ཡོ༌ཧཱ༌ནན༌ནི༌ ཆག༌བྲིས༌ ཉིས༌པ༌།
ཡོ༌ཧཱ༌ནན༌ནི༌ ཇུ༌ ཞུས༌།
1:1-3
1
ང༌ ཆོས༌ཚོགས༌སི༌ ལམ༌སྟོན༌པའེ༌,
དཀོན༌མཆོག༌གི༌ ལྡམ༌མ༌ ཛད༌ཁན༌ནི༌ བུ༌མོ༌ དང༌ ཁོའེ༌ ཕྲུ༌གུ༌གུན༌ལ༌ བྲིའད༌།
ཁྱོ༌རང༌གུན༌ལ༌ ངའེ༌ དེན༌བའ༌ ཅེས༌པ༌ ཅོའད༌,
ཡང༌ ང༌ ཅིག༌པོ༌ མན༌པ༌ དེན༌བའེ༌ ལབ༌ཞ༌གུན༌ གྱུས༌ཡོད༌ཁན༌ནི༌ སྤུན༌གུན༌ནིའང༌,
2 ཅིའ༌ཟེར༌ན༌ དཀོན༌མཆོག༌གི༌ དེན༌བ༌བོ༌ ང༌དང༌གུན༌ནི༌ ནང༌ང༌ ནས༌ཏེ༌ ཡང༌ ཏུས༌གྱུན༌ ང༌དང༌གུན༌ ཉམ༌པོ༌ ལུས༌ཨིན༌།
3 དེན༌བ༌ དང༌ ཅམས༌པའེ༌ ནང༌ང༌ མི༌ཚེ༌ ཕུད༌ ཟ༌ནེ༌,
དཀོན༌མཆོག༌ ཡབ༌ དང༌ ཁོང༌ངི༌ སྲས༌ ཡེ༌ཤུ༌ མ༌ཤི༌ཀ༌ གུན༌ནི༌ ཆོགས༌ནེ༌,
ཐུག༌རྗེ༌,
སྙིང༌རྗེ༌ དང༌ ཞི༌དེ༌ ང༌དང༌གུན༌ལ༌ ཐོབ༌ཤིག༌།
དེན༌བ༌ དང༌ ཅམས༌པ༌།
1:4-11
4 ཁྱོ༌རང༌ངི༌ ཕྲུ༌གུ༌ ཁ༌ཅིག༌,
ཡབ༌ དཀོན༌མཆོག༌གི༌ ང༌དང༌གུན༌ལ༌ བཀའ༌ སལ༌ཁན༌ ནང༌ཞིན༌,
ཁོང༌ངི༌ དེན༌བའེ༌ཀ༌ གྲུལ༌དུག༌ ཟེར༌ཏེ༌ ཚོར༌ར༌ཅིག༌,
ངའ༌ སྲན༌ཏྲེ༌ ཐད༌།
5 ཏ༌ ངའེ༌ བཀའ༌ སོ༌མ༌ཞིག༌གི༌ སྐོར༌ལ༌ མ༌བྲིའ༌,
གོ༌མ༌ནེ༌ ཕར༌ལ༌ ང༌དང༌གུན༌ ཉམ༌པོ༌ ཡོད༌ཁན༌བོའེ༌ སྐོར༌ལ༌ བྲིའད༌།
ང༌དང༌གུན༌ནི༌ ཅིག༌ དང༌ ཅིག༌ག༌ ཅམས༌པ༌ ཅོ༌གོ༌ཤེས༌ ཨིན༌ནོག༌།
6 ཡང༌ ཅམས༌པ༌བོ༌ ནི༌,
ང༌དང༌གུན༌ དཀོན༌མཆོག༌གི༌ བཀའ༌གུན༌ལ༌ ཁའ༌ཉན༌ཏེ༌ གྲུལ༌ཅེས༌པོ༌ ཨིན༌ནོག༌།
ཁྱོ༌ཞ༌གུན༌ནི༌ གོ༌མ༌ནེ༌ ཕར༌ལ༌ ཚོར༌ཁན༌ནི༌ བཀའ༌བོ༌ ནི༌,
ཁྱོ༌ཞ༌གུན༌ ཏེ༌ ཅམས༌པའེ༌ ནང༌ང༌ གྲུལ༌གོ༌ཤེས༌པོ༌ ཨིན༌ནོག༌།
7 གཙོ༌བོ༌ ཡེ༌ཤུ༌ ངོས༌པོའ༌ ཟུགས༌སི༌ ནང༌ང༌ ཕེབས༌ཁན༌བོའ༌ ཏད༌པ༌ མ༌ཅོ༌ཁན༌ནི༌ གོབ༌སྐོར༌ཁན༌ མང༌པོ༌ཞིག༌,
