‑Lagɔ yibhelia nyɩma, nyɩma tɩklɩɩ nya Klisɩɩ dlɩgʋzʋzʋee 'gbʋ
3
Oo ‑Galasii ‑nyɩma,
‑gʋwʋtʋnya,
nyɔɔ ‑salɩ aɩn a?
Wa 'nɩ da aɩn ‑Zezu Klisɩɩ su ‑gʋ lakʋlʋe 'klʋslolu vaa?
2 Nɩɩ,
gbʋʋ gɔ ‑bhlo mɩa da,
a 'palɩ we 'bɩgʋ.
Zuzu 'Pʋpa a 'yɩa,
tite 'nʋŋwɛzʋzʋee 'gbʋ a yia ɔ 'yɩ yaayɩɩ,
‑Lagɔgbʋ a 'nʋa,
a zʋa dlɩ ‑gʋʋ gbʋ ‑wa yɩ?
3 Sa amɩaa ‑gʋ 'ka 'ya sa 'wʋtʋa?
A ka ‑Lagɔgbʋʋ gwedɩ ‑Lagɔɔ Zuzu nya,
'ɩn a 'yɩbha a 'ka ‑slɛɛn we 'wlubha amɩaa 'dɛɛ 'tɩtɛ nyaa?
4 ‑We weee 'wʋ a 'plɩlɩa,
bhe ‑wa yɩ?
‑Ɩnnya,
we 'nɩ mneni we 'ka bhe ‑zɛ.
5 'Ɩn ‑Lagɔ ‑ka ɔ Zuzu aɩn 'nyɛ,
‑zugba ɔ nʋ gwɛdigbʋ lɛ aɩn nyɩdɩ,
amɩaa titee 'nʋŋwɛzʋzʋee gbʋ ‑wa yaayɩɩ,
‑Lagɔgbʋ a 'nʋa 'ɩn a zʋa dlɩ ‑gʋʋ 'gbʋ,
ɔ nʋa we lɛ yɩ?
‑Lagɔɔ dlɩgʋzʋnyɔ Ablaamʋ
6 Nɩɩ,
‑Lagɔsɛbhɛ nɛɛ Ablaamʋʋ daaɛ:
«Ɔ ka ‑Lagɔ dlɩ ‑gʋ zʋ.
Ɔ dlɩzʋzʋee 'gbʋ,
‑Lagɔ yia ɔ yibheli nyɩmɛ tɩklɩɩ nya.»
7 We 'gbʋ,
a yibheli we 'ji nɩɩ,
‑wa zʋa ‑Lagɔ dlɩ ‑gʋ,
ma ‑wa Ablaamʋʋ 'yuoyuaa 'dɛbhie.
8 ‑Lagɔsɛbhɛ ka we gba,
nɩɩ,
nyɩma ‑wa 'nɩa Zuifʋ,
wa dlɩzʋzʋee 'gbʋ ‑Lagɔ yia wa yibhelia nyɩma tɩklɩɩ nya,
ɔ 'dɛ 'yu.
We 'gbʋ,
‑Lagɔ yia Ablaamʋ ‑yla wee gbʋzɔnʋ ‑mɩnɩ gba pepe nɩɩ:
«'Nyu wa yia dʋdʋgʋ ‑nyɩma weee laŋwnaa ‑na 'gbʋ.»
9 Ablaamʋ ka ‑Lagɔɔ gbʋ ‑yɔŋwnu,
'ɩn ‑Lagɔ yia ɔ 'nyulaŋwna.
'Sa ‑bhloo 'dɛ ‑wa weee ŋwnua ‑Lagɔɔ gbʋ ‑yɔ,
‑Lagɔ ŋwnaa wa 'nyu la.
10 Nɩɩ,
‑wa weee zʋa titee 'nʋŋwɛzʋzʋe dlɩ ‑gʋ,
mɛ yia wa kpaa.
Nɩɩ,
‑Lagɔsɛbhɛ nɛɛ:
«‑We weee mɩa cɛlɩda ‑Lagɔɔ titee 'sɛbhɛ 'wʋ,
‑ɔ'ɔ zʋa we 'nʋŋwɛ 'kɔmʋʋ,
mɛ yia ɔ kpaa.»
11 We mɩ 'ya gbʋzɔnʋ nya,
nɩɩ,
nyɩmɛ yabhlogbɔɔ 'nɩ mneni ɔ 'ka ‑mɩ tɩklɩɩ ‑Lagɔ 'yu titee 'nʋŋwɛzʋzʋee 'gbʋ.
Nɩɩ,
‑Lagɔsɛbhɛ nɛɛ:
«‑Ɔ ‑Lagɔ yibhelia nyɩmɛ tɩklɩɩ nya dlɩzʋzʋee 'gbʋ,
'yliyɔgagɩe ‑mɔɔ yia 'yɩa.»
12 'Ɩn tite'e 'bhʋ dlɩzʋzʋee ‑gbɛ.
Nɩɩ,
we mɩ 'ya cɛlɩdaɛ:
«‑Ɔ zʋa titee lɛnʋgbʋ weee 'nʋŋwɛ,
ɔ ‑tʋ we lɛnʋda 'kɔmʋʋ,
'ɩn ɔ 'ka 'yliyɔgagɩe 'yɩ.»
