Nɩɩ, ‑a 'nɩ 'maslɛɛn galɩ, ‑Lagɔɔ 'yua ‑a ‑mɩa
4
‑We ɩn 'yɩbhaa ɩn 'ka gba mʋ nɩ:
'bɩlinyɔ ‑ka ‑slɔ 'yɩslɔkpilɛ nya ‑mɩ,
'wʋsɩsalɩda 'nɩ ɔ ‑yɔ gaylo nyɩdɩ ‑mɩ,
'ɩn ‑zugba mɔ ‑wa wee 'bɩ weee ‑kanyɔ.
2 Nɩɩ,
nyɩma ‑wa zʋa ɔ,
'ɩn ‑wa zʋa ɔ ‑li 'yliyɔ,
ɔ mɩ wa kwɛɛ tɩklɩɩ,
'ɩn bhla ‑we ɔ dide 'paa ŋwɛɛ,
'ɩn we nynia.
3 Nɩɩ,
'sa ‑bhloo 'dɛ we mɩa ‑amɩaa ‑nʋ nya.
Da ‑a mɩa zlɩmɛ 'yɩslɔkpilɛ 'bhisa,
‑a mɩ dʋdʋgʋʋ 'tɩtɛnyaa galɩ nya.
4 'Ɩn,
bhla ‑we ‑Lagɔ zʋa,
da we nynia 'cɛ,
ɔ yia ɔ 'Yu yoo 'pa.
Ŋwnɔ gwalɩa ɔ,
'ɩn ɔ yia Zuifʋʋ titee zɔnyɩmɛ ‑zɛ.
5 'Ɩn ‑wa mɩa tite zɔ,
ɔ 'ka wa 'wʋzɩtɩ.
Sanɛɛ 'sa ɔ 'kaa ‑aɩn ‑Lagɔɔ 'yua ‑zɛlɩ.
6 ‑Lagɔ 'ka we ‑slolu a mɩ ɔ 'yua nyaa 'gbʋ,
ɔ yia ɔ 'Yuu Zuzu yoo 'pa ‑amɩaa dibhe 'wʋ,
Zuzu ‑ɔ kpɩa 'wʋ:
«Abaa ,
'oo Dide!»
7 We 'gbʋ,
‑ɩn 'nɩ 'maslɛɛn gaylo,
nɩɩ,
‑Lagɔɔ 'yu ‑ɩn ‑mɩa.
'Ɩn ‑ɩn mɩ ɔ 'yu nyaa 'gbʋ nɩ,
‑ɩn mɩ 'ya 'bɩlinyɔ nya ‑Lagɔɔ 'nanɩɩ sɔlʋ.
Pɔlʋ lʋa dlɩ ‑Galasii ‑nyɩmaa 'gbʋ
8 Zlɩmɛ a ‑yɔ ‑Lagɔ 'nɩ wɛlɩ ‑ka,
‑zugba a mɩ bʋbɔlii galɩ nya,
'ɩn ‑mʋʋnya 'nɩ ‑Lagɔ ‑zɔnʋ nya ‑mɩ.
9 'Ɩn ‑slɛɛn a ‑yi ‑Lagɔ,
‑we ɩn 'kaa gba mʋ ‑wa nɩɩ,
‑Lagɔ ‑yi aɩn.
Dʋdʋgʋʋ 'tɩtɛnya,
‑we 'nɩa 'tɩtɛ 'wʋ ‑ka,
'ɩn ‑we 'na 'kaa aɩn ‑lu yabhlogbɔɔ ‑yla lɛnʋ,
sa a bhiti 'ya lʋ ‑mʋʋ zɔa?
Sa a 'yɩbha a 'ka 'ya ‑mʋʋ galɩ ‑zɛa?
10 'Ylɩ klaa,
'cʋ klaa,
bhla klaa,
we ‑yɔ ‑zʋ tɔlʋaa 'nʋŋwɛzʋzʋe ‑wa amɩaa ‑yɔkpagbʋ.
11 Amɩaa 'gbʋ na nʋa nyanɔ:
lubho weee ɩn nʋa amɩaa 'gbʋ,
bhe we yia 'wʋtʋa yɩ?
