ཏམ༌པའེ༌ སུང༌རབས༌སི༌ སྐོར༌། 1

ཡ༌ཝ༌ དཀོན༌མཆོག༌གི༌ ཏམ༌པའེ༌ སུང༌རབས༌སི༌ སྐོར༌།

ཏམ༌པའེ༌ སུང༌རབས༌སི༌ ནང༌ང༌ སྤེ༌ཆ༌ 66 ཡོད༌ཏེ༌ ཨིན༌ནོག༌, ཞལ༌ཆད༌ སྙིང༌པའེ༌ ནང༌ང༌ སྤེ༌ཆ༌ 39 ཡང༌ ཞལ༌ཆད༌ སོ༌མའེ༌ ནང༌ང༌ སྤེ༌ཆ༌ 27།

ཞལ༌ཆད༌ སྙིང༌པ༌ ཨ༌རམ༌ དང༌ ཨིབ༌རི༌པའེ༌ སྐད༌དི༌ ནང༌ང༌ ཡེ༌ཤུ༌ མ༌ཤི༌ཀ༌ ལྟམས༌སི༌ སང༌ སྔུན༌ནི༌ ལོ༌ 1,500 ནེ༌ 400 པར༌རི༌ ཏུས༌སི༌ ནང༌ང༌ བྲིས༌ཏེ༌ ཨིན༌ནོག༌། དཀོན༌མཆོག༌གི༌ ཏམ༌པའེ༌ ཐུག༌ཉིད༌དི༌ ཁྲིད༌ད༌ ཛད༌ཁན༌ མི༌ སོ༌སོ༌ མང༌པོའེ༌ འི༌ སྤེ༌ཆ༌བོ༌ བྲིའ༌ ཛད༌ཏེ༌ ཨིན༌ནོག༌ སྤེར༌ན༌ ལུག༌རྫི༌, ལུང༌སྟོན༌པ༌, གྱལ༌པོ༌, གྱལ༌པོའེ༌ ཞབ༌ཞི༌ དང༌ ཞན༌ མང༌པོ༌།

ཞལ༌ཆད༌ སྙིང༌པ༌ ཡ༌ཝ༌ དཀོན༌མཆོག༌གི༌ ཇིག༌རྟེན༌ དང༌ ནམ༌ཁའ༌ ཡང༌ ཏེ༌གུན༌ནི༌ ནང༌ང༌ ཡོད༌ཁན༌ ཚང༌མ༌ ཛད༌ཁན༌ནི༌ སྐོར༌ལ༌ ཤད༌ད༌ ཛད༌ཅེས༌ནེ༌ གོ༌ཟུག༌ག༌ ནོག༌། ཏུས༌ གོ༌ཟུག༌ ཛད༌ ཟ༌ནེ༌ དཀོན༌མཆོག༌གི༌ ཅི༌ཚང༌མ༌ ཕུན༌སུམ༌ཚོགས༌པ༌ ཛདས༌། གོ༌མའེ༌ བུ༌མོ༌ དང༌ བུ༌ཚའེ༌ ནང༌ང༌ སྡིག༌པ༌ ཅའང༌ མེད༌པིན༌ ཡང༌ ཛ༌འོ༌ ཙོགས༌ལ༌ དཀོན༌མཆོག༌ ཁོང༌གུན༌ ཉམ༌པོ༌ ཐུག༌ག༌ སྐྱོད༌ཏེ༌ ཞལ༌ཏ༌ སལ༌ལད༌པིན༌། ཟུ༌མོ༌ ཡ༌ ཤི༌ཅེས༌ མེད༌པིན༌ ཡང༌ དཀོན༌མཆོག༌གི༌ ཁོང༌གུན༌ལ༌ ཇིག༌རྟེན༌ནི༌ཀ༌ སྲོག༌ ཡོད༌ཁན༌ ཚང༌མའེ༌ཀ༌ ཝང༌སྲུལ༌ ཅུག༌ག༌ ཛདས༌། ཨིན༌ནའང༌ ཤེ༌ཏན༌ནི༌ བུ༌ཚ༌ དང༌ བུ༌མོ༌ ཚོད༌ལྟའེ༌ ནང༌ང༌ ཁྲིདས༌ ཡང༌ ཁོང༌གུན༌ནི༌ དཀོན༌མཆོག༌གི༌ བཀའ༌ སལ༌ཁན༌བོ༌ ཅགས༌། ཏེ༌ ཏུས༌ནེ༌ ཕར༌ལ༌ དཀོན༌མཆོག༌གི༌ ངན༌ ཇིག༌རྟེན༌ དང༌ ནམ༌ཁའ༌ གང༌པོའ༌ ཕོགས༌ཏེ༌ ཏེ༌ནང༌ང༌ སྡིག༌པ༌, ཟུ༌མོ༌, ཤི༌ཅེས༌ དང༌ རྡུག༌ངལ༌ གོ༌ཟུག༌ ཨིན༌ནའང༌ ཏེ༌བོ༌ ཞལ༌ཆད༌ སྙིང༌པའེ༌ སྟིང༌ཇུག༌གི༌ ལོན༌བོ༌ མ༌ནོག༌། དཀོན༌མཆོག༌གི༌ ཤེ༌ཏན༌ནི༌ ལས༌གུན༌ མེད༌ཁན༌ ཅོས༌ཏེ༌ དཀོན༌མཆོག༌གི༌ཀ༌ ཏད༌པ༌ ཅོ༌ཁན༌གུན༌ སྐྱོབ༌ཁན༌ སྐྱབ༌གོན༌ཞིག༌ ཀལ༌ལ༌ ཛད༌ཅེས༌སི༌ ཞལ༌ཆད༌ ཛདས༌།

