ཡ༌ཀོབ༌བི༌ ཨི༌སུའ༌ ཐུག༌ཅེས༌ལ༌ གྲལ༌གྲིག༌ ཅོས༌།
32:1-21
32
ཡ༌ཀོབ༌བའང༌ ཏེ༌ཀ༌ནེ༌ ཁོ༌རང༌ངི༌ བེས༌ལ༌ བིང༌ ཡང༌ ཁོའ༌ ཐུག༌ག༌ལ༌ དཀོན༌མཆོག༌གི༌ ཕོ༌ཉ༌གུན༌ སྐྱོདས༌།
2 ཁོང༌གུན༌ ཐོང༌ང༌ཅིག༌ ཁོའེ༌ ཟེརས༌,
“འི༌བོ༌ དཀོན༌མཆོག༌གི༌ མག༌མི༌ ཛོམ༌སའེ༌ ནས༌ས༌ ཨིན༌ནོག༌།”
ཏེ༌བོའེ༌ཕིའ༌ ཁོའེ༌ ཏེ༌ ས༌ཆ༌བོའེ༌ མིང༌ང༌ མ༌ཧ༌ནཱའིམ༌a ཏགས༌།
3 ཏེ༌ནེ༌ ཡ༌ཀོབ༌བི༌ ཨི༌དོམ༌ ཡུལ༌ལི༌ སེ༌འིར༌རི༌ ས༌ཆའེ༌ ནང༌ང༌ དུག༌ཁན༌ ཁོ༌རང༌ངི༌ ཨ༌ཅོ༌ ཨི༌སུའ༌ ལོན༌ ཁྱེར༌ཁན༌གུན༌ སྔུན༌ལ༌ ལམ༌ཅུགས༌།
4 ཁོའེ༌ ཁོང༌གུན༌ལ༌ ལབ༌ཞ༌ ཏངས༌ཏེ༌ ཟེརས༌,
“ཁྱོ༌ཞའེ༌ འི༌ཟུག༌ ཟེར༌གོས༌,
‘སྤོན༌བོ༌ ཨི༌སུ༌ ཉེ༌རང༌ངི༌ ཡོག༌པོ༌ ཡ༌ཀོབ༌བི༌ མོལ༌ལ༌རག༌,
དི༌རིང༌ ཚག༌པ༌ ང༌ ལ༌བན༌ ཉམ༌པོ༌ དུགས༌པིན༌།
5 ཡང༌ ངའ༌ བ༌ལང༌,
བུང༌བུ༌,
ལུག༌ དང༌ ར༌མ༌,
ཡོག༌པོ༌ དང༌ ཡོག༌མོ༌ མང༌པོ༌ ཡོད༌།
ང༌ ང༌རང༌ངི༌ སྤོན༌བོའེ༌ ཆོག༌སྐྱོར༌ ཐོབ༌ཅེས༌ལ༌ ངའེ༌ ཁོང༌གུན༌ ཉམ༌པོ༌ ལོན༌ ཀལ༌ལད༌།’”
6 ལོན༌ ཁྱེར༌ཁན༌གུན༌ ཡ༌ཀོབ༌ ཡོད༌ས༌ ལོགས༌ཏེ༌ ལེབས༌ཏེ༌ ཟེརས༌,
“ང༌ཞའ༌ ཉེ༌རང༌ངི༌ ཨ༌ཅོ༌ ཨི༌སུ༌ ཡོད༌ས༌ སོང༌པིན༌,
ཁོང༌ ཉེ༌རང༌ང༌ ཐུག༌ག༌ལ༌ ཡོང༌ངད༌ ཡང༌ ཁོང༌ ཉམ༌པོ༌ མི༌ ཞིབ༌གྱ༌ དུག༌།”
7 ཡ༌ཀོབ༌ ཇིགས༌ ཡང༌ ཚབས༌,
ཁོའེ༌ ཁོ༌ ཉམ༌པོ༌ ཡོད༌ཁན༌ནི༌ མི༌གུན༌ ཡང༌ ལུག༌,
ར༌མ༌ དང༌ བ༌ལང༌ གུན༌ནི༌ ཁྱུ༌,
ཡང༌ རྔ༌བོང༌གུན༌ སྡེ༌ ཉིས༌སི༌ ནང༌ང༌ བགོས༌།
8 ཁོའེ༌ སམ༌,
