ཏི༌མོ༌ཐིའ༌ པ༌འུ༌ལུའི༌ ཆག༌བྲིས༌ ཏང༌པོ༌།
པ༌འུ༌ལུའི༌ ཆོགས༌ནེ༌ ཇུ༌ ཞུས༌།
1:1-11
1
ང༌དང༌གུན༌ནི༌ སྐྱབ༌གོན༌ དཀོན༌མཆོག༌ དང༌ ང༌དང༌གུན༌ལ༌ རེ༌ཝ༌ སལ༌ཁན༌ནི༌ མ༌ཤི༌ཀ༌ ཡེ༌ཤུའི༌,
ང༌ པ༌འུ༌ལུ༌ མ༌ཤི༌ཀ༌ ཡེ༌ཤུའི༌ སྐུ༌ཚབས༌ལ༌ སྐོའ༌ ཛདས༌།
2 ངའེ༌ ཏད༌པའེ༌ ནང༌ང༌ དེན༌བའེ༌ བུ༌ཚ༌ ཨིན༌ཁན༌ནི༌ ཏི༌མོ༌ཐི༌ ཁྱོ༌རང༌ང༌ བྲིའད༌།
དཀོན༌མཆོག༌ ཡབ༌ དང༌ ང༌དང༌གུན༌ནི༌ གཙོ༌བོ༌ ཡེ༌ཤུ༌ མ༌ཤི༌ཀའེ༌ ཁྱོ༌རང༌ང༌ ཐུག༌རྗེ༌,
སྙིང༌རྗེ༌ དང༌,
ཞི༌དེ༌ སལ༌ལ༌ ཛད༌ཤིག༌།
3 ང༌ མ༌ཀེ༌དོ༌ནི༌ཡཱ༌ ཆ༌ ཟ༌ནེ༌,
ངའེ༌ ཁྱོ༌རང༌ང༌ ཨེ༌ཕེ༌སས༌སི༌ ནང༌ང༌ དུག༌ཅེས༌ དང༌ དཀོན༌མཆོག༌གི༌ སྐོར༌ལ༌ ཟུས༌མ༌ ལབ༌ཞ༌ ཏང༌ཁན༌གུན༌ སྒག༌ཅེས༌ལ༌ མ༌སྲན༌ཏྲེ༌ སྤོས༌པ༌ ཏངས༌པིན༌།
4 ཡང༌ ཟུས༌མའེ༌ རུངས༌ དང༌ ཁོ༌རང༌གུན༌ནི༌ པུར༌གྱུད༌དི༌ ཐོ༌རིང༌མོ༌ གུན༌ནི༌ སྐོར༌ལ༌ གྲབས༌ ཅོ༌ཨིན༌ ཏུས༌ གོད༌ལ༌ མི༌ཏང༌ཅེས༌ལ༌ བཀའ༌ ཏོང༌།
ཏེ༌ ལས༌གུན༌ནི༌ མི༌གུན༌ལ༌ དཀོན༌མཆོག༌གི༌ ཕིའ༌ ཏད༌པ༌ཅན༌ནི༌ མི༌ཚེ༌ཞིག༌ ཕུད༌ཅེས༌སི༌ ནང༌ང༌ རོགས༌ ཅོའ༌ མ༌ནོག༌,
ཨིན༌ནའང༌ ཏོན༌མེད༌དི༌ ཛིང༌མོ༌ ཆ༌ཅུག༌ག༌ནོག༌།
5 ངའེ༌ ལབ༌ཞའེ༌ མིག༌ཞི༌བོ༌ ནི༌ ཏད༌པ༌ ཡོད༌ཁན༌ ཚང༌མ༌ སྙིང༌ ཟང༌པོ༌,
སེམས༌ ལག༌མོ༌ དང༌ དེན༌བའེ༌ ཏད༌པ༌ གུན༌ནེ༌ ཡོང༌ཁན༌ནི༌ ཡ༌ཤའེ༌ གངས༌ཅེས༌པོ༌ ཨིན༌།