ཏུས༌ གོ༌ཟུགས༌པ༌ནེ༌ ཕར༌ལ༌ ཞལ༌ཆད༌ སྙིང༌པའེ༌ ནང༌ང༌ མིར༌གྱུད༌ ཉིས༌སི༌ སྐོར༌ལ༌ ཤད༌དུག༌, ཏེ༌གུན༌ ཏད༌པ༌ ཅོས༌ཏེ༌ ཡ༌ཝ༌ དཀོན༌མཆོག༌ག༌ ཅོལ༌ཁན༌གུན༌ དང༌ ཁོང༌ ཕངས༌ཏེ༌ ལྷ༌ལྷ༌མོ༌ གུན༌ལ༌ ཅོལ༌ཁན༌གུན༌ ཨིན༌ནོག༌། ཡ༌ཝ༌ དཀོན༌མཆོག༌ག༌ ཏད༌པ༌ ཅོས༌ཏེ༌ ཅོལ༌ཁན༌གུན༌ སེད༌དི༌ པུར༌གྱུད༌ ནོ༌ཨ༌, ཨབ༌ར༌ཧམ༌, ཨི༌སཱག༌, ཡ༌ཀོབ༌ དང༌ ཨིས༌ར༌ཨེལ༌ལི༌ མིར༌གྱུད༌གུན༌། ཏེ༌ ཏུས༌རིང༌མོའེ༌ ནང༌ང༌ ཡ༌ཝ༌ དཀོན༌མཆོག༌གི༌ ཆག༌ལས༌གུན༌ གྱུད༌ཏེ༌ ཁང༌ངི༌ སྕོད༌ལམ༌ ཁོང༌རང༌ངི༌ མི༌གུན༌ལ༌ སྔོན༌ཅུག༌ག༌ ཛདས༌། འི༌ སྤེ༌ཆ༌གུན༌ནི༌ ནང༌ང༌ ཡ༌ཝ༌ དཀོན༌མཆོག༌ ཏམ༌པ༌, ཀུན༌ཝང༌, ཀྲང༌པོ༌, སྙིང༌རྗེ༌ཅན༌, ཅམས༌པ༌ དང༌ ཤགས༌པ༌ སལ༌ལ༌ ཛད༌ཁན༌, ཏད༌པ༌ ཅོ༌ཁན༌གུན༌ནི༌ ཡབ༌, སོན༌པོ༌ དཀོན༌མཆོག༌ དང༌ སྐྱབ༌གོན༌ ཞུགས༌ཁན༌བོ༌ སལ༌པོ༌ བྲིའ༌ ཛད༌ཏེ༌ ཨིན༌ནོག༌།