འི༌ ཇིག༌རྟེན༌ནི༌ ནང༌ང༌ བིང༌ཏེ༌ ཨིན༌ནོག༌།
ཏེ༌ཙོགས༌སི༌ མི༌གུན༌ མི༌ཚང༌མ༌ གོབ༌སྐོར༌ཁན༌ དང༌ མ༌ཤི༌ཀའེ༌ གྲ༌འོ༌གུན༌ ཨིན༌ནོག༌།
8 དཀོན༌མཆོག༌གི༌ ཕིའ༌ ཁྱོ༌ཞའེ༌ ཞབས༌ཏོག༌ ཞུ༌ཁན༌གུན༌,
ཏོན༌མེད༌ལ༌ མ༌ཆའ༌,
དཀོན༌མཆོག༌གི༌ ཆོགས༌ནེ༌ ཚང༌རིག༌ སོལ༌རས༌ ཐོབ༌ཅེས༌སི༌ ཕིའ༌ ཁྱོ༌ཞ༌གུན༌ ཤང༌ ཅོ༌ཤིག༌།
9 མ༌ཤི༌ཀའེ༌ ལབ༌ཞ༌གུན༌ནི༌ སང༌ ཐལ༌ཏེ༌ སོང༌ཏེ༌,
ཁོང༌ངི༌ ལབ༌ཞའེ༌ ནང༌ང༌ མ༌ལུས༌ཁན༌གུན༌ནི༌ བྲེལ༌བོ༌ དཀོན༌མཆོག༌ ཉམ༌པོ༌ མེད༌པ༌ ཨིན༌ནོག༌།
མ༌ཤི༌ཀའེ༌ ལབ༌ཞའེ༌ ནང༌ང༌ ལུས༌ཁན༌གུན༌ནི༌ བྲེལ༌ དཀོན༌མཆོག༌ ཡབ༌ དང༌ ཁོང༌ངི༌ སྲས༌ ཉིས༌ཀོ༌ ཉམ༌པོ༌ ཡོད༌ཏེ༌ ཨིན༌ནོག༌།
10 ཀལ༌ཏེས༌ སུ༌ཞིག༌ ཁྱོ༌ཞ༌གུན༌ནི༌ཀ༌ ཡོངས༌ཏེ༌ མ༌ཤི༌ཀའེ༌ ལབ༌ཞ༌ མན༌པ༌,
ཡང༌ ལབ༌ཞ༌ སོ༌སོ༌ རིག༌ ལབ༌ན༌,
ཁོང༌གུན༌ རང༌ངི༌ ཁང༌པའེ༌ ནང༌ང༌ མ༌ཉེན༌,
མ༌ཚད༌ ཁོང༌གུན༌ལ༌ ཇུའང༌ མ༌ཅོ༌ཤིག༌།
11 སུ༌ཞིག༌གི༌ འི༌ཙོགས༌སི༌ མི༌གུན༌ལ༌ གའ༌སུས༌ ཞུ༌ན༌,
ཏེ༌ མི༌བོ༌,
ཁོའེ༌ ལས༌ ངན༌པའེ༌ ནང༌ང༌ དྲེས༌ཏེ༌ ཨིན༌ནོག༌།
སྟིང༌ཇུག༌གི༌ ཞལ༌ཏ༌།
1:12-13
12 ང༌ ཟེར༌ཅེས༌ ཏ༌ མང༌པོ༌ རག༌,
ཨིན༌ནའང༌ ང༌ ནག༌ཙ༌ དང༌ ཉི༌གུ༌ ཉམ༌པོ༌ བྲི༌ཅེས༌པོ༌ ལྡེ༌མོ༌ཞིག༌ ཚོར༌ར༌ མེ༌རག༌།
ཁྱོ༌ཞ༌གུན༌ནི༌ ཕྲོའ༌ ཡོངས༌ཏེ༌ དུན༌ལ༌ སྤེ༌ར༌ ཏང༌ཅེས༌སི༌ རེ༌ཝ༌ ཅོའད༌།
ཏེ༌ནེ༌ ང༌དང༌གུན༌ནི༌ ཐད༌པོ༌ དྲན༌དྲ༌ གྲུབ༌ཨིན༌།
13 དཀོན༌མཆོག༌གི༌ ལྡམ༌མ༌ ཛད༌ཁན༌ནི༌ ཁྱོ༌རང༌ངི༌ སྲིང༌མོའེ༌ ཕྲུ༌གུ༌གུན༌ནི༌ ཁྱོ༌ཞ༌གུན༌ལ༌ ཇུ༌ ཞུ༌རུག༌།