རུཐ༌
ནཱའོ༌མི༌ དང༌ རུཐ༌།
1:1-22
1
ཨིས༌ར༌ཨེལ༌ལི༌ ནང༌ང༌ སྐྱོབ༌ཁན༌ གོ༌ཁྲིད༌གུན༌ནི༌ ཝང༌སྲུལ༌ལི༌ ཏུས༌ མུ༌གེ༌ ཇུང༌,
ཡ༌ཧུ༌དཱའེ༌ ཡུལ༌ཇོངས༌སི༌ བེད༌ལེ༌ཧེམ༌པ༌ མི༌ཞིག༌ ཁོང༌རང༌ངི༌ ན༌མ༌ དང༌ བུ༌ཚ༌ ཉིས༌ཀོ༌ ཁྲིད༌ཏེ༌ མོ༌འབ༌བི༌ ཡུལ༌ལ༌ དུག༌ག༌ལ༌ སོང༌།
2 ཏེ༌ མི༌བོའེ༌ མིང༌ ཨེ༌ལི༌མེ༌ལེག༌ ཨིན༌པིན༌,
ཁོའེ༌ ན༌མ༌ ནཱའོ༌མི༌ ཡང༌ མཧ༌ལོན༌ དང༌ ཀི༌ལི༌འོན༌ ཁོའེ༌ བུ༌ཚ༌གུན༌ ཨིན༌པིན༌།
ཁོང༌གུན༌ ཡ༌ཧུ༌དཱའེ༌ ཡུལ༌ཇོངས༌སི༌ བེད༌ལེ༌ཧེམ༌ནེ༌ ཨེ༌ཕ༌རེད༌ མིར༌གྱུད༌ནེ༌ ཨིན༌པིན༌ ཡང༌ ཁོང༌གུན༌ མོ༌འབ༌བ༌ སོང༌ཏེ༌ ཏེ༌རུ༌ ཚུགས༌ཏེ༌ དུགས༌།
3 ཏེ༌རུ༌ ནཱའོ༌མི༌ མག༌པ༌ ཨེ༌ལི༌མེ༌ལེག༌ ཤི༌ ཡང༌ ཁོ༌ དང༌ ཁོའེ༌ བུ༌ཚ༌ ཉིས༌ཀོ༌ ལུས༌།
4 བུ༌ཚ༌ ཉིས༌ཀོའེ༌ མོ༌འབ༌མ༌ བུ༌མོ༌ ཨོར༌པཧ༌ ཏང༌ རུཐ༌ ཉམ༌པོ༌ བག༌སྟོན༌ ཅོས༌།
ཁོང༌གུན༌ ཧ༌ལམ༌ ལོ༌ རྕུ༌ ཏེ༌རུ༌ དུགས༌ཏེ༌ སྟིང༌ནེ༌,
5 མཧ༌ལོན༌ དང༌ ཀི༌ལི༌འོན༌ ཉིས༌ཀོའང༌ ཤི༌,
བུ༌ཚ༌ ཉིས༌ཀོ༌ དང༌ མག༌པ༌ ཤི༌པ༌ ནཱའོ༌མི༌ ཅིག༌པོ༌ ལུས༌།
6 ཏེ༌ནེ༌ ཡ༌ཧུ༌དཱའེ༌ ནང༌ང༌ ཡ༌ཝའེ༌ ཁོང༌རང༌ངི༌ མི༌གུན༌ལ༌ ཅིན༌ལབས༌ སལ༌ཏེ༌ སྟོན༌ཐོག༌ གྱལ༌ལ༌ སལ༌ཁན༌བོ༌ མོ༌འབ༌བི༌ ནང༌ང༌ ནཱའོ༌མིའ༌ ཚོར༌ར༌ཅིག༌ ཁོ༌ དང༌ ཁོའེ༌ བུ༌ཚ༌གུན༌ནི༌ ན༌མ༌ མོ༌འབ༌ནེ༌ བིང༌ཏེ༌ ནཱའོ༌མིའི༌ ཡུལ༌ལ༌ ཆ༌ཅེས༌ གྲལ༌གྲིག༌ ཅོས༌།
7 ནཱའོ༌མི༌ ཁོ༌རང༌ངི༌ བུ༌ཚ༌གུན༌ནི༌ ན༌མ༌ ཁྲིད༌ཏེ༌ ཁོང༌གུན༌ དུག༌ཁན༌ནི༌ ཡུལ༌ནེ༌ བིངས༌ཏེ༌ ཡ༌ཧུ༌དཱ༌ ཆོགས༌ལ༌ ཆ༌སའེ༌ ལམ༌ནེ༌ སོང༌།
8 ཨིན༌ནའང༌ ཁོའེ༌ ཁོ༌རང༌ངི༌ བུ༌ཚ༌གུན༌ནི༌ ན༌མ༌ ཟེརས༌,
“ཁྱོ༌ཞའ༌ ལོགས༌ཏེ༌ ཁྱོ༌ཞ༌རང༌ངི༌ ཨ༌མའེ༌ ཁང༌པ༌ སོང༌ཤིག༌།
