Alatala topotangara pura-pura manusia
76
Dade Asaf ka topopalu dade. Nipodade ante nokanda kacapi. Dade nantoiya Alatala.2 Alatala natolele ri bagia Yehuda,
sanga-Na natolele ri Tana Israel!
3 Sapo-Na naria ri Kota Yerusalem,
petoꞌo-Na ri Bulu Sion!
4 Ri setumo Iꞌa nompakaropu pura-pura parewa mposibali,
pura-pura pana to noreana, kaliawo bo guma.
5 Pue, nareme mpuꞌumo Komi,
neliu nggagaya nggari bulu-bulu to naria mami nggaulu.
6 Tantara-tantara to nabia naopumo mbara-mbara ira niago,
namatemo ira bo mana namala nembangu.
Pura-pura tau to nabia bo naroso
mana ria karoso ira.
7 O Alatala to nisomba Yakub,
pura-pura jara bo topesawi jara namate nanawu,
sabana nibunggaa-Mu.
8 Aga Komimo to masipato rapokaeka!
Daꞌa ria to mantaha menggore ri ngayo-Mu ane Komi manggarau.
9 Nggari suruga Komi nompakanoto pombabutusi-Mu.
Pade manusia ri dunia naeka bo nekalino,
10 tempo Komi nekanggore motangara
bo mompakasalama tau to nipandasa ri dunia.
11 O Alatala, nipowia-Mu bali-Mu nantoiya Komi,
pade bali to danabolina kana mombasomba Komi.
12 Waimo ka i PUE Alatalamu nuapa to nijanjimu.
Nabelopa pura-pura tau to nosinggamosu ante Tana Israel,
mombawai pesomba ka Alatala to nipokaeka.
13 Iꞌamo to nompakaede rara tau-tau nakuasa sampe ira mana masombo,
pade Iꞌamo to nipokaeka magau-magau ri dunia.