ཡོ༌ཧཱ༌ནན༌ནི༌ བྲིའ༌ཛད༌ཁན༌ནི༌ གའ༌མོའེ༌ ནས༌ཚུལ༌།
མ༌ཤི༌ཀ༌, ཐའ༌མེད༌པའེ༌ བཀའ༌།
1:1-18
1
ཇིག༌རྟེན༌ ཆགས༌སི༌ སང༌ སྔུན༌ལ༌ བཀའ༌ ཡོད༌པིན༌།
བཀའ༌བོ༌ དཀོན༌མཆོག༌ ཉམ༌པོ༌ ཡོད༌པིན༌,
ཡང༌ ཏེན༌ན༌ བཀའ༌བོ༌ ནི༌ དཀོན༌མཆོག༌ ཁོང༌རང༌ ཨིན༌པིན༌།
2 ཁོང༌ གོ༌མ༌ནེ༌ ཕར༌ལ༌ དཀོན༌མཆོག༌ ཉམ༌པོ༌ ཞུགས༌ཏེ༌ ཡོད༌པིན༌།
3 ཁོང༌ གྱུད༌ཏེ༌ དཀོན༌མཆོག༌གི༌ ཅི༌ཚང༌མ༌ ཞང༌ང༌ ཛདས༌,
ཁོང༌ མེད༌པའ༌ ཅི༌ཞིག༌གའང༌ ཞང༌ང༌ མ༌ཛདས༌།
4 ཁོང༌ ནི༌ སྲོག༌ ཚང༌མའེ༌ ཇུང༌ཁུངས༌པོ༌ ཨིན༌ནོག༌།
ཡང༌ ཁོང༌ངི༌ སྐུ༌ཚེ༌,
མི༌ཚང༌མའེ༌ ཕིའ༌ འོད༌ ཨིན༌ནོག༌,
5 འི༌ འོད༌པོའེ༌ མུན༌གྲིག༌ ལྡང༌ཤན༌ ཛད༌ད༌ནོག༌,
ཡང༌ མུན༌གྲིག༌གི༌ ཏེ༌བོའ༌ ཕམ༌ཀལ༌ མི༌ཉན༌།
6 དཀོན༌མཆོག༌གི༌ མི༌ཞིག༌ ཀལ༌ལ༌ ཛདས༌,
ཀ༌བོའ༌ ཡོ༌ཧཱ༌ནན༌ ཁྲུས༌སལ༌ཁན༌ ཟེར༌རད༌པིན༌།
7 ཁོང༌ གྱུད༌ཏེ༌ མི༌ཚང༌མའེ༌ ཏེ༌ འོད༌པོའེ༌ཀ༌ ཏད༌པ༌ ཁྱོང༌ཅེས༌སི༌ ཕིའ༌ ཁོང༌ ཏེ༌བོའེ༌ སྐོར༌ལ༌ སྤང༌པོ༌ ཏང༌ཅེས༌ལ༌ སྐྱོདས༌།
8 ཡོ༌ཧཱ༌ནན༌ ཁོང༌རང༌ ཏེ༌ འོད༌པོ༌ མན༌པིན༌,
ཨིན༌ནའང༌ ཁོང༌ ཏེ༌ འོད༌པོའེ༌ སྐོར༌ལ༌ སྤང༌པོ༌ སལ༌ལ༌ སྐྱོདས༌།
9 མི༌ཚང༌མ༌ལ༌ འོད༌ སལ༌ཁན༌ནི༌ ཏེ༌ དེན༌བའེ༌ འོད༌པོ༌ ཇིག༌རྟེན༌ནི༌ ནང༌ང༌ སྐྱོད༌ད༌ ཛད༌ཏེ༌ ཨིན༌ནོག༌།
10 ཇིག༌རྟེན༌ ཛད༌ཁན༌བོ༌ ཇིག༌རྟེན༌ནི༌ ནང༌ང༌ སྐྱོད༌ཏེའང༌,