ཁྱོ༌ཞའེ༌ ངའ༌ དང༌ ཤི༌ཁན༌གུན༌ལ༌ བཀའ༌དྲིན༌ སྟན༌ པ༌སང༌ ཡ༌ཝའེ༌ ཁྱོ༌ཞའ༌ ཐུག༌རྗེ༌ ཛད༌ཤིག༌།
9 ཡ༌ཝའེ༌ ཁྱོ༌ཞའ༌ ཡང༌སྐྱར༌ མག༌པ༌ སལ༌ཏེ༌ ཁྱོ༌ཞའ༌ ཁྱོ༌ཞ༌རང༌ངི༌ ཁང༌པའེ༌ ནང༌ང༌ སྲུང༌སྐྱོབ༌ ཛད༌ཤིག༌།”
ཏེ༌ནེ༌ ཁོའེ༌ ཁོང༌གུན༌ལ༌ ཇུ༌ ཟེར༌ཏེ༌ པུག༌ ཏངས༌ ཡང༌ ཁོང༌གུན༌ སྲན༌ཏྲེ༌ ངུས༌།
10 བུ༌མོ༌གུན༌ནི༌ ཟེརས༌,
“མན༌།
ང༌ཞའ༌ ཉེ༌རང༌ ཉམ༌པོ༌ ཉེ༌རང༌ངི༌ མི༌གུན༌ ཡོད༌ས༌ ཡོང༌ཨིན༌།”
11 ཨིན༌ནའང༌ ནཱའོ༌མིའི༌ ལན༌ཏངས༌ “ངའེ༌ བུ༌མོ༌གུན༌,
ཁང༌པའ༌ ལོགས༌ཏེ༌ སོང༌།
ཁྱོ༌ཞའ༌ ང༌ ཉམ༌པོ༌ ཅིའ༌ ཆ༌ཉིན༌རག༌?
ཁྱོ༌ཞའེ༌ བག༌སྟོན༌ ཅོ༌ཉན༌ཅེས༌ལ༌ ཅི༌ ང༌ ཞན༌ཡང༌ བུ༌ཚ༌ ཇོར༌ཨིན༌ན༌?
12 མན༌ ངའེ༌ བུ༌མོ༌གུན༌,
ཁྱོ༌ཞའ༌ ལོགས༌ཏེ༌ ཁྱོ༌ཞ༌རང༌ངི༌ ཁང༌པ༌ སོང༌,
ང༌ ཡང༌སྐྱར༌ བག༌སྟོན༌ ཅོ༌ཅེས༌ལ༌ མ༌ རྒད༌མོ༌ སོང༌ཏེ༌ ཨིན༌ནོག༌།
ཀལ༌ཏེས༌ ཏེ༌བོ༌ ཇུངས༌ཏེ༌ ང༌ དི༌རིང༌ ཚན༌ལ༌ ན༌མ༌ ཅོས༌ཏེ༌ བུ༌ཚ༌གུན༌ ཇོར༌ ནའང༌,
13 ཁྱོ༌ཞའ༌ ཁོང༌གུན༌ ལྡན༌ལྡན༌ སྲུངས༌ཏེ༌ དུག༌ཨིན༌ན༌?
ཅི༌ ཁྱོ༌ཞའ༌ ཁོང༌གུན༌ནི༌ ཕིའ༌ ན༌མ༌ མ༌ཅོའ༌ དུག༌ཨིན༌ན༌?
མན༌,
མ༌ནེ༌ མན༌།
ངའེ༌ བུ༌མོ༌གུན༌ འི༌བོ༌ ཁྱོ༌ཞ༌གུན༌ནི༌ སང༌ ངའེ༌ ཕིའ༌ མང༌ང༌ སྐྱོ༌མོ༌ ཨིན༌ནོག༌ ཅིའ༌ཟེར༌ན༌ ཡ༌ཝའེ༌ ངའ༌ ཐུག༌རྗེ༌ སྟན༌ན༌ མ༌ཛད༌ད༌ ཨིན༌ནོག༌།”
14 ཡང༌སྐྱར༌ ཁོང༌གུན༌ སྲན༌ཏྲེ༌ ངུས༌།
ཏེ༌ནེ༌ ཨོར༌པཧའེ༌ ཁོ༌རང༌ངི༌ མག༌པའེ༌ ཨ༌མ༌ པུག༌ ཏངས༌ ཡང༌ ཇུ༌ ཟེར༌ཏེ༌ ལོགས༌ཏེ༌ སོང༌ ཨིན༌ནའང༌ རུཐ༌ ནཱའོ༌མིའ༌ ཐམས༌ཏེ༌ དུགས༌།
15 ནཱའོ༌མིའི༌ ཁོའ༌ ཟེརས༌,
“ལྟོས༌,
ཁྱོ༌རང༌ངི༌ མག༌པའེ༌ ནོའེ༌ ན༌མ༌ ཁོ༌རང༌ངི༌ མི༌གུན༌ དང༌ ལྷ༌ལྷ༌མོ༌ གུན༌ནི༌ཀ༌ ལོགས༌ཏེ༌ ཆའ༌ལ༌,