“ཀལ༌ཏེས༌ ཨི༌སུ༌ ཡོངས༌ཏེ༌ སྡེ༌ ཅིག༌ག༌ སྤུང༌གོལ༌ ཅོ༌ན༌ ཞན༌ སྡེ༌བོ༌ ཤོར༌ཉན༌ཅེས༌ ཨིན༌ནོག༌།”
9 ཏེ༌ནེ༌ ཡ༌ཀོབ༌བི༌ མོས༌ལམ༌ ཞུས༌,
“ངའེ༌ མེ༌མེ༌ ཨབ༌ར༌ཧམ༌མི༌ དཀོན༌མཆོག༌ དང༌ ངའེ༌ ཨ༌བ༌ ཨི༌སཱག༌གི༌ དཀོན༌མཆོག༌,
ཡ༌ཝ༌ ཉེ༌རང༌ངི༌ ངའ༌ མོལ༌ལ༌ ཛདས༌,
‘རང༌ ཡུལ༌ དང༌ རང༌ངི༌ ཉེན༌གྲུང༌གུན༌ ཡོད༌སའེ༌ ས༌ཆའ༌ ལོགས༌ཏེ༌ སོང༌ ཡང༌ ངའེ༌ ཁྱོ༌རང༌ ཅི༌ཚང༌མའེ༌ ནང༌ང༌ ཐར༌ཁྱེལ༌ ཆ༌ཅུག༌ཨིན༌།’
10 ཉེ༌རང༌ངི༌ ཡོག༌པོའ༌ སྟན༌ན༌ ཛད༌ཁན༌ ཨིད༌ཤེས༌ དང༌ ཐུག༌རྗེ༌ ཚང༌མ༌ ཐོབ༌ཅེས༌སི༌ འོས༌པ༌ ངའ༌ མན༌།
ཡོར༌དཱན༌ ལྩངས༌པོ༌ རྒལ༌ཏེ༌ ཆ༌ ཟ༌ནེ༌ ངའེ༌ ལག༌ག༌ རྟེན༌ཅེས༌སི༌ བེར༌ཀ༌བོ༌ མ༌ནེ༌ ཅའང༌ མེད༌པིན༌ ཨིན༌ནའང༌ ཏ༌ ངའེ༌ ལག༌ག༌ སྡེ༌ ཉིས༌ དུག༌།
11 ང༌ ངའེ༌ ཨ༌ཅོ༌ ཨི༌སུའི༌ ཀ༌ནེ༌ སྐྱོབ༌བ༌ ཛད༌ཅེས༌ལ༌ ངའེ༌ མོས༌ལམ༌ ཞུའད༌།
ང༌ ཇིགས༌ས༌རག༌ ཅིའ༌ཟེར༌ན༌ ཁོ༌ ཡོངས༌ཏེ༌ སྤུང༌གོལ༌ ཅོས༌ཏེ༌ ང༌ མ༌ཚད༌ ངའེ༌ ན༌མ༌གུན༌ དང༌ ཕྲུ༌གུ༌གུན༌ སད༌སྲིད༌ཅེས༌ ཨིན༌ནོག༌།
12 ཨིན༌ནའང༌ ཉེ༌རང༌ངི༌ མོལ༌ལ༌ ཛདས༌,
‘ངའེ༌ ཁྱོ༌རང༌ ཅི༌ཚང༌མའེ༌ ནང༌ང༌ ཐར༌ཁྱེལ༌ ཅུགས༌ཏེ༌ ཁྱོ༌རང༌ངི༌ པུར༌གྱུད༌ ཚོའེ༌ ཐའ༌མའེ༌ པེ༌མ༌ རྩི༌ མི༌ཉན༌ཅེས༌ ཙོགས༌ གྱུར༌ཅུག༌ཨིན༌།’”
13 ཏེ༌ ཚན༌ལ༌ ཡ༌ཀོབ༌ ཏེན༌ན༌རུ༌ དུགས༌ ཡང༌ ཁོ༌རང༌ང༌ ཡོད༌ཁན༌གུན༌ནི༌ ནང༌ནེ༌ ཁོའེ༌ ཁོ༌རང༌ངི༌ ཨ༌ཅོ༌ ཨི༌སུའི༌ ཕིའ༌ སྐྱེས༌ ལྡམས༌།
14 ཏེ༌གུན༌ ར༌མ༌ 200,
ར༌ཕོ༌ 20,
ལུག༌ 200,
ལུག༌ཕོ༌ 20,
15 རྔ༌བོང༌མོ༌ 30 དང༌ ཏེ༌གུན༌ནི༌ ཕྲུ༌གུ༌གུན༌,
