‑Zezu Klisɩɩ 'dɛɛ 'kienyi ‑tɩtɩe ‑yɔ ɔ 'ylilo
2
Nɩɩ,
Klisɩ tɛmanɩa aɩn la,
ɔ amɩaa zɛkalɩe paa aɩn 'kʋayli,
ɔ Zuzu nʋa aɩn ‑bhlo,
we 'nɩ mʋʋ?
Klisɩɩ 'gbʋ a 'yɩbhalɩ ‑yɩbhalɩa,
a ka nyazɩdlɩ a 'dɛkpʋa nyɩdɩ ‑bhlo ‑bhlo,
we 'nɩ mʋʋ?
2 Nɩɩ,
we ‑ka 'sa ‑mɩ,
amɩa na bhubhoea,
a ‑ka dlɩ ‑bhlo,
amɩaa 'wlukʋʋn lapʋpalɩe ‑mɩ ‑bhlo,
a kɩkalɩ zɛ.
A ‑ka 'sa nʋda ‑mɩ,
'ɩn a yelia 'mʋna na dlɩ zɔ.
3 A 'na nʋnʋ ‑lu yabhlogbɔɔ lɛ ‑yɔmɩmnɩe ‑yɔ 'dɛɛ 'ylimanɩe klo nya ‑nɩ.
A tɩ amɩaa 'dɛ 'wʋ 'kienyi.
A 'bhu amɩaa ‑lima 'wʋ nɛɛ ma 'yli ma ‑zi aɩn.
4 Nɩɩ,
nyɩmɛ 'na tɩtalɩ ɔ 'dɛɛ zʋzɔnʋ ‑bhlogbɔɔ da ‑nɩ.
Amɩa weee tɩtalɩ 'ya amɩaa ‑limaa nʋʋ zʋzɔnʋ da.
5 Dlɩ ‑we ‑Zezu Klisɩ kaa,
a ‑ka we a 'dɛkpʋa nyɩdɩ.
6 ‑Zezu Klisɩ,
sa ‑Lagɔ mɩa,
'sa ɔ mɩa ‑kpɔ.
Sa ɔ ‑yɔ ‑Lagɔ 'sɔ mnenia 'wʋ,
ɔ 'nɩ we 'klili.
7 'Ɩn ‑we weee ɔ kaa,
ɔ ka we ‑yɔŋwnu ɔ 'ka we 'yitide,
'ɩn ɔ yia ɔ 'dɛ gaylo 'wʋnʋ.
Cɩɩn,
ɔ ka nyɩmɛɛ 'dɛbhie ‑zɛ:
ɔ ‑yɔ nyɩma 'sɔ yia 'wʋwlʋ weee.
8 Ɔ ka 'ya ɔ 'dɛ 'wʋtɩ 'kienyi:
‑Lagɔɔ 'nʋŋwɛzʋzʋee 'gbʋ,
'ɩn ɔ yia tlɩtlɩee gbʋ ‑yɔŋwnu.
Wa yia 'dɛbhie ɔ su ‑gʋ lakʋlʋ,
'ɩn ɔ yia tlɩ.
9 We 'gbʋ,
‑Lagɔ yia ɔ nyɩmaa 'wlulapɩlɩkpe 'kadʋ ‑gʋ ladɩ,
'ɩn 'ŋnɩ ‑we 'ylia ‑we zia 'ŋnɩ weee 'wʋ,
‑Lagɔ yia we ɔ 'nyɛ.
10 Nɩɩ,
‑Lagɔ 'yɩbha,
ɔ lalalu weee mɩa yalɩ,
‑we mɩa dʋdʋ ‑gʋ ‑yɔ dʋdʋʋ zɔ,
we 'sibhli 'kukolu ‑Zezu 'yu,
ɔɔ ‑Zezuu 'ŋnɩɩ 'nʋŋwɛzʋzʋee 'gbʋ.