ཁོང༌ངི༌ སྡིག༌པ༌ནེ༌ སྐྱོབ༌ཁན༌ སྐྱབ༌གོན༌ ཀལ༌ལ༌ ཛད༌ཅེས༌སི༌ ཞལ༌ཆད༌པོ༌ ལུང༌སྟོན༌པ༌གུན༌ གྱུད༌ཏེ༌ མི༌རབས༌ནེ༌ མི༌རབས༌ ཤད༌ད༌ ཛདས༌ ཡང༌ ཏེ༌ཏུས༌སི༌ མི༌གུན༌ ཡ༌ཝ༌ དཀོན༌མཆོག༌ སྐྱོད༌ཅེས༌སི༌ ཞག༌པོའེ༌ ཕིའ༌ སྲུངས༌ཏེ༌ ཡོད༌པིན༌། ཏུས༌སི༌ གོ༌ཟུག༌ དང༌ ཞལ༌ཆད༌ སྙིང༌པ༌ གང༌པོའེ༌ ནང༌ང༌ བྲིའ༌ ཛད༌ཁན༌ནི༌ སྐྱབ༌གོན༌བོ༌ ཞལ༌ཆད༌ སོ༌མ༌ ཅིག༌པོའེ༌ ནང༌ང༌ སྔོན༌ཅུག༌ག༌ ཛད༌ཏེ༌ ཨིན༌ནོག༌, ཁོང༌ ནི༌ ཡེ༌ཤུ༌ མ༌ཤི༌ཀ༌ ཞུགས༌ཏེ༌ ཨིན༌།

ཞལ༌ཆད༌ སོ༌མའེ༌ སྤེ༌ཆ༌ གརིས༌སི༌ སྐད༌དི༌ ནང༌ང༌ ཡང༌ ཡེ༌ཤུ༌ མ༌ཤི༌ཀ༌ ཀྲོངས༌ཏེ༌ སོན༌ཏེའ༌ ཞངས༌ས༌ ཛད༌ཏེ༌ སྟིང༌ནེ༌ ལོ༌ 13 དང༌ 30 པར༌རི༌ ཏུས༌སི༌ ནང༌ང༌ བྲིའ༌ ཛད༌ཏེ༌ ཨིན༌ནོག༌། ཏམ༌པའེ༌ ཐུག༌ཉིད༌དི༌ ཁྲིད༌ད༌ ཛད༌ཁན༌ མི༌ སོ༌སོ༌ མང༌པོའེ༌ འི༌ སྤེ༌ཆ༌བོ༌ བྲིའ༌ ཛད༌ཏེ༌ ཨིན༌ནོག༌ སྤེར༌ན༌ ཉ༌ ཟུམ༌ཁན༌, ཁྲལ༌ལེན༌ཁན༌, ཆོས༌ ཤད༌ཁན༌ ལོབ༌བོན༌ དང༌ ཞན༌གུན༌། འི༌ སྤེ༌ཆ༌ བྲི༌ཁན༌གུན༌ནི༌ ཡེ༌ཤུ༌ མ༌ཤི༌ཀའེ༌ མི༌ཚེ༌ དང༌ ཆག༌ལས༌གུན༌ གྱུད༌ཏེ༌ ཁོང༌ ཞལ༌ཆད༌ སྙིང༌པའེ༌ ནང༌ང༌ བྲིས༌ཁན༌ནི༌ ཁྲིམས༌ ཚང༌མ༌ ཁའ༌ཉན༌ན༌ ཛད༌ཁན༌ ཡང༌ ཁོང༌ངི༌ ནང༌ང༌ སྡིག༌པ༌ མེད༌ཁན༌བོ༌ སལ༌པོ༌ ཧ༌གོ༌ཅུགས༌ཏེ༌ ཨིན༌ནོག༌། ཡེ༌ཤུ༌ མ༌ཤི༌ཀའ༌ ཏད༌པ༌ ཅོས༌ཏེ༌ ཁོང༌ངི༌ གྱབ༌ནེ༌ གྲུལ༌ཁན༌ ཚང༌མ༌ལ༌ ཁོང༌ ཀྲོང༌ཤེས༌ དང༌ སོན༌ཏེའ༌ ཞངས༌ཤེས༌ གྱུད༌ཏེ༌ ཐར༌པ༌ ཐོབ༌ཅེས༌པོ༌ སལ༌པོ༌ ཧ༌གོ༌ཅུགས༌ཏེ༌ ཨིན༌ནོག༌། ཇིག༌རྟེན༌ ཛད༌དི༌སང༌ སྔུན༌ལ༌ དཀོན༌མཆོག༌གི༌ ཁོང༌རང༌ངི༌ སྲས༌ གཙོ༌བོ༌ ཡེ༌ཤུ༌ མ༌ཤི༌ཀ༌ སྐྱབ༌གོན༌ དང༌ གྱལ༌པོའེ༌ ཚུལ༌ལ༌ ཀལ༌ལ༌ ཛད༌ཏེ༌ ཁོང༌རང༌ངི༌ མི༌གུན༌ སྡིག༌པ༌ དང༌ ཉལ༌ཝའེ༌ ནང༌ནེ༌ སྐྱོབས༌ཏེ༌ ནམ༌ཁའེ༌ གྱལ༌སྲིད༌དི༌ ནང༌ང༌ ཏུས༌གྱུན༌ནི༌ ཕིའ༌ དཀོན༌མཆོག༌གི༌ ཛ༌འོ༌ གྱུར༌ཅུག༌ཅེས༌སི༌ ཐབ༌ལྡིངས༌ ཛད༌ཁན༌བོ༌ བྲིས༌ཏེ༌ ཨིན༌ནོག༌།

