གཙོ༌བོ༌ ཡེ༌ཤུ༌ ཕེབས༌ཤེས༌སི༌ ཏུས༌སི༌ ཕིའ༌ གྲལ༌གྲིག༌ དུག༌ཅེས༌།
5:1-11
5
ཅེས༌པའེ༌ སྤུན༌གུན༌,
ཏ༌ གཙོ༌བོ༌ ཡེ༌ཤུ༌ ལོགས༌ཏེ༌ ཕེབ༌ཤེས༌སི༌ ཏུས༌པོ༌,
ནམ༌ ཇུང༌ཨིན༌ ཏེ༌བོའེ༌ སྐོར༌ལ༌ ཁྱོ༌ཞ༌གུན༌ལ༌,
བྲི༌གོས༌ མེད༌པ༌ ཨིན༌ནོག༌།
2 ཅིའ༌ཟེར༌ན༌ གཙོ༌བོ༌ ཕེབ༌ཤེས༌སི༌ ཞག༌པོ༌ ཚན༌ལ༌ རྐུན༌མ༌ ཡོང༌ཁན༌ ཙོགས༌ལ༌ གྱུས༌ མེད༌པ༌ ཡོང༌ཅེས༌པོ༌ ཁྱོ༌ཞའ༌ སལ༌པོ༌ གྱུས༌ཨིན༌ནོག༌།
3 མི༌གུན༌ནི༌,
“འི༌ ཏུས༌པོ༌ ཞི༌དེ༌ཅན༌ དང༌ ཇིགས༌པ༌ མེད༌ཁན༌ དུག༌” ཟེར༌ཨིན༌ ཡོད༌ཏུས༌,
ཧུན༌མེད༌ལ༌ ཏེ༌གུན༌ནི༌ཀ༌ སྐྱེན༌ངན༌ ཡོང༌ཨིན༌,
ཀ༌ཟུག༌ ཕྲུ༌གུ༌ ཇོར༌ཅེས༌ཅན༌ནི༌ བུ༌མོའ༌ སྐྱེ༌ཟེར༌ ཏང༌ངད༌,
ཁོང༌གུན༌ ཏན༌ཏན༌ལ༌ ཏེ༌ཀ༌ནེ༌ མི༌ཐར༌།
4 ཨིན༌ནའང༌ ཅེས༌པའེ༌ སྤུན༌གུན༌,
ཁྱོ༌ཞ༌གུན༌ མུན༌གྲིག༌གི༌ ནང༌ང༌ གྱུས༌མེད༌ཁན༌གུན༌ ཙོགས༌ལ༌ དུགས༌ཏེ༌ མན༌ པ༌སང༌,
རྐུན༌མ༌ ཙོགས༌ལ༌ ཏེ༌ ཞག༌པོ༌ ལེབ༌ ཟ༌ནེ༌,
ཁྱོ༌ཞ༌གུན༌ ཧ༌ མི༌ལས༌།
5 ང༌དང༌གུན༌ ཚན༌ ཡ༌ མུན༌གྲིག༌གི༌ ཕྲུ༌གུ༌ མན༌པ༌,
ཁྱོ༌ཞའ༌ ཚང༌མ༌ འོད༌ དང༌ ཉི༌མའེ༌ ཕྲུ༌གུ༌ ཨིན༌ནོག༌།
6 ཏེ༌བོའེ༌ཕིའ༌ ཏ༌ ང༌དང༌གུན༌ ཤང༌ ཅོས༌ཏེ༌ ཞན༌མ༌གུན༌ ཙོགས༌ལ༌ ཉིད༌ལོགས༌ཏེ༌ མ༌དུག༌ག༌,
རང༌སེམས༌ ཅུན༌ཐུབ༌ཁན༌ རིག༌ ཡོང༌གོ༌ཤེས༌ ཨིན༌ནོག༌།
7 ཉིད༌ ཏང༌ཁན༌གུན༌ ཚན༌ལ༌ ཉིད༌ ཏང༌ང༌ནོག༌,
ཡང༌ ར༌རོས༌ཁན༌གུན༌ ཚན༌ལ༌ ར༌རོས༌ས༌ནོག༌།
8 ཨིན༌ནའང༌ ང༌དང༌གུན༌ འོད༌དི༌ ཨིན༌ པ༌སང༌,
ང༌དང༌གུན༌ནི༌ རང༌སེམས༌ ཅུན༌ཤིག༌,
ཡང༌ ཏད༌པ༌ དང༌ ཅམས༌པ༌ གུན༌ ཀྲང༌ང༌ ཀབ༌ཅེས༌སི༌ མག༌ཆ༌,