ཇིག༌རྟེན༌པ༌གུན༌ནི༌ ཁོང༌ ངོ༌ མ༌ཤེས༌།
11 ཁོང༌ ཁོང༌རང༌ངི༌ མི༌གུན༌ནི༌ཀ༌ སྐྱོདས༌,
ཨིན༌ནའང༌ ཁོང༌གུན༌ནི༌ ཁོང༌ང༌ གའ༌སུས༌ མ༌ཞུས༌།
12 ཁོང༌ང༌ གའ༌སུས༌ ཞུས༌ཁན༌ ཡང༌ ཏད༌པ༌ ཅོས༌ཁན༌གུན༌ལ༌ ཁོང༌ངི༌,
དཀོན༌མཆོག༌གི༌ ཕྲུ༌གུ༌ གྱུར༌ཅེས༌སི༌ འོས༌པ༌ ཐེས༌།
13 རང༌ཞིན༌ནི༌ མིར༌གྱུད༌ ཡ༌ མི༌ ཐབས༌ ཡ༌ ཨ༌བའེ༌ དོད༌པའེ༌ ཞས༌ཏེ༌ ཁོང༌གུན༌ དཀོན༌མཆོག༌གི༌ ཕྲུ༌གུ༌ མ༌གྱུར༌ར༌ དཀོན༌མཆོག༌ ཁོང༌རང༌ནེ༌ སྐྱེས༌ཏེ༌ ཨིན༌ནོག༌།
14 ཏེ༌ བཀའ༌བོ༌ སྐུ༌ལུས༌ལ༌ གྱུར༌ར༌ ཛདས༌ ཡང༌ ང༌ཞ༌གུན༌ནི༌ ཕྲོའ༌ ཞུགས༌ས༌ ཛདས༌།
ང༌ཞ༌གུན༌ནི༌ ཁོང༌ངི༌ ཟིར༌རྗིད༌པོ༌ ཇལ༌,
ཏེ༌ ཟིར༌རྗིད༌པོ༌ ཡབ༌བི༌ སྲས༌ ཅིག༌ཅིག༌པོ༌,
ཐུག༌རྗེ༌ དང༌ དེན༌བའེ༌ གངས༌ཁན༌བོ༌ ཨིན༌།
15 ཡོ༌ཧཱ༌ནན༌ནི༌ ཁོང༌ངི༌ སྐོར༌ལ༌ སྤང༌པོ༌ སལ༌ཏེ༌ ཀུ༌ཅོ༌ ཏང༌ཨིན༌ མོལས༌,
“ཁོང༌ ནི༌ ངའེ༌ ཟེར༌ཁན༌ ཏེན༌ན༌བོ༌ ཨིན༌,
‘ངའེ༌ སྟིང༌ནེ༌ སྐྱོད༌ཅེས༌ཅན༌བོ༌ ངའེ༌ སང༌ ཀྲག༌པོ༌ ཞུགས༌ཏེ༌ ཨིན༌,
ཅིའ༌ཟེར༌ན༌ ཁོང༌ ངའེ༌ སང༌ སྔུན༌ལ༌ ཞུགས༌ཏེ༌ ཡོད༌པིན༌།’”
16 ཁོང༌ ཐུག༌རྗེ༌ གངས༌ཏེ༌ ཡོད༌ཅེས༌པོའེ༌,
ང༌དང༌གུན༌ལ༌ ཐུག༌རྗེ༌ཅན༌ནི༌ ཅིན༌ལབས༌ ཅིག༌གི༌ སྟིང༌ནེ༌ ཅིག༌ ཐོབ༌,
17 ལུང༌སྟོན༌པ༌ མོ༌ཟེས༌ གྱུད༌ཏེ༌ དཀོན༌མཆོག༌གི༌ བཀའ༌ཁྲིམས༌གུན༌ ང༌དང༌གུན༌ལ༌ སལ༌ལ༌ ཛད༌ཏེ༌ ཨིན༌པིན༌,
