10
ཅེས༌པའེ༌ སྤུན༌གུན༌,
ངའེ༌ སྙིང༌ངི༌ དོད༌པ༌ དང༌ དཀོན༌མཆོག༌ག༌ མོས༌ལམ༌ ཕུལ༌ཅེས༌པོ༌ ནི༌ ཨིས༌ར༌ཨེལ༌པ༌གུན༌ སྐྱོབ༌ཅེས༌སི༌ ཕིའ༌ ཨིན༌།
2 ཁོང༌གུན༌ནི༌ དཀོན༌མཆོག༌ ཐུགས༌ཐད༌ ཅུག༌ཅེས༌སི༌ དོད༌པའེ༌ ནང༌ང༌ རྩོན༌གྲུས༌ སྲན༌ཏྲེ༌ ཅོ༌ཁན༌བོའ༌ ངའེ༌ སྤང༌པོ༌ ཏང༌ངད༌,
ཨིན༌ནའང༌ ཁོང༌གུན༌ནི༌ དཀོན༌མཆོག༌ ཙལ༌ཅེས༌སི༌ ལམ༌བོ༌ ནོར༌ཏེ༌ ཨིན༌ནོག༌།
3 ཁོང༌གུན༌ལ༌ དཀོན༌མཆོག༌གི༌ ཆོགས༌ནེ༌ ཡོང༌ཁན༌ནི༌ ཀྲང༌པོའེ༌ སྐོར༌ལ༌ གྱུས༌ མེད༌པ༌ ཨིན༌ནོག༌།
ཁོང༌གུན༌ དཀོན༌མཆོག༌གི༌ ཀྲང༌པོའེ༌ ལམ༌མི༌ཀ༌ གྲུལ༌ཅེས༌ལ༌ མ༌ཐད༌ད༌,
ཁོ༌རང༌གུན༌ནི༌ རྩོན༌གྲུས༌ གྱུད༌ཏེ༌,
ཀྲང༌པོ༌ གྱུར༌ཅེས༌ལ༌ ཐད༌ད༌ནོག༌།
4 མ༌ཤི༌ཀའེ༌ ནང༌ང༌ ཁྲིམས༌སི༌ སྒོས༌དོམ༌ ཚང༌མ༌ གྲུབ༌བ༌ ཛད༌ཏེ༌ ཨིན༌ནོག༌,
ཏེ༌བོའེ༌ བྲས༌བུ༌ ཁོང༌ངི༌ ནང༌ང༌ ཏད༌པ༌ ཅོ༌ཁན༌ ཚང༌མ༌,
དཀོན༌མཆོག༌གི༌ སྐུན༌དུན༌ལ༌ ཀྲང༌པོ༌ ཅོའ༌ ཛད༌ད༌ནོག༌།
ཐར༌པ༌ ཚང༌མའེ༌ ཕིའ༌།
10:5-21
5 མོ༌ཟེས༌སི༌ བྲིའ༌ཛདས༌,
ཁྲིམས༌ ནང༌ཞིན༌ མི༌ཞིག༌ དཀོན༌མཆོག༌གི༌ སྐུན༌དུན༌ལ༌ ཀྲང༌པོ༌ གྱུར༌ཅེས༌སི༌ སྒོས༌དོམ༌བོ༌ ནི༌ “ཁྲིམས༌ ཚང༌མ༌ ཁའ༌ཉན༌གོ༌ཤེས༌ ཨིན༌ནོག༌།”a
6 ཨིན༌ནའང༌ ཏད༌པ༌ གྱུད༌ཏེ༌ དཀོན༌མཆོག༌གི༌ སྐུན༌དུན༌ལ༌ ཀྲང༌པོ༌ གྱུར༌ཅེས༌སི༌ ལབ༌ཞ༌བོའེ༌ མོལས༌,
“ཁྱོ༌ཞའེ༌ སྙིང༌ངི༌ ནང༌ང༌,
‘སུ༌ ནམ༌ཁའ༌ ཆེན༌’b ཅིའ༌ སམ༌མད༌?”