ཡང༌ ཐར༌པ༌ ཐོབ༌ཅེས༌སི༌ རེ༌ཝ༌ ཏན༌ཏན༌བོ༌ ལྕགས༌སི༌ ཏི༌བི༌ ཙོགས༌ལ༌ གོན༌ཨིན༌།
9 ཅིའ༌ཟེར༌ན༌ དཀོན༌མཆོག༌གི༌ ང༌དང༌གུན༌ ཆད༌པའེ༌ ཕིའ༌ ལྡམ༌མ༌ མ༌ཛད༌ད༌,
ང༌དང༌ངི༌ གཙོ༌བོ༌ ཡེ༌ཤུ༌ མ༌ཤི༌ཀ༌ གྱུད༌ཏེ༌ ཐར༌པ༌ ཐོབ༌ཅེས༌ལ༌,
ལྡམ༌མ༌ ཛད༌ཏེ༌ ཨིན༌ནོག༌།
10 ང༌དང༌ངི༌ ཕིའ༌ ཡེ༌ཤུ༌ ཀྲོངས༌།
ང༌དང༌ ཤི༌ཏེ༌ ཡོད༌གྲོ༌ ཡ༌ སོན༌ཏེའ༌ ང༌དང༌ང༌ ཁོང༌ ཉམ༌པོ༌ ཏུས༌གྱུན༌ མི༌ཚེ༌ ཕུད༌ཉན༌ཅེས༌སི༌ གྱུན༌ཚན༌བོའེ༌ ཕིའ༌,
ཁོང༌ ཀྲོངས༌།
11 ཏེ༌བོའེ༌ཕིའ༌ ཁྱོ༌ཞའེ༌ ཅིག༌ དང༌ ཅིག༌ག༌ སྤོས༌པ༌ ཏངས༌ཏེ༌,
གཙོ༌བོ༌ ཡེ༌ཤུའི༌ ནང༌ང༌ ཁོང༌གུན༌ནི༌ ཏད༌པ༌ སྐྱེད༌ལ༌ ཁྱོང༌,
ཀ༌ཟུག༌ ཁྱོ༌ཞའེ༌ ཅོ༌ཨིན༌ཞིག༌ ཨིན༌ནོག༌།
པ༌འུ༌ལུའི༌ སྟིང༌ཇུག༌གི༌ ལབ༌ཞ༌།
5:12-28
12 ཅེས༌པའེ༌ སྤུན༌གུན༌,
གཙོ༌བོ༌ ཡེ༌ཤུའི༌ ཞབས༌ཏོག༌ ཞུ༌ཁན༌ནི༌ འུ༌སྐྱོང༌གུན༌ལ༌ རྩི༌ཝ༌ ཅོ༌ཅེས༌ལ༌ ཞུའད༌,
ཀ༌གུན༌ནི༌ ཁྱོ༌ཞའེ༌ ཕྲོའ༌ རྩོན༌གྲུས༌ སྲན༌ཏྲེ༌ ཅོ༌ཨིན༌ ཁྱོ༌ཞའ༌ སྡིག༌པ༌ མི༌ཅོ༌ཅེས༌ལ༌ སྤང༌པུད༌ད༌ནོག༌།
13 འོ༌ན༌,
ཁོང༌གུན༌ནི༌ རྩོན༌གྲུས༌སི༌ ལས༌གུན༌ ཐོང༌ཏེ༌ ཁོང༌གུན༌ལ༌ གྱས༌པ༌ རྩི༌ཝ༌ དང༌,
སྙིང༌ནེ༌ ཅམས༌པ༌ ཅོ༌ཤིག༌,
ཡང༌ ཅིག༌ དང༌ ཅིག༌ ཐུན༌ཏེ༌ དུག༌ཤིག༌།
14 ཅེས༌པའེ༌ སྤུན༌གུན༌ ཁྱོ༌ཞ༌གུན༌ལ༌,
ང༌ཞའེ༌ སྤོས༌པ༌ ཏང༌ཨིན༌ ཞུའད༌,
ལས༌མི༌ལམ༌ཁན༌གུན༌ལ༌ སྤང༌པུད༌ཤིག༌,
སྙིང༌སྟོབས༌ མེད༌ཁན༌གུན༌ལ༌ སྤོས༌པ༌ ཏོང༌ཤིག༌,
ཉམས༌ཆུང༌གུན༌ལ༌ རོགས༌ ཅོ༌ཤིག༌,
ཡང༌ ཚང༌མ༌ ཉམ༌པོ༌ ཟོད༌པ༌ བོར༌ཤིག༌།
15 སུ༌ཞིག༌གའང༌ ངན༌པའེ༌ ལན༌ལ༌ ངན༌པ༌ ཅོ༌ མ༌ཅུག༌ཤིག༌,
ཅིག༌ དང༌ ཅིག༌ག༌ མ༌ཚད༌,