ཡང༌ ཐུག༌རྗེ༌ དང༌ དེན༌བའེ༌ ལམ༌ ང༌དང༌གུན༌ལ༌ ཡེ༌ཤུ༌ མ༌ཤི༌ཀ༌ གྱུད༌ཏེ༌ སལ༌ལ༌ ཛད༌ཏེ༌ ཨིན༌།
18 དཀོན༌མཆོག༌ ནི༌ སུའིང༌ མ༌ཇལ༌ལ༌ ཨིན༌ནོག༌,
ཨིན༌ནའང༌ ཡབ༌ དཀོན༌མཆོག༌གི༌ སྙིང༌ནེ༌ ཅེས༌པ༌ ཛད༌ཁན༌ སྲས༌ ཅིག༌ཅིག༌པོ༌,
ཀ༌བོ༌ དཀོན༌མཆོག༌ ཨིན༌,
ཁོང༌ངི༌ ང༌དང༌ང༌ ཡབ༌ སྔོན༌ ཅུག༌ག༌ ཛདས༌།
ཡོ༌ཧཱ༌ནན༌ ཁྲུས༌སལ༌ཁན༌ནི༌ སྤང༌པོ༌།
1:19-28
19 ཡེ༌རུ༌ཤ༌ལེམ༌མི༌ གྱལ༌སའེ༌ ནང༌ང༌ ཡོད༌ཁན༌ནི༌ ཡ༌ཧུ༌དཱ༌པའེ༌ ཝང༌སྲུལ༌ཁན༌གུན༌ནི༌,
བླ༌མ༌གུན༌ དང༌ ལི༌ཝི༌པ༌གུན༌ ཡོ༌ཧཱ༌ནན༌ནི༌ཀ༌ ཁོང༌ སུ༌ ཨིན༌ ཟེར༌ཏེ༌ ཏྲིའ༌ལ༌ ལམ༌ཅུགས༌།
20 ཡོ༌ཧཱ༌ནན༌ནི༌ ཐེ༌ཚོམས༌ མེད༌པ༌ སལ༌པོ༌ དང༌ ཀྲང༌པོ༌ མོལས༌,
“ང༌ ནི༌ དཀོན༌མཆོག༌གི༌ ལྡམ༌མ༌ ཛད༌ཁན༌ནི༌ མ༌ཤི༌ཀ༌ མན༌།”
21 ཁོང༌གུན༌ནི༌ ཏྲིས༌,
“ཏེ༌ནེ༌ ཉེ༌རང༌ སུ༌ ཞུགས༌ཏེ༌ ཨིན༌,
ཉེ༌རང༌ ལུང༌སྟོན༌པ༌ ཨེ༌ལི༌ཡཱ༌ ཨིན༌ན༌?”
ཡོ༌ཧཱ༌ནན༌ནི༌ མོལས༌,
“ངའ༌ མན༌།”
ཁོང༌གུན༌ནི༌ ཏྲིས༌,
“ཏེ༌ནེ༌ ཉེ༌རང༌ དཀོན༌མཆོག༌གི༌ ཀལ༌ལ༌ ཛད༌ཅེས༌སི༌ ཁ༌ཆད༌ ཅོའ༌ ཛད༌ཁན༌ནི༌ ལུང༌སྟོན༌པ༌བོ༌ ཨིན༌ན༌?”
ཁོང༌ངི༌ མོལས༌,
“མན༌།”
22 སྟིང༌ཇུག༌ག༌ ཏེ༌ མི༌གུན༌ནི༌ ཁོང༌ང༌ ཏྲིས༌,
“ཏེ༌ནེ༌ ཉེ༌རང༌ ཨིན༌བོ༌ སུ༌ ཨིན༌,
ཤོད༌དའང༌ ཅིའ༌ཟེར༌ན༌ ང༌ཞའ༌,
ང༌ཞའ༌ ཀལ༌ཁན༌གུན༌ལ༌ ལན༌ཏང༌གོས༌སད༌།
ཉེ༌རང༌ངི༌ རང༌ངི༌ སྐོར༌ལ༌ ཅི༌ མོལ༌ལད༌?”
