6
ང༌ཞའ༌ དཀོན༌མཆོག༌གི༌ ཕྲོ༌པ༌ ལས༌ ཅོ༌ཁན༌གུན༌ ཨིན༌པ༌,
ང༌ཞའེ༌ ཁྱོ༌ཞ༌གུན༌ལ༌ དཀོན༌མཆོག༌གི༌ ཐུག༌རྗེ༌བོ༌ སྣང༌མེད༌ ཅོས༌ཏེ༌ ཟུར༌ལ༌ ཕང༌ མི༌ཕང༌ཅེས༌ལ༌ ཞུ༌ཝ༌ ཕུལ༌ལད༌།
2 ཅིའ༌ཟེར༌ན༌ དཀོན༌མཆོག༌གི༌ ཏམ༌པའེ༌ སུང༌རབས༌སི༌ ནང༌ང༌ མོལ༌ཏེ༌ ཨིན༌ནོག༌,
“ངའེ༌ ལྡམ༌ཁན༌ནི༌ ཏུས༌པའེ༌ཀ༌
ངའ༌ ཁྱོ༌ཞ༌གུན༌ནི༌ མོས༌ལམ༌གུན༌ ཚོར༌,
ཐར༌པའེ༌ ཞག༌ག༌,
ངའེ༌ ཁྱོ༌ཞ༌གུན༌ལ༌ རོགས༌ ཅོས༌ཏེ༌ ཨིན༌པིན༌།”a
ལྟོས༌སའང༌,
དི༌རིང༌ དཀོན༌མཆོག༌གི༌ ལྡམ༌མ༌ ཛད༌ཁན༌ནི༌ ཏུས༌, དི༌རིང༌ ཐར༌པའེ༌ ཏུས༌པོ༌ ཨིན༌ནོག༌།
པ༌འུ༌ལུའི༌ སྐ༌ལས༌གུན༌།
6:3-13
3 སུ༌ཞིག༌གའང༌ སྒག༌ མི༌གྱབ༌ཅེས༌ ཡང༌ ང༌ཞ༌གུན༌ནི༌ ཞབས༌ཏོག༌ ཞུ༌ཁན༌གུན༌ནི༌ ནང༌ང༌,
སྐྱོན༌ ཕིང༌ མི༌ཐུབ༌ཅེས༌སི༌ མི༌ཚེ༌ཞིག༌,
ང༌ཞ༌གུན༌ནི༌ ཕུད༌དད༌།
4 ང༌ཞ༌གུན༌ནི༌ རྡུག༌ངལ༌,
སྐ༌ལས༌ དང༌,
ཧུན༌མེད༌དི༌ ཇིགས༌པའེ༌ རིགས༌ ཚང༌མའེ༌ ནང༌ང༌ ཟོད༌པ༌ ཉམ༌པོ༌ དོང༌ལེན༌ ཅོ༌ཅེས༌ གྱུད༌ཏེ༌,
ང༌ཞ༌གུན༌ དཀོན༌མཆོག༌གི༌ དེན༌བའེ༌ ཞབས༌ཏོག༌པ༌ ཨིན༌ཁན༌བོ༌ སྟན༌ན༌ནོག༌།
5 སྤེར༌ན༌,
ང༌ཞ༌གུན༌ལ༌ རྡུང༌གྱབ༌ ཏངས༌,
ཙོན༌ཁང༌ངི༌ ནང༌ང༌ ཀགས༌,
སྲོ༌ཡོང༌ཁན༌ནི༌ མི༌ཚོགས༌གུན༌ལ༌ དོང༌ལེན༌ ཅོ༌གོས༌,
ཟུགས༌པོ༌ སིང༌ ངལ༌ངལ༌ ཚོག༌པ༌ ལས༌ ཅོས༌པིན༌,
ཚན༌ གང༌པོ༌ ཉིད༌མེད༌པ༌ ཕུད༌གོས༌ ཡང༌ ཟ༌གྱུ༌ མེད༌པ༌ ལུས༌།
6 ང༌ཞ༌གུན༌ནི༌ ནང༌ང༌ ཡོད༌ཁན༌ནི༌ རྩང༌མ༌,
ཧ༌གོ༌,
ཟོད༌པ༌,
ཐུག༌རྗེ༌,
ཏམ༌པའེ༌ ཐུག༌ཉིད༌,
དེན༌བའེ༌ ཅེས༌པ༌,
7 ཀྲང༌པོ༌ ཤད༌ཅེས༌,
དཀོན༌མཆོག༌གི༌ ཤེད༌དི༌ ནང༌ང༌,
ལག༌པ༌ ཡས༌པ༌ དང༌ ཡོ༌མ༌ ཉིས༌ཀོའེ༌ ནང༌ང༌ ཀྲང༌པོའེ༌ ནོལ༌ཅེས༌སི༌ ལག༌ཆ༌,