6 ཨིན༌ནའང༌ འི༌ ཟུས༌མའེ༌ ལོབ༌བོན༌གུན༌ནི༌ ཏེ༌ ལབ༌ཞ༌ ཟང༌པོ༌ ཚང༌མ༌ལ༌ གྱབ༌ ལོགས༌ཏེ༌ ཏོན༌མེད༌དི༌ གོར༌གྱན༌གུན༌ནི༌ཀ༌ གྲོས༌དུར༌ ཅོ༌རུག༌།
7 ཆོས༌ཁྲིམས༌ལ༌ ཁས༌པའེ༌ ལོབ༌བོན༌གུན༌ གྱུར༌ཅེས༌སི༌ དོད༌པ༌ ཉམ༌པོ༌,
ཁོང༌གུན༌ནི༌ ཏེ༌གུན༌ ཐེ༌ཚོམས༌ མེད༌པ༌ ཤད༌ནའང༌,
ངོས༌པོའ༌ ཁོང༌གུན༌ནི༌ ཤད༌ཁན༌བོ༌ ཁོ༌རང༌གུན༌ལ༌ ཧ༌མ༌གོའ༌ ཨིན༌ནོག༌།
8 ཀལ༌ཏེས༌ ཆོས༌ཁྲིམས༌པོ༌ དཀོན༌མཆོག༌གི༌ ཐབས༌ ནང༌ཞིན༌ལ༌ ཀོལ༌ན༌,
ཟང༌པོ༌ ཨིན༌ཁན༌བོ༌ ང༌དང༌གུན༌ལ༌ གྱུས༌ཨིན༌ནོག༌།
9 ཅིའ༌ཟེར༌ན༌ བཀའ༌ཁྲིམས༌པོ༌ ལས༌ ཀྲང༌པོ༌ ཅོ༌ཁན༌གུན༌ནི༌ ཕིའ༌ མ༌ཅོའ༌ ཁྲིམས༌ མེད༌ཁན༌,
གྱབ༌གལ༌ ཅོ༌ཁན༌,
དཀོན༌མཆོག༌གི༌ ཇིགས༌སི༌ ནང༌ང༌ མ༌གྲུལ༌ཁན༌ དང༌ སྡིག༌ཅན༌ གུན༌ མ༌ཚད༌,
ཅའང༌ ཏམ༌པའ༌ མ༌རྩི༌ཁན༌,
ཏམ༌པ༌ གུན༌ རྩོག༌པོ༌ ཅོ༌ཁན༌,
ཨ༌བ༌ ཡ༌ ཨ༌མ༌ སད༌ཁན༌ ཡང༌ མི༌སད༌ཁན༌གུན༌ནི༌ ཕིའ༌ ཅོས༌ཏེ༌ ཨིན༌ནོག༌།
10 བཀའ༌ཁྲིམས༌པོ༌ ལུས༌བྲེལ༌ ངན༌པ༌ ཅོ༌ཁན༌,
བུ༌ཚ༌ དང༌ བུ༌ཚའེ༌ པར༌ལ༌ ཡ༌ བུ༌མོ༌ དང༌ བུ༌མོའེ༌ པར༌ལ༌ ལུས༌བྲེལ༌ ཅོ༌ཁན༌གུན༌,
ཚེ༌ཡོག༌གི༌ ཕིའ༌ མི༌གུན༌ ཙོང༌ཁན༌,
ཟུན༌ཇན༌,
ཁྲིམས༌ཁུང༌ངི༌ ནང༌ང༌ སྤང༌པོ༌ ཟུན༌བ༌ ཏང༌ཁན༌ དང༌ ལབ༌ཞ༌ ཟང༌པོའེ༌ གྱབ༌གལ༌ ཅོ༌ཁན༌གུན༌ནི༌ ཕིའ༌ ཨིན༌ནོག༌།
11 ཁོང༌གུན༌ནི༌ གྱབ༌གལ༌ ཅོ༌ཁན༌ནི༌ ལབ༌ཞ༌ ཟང༌པོ༌གུན༌,
ཟིར༌རྗིད༌ཅན༌ནི༌ གའ༌མོའེ༌ ནས༌ཚུལ༌ནེ༌ ཇུང༌ང༌ནོག༌,