23 ཡོ༌ཧཱ༌ནན༌ནི༌ ལུང༌སྟོན༌པ༌ ཡེ༌ཤ༌ཡཱའེ༌ མོལ༌ཁན༌ ནང༌ཞིན༌ལ༌ ལན༌སལས༌,
“རི༌སྟོང༌ངི༌ ནང༌ང༌ སྐད༌ ཆེན༌མོ༌ ཏང༌ཁན༌བོ༌ ང༌ ཨིན༌,
‘གཙོ༌བོའེ༌ ཕེབས༌ལམ༌བོ༌ ཀྲང༌པོ༌ ཅོ༌ཤིག༌།’a”
24 ཏེ༌ནེ༌ ཀལ༌ཁན༌ནི༌ ཕ༌རུ༌ཤི༌པ༌གུན༌ནི༌
25 ཡོ༌ཧཱ༌ནན༌ལ༌ ཏྲིས༌,
“ཀལ༌ཏེས༌ ཉེ༌རང༌ ལྡམ༌མ༌ ཛད༌ཁན༌ནི༌ མ༌ཤི༌ཀ༌ ཡ༌ ཨེ༌ལི༌ཡཱ༌ ཡ༌ ཏེ༌ ལུང༌སྟོན༌པ༌བོ༌ མན༌ན༌,
ཏེ༌ནེ༌ ཉེ༌རང༌ངི༌ ཁྲུས༌ ཅིའ༌ སལ༌ལད༌?”
26 ཡོ༌ཧཱ༌ནན༌ནི༌ ཁོང༌གུན༌ལ༌ ལན༌སལས༌,
“ངའེ༌ མི༌གུན༌ལ༌ ཆུ༌ ཉམ༌པོ༌ ཁྲུས༌ ཏང༌ངད༌,
ཨིན༌ནའང༌ ཁྱོ༌ཞ༌གུན༌ནི༌ ཕྲོའ༌ ཁྱོ༌ཞའེ༌ མ༌ཤེས༌ཁན༌ནི༌ མི༌བོ༌ ཞུགས༌ཏེ༌ ཡོད༌།
27 ཁོང༌ ངའེ༌ སྟིང༌ནེ༌ སྐྱོད༌ཨིན༌,
ངའ༌ ཁོང༌ངི༌ ཞབ༌ཤི༌ ཙོགས༌ལ༌ ཞབ༌པུལ༌ ལྡམས༌ཁན༌བོ༌ ཀྲོལ༌ཅེས༌སི༌ འོས༌པ༌ མེད༌།”
28 འི༌ ཚང༌མ༌ ཡོ༌ཧཱ༌ནན༌ནི༌ མི༌གུན༌ལ༌ ཁྲུས༌སལ༌སའེ༌ ཡོར༌དཱན༌ ལྩངས༌པོའེ༌ ཤར༌ ཆོགས༌ལ༌ ཡོད༌ཁན༌ནི༌ བེད༌ཐཱ༌ནི༌ གྲོང༌ཁྱེར༌ལ༌ ཇུང༌།
ཡེ༌ཤུ༌ དཀོན༌མཆོག༌གི༌ ལུ༌གུ༌།
1:29-34
29 ཐོ༌རེ༌ཟུག༌པོ༌ ཡོ༌ཧཱ༌ནན༌ནི༌ ཡེ༌ཤུ༌ ཁོང༌རང༌ ཆོགས༌ལ༌ སྐྱོད༌ད༌ ཟིགས༌ཏེ༌ མོལས༌,
“ལྟོས༌ཤིག༌ ཁོང༌ ནི༌ དཀོན༌མཆོག༌གི༌ ལུ༌གུ༌,
ཇིག༌རྟེན༌པ༌གུན༌ནི༌ སྡིག༌པ༌ མེད༌ཁན༌ ཅོའ༌ ཛད༌ཁན༌བོ༌ ཨིན༌ནོག༌།
30 ཁོང༌ ཏེན༌ན༌བོ༌ ཞུགས༌ཏེ༌ ཨིན༌,
ཀ༌བོའེ༌ སྐོར༌ལ༌ ངའེ༌ ཟེར༌པིན༌,
‘ངའེ༌ སྟིང༌ནེ༌ སྐྱོད༌ཅེས༌ཅན༌བོ༌ ངའེ༌ སང༌ ཀྲག༌པོ༌ ཞུགས༌ཏེ༌ ཨིན༌ ཅིའ༌ཟེར༌ན༌ ཁོང༌ ངའེ༌ སང༌ སྔུན༌ལ༌ ཞུགས༌ཏེ༌ ཡོད༌པིན༌།’