ཏེ༌གུན༌ནི༌ ང༌ཞའ༌ དཀོན༌མཆོག༌གི༌ དེན༌བའེ༌ ཞབས༌ཏོག༌པ༌ ཨིན༌ཁན༌བོ༌ སྟན༌ན༌ནོག༌།
8 མི༌གུན༌ནི༌ ང༌ཞ༌གུན༌ལ༌ རྩི༌ཝ༌ ཡ༌ ཁྲེལ༌བ༌,
སྨད༌གྲ༌ ཡ༌ སྟོད༌པ༌ ཏང༌ནའང༌,
ང༌ཞའེ༌ དཀོན༌མཆོག༌ག༌ ཞབས༌ཏོག༌ ཞུའད༌།
ང༌ཞའ༌ ཀྲང༌པོ༌ ཨིན༌ནའང༌,
ཁོང༌གུན༌ནི༌ ང༌ཞ༌གུན༌ལ༌ ཟུས༌མའེ༌ ཞབས༌ཏོག༌པ༌གུན༌ ཨིན༌ནོག༌ ཟེར༌དུག༌།
9 ཞན༌ ང༌ཞ༌གུན༌ དཀོན༌མཆོག༌གི༌ ཞབས༌ཏོག༌པ༌ ཨིན༌ཁན༌བོ༌ ཚང༌མའེ༌ ཤེས༌ནའང༌ ཁོང༌གུན༌ནི༌ ང༌ཞ༌གུན༌ལ༌ སྣང༌མེད༌ ཅོ༌རུག༌།
ང༌ཞ༌གུན༌ ཤི༌ཅེས༌སི༌ ཉེ༌མོའ༌ ལུས༌ནའང༌ ཏ༌རུང༌ངའང༌ སོན༌ཏེའ༌ ཡོད༌,
རྡུང༌གྱབ༌ ཏངས༌ ཨིན༌ནའང༌ སད༌ མ༌སདས༌།
10 སྙིང༌གུན༌ནི༌ ནང༌ང༌ རྡུག༌ངལ༌གུན༌ ཡོད༌ནའང༌,
ང༌ཞ༌གུན༌ སྐྱིད༌པོ༌ ཡོད༌།
ཉལ༌བ༌ཅན༌ ཨིན༌ནའང༌,
སེམས༌ཉིད༌དི༌ ཐོག༌ནེ༌ མང༌པོའ༌ ཆུག༌པོ༌ གྱུར༌ཅུག༌གད༌།
ཇིག༌རྟེན༌ནི༌ ཐོག༌ནེ༌ ཅའང༌ མེད༌ནའང༌,
སེམས༌ཉིད༌དི༌ ཐོག༌ནེ༌ ང༌ཞ༌གུན༌ནི༌ ལག༌ག༌ ཅི༌ཚང༌མ༌ ཡོད༌།
11 ཀོ༌རིན༌ཐི༌པ༌ ཛ༌འོ༌གུན༌,
ང༌ཞའེ༌ ཁྱོ༌ཞ༌གུན༌ལ༌ ཀྲང༌པོ༌ ཟེར༌རད༌,
ཏ༌ ང༌ཞའེ༌ སྙིང༌ ཁྱོ༌ཞ༌གུན༌ནི༌ ཕིའ༌ སང༌ ཕེས༌ཏེ༌ ཨིན༌།
12 ང༌ཞ༌གུན༌ནི༌ ཅེས༌པ༌བོ༌ ཁྱོ༌ཞ༌གུན༌ནི༌ ཕིའ༌ སྒགས༌ཏེ༌ བོར༌ར༌ མེད༌,
ཨིན༌ནའང༌ ཁྱོ༌ཞ༌གུན༌ནི༌ ཅེས༌པ༌བོ༌ ང༌ཞ༌གུན༌ནི༌ ཕིའ༌ སྒགས༌ཏེ༌ བོར༌དུག༌།
13 ངའེ༌ ཁྱོ༌ཞ༌གུན༌ལ༌ ང༌རང༌ངི༌ ཕྲུ༌གུ༌ ཙོགས༌ལ༌ སྤེ༌ར༌ ཏང༌ངད༌,
ཁྱོ༌ཞ༌གུན༌ནིའང༌ སྙིང༌བོ༌ སང༌ ཕེས༌སའང༌།
སོན༌པོ༌ དཀོན༌མཆོག༌གི༌ ཆོད༌ཁང༌།
6:14-7:4
14 ཁྱོ༌ཞའ༌ ཏད༌པ༌ མེད༌ཁན༌གུན༌ ཉམ༌པོ༌ ཛ༌འོ༌ ཉེ༌མོ༌ མ༌གྱུར༌ཤིག༌།
ཀྲང༌པོ༌ ཀ༌ཟུག༌གི༌ ངན༌པའེ༌ ཕྲོ༌པ༌ གྱུར༌ ཉན༌ཨིན༌?
