མ༌ཤི༌ཀའེ༌ ནང༌ང༌ རང༌ཝང༌
5:1-15
5
རང༌ཝང༌ངི༌ ནང༌ང༌ དུག༌ཅེས༌སི༌ ཕིའ༌ མ༌ཤི༌ཀའེ༌ ང༌དང༌གུན༌ ཐར༌ ཅུག༌ག༌ ཛདས༌།
ཏ༌ སྟན༌པོ༌ དུག༌ཤིག༌།
ཡང༌སྐྱར༌ ལྕིན༌ཏྲེ༌ ཁྲིམས༌སི༌ ཉ༌ཤིང༌བོ༌ ཁུར༌ཏེ༌ ཏེ༌བོའེ༌ ཚེ༌ཡོག༌ གྱུར༌ མ༌ཅུག༌ཤིག༌།
2 ཉོན༌ཤིག༌,
ང༌ པ༌འུ༌ལུའི༌ ཁྱོ༌ཞ༌གུན༌ལ༌ འི༌བོ༌ ཤད༌དད༌,
ཀལ༌ཏེས༌ ཁྱོ༌ཞ༌གུན༌ནི༌ ཁྱོ༌ཞ༌རང༌ང༌ སུན༌ནད༌ ཅོ༌ཅུག༌གད༌ན༌,
ཏེ༌ནེ༌ མ༌ཤི༌ཀའེ༌ ཀ༌ནེ༌ ཡོང༌ཁན༌ནི༌ ཕན༌ཐོགས༌པོ༌ ཁྱོ༌ཞ༌གུན༌ལ༌ མི༌ཐོབ༌།
3 ངའེ༌ ཡང༌སྐྱར༌ སྤང༌པུད༌དད༌,
ཀལ༌ཏེས༌ ཁྱོ༌ཞ༌གུན༌ནི༌ སུན༌ནད༌ ཅོ༌ཅུགས༌ཏེ༌ དཀོན༌མཆོག༌གི༌ ཆོག༌སྐྱོར༌ ཙལ༌ཅེས༌ ཅོའད༌ན༌,
ཏེ༌ནེ༌ ཁྱོ༌ཞ༌གུན༌ནི༌ མོ༌ཟེས༌སི༌ ཁྲིམས༌ ཚང༌མ༌ སྲུང༌གོས༌།
4 ཁྲིམས༌པོ༌ སྲུངས༌ཏེ༌ དཀོན༌མཆོག༌གི༌ སྐུན༌དུན༌ལ༌ ཀྲང༌པོ༌ གྱུར༌ ཉན༌ན༌ནོག༌ སམ༌ཁན༌ ཁྱོ༌ཞ༌གུན༌ནི༌,
བྲེལ༌བོ༌ མ༌ཤི༌ཀ༌ ཉམ༌པོ༌ ཆད༌ཏེ༌ ཨིན༌ནོག༌།
ཁྱོ༌ཞ༌གུན༌ དཀོན༌མཆོག༌གི༌ ཐུག༌རྗེ༌ནེ༌ ཐག༌རིང༌ང༌ སོང༌ཏེ༌ ཨིན༌ནོག༌།
5 ཨིན༌ནའང༌ ཏ༌ ང༌དང༌ ཐུག༌ཉིད༌དི༌ ནང༌ཞིན༌ མི༌ཚེ༌ ཕུད༌ཁན༌གུན༌ནི༌,
དཀོན༌མཆོག༌གི༌ ཞལ༌ཆད༌ ཛད༌ཁན༌ནི༌ ཀྲང༌པོ༌བོ༌,
ཏད༌པ༌ གྱུད༌ཏེ༌ ཐོབ༌ཅེས༌ལ༌ རིངས༌ཨིན༌ཞིག༌ ཨིན༌ནོག༌།
6 ང༌དང༌གུན༌ནི༌ བྲེལ༌ མ༌ཤི༌ཀ༌ ཡེ༌ཤུ༌ ཉམ༌པོ༌ ཡོད༌ པ༌སང༌,
སུན༌ནད༌ ཅོ༌ཁན༌ ཡ༌ མ༌ཅོ༌ཁན༌ནི༌ ནང༌ང༌ ཅའང༌ ཁྱད༌ མེད༌པ༌ ཨིན༌ནོག༌།
ཁག༌ཅན༌ ནི༌,