བ༌ལང༌ 40 དང༌ ལང༌ཏོ༌ 10,
བུང༌མོ༌ 20 དང༌ བུང༌ཕོ༌ 10 ཨིན༌པིན༌།
16 ཁོའེ༌ ཏེ༌གུན༌ནི༌ ཁྱུ༌ སོ༌སོ༌ ཅོས༌ཏེ༌ ཁོ༌རང༌ངི༌ ཡོག༌པོ༌གུན༌ལ༌ སྟ༌སྟོག༌ ཅོ༌ཅུགས༌།
ཁོའེ༌ ཁོང༌གུན༌ལ༌ ཟེརས༌,
“ངའེ༌ སང༌ སྔུན༌ལ༌ སོང༌ ཨིན༌ནའང༌ ཁྱུ༌གུན༌ནི༌ པར༌ལ༌ པར༌ བོར༌།”
17 ཁོའེ༌ གོ༌མ༌ ཆའ༌ཁན༌ནི༌ ཡོག༌པོའ༌ ལབ༌ཞ༌ ཏངས༌,
“ངའེ༌ ཨ༌ཅོ༌ ཨི༌སུ༌ ཐུག༌ཏེ༌ ‘ཁྱོ༌རང༌ངི༌ སྤོན༌བོ༌ སུ༌ ཨིན༌ ཡང༌ ཁྱོ༌རང༌ ཀ༌རུ༌ ཆའད༌།
འི༌ སེམས༌ཅན༌ ཚང༌མའ༌ སུའི༌ ཨིན༌ ཟེར༌ཏེ༌ ཏྲི༌ན༌?’
18 ཁྱོ༌རང༌ངི༌ ལན༌ འི༌ཟུག༌ ཏང༌གོས༌,
‘འི༌ ཚང༌མ༌ ཉེ༌རང༌ངི༌ ཡོག༌པོ༌ ཡ༌ཀོབ༌བི༌ ཨིན༌ལེ༌།
འི༌ ཚང༌མ༌ ཁོང༌ངི༌ སྤོན༌བོ༌ ཨི༌སུའི༌ ཕིའ༌ སྟགས༌ ཀལ༌ཁན༌གུན༌ ཨིན༌ ཡང༌ ཡ༌ཀོབ༌ ཁོང༌རང༌ ང༌ཞའེ༌ སྟིང༌ནེ༌ ཡོང༌ངད༌ལེ༌།’”
19 ཁོའེ༌ ཉིས༌པ༌ དང༌ སུམ༌པ༌ ཁྱུ༌གུན༌ ཉམ༌པོ༌ ཡོད༌ཁན༌ནི༌ ཡོག༌པོ༌གུན༌ལའང༌ ལབ༌ཞའ༌ ཏངས༌,
“ཨི༌སུ༌ ཐུག༌ག༌ཅིག༌ ཁྱོ༌ཞ༌གུན༌ནི༌ ཏེན༌ན༌ ཙོགས༌ ཟེར༌,
20 ‘ཉེ༌རང༌ངི༌ ཡོག༌པོ༌ ཡ༌ཀོབ༌ ང༌ཞའེ༌ སྟིང༌ནེ༌ ཡོང༌ངད༌’ ཟེར༌ཅེས༌པོ༌ རྗེད༌ མ༌གོས༌།”
ཡ༌ཀོབ༌བི༌ སམ༌,
“ཅི༌གྱུས༌,
ངའེ༌ སྟགས༌ ཀལ༌ཁན༌བོའེ༌ ཁོ༌ ཐད༌ཅུགས༌ཏེ༌,
སྟིང༌ནེ༌ ང༌ ཐུག༌ག༌ཅིག༌ ཁོའེ༌ ཤགས༌པ༌ ཏངས༌ཏེ༌ ངའ༌ སྙིང༌རྗེ༌ སྟན༌ སྲིད༌ཅེས༌ ཨིན༌ནོག༌།”
21 ཏེ༌བོའེ༌ཕིའ༌ ཁོའེ༌ སྟགས༌ ཚང༌མ༌ ཁོ༌རང༌ངི༌ སང༌ སྔུན༌ལ༌ ཀལས༌,
ཨིན༌ནའང༌ ཁོ༌རང༌ ཏེ༌ ཚན༌བོ༌ ཏེན༌ན༌རུ༌ དུགས༌།
ཡ༌ཀོབ༌བི༌ དཀོན༌མཆོག༌ ཉམ༌པོ༌ ནོལས༌།
32:22-32