ཀ༌བོ༌ ཅིན༌ལབས༌ཅན༌ནི༌ དཀོན༌མཆོག༌གི༌ ངའེ༌ ལག༌ག༌ སྟད༌ད༌ ཛད༌ཏེ༌ ཨིན༌།
དཀོན༌མཆོག༌གི༌ སྙིང༌རྗེའེ༌ ཕིའ༌ ཐུག༌རྗེ༌ཆེ༌ ཞུས༌།
1:12-17
12 མ༌ཤི༌ཀ༌ ཡེ༌ཤུ༌ ང༌དང༌གུན༌ནི༌ གཙོ༌བོའེ༌ ངའ༌ ཁོང༌རང༌ངི༌ ཆག༌ལས༌གུན༌ ཛད༌ཅེས༌ལ༌ སྟོབས༌ སལ༌ལ༌ ཛདས༌,
ཁོང༌ང༌ ངའེ༌ ཐུག༌རྗེ༌ཆེ༌ ཞུའད༌།
ཁོང༌ངི༌ ངའ༌ ལོ༌ཁྱེལ༌ཅན༌ནི༌ མི༌ཞིག༌ རྩིའ༌ ཛད༌ཏེ༌ ཁོང༌རང༌ང༌ ཞབས༌ཏོག༌ ཞུ༌ཅེས༌སི༌ ཕིའ༌ སྐོའ༌ ཛདས༌།
13 ཞན༌ ངའ༌ དད༌ལོག༌ ཞུ༌ཁན༌,
ཏད༌པ༌ཅན༌གུན༌ལ༌ ནགས༌སྟན༌ཏེ༌ ནོད༌སྐྱལ༌ཁན༌ ཨིན༌ཏེའང༌,
དཀོན༌མཆོག༌ག༌ ངའེ༌ཀ༌ སྙིང༌རྗེ༌ སྐྱེའ༌ ཛདས༌,
ཅིའ༌ཟེར༌ན༌ ཏེ༌གུན༌ ངའེ༌ མ༌ཤི༌ཀ༌ ཏད༌པ༌ མ༌ཅོ༌ཁན༌ དང༌ དེན༌བའེ༌ ལབ༌ཞ༌ གུན༌ མ༌ཤེས༌ཁན༌ འིན༌ནི༌ ཏུས༌ལ༌ ཅོས༌ཏེ༌ ཨིན༌པིན༌།
14 འོ༌,
ང༌དང༌གུན༌ནི༌ གཙོ༌བོ༌,
ཙམ༌ཤིག༌གི༌ སྙིང༌ ཕེས༌ཏེ༌ སལ༌ཁན༌ དང༌ ཐུག༌རྗེ༌ཅན༌ཞིག༌ ཞུགས༌ཏེ༌ མི༌རུག༌།
ཁོང༌ངི༌,
ངའ༌ མ༌ཤི༌ཀ༌ ཡེ༌ཤུ༌ནེ༌ ཇུང༌ཁན༌ནི༌ ཏད༌པ༌ དང༌ ཅེས༌པའེ༌ སྐང༌ང༌ ཛདས༌།
15 འི༌ ཞལ༌ཏ༌གུན༌ དེན༌བ༌ ཨིན༌པ༌,
མི༌ཚང༌མའེ༌ ཏེ༌གུན༌ནི༌ཀ༌ ཨིད༌ཤེས༌ ཅོ༌གོས༌ཤེས༌ ཨིན༌ནོག༌,
“མ༌ཤི༌ཀ༌ ཡེ༌ཤུ༌ འི༌ ཇིག༌རྟེན༌ནི༌ ནང༌ང༌ སྡིག༌ཅན༌གུན༌ སྐྱོབ༌བ༌ལ༌ སྐྱོདས༌།”
ཏེ༌ སྡིག༌ཅན༌གུན༌ནི༌ ཕྲོ༌ནེ༌ ངའ༌ ཚང༌མའེ༌སང༌ ཐུ༌ཤོག༌པོ༌ ཨིན༌པིན༌།
16 ཨིན༌ནའང༌ མ༌ཤི༌ཀ༌ ཡེ༌ཤུའི༌ ཁོང༌རང༌ངི༌ ཟོད༌སེམས༌ ཆེན༌མོའེ༌ སྤེ༌ཞིག༌གི༌ ཚུལ༌ལ༌ ངའ༌,