ཏད༌པ༌བོ༌ ཅེས༌པའེ༌ ནང༌ང༌ སྟན༌ཅེས༌པོ༌ ཨིན༌ནོག༌།
7 ཁྱོ༌ཞ༌གུན༌ནི༌ མི༌ཚེའེ༌ བང༌གྱུགས༌པོ༌ མ༌ གྱལ༌ལ༌ ཅོས༌ཏེ༌ ཏང༌ངད༌པིན༌།
ཏ༌ སུའི༌ ཁྱོ༌ཞ༌གུན༌ལ༌ དེན༌བའེ༌ གྱབ༌ནེ༌ གྲུལ༌ཅེས༌སི༌ ནང༌ང༌ སྒག༌ཞའ༌ ཏངས༌།
8 ཏེ༌ ཁའ༌ལྕེ༌ ཏང༌ཅེས༌པོ༌ ནི༌ ཏན༌ཏན༌ལ༌ ཁྱོ༌ཞ༌གུན༌ རང༌ཝང༌ངི༌ ནང༌ང༌ དུག༌ཅེས༌ལ༌ བོད༌ད༌ ཛད༌ཁན༌ དཀོན༌མཆོག༌གི༌ ཆོགས༌ནེ༌ མ༌ནོག༌།
9 འི༌ ཟུས༌མའེ༌ ལབ༌ཞ༌བོ༌ ནི༌,
པག༌པའེ༌ གང༌པོའེ༌ ནང༌ང༌ སྐྱུར༌ ཡོང༌ཅུག༌ཁན༌ནི༌ ཏེ༌ སྐྱུར༌ ཆུ༌ངུན༌ ཙོགས༌ ཨིན༌ནོག༌།
10 ངའེ༌ གཙོ༌བོའེ༌ ནང༌ང༌ ཨིད༌ཤེས༌ ཅོའད༌,
ཁོང༌ངི༌ ཁྱོ༌ཞ༌གུན༌ལ༌,
ང༌ཞའེ༌ ལབ༌ཁན༌ མན༌པ༌,
ཞན༌ སོ༌སོ༌ ལབ༌ཞའ༌ ཏད༌པ༌ ཅོ༌ཅེས༌ནེ༌ ཐག༌རིང༌ང༌ བོར༌ར༌ ཛད༌ཨིན༌།
ཁྱོ༌ཞའ༌ གོབ༌སྐོར༌ཁན༌བོ༌ སུ༌ཞིག༌ ཨིན༌ནའང༌,
དཀོན༌མཆོག༌གི༌ ཁྲིམས༌ཅད༌ སལ༌ལ༌ ཛད༌ཨིན༌།
11 ཅེས༌པའེ༌ སྤུན༌གུན༌,
ཀལ༌ཏེས༌ ངའེ༌ སུན༌ནད༌ ཅོ༌གོས༌ ཟེར༌ཏེ༌ ཏ༌རུང༌ངའང༌ ལབ༌བད༌ན༌,
༼ཀ༌ཟུག༌ ཁ༌ཅིག༌གི༌ ངའེ༌ ཅོ༌རུག༌ ཟེར༌ར༌ནོག༌༽,
ཏེ༌ནེ༌ ཅི༌ཕིའ༌ ཏ༌རུང༌ངའང༌ ངའ༌ ནགས༌བར༌དོ༌ ཐོང༌ཨིན༌ ཨིན༌ནོག༌?
ཀལ༌ཏེས༌ ངའེ༌ མ༌ཤི༌ཀའེ༌ རྐྱང༌ཤིང༌ གྱུད༌ཏེ༌ ཐར༌པ༌བོ༌ མ༌ལབས༌པིན༌ན༌,
ཏེ༌ནེ༌ སུ༌ཞིག༌གའང༌ ངའེ༌ཀ༌ སྲོ༌ ཡོངས༌ཏེ༌ མེད༌གྲོ༌།
12 ཁྱོ༌ཞའ༌ ནགས༌ སྟན༌ཁན༌གུན༌ནི༌,
ཁོ༌རང༌གུན༌ལ༌ སུན༌ནད༌ ཅོ༌ ཟ༌ནེ༌ ཁོ༌རང༌ བུ༌ཚ༌ ཨིན༌ཁན༌ནི༌ སྟགས༌པོ༌ གང༌པོ༌ ཅད༌ཤིག༌!
