Pyâna kɔn dɛ̀bɛ́ rə̀ bʼa kwɛrhɛ á da-byâ bɛ́ yò
14
Zwẽnə lò mɔ̀bɔ́ ń Yi-ni-zhú mú gwẽ̌ də̀ kẽkẽ mó cɛ̀nɛ̀,
sʼá bə̀kʼá wɔ̀ bə̀ kɔn dɛ̀bɛ́ ń nə́ ń bùl mó bə̀ càn yé.
2 Dɛ̀ga mɔ̃̌ ŋwɛ́nɛ́ ń nə́ ń bùl bə̀ ń wɔ̌ ń jí kùjú dwí gakó,
sə mɔ̀bɔ́ ń Yi-ni-zhú mú gwẽ̌ də̀ kẽkẽ mó bə shɛ̀ nàmá yò yé;
wɔ́ də̀-vɔr ń nə́ ń jí.
3 Mɔ̀bɔ́ ń nə́ ń jí kùjú dwí gakó mó bə mə̂ sə n fulsi mɔ̀bɔ́ ń tá ń jí kùjú dwí gakó mó yé,
sə lò mɔ̀bɔ́ ń tá ń jí kùjú dwí gakó bə mə̂ sə n kə́ mɔ̀bɔ́ ń nə́ ń jí kùjú dwí gakó mó bùrsì yé,
bə̀ Yi shɛ̀nɛ́ n zù rì.
4 Ǹmyɛ́ wɔ́ mɔ̌ ǹdʼám,
ǹ mə́ ǹ kɛ́ lò dõ tùntùnnə̀ bùrsì?
Ń gə zhǐ kẽkẽ,
ń gə bə zhǐ kẽkẽ myɛ,
wɔ́ ń yó-cə́bal mɔ́ rə̀ cə̀l.
E jà ń mà n zhì kẽkẽ,
bə̀ Cinu zhe jàn ń wɔ̌ ń mà n sɛ̃ mɔ.
5 Lò mwə̀lbə́ ŋwɛ́nɛ́ ń nə́ ń bùl bə̀ dwã ŋwɛ́nɛ́ nə̀ du nə̀ dwã bɛ́,
ń dõ myɛ zɛ̃̀ ń ŋwɛ́nɛ́ ń nə́ ń bùl bə̀ dwã nɛ́ gakó wɔ́ kɔn rə̀dù.
Rə̀myɛ́ ce,
kɔn dɛ̀bɛ́ lò gakó nə́ ń bùl mó,
sʼe yə̀ ǹdə́ ń wu gakó.
6 Lò mɔ̀bɔ́ ń nə́ ń bùl bə̀ dwã ŋwɛ́nɛ́ nə̀ du nə̀ dwã bɛ́,
wɔ́ Cinu yil ń nə́ ń bùl èta.
Lò mɔ̀bɔ́ ń nə́ ń jí kùjú dwí gakó,
ńmyɛ wɔ́ Cinu yil ń nə́ ń jí èta,
bə̀ wɔ́ Yi ń nə́ ń ce ń mə́ ń jí.
Lò mɔ̀bɔ́ ńmyɛ tá ń jí wẽ̀ dwí gakó,
wɔ́ Cinu yil ńmyɛ nə́ ń wɛ̀rhɛ́ èta,
bə̀ ńmyɛ nə́ ń ce Yi nə̀bán rə̀myɛ́ yilə.
7 Nə́ mə̀dù ga tɛ̀nɛ́ ń cìn yil yé.
Èta myɛ,
nə́ mə̀dù ga tá ń la cú ń cìn yil yé.
8 Nə́ gə ŋwɛ́nɛ́ myɛ,
wɔ́ Cinu yil nə́ ŋwɛ́nɛ́;
nə́ gə kʼé cù myɛ,
wɔ́ Cinu yil nə́ cùwə̀.
Rə̀myɛ́ ce,
nə́ gə ŋwɛ́nɛ́ ráá nə́ gə cù myɛ,
wɔ́ Cinu ń cǐ nə́ba,
9 bə̀ Kristə gə́ cù n ká n bwìrhì mú,
wɔ́ mùnì ga n cìní cùùrí ǹdə́ lyì-nyìsí ga.
10 Sə ǹmyɛ́,
wɔ́ byè yil ǹ nə́ ǹ cĩ́ dóó ǹ da-byǐ mú yó wə?
Sə ǹmyɛ́,
wɔ́ byè yil ǹ nə́ ǹ fulsi ǹ da-byǐ mú?
Nə́ gakó bʼâ zhì Yi yé né,
rə kə́ lò gakó bùrsì.
11 Bə̀ kɛ̃ Yi zɔ̀mɛ̀ rɛ́ sɛ́bɛ́ rɛ́ wẽ́ bə̀ Cinu wòwə̀:
“Wɔ́ àmyɛ́ Cinu,
à wɔ́ nã́nyì.
À nʼâ wə̀l bə̀ nunə dwí gakó bʼa wùlì tɛ̃´ à yé né,
bə cèrhé ne.”
12 Èta,
nə́ mə̀dù mə̀dù gakó bʼâ byili Yi yé né kɔn dɛ̀bɛ́ ǹ cìcì wɛ̀rhɛ́.