སྡིག༌ཅན༌ ཐུ༌ཤོག༌པོ༌ ཀོལ༌ལ༌ ཛད༌ཅེས༌སི༌ ཕིའ༌ དཀོན༌མཆོག༌གི༌ ངའེ༌ཀ༌ སྙིང༌རྗེ༌ སྐྱེའ༌ ཛདས༌།
ཏེ༌ སྤེ༌བོའེ༌ ཡེ༌ཤུའི༌ཀ༌ ཏད༌པ༌ ཅོ༌ན༌,
ཐའ༌མེད༌པའེ༌ མི༌ཚེ༌ ཐོབ༌ཐུབ༌ཅེས༌པོ༌ ཞན༌མ༌གུན༌ལ༌ ཧ༌གོ༌ཐུབ༌ཨིན༌།
17 ཁོང༌ ནི༌ ཐའ༌མེད༌པའེ༌ གྱལ༌པོ༌,
ཇལ༌ མ༌ཇལ༌ཁན༌,
མ༌ནེ༌ མི༌ཀྲོངས༌ཁན༌,
ཡང༌ ཁོང༌རང༌ ཅིག༌པོ༌ དཀོན༌མཆོག༌ ཞུགས༌ཏེ༌ ཨིན༌ནོག༌།
ཁོང༌ང༌ རྩི༌ཝ༌ དང༌ སྤལ༌ གུན༌,
ཏུས༌གྱུན༌ནེ༌གྱུན༌ ཐོབ༌ཤིག༌།
ཨ༌མེན༌།
ཏི༌མོ༌ཐིའི༌ ཁག༌གུན༌།
1:18-20
18 ངའེ༌ བུ༌ཚ༌ ཏི༌མོ༌ཐི༌,
ཁྱོ༌རང༌ངི༌ སྐོར༌ལ༌ སྔུན༌ལ༌ ལུང༌སྟན༌ ཤད༌ཁན༌ ནང༌ཞིན༌,
ངའེ༌ འི༌ ལབ༌ཞ༌གུན༌ ཁྱོ༌རང༌ང༌ ཏང༌ངད༌།
འི༌ ལབ༌ཞ༌གུན༌ནི༌,
ཁྱོ༌རང༌ང༌ གཙོ༌བོའེ༌ མག༌ཐབས༌སི༌ ནང༌ང༌ གྱལ༌ཁའ༌ ཐོབ༌ཅེས༌ལ༌ རོགས༌ ཐོབ༌ཤིག༌།
19 མ༌ཤི༌ཀའེ༌ ནང༌ང༌ ཁྱོ༌རང༌ངི༌ ཏད༌པ༌བོ༌ སྟན༌པོ༌ ཐམས༌ཏེ༌ དུག༌,
ཡང༌ ཁྱོ༌རང༌ངི༌ སེམས༌ ནོངས༌མེད༌ བོར༌,
ཅིའ༌ཟེར༌ན༌ མི༌ ཁ༌ཅིག༌གི༌ འི༌ ལབ༌ཞ༌བོ༌ ཕངས༌པ༌,
ཁོང༌གུན༌ནི༌ ཏད༌པ༌བོ༌ ཁྲེས༌ཏོར༌ སོང༌ཏེ༌ ཨིན༌ནོག༌།
20 ཧེ༌མི༌ན༌ཡུས༌ དང༌ ཨ༌ལེག༌ཟན༌དེར༌ ཉིས༌ཀོ༌,
ཏེ༌བོའེ༌ སྤེ༌ཞིག༌ ཨིན༌ནོག༌།
ཁོང༌གུན༌ལ༌ དཀོན༌མཆོག༌ག༌ དད༌ལོག༌ མི༌ཅོ༌ཅེས༌པོ༌ ཧ༌གོ༌ཅེས༌སི༌ ཕིའ༌,
ངའེ༌ ཁོང༌གུན༌ ཆོས༌ཚོགས༌སི༌ ཕྲོ༌ནེ༌ ཕིངས༌ཏེ༌ ཤེ༌ཏན༌ནི༌ ལག༌ག༌ སྟད༌པིན༌།