13 ངའེ༌ ཅེས༌པའེ༌ སྤུན༌གུན༌,
ཁྱོ༌ཞ༌གུན༌ རང༌ཝང༌ཅན༌ནི༌ མི༌ཚེའེ༌ ཕུད༌ད༌ལ༌ བོད༌ད༌ ཛད༌ཏེ༌ ཨིན༌ནོག༌།
ཨིན༌ནའང༌ ཏེ༌ རང༌ཝང༌བོ༌ ཁྱོ༌ཞ༌གུན༌ནི༌ སྡིག༌པའེ༌ དོད༌པ༌གུན༌ དྲན༌དྲ༌ གྲུབ༌ཅེས༌སི༌ སྐབས༌ཤིག༌གི༌ ཚུལ༌ལ༌ མ༌ཀོལ༌ཤིག༌།
ཏེ༌ སང༌ཏ༌,
ཏེ༌ རང༌ཝང༌བོ༌ ཁྱོ༌ཞ༌གུན༌ནི༌ ཅིག༌ དང༌ ཅིག༌ག༌ ཅེས༌པའེ༌ ནང༌ང༌ ཞབས༌ཏོག༌ ཞུ༌ཅེས༌སི༌ ཕིའ༌ ཀོལ༌ཤིག༌།
14 ངའེ༌ ཏེ༌བོ༌ ཟེར༌རད༌,
ཅིའ༌ཟེར༌ན༌ ཁྲིམས༌ གང༌པོ༌ འི༌ བཀའ༌ ཅིག༌པོའེ༌ ནང༌ང༌ ལྡུས༌ཏེ༌ ཨིན༌ནོག༌,
“རང༌ང༌ ཅམས༌པ༌ ཅོ༌ཁན༌ ཙོགས༌ ཁྱོ༌རང༌ངི༌ ཁྱིམ༌ཚེས༌པའང༌ ཅམས༌པ༌ ཅོས༌།”a
15 ཨིན༌ནའང༌ ཀལ༌ཏེས༌ ཁྱོ༌ཞ༌གུན༌ནི༌ ཤང༌ཀུ༌ ཙོགས༌ལ༌ ཅིག༌ དང༌ ཅིག༌ག༌ མ༌སྐྱོན༌ ཅོ༌ཅེས༌ དང༌ ནོད༌པ༌ སྐྱལ༌ན༌,
ཤང༌ ཅོ༌ཤིག༌,
ཏེ༌ མ༌ནེ༌ ཁྱོ༌ཞ༌གུན༌ནི༌ ཅིག༌ དང༌ ཅིག༌ ཁྲེས༌ཏོར༌ ཅོ༌ཨིན༌།
ཐུག༌ཉིད༌དི༌ ཝང༌ངི༌ ནང༌ང༌ མི༌ཚེ༌ ཕུད༌ཅེས༌།
5:16-26
16 ངའེ༌ ཟེར༌ཅེས༌པོ༌ ནི༌,
ཏམ༌པའེ༌ ཐུག༌ཉིད༌དི༌ སྟན༌ཁན༌ནི༌ མི༌ཚེའེ༌ ལམ༌བོའེ༌ཀ༌ གྲུལ༌ཤིག༌།
ཏེ༌ནེ༌ ཁྱོ༌ཞ༌གུན༌ནི༌ སྡིག༌པའེ༌ དོད༌པའེ༌ ཅོ༌ཅུག༌ཁན༌ནི༌ ལས༌གུན༌ དྲན༌དྲ༌ གྲུབ༌ མི༌ཅུག༌།
17 སྡིག༌པའེ༌ དོད༌པའེ༌,
ཏམ༌པའེ༌ ཐུག༌ཉིད༌དི༌ དོད༌པའེ༌ གོ༌ལོག༌པོ༌ ཅོའ༌ནོག༌,
ཡང༌ ཏམ༌པའེ༌ ཐུག༌ཉིད༌དི༌ དོད༌པའེ༌,
སྡིག༌པའེ༌ དོད༌པའེ༌ གོ༌ལོག༌པོ༌ ཛད༌ད༌ནོག༌།
འི༌ ཉིས༌ཀོ༌ མ༌ཐུན༌ པ༌སང༌ ཁྱོ༌ཞའ༌ ཐད༌ཁན༌བོ༌ ཅོ༌ཉན༌ན༌ མ༌ནོག༌།
18 ཨིན༌ནའང༌ ཁྱོ༌ཞ༌གུན༌ ཐུག༌ཉིད༌དི༌ ཁྲིད༌ ཟ༌ནེ༌,
ཁྱོ༌ཞ༌གུན༌ མོ༌ཟེས༌སི༌ ཁྲིམས༌སི༌ ཡོག༌ག༌ དུག༌གོས༌ མེད༌པ༌ ཨིན༌ནོག༌།
