Alatala topotangara to nanoana
75
Dade Asaf ka topopalu dade. Nipodade nantuki dade to nosanga ka “Neꞌe mompakaropu.” Dade nantoiya Alatala.2 O Alatala, kami nosukuru ri jaꞌi-Mu,
kami nosukuru sabana Komi namosu.
Tau-tau nompatolele powia-Mu to nipogumaa.
3 Komi nanguli, “Ri tempo to Kupakatantu,
Aku kana mantangara manusia ante manoa.
4 Tempo dunia bo pura-pura isina nogagoya,
Aku kana mompakaroso palo nu dunia.
5 Aku nanguli ka tau nangoa,
‘Neꞌe mana mangoa,’
bo nanguli ka tau najaꞌa,
‘Neꞌe mana mompakalanga rara!
6 Neꞌe mompopokita karosomu,
bo neꞌe mana motesa masombo!’”
7 Sabana daꞌa ria tau nggari pebulu nu eo,
atau nggari kasolona,
bara nggari karawa baina
to namala mompakalanga katuwu manusia.
8 Tapi aga Alatala mboto to mantangara manusia;
Iꞌa nompakaede katuwu sambaꞌa tau bo nompakalanga katuwu tau ntanina.
9 Rau rara i PUE nirapaka ewa tubu ri pale-Na,
to niisi ue anggur to mpuꞌu-mpuꞌu nepakalangu.
Iꞌa kana mantubaraka isina,
ala pura-pura tau najaꞌa ri dunia kana manginu sampe maopu.
10 Tapi aku kana mompatolele powia Alatala to nisomba Yakub,
aku kana modade mantoiya Iꞌa sampe ri kasae-saena.
11 Iꞌa kana mompakalipo karoso tau najaꞌa,
tapi tau nabelo kana ratambai-Na karosona.