ཆོས༌ཚོགས༌སི༌ འུ༌སྐྱོང༌གུན༌།
3:1-13
3
ངོས༌པོའ༌ འི༌ ཞལ༌ཏ༌གུན༌ དེན༌བ༌ ཨིན༌ནོག༌,
“ཀལ༌ཏེས༌ སུ༌ཞིག༌ག༌ ཆོས༌ཚོགས༌སི༌ འུ༌སྐྱོང༌ ཅོ༌ཅེས༌སི༌ དོད༌པ༌ ཡོད༌ན༌,
ཁོའ༌ དོད༌པ༌ ཡོད༌ཁན༌ནི༌ ལས༌པོ༌ རྩི༌ཝ༌ཅན༌ ཞིག༌ ཨིན༌ནོག༌།”
2 ཆོས༌ཚོགས༌སི༌ འུ༌སྐྱོང༌ ནི༌,
སྐྱོན༌མེད༌ཁན༌,
ཁོ༌རང༌ངི༌ ན༌མ༌ ཉམ༌པོ༌ ཨིད༌ཤེས༌ཅན༌,
སམ༌བ༌ཅན༌,
རང༌སེམས༌ ཅུན༌ཉན༌ཁན༌ དང༌ རྩི༌ཝ༌ཅན༌,
བེས༌པ༌གུན༌ལ༌ ཁང༌པའེ༌ ནང༌ང༌ གའ༌སུས༌ ཞུ༌ཁན༌,
ལབ༌ ཉན༌ཅེས༌སི༌ ཁྱུད༌,
3 མངས༌ཏེའང༌ མང༌པོ༌ ཆང༌ མ༌ཐུང༌ཁན༌,
ནོད༌པ༌ མ༌སྐྱལ༌ཁན༌,
ཞན༌མ༌གུན༌ ཉམ༌པོ༌ བོལ༌མོ༌,
ཛིང༌མོ༌ མ༌ཏང༌ཁན༌,
ཡང༌ པེ༌ནེ༌ མང༌པོའེ༌ དོད༌པ༌ མེད༌ཁན༌ནི༌ མི༌ཞིག༌ ཡོང༌གོས༌།
4 ཁོའེ༌ ཁོ༌རང༌ངི༌ ནང༌ཚངས༌ལ༌ གོ༌ཁྲིད༌ དང༌ སྟ༌སྟོག༌ གྱལ༌ལ༌ ཅོས༌ཏེ༌ ཁོའེ༌ ཕྲུ༌གུ༌གུན༌ རྩི༌ཝ༌ ཅོ༌ཁན༌ དང༌ ཁའ༌ཉན༌ཁན༌ རིག༌ ཡོང༌གོས༌།
5 ཀལ༌ཏེས༌ མི༌ཞིག༌ག༌ ཁོ༌རང༌ངི༌ ནང༌ཚངས༌སི༌ གོ༌ཁྲིད༌ དང༌ སྟ༌སྟོག༌ ཅོ༌ མ༌ཉན༌ན༌,
ཏེ༌ནེ༌ ཀ༌ཟུག༌གི༌ ཁོའ༌ དཀོན༌མཆོག༌གི༌ ཆོས༌ཚོགས༌སི༌ གོ༌ཁྲིད༌ དང༌ སྟ༌སྟོག༌ ཅོ༌ཉན༌ཨིན༌?