11 'Ɩn we 'ka lalalu weee ŋwɛɛ 'tla nɩɩ,
‑Zezu Klisɩ ‑wa Nyɩmaa ‑Kanyɔ.
'Ɩn Dide ‑Lagɔɔ 'ŋnɩ 'ka mnɩda ‑tʋ.
‑Lagɔnyɩma mɩ dʋdʋ ‑gʋ zlɩ 'bhisa
12 We 'dɛɛ 'gbʋ,
na 'talea ‑zɔnʋ,
da ɩn mɩa ‑benyi amɩaa ‑gbɛ,
a ka ‑Lagɔ 'nʋŋwɛ zʋ 'kɔmʋʋ,
'ɩn da ɩn 'nɩa ‑slɛɛn da amɩaa ‑gbɛ ‑mɩ,
a zʋ 'ya ɔ 'nʋŋwɛ bhabha.
A nʋ lubho,
'ɩn a 'ka amɩaa 'pʋpʋe gbalɩ.
A nʋ we lɛ ‑Lagɔɔ sɔsʋe ‑yɔ ‑yɔtɛlɩe nya.
13 Nɩɩ,
‑Lagɔɔ 'dɛ mɩ amɩaa dlɩ zɔ lubho nʋda,
ɔ dʋmagbʋ 'ka aɩn dʋdʋnamanɩ,
'ɩn a 'ka 'ya we lɛnʋ.
14 Amɩaa lɛnʋgbʋ weee 'wʋ,
a 'na 'ŋwuŋweni zɔ ‑nɩ,
'ɩn a 'na kpɩkpɛlɩ ‑nɩ.
15 'Ɩn gbʋnyuu 'na ‑mɩ ‑nɩ aɩn kwɛyli ‑nɩ,
'ɩn a ‑tʋ ‑mɔwlʋda,
a 'ka ‑Lagɔɔ 'yua tɩklɩɩ ‑zɛ,
gbʋnyuu ‑lɛnʋnya ‑yɔ ‑dawlicɩan nyɩdɩ.
A ‑nyuma wa nyɩdɩ dʋdʋ ‑gʋ ylɔ 'bhisa,
nikpise 'wʋ.
16 'Ɩn wɛlɩ ‑we wlaa 'yliyɔgagɩe,
a gba we nyɩma ‑yla,
'ɩn zlɩ ‑Zezu Klisɩ ‑ka lʋyi,
'mʋna na yia lia ɔ 'yu amɩaa 'gbʋ.
'Ɩn 'ji na yia we yibhelia nɩɩ,
lubho ɩn nʋa,
we 'nɩ bhe,
'ɩn ɩn 'nɩ sɩa bhe.
17 Amɩaa ‑Lagɔɔ dlɩgʋzʋzʋe ‑we mɩa 'slaka 'bhisa,
wa yi 'dɛbhie we 'gbʋ na 'pɩɔn laslu nɛɛ we nyu,
'mʋna na lia.
'Ɩn na ‑yɔ a 'dɛ weee lia 'mʋna dabʋdʋ.
18 Nɩɩ,
amɩa li 'sa ‑bhloo 'dɛ 'mʋna,
'ɩn a ‑yɔ 'mɩ li we dabʋdʋ.
Timotee ‑yɔ Epafloditɩ 'sɔ
19 Nyɩmaa ‑Kanyɔ ‑Zezu ‑ka we ‑yɔŋwnu nɩ,
Timotee na yia daylɩ amɩaa ‑gbɛ tiea.
'Ɩn da ɔ ‑ka lʋyi,
ɔ 'ka 'mɩ ‑yla amɩaa ‑zɔɔ dɩ ‑sa,
'ɩn ‑mʋʋ 'ka 'ya 'mɩ 'kʋayli 'pa.
20 Nɩɩ,
‑wa ‑yɔ 'mɩ 'sɔ mɩa ‑seli,
ɔ 'dɛbhlogbɔɔ kaa amɩaa gbʋ.