31 སྔུན༌ལ༌ ངེའང༌ ཁོང༌ ངོ༌ མ༌ཤེས༌,
ཨིན༌ནའང༌ ཨིས༌ར༌ཨེལ༌པ༌གུན༌ལ༌ ཁོང༌ སྔོན༌ཅུག༌ཅེས༌སི༌ ཕིའ༌,
ངའེ༌ ཆུ༌ ཉམ༌པོ༌ ཁྲུས༌ ཏང༌ཨིན༌ ཡོངས༌པིན༌།”
32 ཏེ༌ནེ༌ ཡོ༌ཧཱ༌ནན༌ནི༌ སྤང༌པོ༌ སལས༌,
“ངའེ༌ ཏམ༌པའེ༌ ཐུག༌ཉིད༌ ཕུར༌གོན༌ཞིག༌གི༌ ཚུལ༌ལ༌ ནམ༌ཁའ༌ནེ༌ བབས༌ཏེ༌ ཁོང༌ངི༌ཀ༌ ཞུགས༌ས༌ལ༌ ཐོང༌།
33 གོ༌མ༌ ངའེ༌ ཁོང༌ སུ༌ ཨིན༌ཁན༌བོ༌ ངོ༌ཤེས༌ས༌ མེད༌པིན༌,
ཨིན༌ནའང༌ ང༌ ཆུ༌ ཉམ༌པོ༌ ཁྲུས༌ ཏང༌ང༌ལ༌ ཀལ༌ལ༌ ཛད༌ཁན༌བོའེ༌ མོལས༌,
‘ཁྱོ༌རང༌ངི༌ ཏམ༌པའེ༌ ཐུག༌ཉིད༌ བབས༌ཏེ༌ ཞུགས༌ས༌ལ༌ ཐོང༌ཁན༌བོའེ༌,
ཏམ༌པའེ༌ ཐུག༌ཉིད༌ ཉམ༌པོ༌ ཁྲུས༌སལ༌ལ༌ ཛད༌ཨིན༌།’
34 ངའེ༌ ཁོང༌ ཇལ༌པ༌ ངའེ༌ ཁོང༌ དཀོན༌མཆོག༌གི༌ སྲས༌ ཨིན༌ཁན༌བོའེ༌ སྤང༌པོ༌ ཏང༌ངད༌།”
གཙོ༌བོ༌ ཡེ༌ཤུའི༌ ལོབ༌ཕྲུགས༌ ཏང༌པོ༌།
1:35-42
35 སྟིང༌མ༌ ཞག༌ག༌ ཡོ༌ཧཱ༌ནན༌ ཡང༌སྐྱར༌ ཁོང༌རང༌ངི༌ ལོབ༌ཕྲུགས༌ ཉིས༌ ཉམ༌པོ༌ ཡོད༌པིན༌,
36 ཁོང༌ངི༌ ཡེ༌ཤུ༌ ཏེ༌ཀ༌ནེ༌ གྲུལ༌ཨིན༌ སྐྱོད༌ད༌ལ༌ ཟིགས༌ཏེ༌ མོལས༌,
“ལྟོས༌ཤིག༌,
ཁོང༌ དཀོན༌མཆོག༌གི༌ ལུ༌གུ༌ ཨིན༌ནོག༌”,
37 ཡང༌ ཡོ༌ཧཱ༌ནན༌ནི༌ ལོབ༌ཕྲུགས༌ ཉིས༌ཀོའ༌ ཁོང༌ངི༌ ཏེ༌ཟུག༌ མོལ༌ལ༌ ཚོར༌ར༌ཅིག༌,
ཁོང༌གུན༌ ཡེ༌ཤུའི༌ སྟིང༌རང༌ནེ༌ སོང༌།
38 ཡེ༌ཤུའི༌ གྱབ༌ ལོགས༌ཏེ༌ ཁོང༌གུན༌ སྟིང༌རང༌ནེ༌ ཡོང༌ང༌ ཟིགས༌པ༌,
ཁོང༌གུན༌ལ༌ ཏྲིའ༌ ཛདས༌,
“ཁྱོ༌ཞའ༌ ཅི༌ གོས༌སད༌?”
ཁོང༌གུན༌ནི༌ ལན༌ཏངས༌,
“རབ༌བི༌” ༼ཡང༌ན༌ “ལོབ༌བོན༌ལེ༌”༽ “ཉེ༌རང༌ ཀ༌རུ༌ ཞུགས༌སད༌?”