6 འུ༌སྐྱོང༌བོ༌,
ཏད༌པ༌ ཅོ༌ཁན༌ སོ༌མ༌ཞིག༌ ཡོང༌ མ༌གོས༌,
ཅིའ༌ཟེར༌ན༌ ཁོའེ༌ ནང༌ང༌ ཕོ༌སོ༌ ཡོང༌སྲིད༌ཅེས༌ ཨིན༌ནོག༌ ཀ༌བོའེ༌ ཁོ༌,
ཤེ༌ཏན༌ལ༌ ཕོག༌ཁན༌ནི༌ ཁྲིམས༌ཅད༌ ཙོགས༌སི༌ ནང༌ང༌ གྱེལ༌ཅུག༌ཨིན༌།
7 ཁྲེལ༌བ༌ སོང༌ཏེ༌ ཤེ༌ཏན༌ནི༌ ཅུས༌ངན༌ནི༌ ནང༌ང༌ མི༌གྱེལ༌ཅེས༌སི༌ ཕིའ༌,
ཁོ༌ ཏད༌པ༌ མེད༌ཁན༌གུན༌ནིའང༌ རྩི༌ཝ༌ ཅོ༌ཁན༌ནི༌ མི༌ཞིག༌ ཡོང༌གོས༌།
8 ཏེན༌ན༌ ཙོགས༌ལ༌,
ཆོས༌ཚོགས༌སི༌ ཞབས༌ཏོག༌པ༌ སྐོའ༌ ཛད༌ཁན༌གུན༌ནའང༌ རྩི༌ཝ༌ཅན༌ ཡོང༌གོས༌,
དུན༌ལ༌ ཟང༌པོ༌ གྱབ༌ནེ༌ ངན༌པ༌ ཅོ༌ཁན༌,
ཆང༌ མང༌པོ༌ ཐུང༌ཁན༌ ཡང༌ པེ༌ནེ༌ ཐོག༌ནེ༌ ནབས༌ཤན༌ ཡོང༌ མ༌གོས༌།
9 ཁོང༌གུན༌ནི༌ སེམས༌སི༌ ནང༌ང༌ ནོངས༌ མེད༌པ༌ ཏད༌པའེ༌ ཁག༌ཅན༌ ཀྲང༌པོ༌གུན༌ལ༌ སྟན༌པོ༌ ཐམས༌ཏེ༌ དུག༌གོས༌།
10 ཞབས༌ཏོག༌པ༌ ཞིག༌ སྐོའི༌ སང༌ སྔུན༌ལ༌ ཁོང༌གུན༌ནི༌ སྕོད༌པ༌གུན༌ལ༌ ཞིབ༌སལ༌ ཅོས༌ཏེ༌ ལྟ༌གོས༌།
ཀལ༌ཏེས༌ ཁོང༌གུན༌ སྐྱོན༌མེད༌ཁན༌ཞིག༌ ཐོང༌ན༌,
ཁོང༌གུན༌ལ༌ ཞབས༌ཏོག༌པའེ༌ ཚུལ༌ལ༌ ཞབས༌ཏོག༌ ཞུ༌ཅུག༌ཤིག༌།
11 ཏེན༌ན༌ ཙོགས༌ལ༌ ཆོས༌ཚོགས༌སི༌ ཞབས༌ཏོག༌པ༌གུན༌ནི༌ ན༌མ༌གུན༌ནའང༌ ཞན༌མའེ༌ རྩི༌ཝ༌ ཡོད༌ཁན༌ནི༌ བུ༌མོ༌ རིག༌ ཡོང༌གོས༌,
ཡང༌ ཞན༌མ༌གུན༌ནི༌ སྕོད༌པའེ༌ སྐོར༌ལ༌ ངན༌པ༌ ཟེར༌ མ༌གོས༌།
ཁོང༌གུན༌ནི༌ རང༌སེམས༌ ཅུན༌ཏེ༌,
ཡང༌ ལས༌ ཅོ༌ཁན༌ ཚང༌མའེ༌ ནང༌ང༌ ཨིད༌ཤེས༌ཅན༌ ཡོང༌གོས༌།