༼ཡང༌ན༌ ཐུར༌ལ༌ སྐྱོད༌ཏེ༌ ཐར༌པའེ༌ ལོན༌བོ༌ ང༌དང༌གུན༌ལ༌ ཤད༌ད༌ ཛད༌ཅེས༌སི༌ ཕིའ༌ མ༌ཤི༌ཀའ༌ བོད༌ད༌ལ༌།༽
7 “ཡ༌ ཅིའ༌ སམ༌མད༌,
‘ཡོག༌ག༌ ཤི༌ཁན༌གུན༌ནི༌ ནས༌སའེ༌ ནང༌ང༌ སུ༌ ཆེན༌?’c
” ༼ཡང༌ན༌ ཏེ༌ནང༌ནེ༌ མ༌ཤི༌ཀ༌ བིངས༌ཏེ༌ སྐྱོད༌ཏེ༌ ཐར༌པའེ༌ ལོན༌བོ༌ ང༌དང༌གུན༌ལ༌ ཤད༌ད༌ ཛད༌ ཟེར༌ཅེས༌ལ༌།༽
8 ཨིན༌ནའང༌ ཏད༌པའེ༌ སྐོར༌ལ༌ ལབ༌ཞའེ༌ ཅི༌ མོལ༌དུག༌?,
“ལོན༌བོ༌ ཁྱོ༌ཞའེ༌ ལག༌ག༌ ཡོད༌ཏེ༌ ཨིན༌ནོག༌
ཏེ༌བོ༌ ཁྱོ༌ཞའེ༌ ཁལ༌པག༌ དང༌ སྙིང༌ གུན༌ནི༌ ནང༌ང༌ ཡོད༌ཏེ༌ ཨིན༌ནོག༌།”d
ཡང༌ ཏེན༌ན༌ ལོན༌བོ༌ ནི༌,
མ༌ཤི༌ཀའེ༌ ནང༌ང༌ ཏད༌པ༌ ཅོ༌ཅེས༌ལ༌ ང༌ཞའེ༌ ཆོས༌ཤད༌ཁན༌ནི༌ ལོན༌བོ༌ ཨིན༌།
9 ཀལ༌ཏེས༌ ཁྱོ༌ཞའེ༌ རང༌ངི༌ ཁའ༌ནེ༌,
“ཡེ༌ཤུ༌ གཙོ༌བོ༌ ཨིན༌ཁན༌བོ༌” ཟེར༌ཅེས༌ དང༌ དཀོན༌མཆོག༌གི༌ ཁོང༌ ཤི༌ཁན༌གུན༌ནི༌ ཕྲོ༌ནེ༌ སོན༌པོའ༌ ལང༌ང༌ ཛད༌ཏེ༌ ཨིན༌ཁན༌བོའ༌ ཏད༌པ༌ ཅོ༌ན༌,
ཁྱོ༌ཞ༌གུན༌ སྐྱོབ༌བ༌ ཛད༌ཨིན༌།
10 ཁྱོ༌ཞ༌གུན༌ནི༌ སྙིང༌ངི༌ ནང༌ང༌ ཏད༌པ༌ ཡོད༌ཅེས༌པོའེ༌,
ཁྱོ༌ཞ༌གུན༌ དཀོན༌མཆོག༌གི༌ སྐུན༌དུན༌ལ༌ ཀྲང༌པོ༌ ཅོའ༌ ཛདས༌,
ཡང༌ ཁའ༌ནེ༌ ཤད༌ཅེས༌པོའེ༌,
ཁྱོ༌ཞ༌གུན༌ སྐྱོབ༌བ༌ ཛདས༌།
11 ཀ༌ཟུག༌ ཏམ༌པའེ༌ སུང༌རབས༌སི༌ ནང༌ང༌ མོལ༌ཏེ༌ ཨིན༌ནོག༌,
“ཁོང༌ངི༌ ནང༌ང༌ ཨིད༌ཤེས༌ ཅོ༌ཁན༌གུན༌ནི༌ རེ༌ཝ༌བོ༌ མ༌ནེ༌ ཅག༌ག༌ མི༌ཛད༌།”e
12 ཡ༌ཧུ༌དཱ༌པ༌ དང༌ ཡ༌ཧུ༌དཱ༌པ༌ མན༌ཁན༌ གུན༌ནི༌ ནང༌ང༌ ཅའང༌ ཁྱད༌ མེད༌པ༌ ཨིན༌ནོག༌།