12 Na bhelia,
amɩa na bhubhoe,
a ‑mɩ 'mɩ 'bhisa,
‑we ka gbʋ ‑wa,
‑amɩ ka na 'dɛ nʋ amɩa 'bhisa titee gbɛgbɛɩn.
'Ɩn a 'nɩ 'mɩ gbʋnyuu yabhlogbɔɔ ‑yla lɛnʋ,
da ɩn mɩa amɩaa ‑gbɛ.
13 'Ɩn ‑we nʋa lɛ,
'ɩn ɩn yia zlɩmɛ amɩaa ‑gbɛ ‑tʋ,
'ɩn ɩn yia aɩn ‑yla ‑Lagɔgbʋ gba,
a ‑yi we.
Gu ɩn kaa ‑yɔɔ gbʋ ‑wa.
14 Na guzʋ ‑nʋ mɩ laylagbʋ nya amɩaa ‑nʋ nya,
'ɩn a 'nɩ 'mɩ 'wʋnyɛ,
'ɩn a 'nɩ 'mɩ kwnɛɛ ‑sa.
Nɩɩ,
‑Lagɔɔ 'anzɩ yabhlo 'bhisa a kpaa 'mɩ,
‑Zezu Klisɩɩ 'dɛgbolu 'bhisa.
15 Da amɩaa zlɩmɛɛ 'mʋna ‑tʋlʋa?
‑We ɩn 'kaa gba amɩaa daa mʋ ‑wa nɩɩ,
we ‑ka yaa 'yli wa sa ‑mɔ,
‑zugba a ka ‑mɔ amɩaa 'yli ‑sa,
a ka 'mɩ we yoo 'nyɛ!
16 'Lee,
gbʋzɔnʋgbʋ na gbaa da aɩn ‑yla,
we 'gbʋ ɩn yia amɩaa tʋnyɩmɛ ‑zɛ ‑slɛɛn yɩ?
17 Waa nyɩma ‑wa nynia aɩn ‑yɔla,
wa 'nɩ amɩaa zɛkalɩ sazɔnʋ sa.
Wa 'yɩbha wa 'ka aɩn 'mɩ 'bɩ ‑sa,
'ɩn a 'ka wa 'bɩbholu we gbʋ ‑wa.
18 Cɩɩn,
gbʋzɔnʋ ‑wa,
nyɩmaa zɛkalɩe ‑ka aɩn ye sazɔnʋ sa,
mʋ nanɩa 'yli.
We ‑zɛ dlɩ ‑zɔnʋ nya.
A nʋ we lɛ bhla weee nya,
we 'na ‑zɛlɩ na 'yibadɩ ‑bhlogbɔɔ ‑nɩ.
19 Na 'yua,
amɩaa 'gbʋ ɩn mɩ 'yaa da sɩada lʋ,
nɛɛ ŋwnɔ ‑bho luzi,
mɔ.
'Ɩn ɩn mɩ 'sa sɩada tɩklɩɩ,
'ɩn Klisɩ 'ka aɩn 'wʋladɩlɩ,
'ɩn a 'ka Klisɩɩ 'wʋwlʋ ‑zɛ kpɛɛn kpɛɛn.
20 Nɩɩ,
ɩn 'yɩbha ɩn 'ka bhla ‑mɩnɩ nya aɩn kwesi ‑mɩ,
ɩn 'ka aɩn ‑yla gba sɔ ‑putu lʋ.
‑We ɩn 'kaa lɛnʋ ‑slɛɛn,
ɩn 'nɩ we ‑yi.
Amɩaa 'gbʋ dlɩlʋe mɩa da 'mɩ ‑yɔ.
*Agaa ‑yɔ Salaa gbʋʋ 'wʋpalɩgbʋ
21 A gba ‑slɔ we 'mɩ ‑yla,
amɩa ‑wa 'yɩbhaa a 'ka Moizɩɩ tite 'nʋŋwɛ zʋ,
‑we wee tite ‑mɩnɩɩ 'sɛbhɛ gbaa,
a'a 'nʋ wee?