12 ཞབས༌ཏོག༌པ༌ རང༌ངི༌ ན༌མ༌ ཉམ༌པོ༌ ཨིད༌ཤེས༌ཅན༌ ཡོང༌གོས༌,
ཡང༌ ཁོའེ༌ ཁོ༌རང༌ངི༌ ཕྲུ༌གུ༌ དང༌ ཁང༌པའེ༌ ནང༌ང༌ དུག༌ཁན༌ ཚང༌མ༌ལ༌ གྱལ༌ལ༌ ཅོས༌ཏེ༌ སྟ༌སྟོག༌ ཅོ༌གོས༌།
13 གྱལ༌ལ༌ ཅོས༌ཏེ༌ ཞབས༌ཏོག༌ ཞུ༌ཁན༌གུན༌ལ༌,
ཞན༌མ༌གུན༌ནི༌ ཀ༌ནེ༌ རྩི༌ཝ༌ ཐོབས༌ཏེ༌ མང༌ང༌ ཧམ༌པ༌ ཉམ༌པོ༌ ཞན༌མ༌གུན༌ལ༌ མ༌ཤི༌ཀ༌ ཡེ༌ཤུའི༌ སྐོར༌ལ༌ ཤད༌ཐུབ༌ཨིན༌།
སང༌ཝའེ༌ དེན༌བ༌གུན༌།
3:14-16
14-15 ཞན༌ ང༌ ཁྱོ༌རང༌ ཉམ༌པོ༌ གྱོགས༌པ༌ ཐུག༌ཅེས༌སི༌ རེ༌ཝ༌ ཅོའད༌,
ཨིན༌ནའང༌ ཀལ༌ཏེས༌ ངའ༌ ཡོང༌ཅེས༌ལ༌ གོར༌ན༌,
མི༌ཞིག༌ དཀོན༌མཆོག༌གི༌ ནང༌ཚངས༌སི༌ ཕྲོའ༌ ཀ༌ཟུག༌གི༌ དུག༌གོ༌ཤེས༌པོ༌,
ཁྱོ༌རང༌ང༌ གྱུས༌ ཆ༌ཅེས༌ལ༌ འི༌ ལབ༌ཞ༌གུན༌ བྲིའད༌།
ཏེ༌ ནང༌ཚངས༌པོ༌ ནི༌ དཀོན༌མཆོག༌ སོན༌པོའེ༌ ཆོས༌ཚོགས༌པོ༌ ཨིན༌ནོག༌,
ཀ༌བོ༌ དཀོན༌མཆོག༌གི༌ བཀའ༌ ཀྲང༌པོའེ༌ ཀ༌ཝ༌ དང༌ མག༌ལྡན༌ ཨིན༌།
16 ཐེ༌ཚོམས༌ མེད༌པ༌ འི༌བོ༌ ནི༌,
ང༌དང༌གུན༌ནི༌ ཏད༌པའེ༌ སང༌ཝ༌ ཆེ༌ཤོག༌པོ༌ ཨིན༌ནོག༌།
མ༌ཤི༌ཀ༌ མིའི༌ ཟོབ༌སྟའེ༌ ནང༌ང༌ སྔོན༌ཏེ༌
ཁོང༌ དཀོན༌མཆོག༌གི༌ སྲས༌ ཨིན༌ཁན༌བོ༌ ཏམ༌པའེ༌ ཐུག༌ཉིད༌དི༌ སྟན༌ཏེ༌,
ཕོ༌ཉ༌གུན༌ནི༌ ཇལ༌།
ཡང༌ གྱལ༌ཁམས༌གུན༌ནི༌ ནང༌ང༌ ཤད༌ཏེ༌
ཇིག༌རྟེན༌ གང༌པོའེ༌ ནང༌ང༌ མི༌ མང༌པོ༌ཞིག༌གི༌ ཁོང༌ང༌ ཏད༌པ༌ ཅོས༌།
ཡང༌ ནམ༌ཁའེ༌ ནང༌ང༌ ཟིར༌རྗིད༌ ཉམ༌པོ༌ ཁྱེར༌ར༌ ཛད༌ཏེ༌ ཨིན༌།