ཏེན༌ན༌ གཙོ༌བོ༌བོ༌ ཚང༌མའེ༌ གཙོ༌བོ༌ ཨིན༌ནོག༌,
ཡང༌ ཁོང༌ང༌ ཞུ༌ཝ༌ ཕུལ༌ཁན༌གུན༌ལ༌ སྙིང༌ ཕེས༌ཏེ༌ སལ༌ལ༌ ཛད༌ད༌ནོག༌།
13 ཅིའ༌ཞུ༌ན༌ “གཙོ༌བོའ༌ སྐྱོབ༌ཅེས༌ལ༌ ཞུ༌ཝ༌ ཕུལ༌ཁན༌ ཚང༌མ༌ ཁོང༌ངི༌ སྐྱོབ༌བ༌ ཛད༌ཨིན༌།”f
14 ཏེ༌ནེ༌ ཁོང༌གུན༌ནི༌ ཀ༌ཟུག༌གི༌ ཞུ༌ཝ༌ ཕུལ༌ཨིན༌,
ཀལ༌ཏེས༌ ཁོང༌གུན༌ནི༌ ཁོང༌ང༌ ཏད༌པ༌ མ༌ཅོ༌ན༌?
ཡང༌ ཁོང༌གུན༌ནི༌ ཀ༌ཟུག༌གི༌ ཏད༌པ༌ ཅོ༌ཨིན༌,
ཀལ༌ཏེས༌ ཁོང༌གུན༌ནི༌ ཁོང༌ངི༌ སྐོར༌ལ༌ མ༌ནེ༌ མ༌ཚོར༌ར༌ ཡོད༌ན༌?
ཡང༌ ཁོང༌གུན༌ལ༌ ཀ༌ཟུག༌གི༌ ཚོར༌ཨིན༌ ཀལ༌ཏེས༌ སུ༌ཞིག༌གིའང༌ ཁོང༌ངི༌ སྐོར༌ལ༌ མ༌ཤད༌ན༌?
15 ཡང༌ ཀལ༌ཏེས༌ ཀལ༌ཏེ༌ མན༌པིན༌ན༌,
ཁོང༌གུན༌ ཡོད༌ས༌ སོང༌ཏེ༌ ཆོས༌ ཀ༌ཟུག༌གི༌ ཤད༌ཨིན༌?
ཏེན༌ན༌བོའེ༌ཕིའ༌ ཏམ༌པའེ༌ སུང༌རབས༌སི༌ ནང༌ང༌ མོལ༌ཏེ༌ ཨིན༌ནོག༌,
“གའ༌མོའེ༌ ནས༌ཚུལ༌ ཁྱོང༌ཁན༌གུན༌ནི༌ རྐང༌པ༌ ཙམ༌ཤིག༌གི༌ ཅིན༌ལབས༌ཅན༌ མ༌ནོག༌།”g
16 ཨིན༌ནའང༌ སུ༌ཚང༌མའེ༌ གའ༌མོའེ༌ ནས༌ཚུལ༌ལ༌ གའ༌སུས༌ ཞུའ༌མ༌ནོག༌,
ཅིའ༌ཟེར༌ན༌ ལུང༌སྟོན༌པ༌ ཡེ༌ཤ༌ཡཱའེ༌ ཟེརས༌,
“གཙོ༌བོ༌ལེ༌,
སུའི༌ ང༌དང༌ངི༌ ལོན༌བོའ༌ ཨིད༌ཤེས༌ ཅོས༌?”h
17 སོང༌པ༌སང༌ ལོན༌བོ༌ ཉན༌ཅེས༌ ཅིག༌པོ༌ གྱུད༌ཏེ༌ ཏད༌པ༌བོ༌ ཡོང༌ང༌ནོག༌,
ཡང༌ ཏེ༌ ལོན༌བོ༌ ནི༌ མ༌ཤི༌ཀའེ༌ སྐོར༌རི༌ གའ༌མོའེ༌ ནས༌ཚུལ༌བོ༌ ཨིན༌ནོག༌།
18 ཨིན༌ནའང༌ ངའེ༌ ཏྲིའད༌,
ཅི༌ ཨིས༌ར༌ཨེལ༌པ༌གུན༌ལ༌ ལོན༌བོ༌ མ༌ཚོར༌ར༌ ཨིན༌ནོག༌ག༌?