'Ɩn mɔ 'yɩbhaa ɔ 'ka aɩn ‑yɔbɛ,
ɔ 'ka aɩn 'wʋsa.
21 'Ɩn ‑wa weee ‑tʋa 'wʋ,
wa 'dɛɛ zʋzɔnʋ wa nɔnʋa 'ylibɩla,
nɩɩ,
wa'a lʋ ‑Zezu Klisɩɩ gbʋʋ 'gbʋ dlɩ.
22 Amɩaa 'dɛ ‑yi we 'ji nɩɩ,
Timotee ka 'mɩ 'wʋsa bhabha.
Sa 'yu saa ɔ dide 'wʋ,
'sa.
Ɔ ‑yɔ 'mɩ 'sɔ,
'ɩn ‑a yia ‑Lagɔgbʋ gba dabʋdʋ.
23 Ɩn dɩ we dlɩ 'wʋ nɩɩ,
da ɩn ‑ka na 'dɛɛ gbɛgbɛɩn gbʋ ‑yɔyɩ tɩklɩɩ,
'mɔ na yia amɩaa ‑gbɛ tiea slʋɩ.
24 'Ɩn na dlɩ mɩ we ‑gʋ nɩɩ,
Nyɩmaa ‑Kanyɔ ka we ‑yɔŋwnu,
daylɩ na 'dɛ yi 'yaa aɩn 'yɩa.
25 Na bheli Epafloditɩ a tiea zlɩmɛ na ‑gbɛ,
ɔ 'ka 'mɩ 'wʋsa,
'ɩn ‑li ɩn 'yɩbhaa,
'ɩn a yia we ɔ kwɛɛ zʋ.
'Mɔ na ‑yɔ ɔ nʋa lubho,
'ɩn 'mɔ na ‑yɔ ɔ gʋa tʋ dabʋdʋ.
'Ɩn ‑slɛɛn,
we mɩ nɩɩ,
ɩn 'bhitili ɔ lʋ la amɩaa ‑gbɛ.
26 A 'dɛ weee 'tʋ mɩ ɔ 'bhadaa 'gbʋ,
ɔ 'yɩbha ɔ 'ka aɩn 'yɩ.
Da ɔ 'nʋa nɩɩ,
a ka ɔ gunʋ dɩ 'nʋ,
'ɩn we yia ɔ dlɩ sumanɩ.
27 Gbʋzɔnʋ ‑wa,
ɔ ka gu nʋ,
ɔ fɛlɩ 'dɛbhie tlɩa,
'ɩn ‑Lagɔ yia ɔ nyazɩ 'yɩlɩ.
We 'nɩ ɔ 'dɛ ‑bhlo,
nɩɩ,
‑Lagɔ ka 'ya ‑amɩ nyazɩ 'yɩlɩ,
na ‑gʋ yi 'wʋtʋ ‑kɔʋʋn bhabhaa 'gbʋ.
28 We 'gbʋ,
kwɛ na puloa la,
ɩn 'ka ɔ lʋlabhitili amɩaa ‑gbɛ,
'ɩn a ‑ka ɔ 'yɩ,
a 'ka 'mʋna li,
'ɩn na sɩasɩe 'ka zɔbɛ.
29 A kpa ɔ 'mʋna weee nya,
‑Lagɔbheli 'bhisa.
'Ɩn a zʋ ɔ ‑sʋkpa ‑nyɩma 'nʋŋwɛ.
30 ‑We ka gbʋ ‑wa,
Klisɩɩ lubhoo 'gbʋ ɔ fɛlɩa tlɩa.
Ɔ 'dɛɛ 'pʋpʋe ɔ ‑saa dlɩ,
'ɩn sa a 'ka yaa 'mɩ kwalɩ,
'ɩn ɔ yi 'saa nʋ.