Pyâna nə́ pyà kɔn dɛ̀bɛ́ rə̀ bʼa ce yə̀-zùlə́ yə̀ nɛ́
13 Yẽ̌nə nə́ yẽ̌ dwã bùrsì kɔ́ nɛ.
Nyǐnə kɔn dɛ̀bɛ́ á mə̂ dwã sʼá wɛ̀rhɛ́:
bə̀kʼá shɛ̀nɛ́ á wɛ̀rhɛ́ kɔn dɛ̀bɛ́ rə̀ bʼa ce á da-byǐ mà ń nà n tu lwɛlɛ wẽ́ yé.
14 À gə́ zhí Cinu Yezu ni mú ce,
à yě kɔn rə̀dù rə̀ wɔ́ pamparɛ̃ɛ̃:
bə̀ kɔn tɛ̀nɛ́ rə̀ súl ǹdə́ jú yé.
Wɔ́ lò ǹ gə bùl bə̀ kɔn súl ǹdə́ jú,
fòró rə zɛ̃̀ rə̀ zhe súsúlú ǹ yilə.
15 Ǹ gə nə́ ǹ jí kùjú ǹ da-byǐ tə̀ rə̀myɛ́ yil ń wu zhìlì,
sə́ lwar bə̀ rə̀myɛ́ də̀ sónó tum yé.
Ǹ bə̀kʼá tə̀ kùjú yil ń zhìlì ǹ da-byǐ mú Kristə cù ń yil mó yò yé.
16 Kɔn dɛ́ dɛ̀bɛ́ ámyɛ̌ nʼá bùl bə̀ rə̀ càn mɔ́ bə̀kʼa jǐrh kɔn dɛ̀bɛ́ rə̀ bə càn lyì dwã la tó rə̀ dɛnnɛ bə zɔ̀m á yil námməlwɛ̀lɛ́ yé.
17 Yi pyɛ̀lɛ̀ rɛ́ də̀ e jí ráá e nyɔ̀ nyə̀ná yé.
Rə̀ pyɛ̀lɛ̀ rɛ́ kùr wɔ́:
nə́ wɛ̀rhɛ́ ǹdə Yi gə́ nʼê yâl nɛ́,
nə́ yə̀ cángá,
nə́ zə yə̀-zùlə́ ǹdə́ wu-nyɔ̃̀ Eshirhə náàcɛ̀nɛ́ jàn yilə.
18 Lò mɔ̀bɔ́ ń nə́ ń tó Kristə ne èta,
rə̀-ná-cí sú Yi yírh,
lyì bí jʼà só mo.
19 Rə̀myɛ́ ce,
pyâna nə́ pyà kɔn dɛ̀bɛ́ rə̀ bʼa ce yə̀-zùlə́ yə̀ nɛ́,
sə rə jʼa súlí nə́ gùlú w jàn.
20 Zhə̀nà,
kùjú gakó wɔ̌ ò jí.
Sə kùjú kɔ̀bɔ́ lò la jú,
ǹ dõ zɛ̃̀ n tó ò dɛnnɛ n tu lwɛlɛ wẽ́ mó,
bə càn yé.
Rə̀myɛ́ ce,
lò bə̀ká tə̀ kùjú yil ń cɔ̀ Yi tum dí yé.
21 Ǹ gə pwírí ǹ gə dɔ̀m nàmá,
ráá ǹ gə nyɔ̀ sɛ̃´,
kɔn dɛ̀bɛ́ gakó ǹ gə la jú,
rə̀ wɔ̌ rə̀ bʼa ce ǹ da-byǐ tu lwɛlɛ wẽ́,
sə́ yẽ̌ rə̀ jú ni.
Wɔ́ rə̀myɛ́ rə̀ wɔ́ kɔn dɛ̀bɛ́ rə̀ càn.
22 Kɔn dɛ́ dɛ̀bɛ́ ǹmyɛ́ dúdú zɛ̃̀ ǹ yě yò w òmyɛ́ shò-kwã nɛ́ mɔ́,
sə́ zə rɛ ǹ wẽ́ ǹmyɛ́ ǹdə́ Yi.
Lò gə zɛ̃̀ ń nə́ ń wɛ̀rhɛ́ kɔn,
rə̀ də̀ dóó ń wẽ́,
wu-nyɔ̃̀ ŋwɛ́nɛ́ ǹdə́ rə̀-ná-cí.
23 Sə lò gə nə́ ń jí kùjú,
n jà n zɛ̃̀ ń nə́ ń bùl bə̀ ń gə́ nə́ ń jí w mú,
ń tá ń wɛ̀rhɛ́ cɛ̀nɛ̀,
Yi bʼa pə rə̀-ná-cí dóó,
bə̀ ń nə́ ń wɛ̀rhɛ́ kɔn dɛ̀bɛ́ rə̀ tʼâ tó ǹdə ń Yi-ni-zhú mú gə́ nʼê yâl nɛ́ yé.
E jà lò gə nə́ ń wɛ̀rhɛ́ kɔn dɛ̀bɛ́ rə̀ tʼâ tó ǹdə ń Yi-ni-zhú mú gə́ nʼê yâl nɛ́,
wɔ́ yə̀-bəlɔ̀lɔ́ ń nə́ ń wɛ̀rhɛ́.