འོ༌ན༌,
ཁོང༌གུན༌ནི༌ ཚོར༌ཏེ༌ ཨིན༌ནོག༌,
“ལོན༌བོ༌ ཇིག༌རྟེན༌ གང༌པོའེ༌ ནང༌ང༌ ཕེལ༌ཏེ༌ ཨིན༌ནོག༌,
ཡང༌ བཀའ༌བོ༌ ཇིག༌རྟེན༌ནི༌ ཐའ༌མ༌ ཚོག༌པའང༌ ལེབས༌ཏེ༌ ཨིན༌ནོག༌།”i
19 ཨིན༌ནའང༌ ངའེ༌ ཡང༌སྐྱར༌ ཏྲིའད༌,
ཅི༌ ཨིས༌ར༌ཨེལ༌པ༌གུན༌ལ༌ ཧ༌མ༌གོའ༌ ཨིན༌ནོག༌ག༌?
ཁོང༌གུན༌ནི༌ ཧ༌གོ༌ཏེ༌ ཨིན༌ནོག༌,
ཅིའ༌ཟེར༌ན༌ མོ༌ཟེས༌སི༌ ཏུས༌ལའང༌ དཀོན༌མཆོག༌གི༌ མོལ༌ལ༌ ཛདས༌,
“གྱལ༌ཁམས༌ མན༌ཁན༌ནི༌ མི༌གུན༌ གྱུད༌ཏེ༌,
ངའེ༌ ཁྱོ༌ཞ༌གུན༌ནི༌ ནང༌ང༌ ཚིག༌ཅེས༌ སྐྱེ༌ཅུག༌ཨིན༌,
སམ༌བ༌ མེད༌ཁན༌ནི༌ ཡ༌ཧུ༌དཱ༌པ༌ མན༌ཁན༌གུན༌ གྱུད༌ཏེ༌,
ངའེ༌ ཁྱོ༌ཞ༌གུན༌ནི༌ ནང༌ང༌ སྲོ༌ སྐྱེ༌ཅུག༌ཨིན༌།”j
20 ཡང༌ སྟིང༌ནེ༌ དཀོན༌མཆོག༌གི༌ ཆོགས༌ནེ༌ ཡེ༌ཤ༌ཡཱའེ༌ ཧམ༌པ༌ ཉམ༌པོ༌ མོལས༌,
“ངའ༌ མ༌ཙལ༌ཁན༌ནི༌ མི༌གུན༌ནི༌ ངའེ༌ ནང༌ང༌ ཏད༌པ༌ ཅོས༌།
ངའ༌ ཤེས༌ཉིན༌ མ༌གྲོ༌ཁན༌གུན༌ལ༌,
ངའེ༌ ང༌རང༌ སྔོན༌ཅུགས༌པིན༌།”k
21 ཨིན༌ནའང༌ ཨིས༌ར༌ཨེལ༌པ༌གུན༌ནི༌ སྐོར༌ལ༌ དཀོན༌མཆོག༌གི༌ མོལས༌,
“ཉི༌མ༌ གང༌པོ༌ ངའེ༌ ང༌རང༌ངི༌ ལག༌པ༌ ཁོང༌གུན༌ལ༌ གའ༌སུས༌ ཞུའ༌ལ༌ རྐྱངས༌ཏེ༌ བོར༌པིན༌,
ཨིན༌ནའང༌ ཁོང༌གུན༌ ཁའ༌མི༌ཉན༌ དང༌ ངོ༌ལོག༌ ཅོ༌ཁན༌ ཡོད༌པིན༌།”l