22 ཏེན༌ན༌ ཚན༌ལ༌ ཡ༌ཀོབ༌ ལངས༌ཏེ༌ ཁོ༌རང༌ངི༌ ན༌མ༌ ཉིས༌ཀོ༌,
ཁོའེ༌ ཚེ༌ཡོག༌ ན༌མ༌ ཉིས༌ཀོ༌,
ཁོ༌རང༌ངི༌ ཕྲུ༌གུ༌ ཅུག༌ཤིག༌པོ༌ ཁྲིད༌ཏེ༌ ཡབ༌བོག༌ ལྩངས༌པོ༌ རྒལ༌ཏེ༌ ཆ༌ཅེས༌ལ༌ སོང༌།
23 ཁོའེ༌ ཁོང༌ དང༌ ཁོའེ༌ གྱུ༌ནོར༌ ཚང༌མ༌ ལྩངས༌པོའེ༌ ཕར༌ཀ༌ ཀལ༌ ཚར༌ཏེ༌
24 ཁོ༌རང༌ ཅིག༌པོ༌ ལུས༌ཏེ༌ ཡོད༌ ཟ༌ནེ༌ མི༌ཞིག༌གི༌ ཁོ༌ ཉམ༌པོ༌ ནམ༌ ལང༌ལངས༌ ཚོག༌པ༌ ནོལས༌།
25 མི༌བོའ༌ ནོལ༌ཅེས༌སི༌ ནང༌ང༌ ཁོང༌ མི༌གྱལ༌ཅེས༌པོ༌ ཧ༌གོའ༌ཅིག༌ ཁོང༌ངི༌ ཡ༌ཀོབ༌བི༌ སྤི༌རུས༌པོའ༌ ཆག༌ རྩེས༌ཏེ༌ ཏེ༌བོ༌ ཚིགས༌སི༌ ནང༌ནེ༌ ཕིངས༌ཏངས༌།
26 ཏེ༌ནེ༌ མི༌བོའེ༌ མོལས༌,
“ང༌ ཆ༌ཅུག༌,
ཉི༌མ༌ ཤར༌དུག༌།”
ཡ༌ཀོབ༌བི༌ ལན༌ཏངས༌,
“ཉེ༌རང༌ངི༌ ངའ༌ ཅིན༌ལབས༌ སལ༌ཏེ༌ མ༌ནེ༌ ངའེ༌ ཉེ༌རང༌ ཆ༌ མི༌ཅུག༌།”
27 མི༌བོའེ༌ ཏྲིའ༌ ཛདས༌,
“ཁྱོ༌རང༌ངི༌ མིང༌ང༌ ཅི༌ ཨིན༌།”
ཁོའེ༌ ཟེརས༌,
“ཡ༌ཀོབ༌།”
28 ཁོང༌ངི༌ མོལས༌,
“ཏ༌ནེ༌ཕར༌ལ༌ ཁྱོ༌རང༌ང༌ ཡ༌ཀོབ༌ མན༌པ༌ ཨིས༌ར༌ཨེལ༌b ཟེར༌ཨིན༌,
ཅིའ༌ཟེར༌ན༌ ཁྱོ༌རང༌ངི༌ དཀོན༌མཆོག༌ དང༌ མི༌གུན༌ ཉམ༌པོ༌ རད༌ཏེ༌ ཁྱོ༌རང༌ང༌ གྱལ༌ཁའ༌ ཐོབ༌།”
29 ཡ༌ཀོབ༌བི༌ ཟེརས༌,
“ཇུ༌ཇུ༌ ཉེ༌རང༌ངི༌ མིང༌ ཤད༌ད༌ ཛད༌།”
ཨིན༌ནའང༌ ཁོང༌ངི༌ ལན༌སལས༌,
“ཅི༌ཕིའ༌ ཁྱོ༌རང༌ངི༌ ངའེ༌ མིང༌ ཏྲིའད༌?”
ཡང༌ ཁོང༌ངི༌ ཡ༌ཀོབ༌བ༌ ཅིན༌ལབས༌ སལས༌།
30 ཡ༌ཀོབ༌བི༌ ཟེརས༌,
“ངའེ༌ ང༌རང༌ངི༌ མིག༌ནེ༌ དཀོན༌མཆོག༌ ཇལ༌ཏེའང༌ ང༌ སོན༌ཏེའ༌ ལུས༌།”
ཏེ༌བོའེ༌ཕིའ༌ ཁོའེ༌ ཏེ༌ ས༌ཆ༌བོའེ༌ མིང༌ང༌ པེ༌ནིལ༌c ཏགས༌།