19 སྡིག༌པའེ༌ དོད༌པའེ༌ ལས༌གུན༌ མ༌ སལ༌པོ༌ ཐོང༌ང༌ནོག༌།
ཏེ༌གུན༌ ལུས༌བྲེལ༌ ངན༌པ༌ ཅོ༌ཅེས༌,
སྕོད༌པ༌ ངན༌པའེ༌ ལས༌གུན༌ ཅོ༌ཅེས༌,
ཐའ༌མེད༌པའེ༌ ལུས༌བྲེལ༌ལི༌ དོད༌པ༌,
20 སྐུན༌དྲའ༌ ཅོལ༌ཅེས༌,
ཆོས༌ངན༌ ཅོ༌ཅེས༌,
ནཕ༌རད༌ ཅོ༌ཅེས༌,
ཛིང༌མོ༌ ཏང༌ཅེས༌,
ཚིག༌ཅེས༌,
མངས༌ཏེའང༌ སྲོ༌ ཡོང༌ཅེས༌,
སྟོད༌པ༌ ཡ༌ རྩི༌ཝའེ༌ དོད༌པ༌ བོར༌ཅེས༌,
ཁོན༌བོར༌ཅེས༌,
པོ༌པུད༌ཅེས༌,
21 ཞན༌མའ༌ ཡོད༌ཁན༌གུན༌ནི༌ དོད༌པ༌ ཅོ༌ཅེས༌,
མུན༌ལ༌ ཆང༌ ཐུང༌ཅེས༌,
གྲོན༌ཏང༌ཨིན༌ ར༌རོས༌ཤེས༌སི༌ ཟས༌གུན༌ ལེན༌ཏེ༌ ཀྲན༌བ༌ སྟོར༌ཅེས༌ དང༌ ཞན༌ཡང༌ འི༌ཙོགས༌སི༌ སྡིག༌པ༌གུན༌།
ངའེ༌ ཁྱོ༌ཞ༌གུན༌ལ༌ ཡང༌སྐྱར༌ སྤང༌པུད༌དད༌,
ཏེ༌ཙོགས༌སི༌ མི༌ཚེ༌ ཕུད༌ཁན༌གུན༌ལ༌ དཀོན༌མཆོག༌གི༌ གྱལ༌སྲིད༌པོ༌ ནོར༌སྐལ༌ལ༌ མ༌ནེ༌ མི༌ཐོབ༌།
22 ཨིན༌ནའང༌ ཏམ༌པའེ༌ ཐུག༌ཉིད༌ནེ༌ སྨིན༌ཁན༌ནི༌ བྲས༌བུ༌ ནི༌,
ཅེས༌པ༌,
སྐྱིད༌པོ༌,
ཞི༌དེ༌,
ཟོད༌པ༌,
ཀའ༌ཀྲིན༌,
ཟང༌པོ༌,
ཨིད༌ཤེས༌ཅན༌,
23 བོལ༌མོ༌ དང༌ རང༌སེམས༌ ཅུན༌ཅེས༌ གུན༌ ཨིན༌ནོག༌།
ཏེ༌ཙོགས༌སི༌ སྕོད༌པ༌གུན༌ནི༌ གྱབ༌གལ༌ལ༌ ཁྲིམས༌ ཅའང༌ མེད༌པ༌ ཨིན༌ནོག༌།
24 མ༌ཤི༌ཀ༌ ཡེ༌ཤུའི༌ ཨིན༌ཁན༌གུན༌ནི༌,
སྡིག༌པའེ༌ དོད༌པ༌ དང༌ དོད༌ཆགས༌ ངན༌པ༌ གུན༌ རྐྱང༌ཤིང༌ངི༌ཀ༌ རྐྱངས༌ཏེ༌ མེད༌ཁན༌ ཅོས༌ཏེ༌ ཨིན༌ནོག༌།
25 ཏམ༌པའེ༌ ཐུག༌ཉིད༌དི༌ ང༌དང༌གུན༌ལ༌ མི༌ཚེ༌ ཕུད༌ཅུག༌ག༌ ཛད༌ པ༌སང༌,
ཐུག༌ཉིད༌དི༌ གྱབ༌ནེ༌ གྲུལ༌ཨིན༌ཞིག༌,
མི༌ཚེ༌ ཁག༌ ཚང༌མ༌ ཁོང༌ང༌ ཁྲིད༌ཅུག༌ཤིག༌།
26 ང༌དང༌གུན༌ ཕོ༌སོ༌ ཚོར༌ མ༌གོས༌,
ཡང༌ ཅིག༌ དང༌ ཅིག༌གི༌ ནང༌ང༌ སྲོ༌ ཡ༌ ཚིག༌ཅེས༌ གུན༌ ཡོང༌ཅུག༌ མ༌གོས༌།