39 ཡེ༌ཤུའི༌ ཁོང༌གུན༌ལ༌ ལན༌སལས༌,
“ང༌ ཉམ༌པོ༌ ཡོངས༌ཏེ༌ ལྟོས༌ཤིག༌།”
ཏེ༌ནེ༌ ཁོང༌ ཉིས༌ཀ༌ ཡེ༌ཤུ༌ ཉམ༌པོ༌ སོང༌ཏེ༌ ཁོང༌ ཞུག༌སའེ༌ ནས༌ས༌བོ༌ ཐོང༌།
ཏེ༌ ཟ༌ནེ༌ ཕི༌ཏོག༌གི༌ ཆུ༌ཚོད༌ ཞི༌པ༌ ཟོད༌ སོང༌པ༌ ཏེ༌ ཚན༌བོ༌ ཁོང༌གུན༌ ཡེ༌ཤུ༌ ཉམ༌པོ༌ དུགས༌།
40 ཡོ༌ཧཱ༌ནན༌ནི༌ མོལ༌ཁན༌གུན༌ ཚོར༌ཏེ༌,
ཡེ༌ཤུའི༌ གྱབ༌ནེ༌ བྲངས༌ཁན༌ ཉིས༌སི༌ ནང༌ནེ༌ ཅིག༌པོ༌ ཤི༌མོན༌ པི༌ཏྲར༌རི༌ ནོ༌ ཨེན༌གྲིའུ༌ ཨིན༌པིན༌།
41 ཚང༌མའེ༌ སང༌ སྔུན༌ལ༌ ཨེན༌གྲིའུ༌འི༌ ཁོའེ༌ ཨ༌ཅོ༌ ཤི༌མོན༌ པི༌ཏྲར༌ ཙལ༌ཏེ༌ ཁོའ༌ ཟེརས༌,
“ང༌ཞའ༌ དཀོན༌མཆོག༌གི༌ ལྡམ༌མ༌ ཛད༌ཁན༌ནི༌ མ༌ཤི༌ཀ༌ ༼ཡང༌ན༌ སྐོའ༌ ཛད༌ཁན༌བོ༌༽ ཐོབ༌།”
42 ཨེན༌གྲིའུ༌འི༌ ཤི༌མོན༌ ཁྲིད༌ཏེ༌ ཡེ༌ཤུའི༌ཀ༌ ཁྱེརས༌།
ཡེ༌ཤུའི༌ ཁོའ༌ ཟིགས༌ཏེ༌ མོལས༌,
“ཁྱོ༌རང༌ ཡོ༌ཧཱ༌ནན༌ནི༌ བུ༌ཚ༌ ཤི༌མོན༌ མན༌ན༌?
ཏ༌ནེ༌ཕར༌ལ༌ ཁྱོ༌རང༌ངི༌ མིང༌ང༌ ཀྱེ༌ཕས༌ ༼ཡང༌ན༌ པི༌ཏྲར༌༽ ཟེར༌ཨིན༌།”
ཕི༌ལིབ༌ དང༌ ན༌ཐན༌ནི༌འེལ༌ ལྡམ༌མ༌ ཛདས༌།
1:43-51
43 ཐོ༌རེ༌ཟུག༌པོ༌ ཡེ༌ཤུ༌ གཱ༌ལིལ༌ལིའི༌ ཡུལ༌ཇོངས༌ལ༌ སྐྱོད༌ཅེས༌ ཐག༌ཅད༌ད༌ ཛདས༌།
ཕི༌ལིབ༌ ཐོབ༌བ༌ཅིག༌ ཁོང༌ངི༌ ཁོའ༌ མོལས༌,
“ངའེ༌ སྟིང༌རང༌ནེ༌ ཡོང༌།”
44 ཕི༌ལིབ༌,
ཨེན༌གྲིའུ༌ དང༌ པི༌ཏྲར༌རི༌ གྲོང༌ཁྱེར༌ བེད༌སའི༌ད༌ ཨིན༌པིན༌།
45 ན༌ཐན༌ནི༌འེལ༌ ཐོབ༌བ༌ཅིག༌ ཕི༌ལིབ༌བི༌ ཟེརས༌,
“མོ༌ཟེས༌ དང༌ ལུང༌སྟོན༌པ༌གུན༌ནི༌ བྲིའ༌ ཛད༌ཁན༌ནི༌ མི༌བོ༌ ང༌ཞའ༌ ཐོབ༌།
ཁོང༌ ནི༌ ཡོ༌སེབ༌བི༌ བུ༌ཚ༌ ན༌ཙ༌རེད༌པ༌ ཡེ༌ཤུ༌ ཨིན༌ནོག༌།”
46 ན༌ཐན༌ནི༌འེལ༌ལི༌ ཁོའ༌ ཟེརས༌,
“ན༌ཙ༌རེད༌ནེ༌ མི༌ ཟང༌པོ༌ཞིག༌ བིང༌ སྲིད༌ད༌ནོག༌ག༌?”