འོད༌ ཀ༌ཟུག༌གི༌ མུན༌གྲིག༌ ཉམ༌པོ༌ དྲེས༌ ཉན༌ཨིན༌?
15 མ༌ཤི༌ཀ༌ དང༌ ཤེ༌ཏན༌ནི༌ པར༌ལ༌ ཅི༌ བྲེལ༌ ཡོད༌ཀྱག༌?
ཅའང༌ མེད༌ཀྱག༌།
ཏད༌པ༌ཅན༌ཞིག༌ ཏད༌པ༌ མེད༌ཁན༌ཞིག༌གི༌ ཏད༌པ༌ ཅོ༌ཁན༌བོའེ༌ ནང༌ང༌ དྲེས༌ཉན༌ཨིན༌ན༌?
མ༌ནེ༌ མི༌ཉན༌།
16 དཀོན༌མཆོག༌གི༌ ཆོད༌ཁང༌ དང༌ སྐུན༌དྲ༌ གུན༌ནི༌ པར༌ལ༌ ཅི༌ བྲེལ༌ ཡོད༌ཀྱག༌?
ཅའང༌ མེད༌ཀྱག༌།
ང༌དང༌གུན༌,
སོན༌པོ༌ དཀོན༌མཆོག༌གི༌ ཆོད༌ཁང༌བོ༌ ཨིན༌ནོག༌,
ཀ༌ཟུག༌ དཀོན༌མཆོག༌གི༌ ཏམ༌པའེ༌ སུང༌རབས༌སི༌ ནང༌ང༌ མོལ༌ཏེ༌ ཨིན༌ནོག༌།
“ང༌ ཏེ༌གུན༌ནི༌ ཕྲོའ༌ དུགས༌ཏེ༌ ཁོང༌གུན༌ ཉམ༌པོ༌ གྲུལ༌ཨིན༌།
ང༌ ཁོང༌གུན༌ནི༌ དཀོན༌མཆོག༌ ཡང༌ ཁོང༌གུན༌ ངའེ༌ མི༌གུན༌ གྱུར༌ཨིན༌།”b
17 “ཏེན༌ན༌བོའེ༌ཕིའ༌ ཏད༌པ༌ མེད༌ཁན༌གུན༌ནི༌ ཕྲོ༌ནེ༌ བིངས༌ཏེ༌
ཁྱོ༌ཞ༌རང༌ ཏེ༌གུན༌ནི༌ ཕྲོ༌ནེ༌ སོ༌སོའ༌ བེ༌ཏེ༌ དུག༌གོས༌།
ཁོང༌གུན༌ནི༌ ཁམ༌ལོག༌གི༌ ཅ༌ལག༌གུན༌ལ༌ ལག༌པ༌ མ༌ཐུག༌ཤིག༌,
ཏེ༌ནེ༌ ངའེ༌ ཁྱོ༌ཞ༌གུན༌ལ༌ གའ༌སུས༌ ཞུ༌ཨིན༌།”c
18 “ཡང༌ ང༌ ཁྱོ༌ཞ༌གུན༌ནི༌ ཨ༌བ༌ དང༌ ཁྱོ༌ཞ༌གུན༌
ངའེ༌ བུ༌ཚ༌ དང༌ བུ༌མོ༌གུན༌ གྱུར༌ཨིན༌།”d
གཙོ༌བོ༌ ཀུན༌ཝང༌ དཀོན༌མཆོག༌གི༌ མོལས༌།