སྐད༌ སྣ༌ཚོགས༌སི༌ ནང༌ང༌ ཏམ༌པའེ༌ སུང༌རབས༌།

ལོ༌ 2020 སྟིང༌ཇུག༌ ཚག༌པ༌ ཏམ༌པའེ༌ སུང༌རབས༌ གང༌པོ༌ ༼ཞལ༌ཆད༌ སྙིང༌པ༌ དང༌ སོ༌མ༌༽ སྐད༌ 704, ཞལ༌ཆད༌ སོ༌མ༌ སྐད༌ 1,551 ཡང༌ སུང༌རབས༌སི༌ ནང༌ནེ༌ ཁག༌རིག༌ སྐད༌ 1,160 ནང༌ང༌ སྐད༌གྱུར༌ ཅོ༌ཚར༌ཏེ༌ ཨིན༌ནོག༌། ཚང༌མ༌ ཐེ༌ན༌ 3,415 སྐད༌དི༌ ནང༌ང༌ ཡ༌ཝ༌ དཀོན༌མཆོག༌གི༌ ཏམ༌པའེ༌ སུང༌རབས༌ སྐད༌གྱུར༌ ཅོས༌ཏེ༌ ཡོད༌ཏེ༌ ཨིན༌ནོག༌།

དག༌ས༌ ཚག༌པ༌ ཧ༌ལམ༌ 500,00,00,000 ཏམ༌པའེ༌ སུང༌རབས༌སི༌ སྤེ༌ཆ༌གུན༌ ཇིག༌རྟེན༌ནི༌ ཡུལ༌ མང༌ཆེའེ༌ མི༌གུན༌ལ༌ བགོས༌ ཚར༌ཏེ༌ ཨིན༌ནོག༌།

