SURA KARONGGANINA NGGARI JAꞌI
YOHANES
Petabe
1
Sura eꞌi nggari jaꞌiku topanggeniaka topomparasaya, ka komi totuꞌa besi to nipelisi Alatala, pade ka ana-anamu. Aku mpuꞌu-mpuꞌu nompotowe komi pura-pura, pade daꞌa aga aku tapi pura-pura tau to nangginjani pepatuduki to nakonona woꞌu.
2 Kami pura-pura nompotowe komi sabana kita mpasanggani-nggani naroo nantuki pepatuduki to nakonona. Pepatuduki etu bate-batena naria ri jaꞌita sampe ri kasae-saena.
3 Perapi towe belo Umata Pue Alatala bo Anana Yesus Kristus maria ri jaꞌita. Perapi ira maasi mata manggita kita pade mombawai ka kita katuwua mabelo. Etu pura-pura majadi ri jaꞌita to naroo nantuki pepatuduki to nakono etu, pade to nompotowe roa-roata.
Kita kana mantuki pepatuduki to nakonona pade mosipotowe
4 Nadamba mpuꞌumo raraku nangepe kareba to nanguli naria anamu natuwu nantuki pepatuduki Alatala to nakonona ewa to niparenta Umata Alatala mboto ka kita.
5 Jadi weꞌi-weꞌi, indo, kuperapi ka komi ante mpuꞌu-mpuꞌu, ala kita mosipotowe sambaꞌa bo sambaꞌa. To nitulisiku eꞌi daꞌa parenta to nabouna, tapi etu parenta to niwai ka kita nggari pamulana kita nomparasaya i Pue Yesus.
6 Iweꞌimo to niulika towe: Kita kana matuwu mantuki parenta Alatala. Iweꞌimo parenta to niepe komi nggari pamulana etu: Kita kana matuwu ante mosipotowe sambaꞌa bo sambaꞌa.
7 Nadeamo topebagiu neumba pade nalau ri umba-umba ri dunia. Ira etu tau-tau to daꞌa nompangaku Yesus Kristus narata ri dunia netimbali najadi manusia. Tau-tau etumo topodawa bo bali Kristus.
8 Etu sampe komi kana mainga, neꞌe sampe malipo nggari jaꞌi komi nuapa to nipatuduki kami ka komi. Komi kana mainga ala komi mamala mombarata pura-pura rasi to nipakasadia Alatala ka komi.
9 Isema-sema daꞌa naroo mantuki pepatuduki Kristus tapi aga manggabasaka pepatuduki etu, tau-tau etu daꞌa naria Alatala riara ntaꞌi ira. Tapi isema-sema naroo mantuki pepatuduki Kristus, iramo to naria Umata Pue Alatala bo Anana riara ntaꞌina.
10 Jadi ane maria tau marata ri jaꞌi komi to nompatolele pepatuduki to nosisala nggari pepatuduki Kristus, neꞌe ratarima ira rara njapo komi. Neꞌe komi mombatabe ira,
11 sabana ane komi mombatabe ira, batuana komi najadi topantulungi ira nowia to najaꞌana.
Tesa kaopuna
12 Danadeapa to kutesa ka komi, tapi nipekiriku nabelopa neꞌe ratulisi riara sura. Nisarumakaku aku mboto mamala marata ri jaꞌi komi pade kita mamala motesa mosirata mata ala mpuꞌu-mpuꞌu madamba rarata mpasanggani-nggani.
13 Nadea tabe nggari jaꞌi ana-ana nu sampesuwumu ri seꞌi to nipelisi Alatala woꞌu.