ཞན༌ ཚང༌མ༌ ཉམ༌པོའང༌ ཏུས༌གྱུན༌ ཟང༌པོ༌ ཅོ༌ཅེས༌སི༌ རྩོན༌གྲུས༌ ཅོ༌ཤིག༌།
16 ཏུས༌གྱུན༌ གའ༌མོ༌ དུག༌ཤིག༌།
17 ཆད༌མེད༌ལ༌ མོས༌ལམ༌ ཞུ༌ཨིན༌ དུག༌ཤིག༌།
18 ནས༌ལུག༌ ཚང༌མའེ༌ ནང༌ང༌ དཀོན༌མཆོག༌ག༌ ཐུག༌རྗེ༌ཆེ༌ ཞུ༌ཤིག༌,
ཅིའ༌ཟེར༌ན༌ ཁྱོ༌ཞའེ༌ མ༌ཤི༌ཀ༌ ཡེ༌ཤུ༌ ཉམ༌པོ༌ མི༌ཚེའེ༌ ནང༌ང༌,
འི༌གུན༌ དཀོན༌མཆོག༌གི༌ ཐུག༌གོངས༌ ཨིན༌ནོག༌།
19 ཁྱོ༌ཞའེ༌ སྙིང༌ངི༌ ནང༌ང༌ ཏམ༌པའེ༌ ཐུག༌ཉིད༌དི༌ ཆག༌ལས༌གུན༌ལ༌ སྒག༌ཞའ༌ མ༌ཏང༌ཤིག༌།
20 ལུང༌སྟན༌གུན༌ལ༌ རྩི༌ཝ༌ མ༌ཏང༌ང༌ སྣང༌མེད༌ མ༌ཅོ༌ཤིག༌།
21 ལུང༌སྟན༌ ཚང༌མ༌ལ༌ སྟག༌ཅད༌ ཅོ༌ཤིག༌།
དེན༌བའེ༌ ལུང༌སྟན༌གུན༌ནི༌ཀ༌ སྟན༌པོ༌ ཐམས༌ཏེ༌ དུག༌ཤིག༌།
22 ལས༌ ངན༌པའེ༌ རིགས༌ ཚང༌མ༌ནེ༌ ཐག༌རིང༌ང༌ དུག༌ཤིག༌།
23 ཏ༌ ང༌དང༌ང༌ ཞི༌དེ༌ སལ༌ཁན༌ནི༌ དཀོན༌མཆོག༌གི༌ ཁྱོ༌ཞ༌གུན༌ལ༌ ཅི༌ས༌ཐོག༌ནེ༌ ཏམ༌པ༌ ཛད༌ཤིག༌།
ཡང༌ ང༌དང༌ངི༌ གཙོ༌བོ༌ ཡེ༌ཤུ༌ མ༌ཤི༌ཀ༌ ལོགས༌ཏེ༌ ཕེབས༌ཕེབས༌ ཚོག༌པ༌,
ཁྱོ༌ཞའེ༌ སེམས༌ཉིད༌,
སེམས༌ དང༌ ཟུགས༌པོ༌ ཚང༌མ༌,
སྐྱོན༌མེད༌ བོར༌ར༌ ཛད༌ཤིག༌།
24 ཁྱོ༌ཞའ༌ བོད༌ད༌ ཛད༌ཁན༌ནི༌ དཀོན༌མཆོག༌ ནི༌ ཨིད༌ཤེས༌ཅན༌ ཨིན༌ནོག༌,
ཡང༌ ཁོང༌ངི༌ ཏེ༌ ཚང༌མ༌ ཅོའ༌ ཛད༌ཨིན༌།
25 ཅེས༌པའེ༌ སྤུན༌གུན༌,
ང༌ཞའེ༌ ཕིའ༌ མོས༌ལམ༌ ཞུས༌ཤིག༌།
26 ཅམས༌པ༌ ཉམ༌པོ༌ ཅེས༌པའེ༌ སྤུན༌ ཚང༌མ༌ལ༌ ཇུ༌ ཞུས༌།
27 ང༌,
པ༌འུ༌ལུའི༌ ཁྱོ༌ཞ༌གུན༌ལ༌,
གཙོ༌བོའེ༌ ཝང༌ངི༌ ནང༌ང༌ འི༌ ཨི༌གེ༌བོ༌ ཅེས༌པའེ༌ སྤུན༌ ཚང༌མའེ༌ དུན༌ལ༌ སིལ༌ཅེས༌ལ༌ བཀའ༌ ཏང༌ངད༌།
28 ང༌དང༌ངི༌ གཙོ༌བོ༌ ཡེ༌ཤུ༌ མ༌ཤི༌ཀའེ༌ ཐུག༌རྗེ༌ ཁྱོ༌ཞའ༌ ཉམ༌པོ༌ ལུས༌ཤིག༌།