Dɔbrɛ́ nándùl lé nyí rí bwə̂l
3
Nə́ gə́ zɔ̀m èta mɔ́,
á zɛ̃̀ á nʼá bùl bə̀ wɔ́ nə́ cìn nə́ kʼé ji kùr nə́ rʼé zhẽ̌ dɛ̃̌ náá etəra?
Ráá nə́ mə̂ sə nə́ zə sábá nə́ bʼě byili ába mùnì ga á lwar bə̀ nə́ wɔ́ Kristə tùntúmə́,
ráá ámyɛ mə̂ sʼá pə nə́ba sábá mùnì ga lyì bí lwar bə́ nə́ wɔ́ Kristə tùntúmə́,
ǹdə lyì jàlà gə́ nʼê wɛ̀rhɛ́ nɛ́?
2 Wɔ́ ámyɛ̌ cìcì á wɔ́ nə́ sɛ́bɛ́,
rə̀ kɛ̃ nə́ wun ní wẽ́;
lyì bí gakó wɔ̌ bə̀ lwar rə̀ párá bə kàrmə̀.
3 Bə̀ lwar pamparɛ̃ɛ̃ bʼâ wɔ́ sɛ́bɛ́ Kristə cìcì kɛ̃ nə́ zə nə́ mʼé bà,
sə è də̀ numbyíní è kɛ̃ sɛ́bɛ́ rɛ́ rə̀myɛ́ zɔ̀mà nɛ́ yé.
Wɔ́ Yi nã́nyì y Eshirhə y è kɛ̃ nɛ.
Nə̀ yə̀ kɛ̃ nə́kuuli yó yé.
Wɔ́ numbyínsi wun wẽ́ nə̀ kɛ̃ nɛ́.
4 Nə́ rʼé tó Kristə dɛnnɛ nə́ zɔ̀m èta ǹdə́ zhə̀n dɛ́ tɛ̀bɛ́ nə́ zhe ǹdə́ Yi mú.
5 È də̀ búl nə́ rʼé bùl bə̀ nə́ wɔ̌ kɔn nə́ la wɔ̀rhɔ́ ǹdə́ nə́ sə̀pwà jàn yé.
Nə́ ŋwɔ̀nɔ́ w wɔ́ Yi sõ ò nʼô shí ní,
6 bə̀ wɔ́ rə̀myɛ́ rə̀ ce nə́ ŋwɛ̀nɛ́ nə́ jǐrh rə̀ tùntùnnə̀ nə́ rʼé bwə̀l dɔbrɛ́ nándùl lé nyí rí nə́ byili.
Dɔbrɛ́ nándùl lé rə̀myɛ́ nʼê shí Eshirhə náàcɛ̀nɛ́ sõ.
Rə̀ tʼâ shí nyə́ né nə̀ kɛ̃ nə́kuulí yó mó wẽ́ yé.
Nyə́ né nə̀ kɛ̃ mɔ́ nʼê zə cu nə̀ twí,
sə Eshirhə y nʼê pɛ nyǔ.
7 Muyiisi yà ń nə́ ń bwə̀l nyə́ né zɔ̀mà nɛ́ nə̀ kɛ̃ nə́kuulí yó mó,
sə nə̀ yʼà nʼê zə cu nə̀ twí.
Ǹdə́ rə̀myɛ́ ga,
tum dí rə̀myɛ́ mɔ́ yʼà nʼê byili Yi zùwə́ yə́.
Rə̀ zùwə́ y èmyɛ́ yʼà nʼê ce Muyiisi yé y jə́jɛ̀mɛ́.
Rə̀myɛ́ ce,
Esərayɛl lyì bí yʼà kʼê kwàl ń yé y bə̀ nʼê nyǐ yé.
È jə́jɔ̀mɔ́ mɔ́ jʼà yʼà tʼâ dɛnɛ yé,
8 sə zùwə́ y kɛ̀bɛ́ Eshirhə náàcɛ̀nɛ́ tum dí nʼê pɛ mɔ́ já dɛ̃´dɛ̃´ du.
