Vwàmá nyɛ̀bɛ́ bə̀ zwə́l wẽ̀ tɛ̀bɛ́ rə̀ də̀ Yi yó nàmá
8
È gə wɔ́ vwàmá nyɛ̀bɛ́ bə̀ zwə́l wẽ̀ tɛ̀bɛ́ rə̀ də̀ Yi yó nàmá bɛ́ yilə,
á nʼá wə̀l bə̀:
“Nə́ gakó yě.”
Rə̀myɛ́ wɔ́ zhə̀nà.
Sə lwar mɔ́ mə̀myɛ́ nʼê ce cìn-byilu numbyíní wẽ́.
Wɔ́ sónó ò nʼô súlí nə́ Yi-ni-zhú mú jàn.
2 Lò mɔ̀bɔ́ ǹ nə́ ǹ bùl bə̀ ǹ yě,
sə́ lwar bə̀ ǹ gwẽ̌ yə̀l lò gə́ mə̂ sə́ lwar nɛ́ yé.
3 Sə lò mɔ̀bɔ́ ǹ só Yi,
rə̀ yě ǹ párá.
4 Á bwə̀rh nè ǹdʼá gə wɔ̌ á dɔ̀m vwə̃̀ né nàmá bɛ́.
È gə wɔ́ nə́myɛ̌ yilə,
nə́ yě náàcɛ̀nɛ́ bə̀ wẽ̀ dé tɛ̀bɛ́ lyì bí nʼê zwə́l lũ w wẽ́ mó də̀ kaka yé.
Yi wɔ́ rə̀dù sásá rə̀ ŋwɛ́nɛ́.
5 Nə́ yě bə̀ lyì jàlà nʼê wə̀l bə̀ yə né nyɛ̀ ŋwɛ́nɛ́ dɛ̃̌,
nə̀ nyɛ̀ ŋwɛ́nɛ́ tɛ̃´.
Wɔ́ zhə̀nà,
bə̀ nʼê bùl bə̀ yə né já,
bə̀ nʼê bùl bə̀ yó-cìnə́ bé myɛ já.
6 Sə è gə wɔ́ nə́myɛ̌ yilə,
Yi rí wɔ́ rə̀dù.
Wɔ́ nə́ Da Yi.
Wɔ́ ńmyɛ̌ ń wɛ̀rhɛ́ kɔn gakó.
Wɔ́ ńmyɛ̌ yil myɛ nə́ ŋwɛ́nɛ́.
Cinu mú myɛ wɔ́ mə̀dù.
Wɔ́ Yezu Kristə.
Wɔ́ ńmyɛ̌ jàn yil kɔn gakó ŋwɛ́nɛ́.
Wɔ́ ńmyɛ̌ jàn yil nə́myɛ ŋwɛ́nɛ́.
7 Sə Kristə-lyì bí ga gwẽ̌ yə̀l rə̀myɛ́ yé.
Lyì jàlà yʼà myɛ̀rhɛ̀ vwə̃̀ zwə́l wẽ̀ tɛ̀bɛ́ rə̀ də̀ Yi yó.
Bə̀ gə gwẽ̌ nʼê dɔ̀m vwə̃̀ nàmá zà,
bə̀ tʼâ zwẽ nyí bə̀ rə̀ bə kùr zhe yé.
Bə̀ gə́ gwẽ̌ yə̀ Yi ni zhí námpúm mú ce,
bə̀ nʼê bùl bə̀ bə̀ zhìlì bə̀ yò ǹdə́ Yi.
8 E jʼà də̀ kùjú w kɔ̀bɔ́ nə́ rʼé jí mú ò bʼa kwɛrhɛ nə́ yò ǹdə́ Yi yé.
Nə́ gə yə̀ w jí myɛ,
ò tʼâ bɔ̀ nə́ kaka yé.
Nə́ gə jú w myɛ,
ò tʼâ súlí nə́ kaka yé.
9 Á cǐ á cìnə̀,
á wɔ̌ á wɛ̀rhɛ́ ǹdə á gə́ nʼá yâl nɛ́.
Sə dɛ̃̌na,
byɛ̀bɛ́ bə̀ gwẽ̌ yə̀ Yi ni zhí námpúm mú bə̀kʼa tó cìn-cìnú mú mə̀myɛ́ dɛnnɛ bə tu tɛ̃´ yé.
10 Lò mɔ̀bɔ́ ń gwẽ̌ yə̀ Yi ni zhí námpúm gə tú n nɔ ǹmyɛ́ mɔ̀bɔ́ ǹ yě zhə̀n dɛ́ gə́ wɔ́ nɛ́ mɔ́,
ǹ jě jì kɛ̀bɛ́ bə̀ nʼê zwə́l wẽ̀ tɛ̀bɛ́ rə̀ də̀ Yi è wẽ́ mó wẽ́,
ń tó ǹ nə́ ǹ jí kùjú,
ńmyɛ tá ń la ǹ dɛnnɛ tó n dɔ̃̀ vwə̃̀ né nàmá bɛ́?
11 Kɔn dɛ́ dɛ̀bɛ́ ǹ wɛ̀rhɛ́ ǹ gə́ yě zhə̀n dɛ́ gə́ wɔ́ nɛ́ mɔ́,
bʼa zhìlì Kristə-lò mó ńmyɛ̌ mɔ́ ń gwẽ̌ yə̀ Yi ni zhí námpúm mú yò.
E jʼà wɔ́ ǹdə́ ńmyɛ ga yil Kristə cùwə̀.
12 Á gə wɛ̀rhɛ́ èta,
á bʼá dó á da-byâ bɛ́,
bə̀ Yi-ni-zhú mú tó á dɛnnɛ mə zhìlì,
wɔ́ Kristə cìcì á gwar.
13 Rə̀myɛ́ ce,
àmyɛ́ gə pwírí kùjú bʼa ce à da-byǐ tu yə̀-bəlɔ̀lɔ́ wa,
sə́ nyǐ à kʼâ tʼâ la nàmá dɔ́m gaga yé,
mùnì ga à da-byǐ mú bə̀ká n tu tɛ̃´ yé.