ཕི༌ལིབ༌བི༌ ཁོའ༌ ཟེརས༌,
“ཡོངས༌ཏེ༌ ལྟོས༌།”
47 ཡེ༌ཤུའི༌ ན༌ཐན༌ནི༌འེལ༌ ཡོང༌ང༌ ཟིགས༌ཏེ༌ ཁོའེ༌ སྐོར༌ལ༌ མོལས༌,
“ལྟོས༌ཤིག༌,
འི༌ མི༌བོའ༌ ཨིས༌ར༌ཨེལ༌པ༌ ཟེར༌ཅེས༌ འོས༌པ༌ ཨིན༌ནོག༌,
ཅིའ༌ཟེར༌ན༌ ཁོའེ༌ སུ༌ཞིག༌གའང༌ མ༌ནེ༌ གོབས༌མི༌སྐོར༌།”
48 ན༌ཐན༌ནི༌འེལ༌ལི༌ ཡེ༌ཤུའ༌ ཟེརས༌,
“ཉེ༌རང༌ངི༌ ང༌ ཀ༌ཟུག༌གི༌ ཁྱེན༌ནད༌།”
ཡེ༌ཤུའི༌ ཁོའ༌ མོལས༌,
“ཕི༌ལིབ༌བི༌ བོད༌དི༌ སང༌ སྔུན༌ལ༌ ངའེ༌ ཁྱོ༌རང༌ ཕིག༌ ཁ༌ཟས༌སི༌ ལྕང༌མའེ༌ ཡོག༌ག༌ དུགས༌ཏེ༌ ཐོང༌།”
49 ན༌ཐན༌ནི༌འེལ༌ལི༌ ཟེརས༌,
“ལོབ༌བོན༌ལེ༌,
ཉེ༌རང༌ དཀོན༌མཆོག༌གི༌ སྲས༌ དང༌ ཁོང༌ངི༌ ཨིས༌ར༌ཨེལ༌ལི༌ ཕིའ༌ སྐོའ༌ ཛད༌ཁན༌ནི༌ གྱལ༌པོ༌ ཨིན༌ནོག༌།”
50 ཡེ༌ཤུའི༌ ན༌ཐན༌ནི༌འེལ༌ལ༌ མོལས༌,
“ངའེ༌ ཁྱོ༌རང༌ ཕིག༌ ཁ༌ཟས༌སི༌ ལྕང༌མའེ༌ ཡོག༌ག༌ དུགས༌ཏེ༌ ཐོང༌ ཟེར༌པ༌ ཁྱོ༌རང༌ངི༌ ཏད༌པ༌ ཅོས༌ཏེ༌ ཨིན༌ན༌?
ཁྱོ༌རང༌ངི༌ འི༌ སང༌ ཧ༌ལས༌ཤེས༌སི༌ ལས༌ ཆེའ༌ ཐོང༌ཨིན༌།”
51 ཡེ༌ཤུའི༌ ཏ༌རུང༌ངའང༌ མོལས༌,
“ངའེ༌ ཁྱོ༌རང༌ང༌ དེན༌བ༌ ཟེར༌རད༌,
ཁྱོ༌རང༌ངི༌ ནམ༌ཁའ༌ བེས༌ཏེ༌ ཡང༌ དཀོན༌མཆོག༌གི༌ ཕོ༌ཉ༌གུན༌,
ང༌ མི༌རིགས༌སི༌བུའི༌ཀ༌ ཛགས༌ཨིན༌ ཡང༌ བབས༌ཨིན༌ ཐོང༌ཨིན༌།”b