22 Nɩɩ,
we mɩ cɛlɩda we 'wʋɛ,
Ablaamʋ 'yɩ nʋkpasuyua 'sɔ.
'Yabhlo ɔ ‑yɔ gayloŋwnɔ Agaa gwalɩa,
'ɩn ‑gʋdʋ ɔ ‑yɔ nyɩmɛzɔnʋŋwnɔ Sala gwalɩa.
23 Nɩɩ,
'yu ɔ ‑yɔ gayloŋwnɔ Agaa gwalɩa,
nyɩmaa dʋmagbʋʋ sɔlʋ wa gwalɩa ‑mɔɔ.
'Ɩn ‑ɔ ɔ ‑yɔ nyɩmɛzɔnʋŋwnɔ gwalɩa,
wɛlɩ ‑Lagɔ wlaa,
we sɔlʋ wa gwalɩa ‑mɔɔ.
24 Wee gbʋʋ 'wʋpalɩgbʋ ‑mɩnɩɩ 'ji ‑tɔ 'wʋ,
waa 'ŋwnɩ 'sɔ ‑manɩ 'wʋsusloluee gbʋ 'sɔ wa slolua.
We tɩanʋ mɩa,
'wʋsuslolue ‑we ‑Lagɔ ‑yɔ Ablaamʋ ‑yɔ Izlaɛlɩnyɩma nʋa lɛ ‑gɔgɔ wa laa Sinaii 'wlu,
we yli ‑wa Agaa,
wee 'wʋsusloluee tite nʋa nyɩma galɩ 'wʋ.
25 Nɩɩ,
Agaa mɩa,
mɔ ‑wa Sinaii ‑gɔgɔ Alabii ‑dʋdʋ ‑gʋ.
Mɔ ‑wa dʋdʋ ‑mɩnɩ ‑gʋʋ ‑Zeluzalɛmʋgbe,
‑we ka gbʋ ‑wa,
we ‑yɔ we 'yua weee mɩ galɩ nya.
26 Nɩɩ,
yalɩɩ ‑Zeluzalɛmʋ mɩa,
mʋ ‑wa ‑Zeluzalɛmʋ ‑we 'nɩa gaylo nya ‑mɩ,
'ɩn mʋ ‑wa ‑amɩaa 'nyaa.
27 Nɩɩ,
we mɩ cɛlɩda ‑Lagɔsɛbhɛ 'wʋɛ:
«Gblotʋŋwnɔ,
a li 'mʋna!
Ama 'nɩa 'yugwalɩee kuu 'cɔnʋee 'ji ‑yi,
a 'kpɩ 'wʋ 'mʋna nya!
Nɩɩ,
'wʋnyɛŋwnɔɔ yua yia 'wʋzumanɩa,
wa 'ka 'wʋyɩbhaŋwnɔɔ 'yua 'wʋzi.»
28 'Ɩn amɩa,
na bhelia,
wɛlɩ ‑Lagɔ wlaa amɩa mɩa we ‑gʋʋ 'yua nya,
Izakɩ 'bhisa.
29 Zlɩmɛ,
'yu wa gwalɩa nyɩmaa dʋmagbʋʋ sɔlʋ,
mɔ palɩa ‑ɔ wa gwalɩa ‑Lagɔɔ Zuzuu sɔlʋ 'klɩyɩe 'wʋ.
'Ɩn 'sa ‑bhloo 'dɛ we mɩa dɛslɛɛn nʋda.
30 'Ɩn ‑Lagɔsɛbhɛ nɛɛ lɛa?
We nɛɛ:
«‑Ɩn vu gayloŋwnɔ ‑yɔ ɔ 'yu.
Nɩɩ,
gayloŋwnɔɔ 'yu ‑yɔ nyɩmɛzɔnʋŋwnɔɔ 'yu
'nɩ mneni wa 'ka wa didee 'bɩ dlili.»
31 We 'gbʋ,
na bhelia,
‑amɩa 'nɩ gayloŋwnɔɔ yua,
nyɩmɛzɔnʋŋwnɔɔ 'yua ‑a ‑mɩa.