ལ༌དཱགས༌སི༌ སྐད༌དི༌ ནང༌ང༌ ཏམ༌པའེ༌ སུང༌རབས༌།

འི༌ སྤེ༌ཆའེ༌ ནང༌ང༌ ཞལ༌ཆད༌ སོ༌མ༌ གང༌པོ༌ དང༌ ཞལ༌ཆད༌ སྙིང༌པའེ༌ སྤེ༌ཆ༌ རྒྱད༌ མ༌ནེ༌ མེད༌ཏེ༌ ཨིན༌ནོག༌།

སུང༌རབས༌ སིལ༌ཅེས༌སི༌ ནང༌ང༌ རོགས༌གུན༌།

སུང༌རབས༌ སིལ༌ཅེས༌སི༌ ནང༌ང༌ རོགས༌ ཐོབ༌ཅེས༌ལ༌ སྤེ༌ཆ༌ རེ༌རེ༌ ལིའུ༌ དང༌ ལིའུ༌ རེ༌རེ༌ རྐང༌པའེ༌ ནང༌ང༌ བགོས༌ཏེ༌ ཡོད༌ཏེ༌ ཨིན༌ནོག༌། ཨང༌ཀྲངས༌ ཆེན༌མོའེ༌ ནང༌ང༌ བྲིས༌ཁན༌བོ༌ ལིའུ༌ ཡང༌ ཆུ༌ངུན༌ནི༌ ནང༌ང༌ བྲིས༌ཁན༌བོ༌ རྐང༌པ༌ ཨིན༌ནོག༌། སྤེ༌ཆའེ༌ ཏེ༌ ཁག༌པོའེ༌ ནང༌ང༌ བྲིས༌ཁན༌ནི༌ སྐོར༌ ཤད༌ཅེས༌ལ༌ གོར༌གྱན༌ བྲིས༌ཏེ༌ ཡོད༌ཏེ༌ ཨིན༌ནོག༌།

འི༌ སྤེ༌ཆའེ༌ གྱབ༌པོའེ༌ཀ༌ “ཏམ༌པའེ༌ སུང༌རབས༌སི༌ ཁག༌ཅན༌ མིང༌ དང༌ ཚིགས༌ གུན༌” ཟེར༌ཁན༌ནི༌ ཁག༌ཞིག༌ ཡོད༌ཏེ༌ ཨིན༌ནོག༌ ཀ༌བོའེ༌ ནང༌ང༌ སིལ༌ཁན༌གུན༌ནི༌ ཏེ༌ ཚིགས༌ ཡ༌ མིང༌ངི༌ སྐོར༌ལ༌ གྱལ༌ལ༌ ཅོས༌ཏེ༌ ཧ༌གོ༌ཅེས༌ལ༌ ཞིབ༌སལ༌ བྲིས༌ཏེ༌ ཡོད༌ཏེ༌ ཨིན༌ནོག༌།

འི༌ སྤེ༌ཆའེ༌ གྱབ༌པོའེ༌ཀ༌ ཞལ༌ཆད༌ སྙིང༌པ༌ དང༌ སོ༌མ༌ ཉིས༌ཀོའེ༌ ནང༌ང༌ བྲིས༌ཏེ༌ ཡོད༌ཁན༌ནི༌ ཡུལ༌ཇོངས༌ དང༌ སྐུ༌ཚབས༌ པ༌འུ༌ལུའི༌ བེས༌ལམ༌ སྟན༌ཁན༌ནི༌ ནག༌ཤ༌གུན༌ ཡོད༌ཏེ༌ ཨིན༌ནོག༌། དཀོན༌མཆོག༌གི༌ ཛད༌ཁན༌ གོ༌མའེ༌ མི༌ ཨ༌དཱམ༌མི༌ པུར༌གྱུད༌ ཡོ༌སེབ༌ ཚག༌པ༌ ཡང༌ ཨ༌དཱམ༌ནེ༌ གཙོ༌བོ༌ ཡེ༌ཤུ༌ མ༌ཤི༌ཀ༌ ཚག༌པ༌ ཁག༌ཅན༌ མི༌གུན༌ནི༌ ཏུས༌སི༌ ནག༌ཤ༌གུན༌ ཡོད༌ཏེ༌ ཨིན༌ནོག༌།