ཁྱོ༌རང༌ངའང༌ ཁོ༌ ཉམ༌པོ༌ ལོགས༌ཏེ༌ སོང༌།”
16 ཨིན༌ནའང༌ རུཐ༌ཐི༌ ལན༌ཏངས༌,
“ངའ༌ ཉེ༌རང༌ ཕངས༌ཏེ༌ ལོགས༌ཏེ༌ ཆ༌ཅེས༌ལ༌ འུ༌ཙུག༌ མ༌སལ༌།
ཉེ༌རང༌ ཀ༌རུ༌ སྐྱོད༌ནའང༌ ང༌ ཆེན༌ ཡང༌ ཉེ༌རང༌ ཀ༌རུ༌ ཞུགས༌ནའང༌ ང༌ དུག༌ཨིན༌།
ཉེ༌རང༌ངི༌ མི༌ ངའེ༌ མི༌ ཡང༌ ཉེ༌རང༌ངི༌ དཀོན༌མཆོག༌ ངའེ༌ དཀོན༌མཆོག༌ ཨིན༌།
17 ཉེ༌རང༌ ཀ༌རུ༌ ཀྲོངས༌ན༌ ང༌ ཏེན༌ན༌རུ༌ ཤི༌ཨིན༌ ཡང༌ ཏེན༌ན༌རུ༌ སུབ༌ཨིན༌།
ཤི༌ཅེས༌ མ༌སྟོག༌ ཞན༌ ཅི༌ཞིག༌གིའང༌ ང༌དང༌ ཉིས༌ཀོ༌ ཕེ༌ན༌ ཡ༌ཝའེ༌ ངའ༌ སྲན༌ཏྲེ༌ ཆད༌པ༌ སལ༌ཤིག༌།”
18 རུཐ༌ ལོགས༌ཏེ༌ མ༌ཆ༌ རངས༌ཏེ༌ དུག༌ཅེས༌པོ༌ ནཱའོ༌མིའ༌ ཧ༌གོའ༌ཅིག༌ ཁོའེ༌ ཡང༌ ཅའང༌ མ༌ཟེརས༌།
19 ཏེ༌ནེ༌ ཁོང༌ ཉིས༌ཀོའེ༌ བེས༌ གོ༌ཟུགས༌ཏེ༌ བེད༌ལེ༌ཧེམ༌ ཆོགས༌ལ༌ སོང༌།
ཁོང༌གུན༌ ཏེ༌རུ༌ ལེབ༌བ༌ཅིག༌ གྲོང༌ཁྱེར༌ གང༌པོ༌ ཁོང༌གུན༌ ལོགས༌ཏེ༌ ཡོང༌ང༌ ཐོང༌ཏེ༌ སྲན༌ཏྲེ༌ ཧ༌ལས༌ ཡང༌ ཟེརས༌,
“ཅི༌ འི༌བོ༌ ཏན༌ཏན༌ ནཱའོ༌མི༌ ཨིན༌ནོག༌ག༌?”
20 ནཱའོ༌མི༌ ལན༌ཏངས༌,
“ངའ༌ ནཱའོ༌མི༌a མ༌ཟེར༌ར༌ མ༌ར༌b ཟེར༌ཤིག༌ ཅིའ༌ཟེར༌ན༌ ཀུན༌ཝང༌ དཀོན༌མཆོག༌གི༌ ངའེ༌ མི༌ཚེའེ༌ མ༌ སྐྱོ༌མོ༌ ཅོའ༌ཛདས༌།
21 ཆ༌ ཟ༌ནེ༌ ངའེ༌ ལག༌ག༌ ཅི༌ཚང༌མ༌ ཡོད༌པིན༌ ཨིན༌ནའང༌ ཡ༌ཝའེ༌ ངའ༌ ལོགས༌ཏེ༌ ཁང༌པའ༌ ལག༌པ༌ སྟོང༌པ༌ ཁྱོང༌ང༌ ཛདས༌།
ངའ༌ ནཱའོ༌མི༌ ཅིའ༌ ཟེར༌ཨིན༌ ནམ༌ ཡ༌ཝའེ༌ ངའ༌ རྡུག༌ངལ༌ སལ༌ཏེ༌ ཀུན༌ཝང༌ དཀོན༌མཆོག༌གི༌ ངའ༌ རྡུག༌པོ༌ ཇུང༌ཅུག༌ག༌ ཛདས༌།”
22 ཏེན༌ན༌ ཟུག༌གི༌ ནཱའོ༌མི༌ མོ༌འབ༌ནེ༌ ལོགས༌ཏེ༌ ཡོངས༌ ཡང༌ ཁོ༌ ཉམ༌པོ༌ ཁོ༌རང༌ངི༌ བུ༌ཚའེ༌ ན༌མ༌ མོ༌འབ༌མ༌ རུཐ༌ ཡོད༌པིན༌།
ཁོང༌གུན༌ བེད༌ལེ༌ཧེམ༌མ༌ ལེབ༌ ཟ༌ནེ༌ ནས༌སི༌ སྟོན༌ཐོག༌ རྔ༌ཅེས༌ གོ༌ཟུགས༌ཏེ༌ ཡོད༌པིན༌།