sɛ́bɛ́ rɛ́ wẽ́ bə wɔ̀:
“À zwẽ nyí.
Wɔ́ rə̀myɛ́ yil à zɔ̀m.”
Nə́myɛ wɔ́ èta.
Nə́ rʼé zwẽ nyí.
Wɔ́ rə̀myɛ́ yil nə́ rʼé zɔ̀mà.
14 Zhə̀nà,
nə́ yě bə̀ mɔ̀bɔ́ ń bwìrhì Cinu Yezu mú mà n súlí n bwìrhì nə́myɛ,
sə nə́myɛ̌ ǹdʼámyɛ̌ ga bʼâ du nə́ zhì Yezu yala nɛ.
15 Wɔ́ ámyɛ̌ yil rə̀myɛ́ gakó la wɔ̀rhɔ́,
mùnì ga Yi yò-ècɔ̀nɔ̀ w jʼâ nʼô yí lyì nánjə̀jóló.
Èta,
á mʼâ yə̀ nánzhəzhɔ̌ á mù dwã nɛ á ce Yi nə̀báná,
sʼá cèrhé re.
Wɔ́ nə́ Yi-ni-zhú mú yil nə́ ŋwɛ́nɛ́
16 Wɔ́ rə̀myɛ́ è ce,
nə́ wun tʼâ gɛ gaga yé.
Bá nə́ yala nɛ́ jàn dɛ́ gə nʼê bɔ̀ námpɔ́lɛ́ námpɔ́lɛ́ myɛ,
nə́ yě nə́ wẽ́ bə̀ nə́ yò nʼô kwɛrhɛ ǹdə́ Yi twéé twéé.
17 Zhə̀nà,
èlâsɛ̃´ mɔ́,
nɔ̀nɔ̀ zhe nə́ba námpɔ́lɛ́,
sə ò tʼâ la dɔnɔ yé.
Nɔ̀nɔ̀ w òmyɛ́ bʼa ce nə́ nə zùwə́ nánfɔ̀lɔ̀ è tʼâ la zhɔ̌,
sə zùwə́ y nə́ la nɔ mɔ́ bʼa dwini nɔ̀nɔ̀ w kɔ̀bɔ́ nə́ rʼé nwɛ̀nɛ̀ èlâsɛ̃´ mɔ́ dɛ̃´dɛ̃´.
18 Nə́myɛ̌ tʼá pyà kɔn dɛ̀bɛ́ yírhə́ wɔ̌ nə̀ nɛ yé.
Wɔ́ dɛ̀bɛ́ yírhə́ wàr nə̀ nɛ mɔ́ nə́ rʼé pyà,
bə̀ dɛ̀bɛ́ yírhə́ nə mɔ́ bəbwâ cɔ̌ yé,
sə dɛ̀bɛ́ yírhə́ bə nɛ mɔ́ tʼâ cɔ̀ gaga yé.