9 Nyə́ né nyɛ̀bɛ́ nə̀ yʼà nʼê zə cu nə̀ twí mú bwə̂l e byili mú gə yʼà nʼê ce nə̀ bwə̀lnə̀ mó nə zùwə́,
sə́ nyǐ Eshirhə y è nʼê ce nə́ kʼé bə dwə́ə́re zhe mó bwə̀lnə̀ bé nə zùwə́ nánfɔ̀lɔ̀ du.
10 Zùwə́ y kɛ̀bɛ́ è ŋwɛ́nɛ́ èlâsɛ̃´ mɔ́ du shãã ga nyâ yá.
Rə̀myɛ́ ce shãã ga nyâ y kʼê bə kùr zhe yé.
11 Kɔn dɛ̀bɛ́ rə̀ tʼâ dɛnɛ rə̀ mʼê jé mó gə zhe zùwə́,
sə́ nyǐ tɛ̀bɛ́ rə̀ jʼâ ŋwɛ́nɛ́ gaga mɔ́ zhe zùwə́ du.
12 Nə́ gə́ nʼé dɛ̃̀ Yi nyì-bwelé y pyǐrh mó ce nə́ zhe wu-jɔ̀.
13 Nə́ tʼâ wɛ̀rhɛ́ ǹdə Muyiisi ta yé.
Ń yà ń nə́ ń zə kàmə̀-jɛ̃̀ ń mə́ ń círhí ń yé ne,
mùnì ga Esərayɛl lyì bí bə̀kʼa nə ń yé y jə́jɔ̀mɔ́ mɔ́ gə́ la nɛ́ zhɔ̌ yé,
e jʼà tʼâ dɛnɛ yé.
14 Sə bə̀ surhə né yʼà pyi.
Zà zà myɛ gwẽ̌ wɔ́ èta.
Bə̀ gə nʼê kàrmə̀ dɔbrɛ́ nándwə́l lé sɛ́bɛ́ rɛ́,
kàmə̀-jɛ̃̀ y èmyɛ́ cìcì mú nʼê pyi bə̀ surhə né.
Lò mɔ̀bɔ́ ń zù Kristə,
wɔ́ ńmyɛ̌ dúdú surhə né kàmə̀-jɛ̃̀ y èmyɛ́ tʼâ pyi yé.
15 Zà zà gwẽ̌,
bə̀ gə nʼê kàrmə̀ Muyiisi sábá nɛ́,
kàmə̀-jɛ̃̀ gwẽ̌ nʼê pyi bə̀ wun ní.
16 Bə̀ kɛ̃ Yi zɔ̀mɛ̀ rɛ́ sɛ́bɛ́ rɛ́ wẽ́ bə wɔ̀:
“Lò mɔ̀bɔ́ ǹ pyìrhí ǹ wu ń zù Cinu,
kàmə̀-jɛ̃̀ y nʼê púrə́.”
17 Nyɔ̀nɔ̀,
bə̀ gə wò bə̀ Cinu,
wɔ́ ń Eshirhə y yò bə̀ nʼê zɔ̀mà,
sə Cinu Eshirhə y gə ŋwɛ́nɛ́ mə̀gã̌,
cìn-cìnú ŋwɛ́nɛ́ gàà.
18 Nə́myɛ̌ byɛ̀bɛ́ gakó kàmə̀-jɛ̃̀ y yə̀ nə́ yésé ne círhí mú,
nə́ rʼé nɛ Cinu zùwə́ y ǹdə lò gə́ nə́ ń nyǐ ń cìn zhèzhé wẽ́ ta.
Ńmyɛ̌ mɔ̀bɔ́ ń wɔ́ Eshirhə mó ce nə́ rʼé nɛ zùwə́ dɛ̃´dɛ̃´.
Èta,
nə́ zɛ̃̀ nə́ nyɛrhɛ ń cìcì.