13 Klisɩ ka ɔ 'dɛ mɛyɔlatɩnyɔ ‑zɛlɩ ‑amɩaa 'bɩgʋ,
sanɛɛ 'sa ɔ zɩtɩa ‑aɩn 'wʋ titee mɛ kwɛɛ.
Nɩɩ,
we mɩ cɛlɩda ‑Lagɔsɛbhɛ 'wʋɛ:
«Nyɔɔo nyɔɔ wa ‑ka bɩzɩ su 'wlu,
mɛ mɩ ɔ ‑nʋ nya.»
14 Nɩɩ,
sanɛɛ 'sa we nʋa,
'ɩn 'nyulaŋwna ‑wɛlɩ ‑Lagɔ gbaa Ablaamʋ ‑yla,
nyɩma ‑wa 'nɩa Zuifʋ,
wa 'ka we 'yɩ ‑Zezu Klisɩɩ 'gbʋ.
'Ɩn Zuzu ‑Lagɔ gbaa ɔ 'ka wla,
‑a 'ka we 'yɩ dlɩzʋzʋee 'gbʋ.
Tite ‑yɔ ‑lu ‑we ‑Lagɔ gbaa ɔ 'ka wla
15 Na bhelia,
dʋdʋ ‑gʋʋ gbʋ yabhlo na yia da palɩa:
we ‑ka nɩɩ,
wɛlɩ nyɩmɛ 'kaa tɩ,
ɔ ‑ka we tɩ sazɔnʋ sa,
nyɩmɛ yabhlogbɔɔ 'nɩ mneni ɔ 'ka ‑bha we lasalɩ,
'ɩn ɔ 'na 'ka we ‑gʋ ‑lu yabhlogbɔɔ palɩ.
16 Cɩɩn,
‑li ‑we ‑Lagɔ 'kaa wla,
ɔ ka we gba Ablaamʋ ‑yɔ ɔ 'yuoyu ‑yla.
'Ɩn ‑Lagɔsɛbhɛ 'nɩ ‑gbaɛ:
«Ablaamʋ ‑yɔ ɔ 'yuoyua,»
'ɩn ‑mʋʋ 'ka 'wlʋ nɛɛ nyɩma duuun gbʋ wa gba,
nɩɩ,
‑Lagɔsɛbhɛ nɛɛ saɛ:
«‑Ɩn ‑yɔ ‑na 'yuoyu,»
nyɩmɛ yabhlogbɔɔ we saa 'ŋnɩ,
mɔ ‑wa Klisɩ.
17 ‑We ɩn 'yɩbhaa ɩn 'ka gba mʋ nɩ:
‑Lagɔ ka wɛlɩ tɩ Ablaamʋ ‑yla,
'ɩn ɔ nɛɛ,
‑gʋ ɔ yia we 'yligbea ‑kli.
‑Zʋʋ 'wlu 'sɔ ‑zʋ glʋ ‑bhlo 'ya kugbua (430) 'plɩa,
'bhie,
Moizɩɩ tite yia yi.
‑Mʋʋ 'nɩ mneni ‑mʋʋ 'ka wɛlɩ ‑Lagɔ tɩa ‑bhalasalɩ,
'ɩn ‑lu ‑Lagɔ gbaa ɔ 'ka wla,
we 'nɩ mneni we 'ka we lasa.
18 'Ɩn we ‑ka nɩɩ,
'bɩ ‑we ‑Lagɔ wlaa,
titee sɔlʋ wa yɩ we,
‑zugba we 'nɩ ‑lu ‑Lagɔ gbaa ɔ 'ka wlaa sɔlʋ 'bhʋ,
'ɩn,
‑lu ‑we ‑Lagɔ gbaa ɔ 'ka wla,
mʋ ‑yɔ ɔ ‑slolua ɔ 'nanɩ Ablaamʋ ‑yla.
‑We ka 'gbʋ ‑Lagɔ yia tite palɩ
19 'Ɩn lɛɛ ‑lu ka 'gbʋ ‑Lagɔ yi tite palɩ nyɩma ‑ylaa?
Palɩ ɔ palɩa we,
'ɩn da nyɩma ‑saa ɔ dʋmagbʋ 'nʋŋwɛ ɔ 'ka we ‑slolu.
'Ɩn we 'ka 'sa lɛnʋda ‑tʋ tɩklɩɩ,
'ɩn Ablaamʋʋ 'yuoyu ‑ɔ ka 'gbʋ ‑Lagɔ gbaa ɔ 'ka Ablaamʋ ‑lu 'nyɛ,
'ɩn ‑mɔɔ yiyibhla 'ka nyni.
‑Lagɔ zʋa wee tite 'anzɩnya ŋwɛɛ,
'ɩn 'anzɩnya yia Moizɩ 'wʋbhu 'kɔlʋ nya,
‑Lagɔ ‑yɔ nyɩma nyɩdɩ.
20 Nɩɩ,
kɔlʋ mɩa,
nyɩma 'sɔ nyɩdɩ ɔ mɩa.
'Ɩn,
‑Lagɔɔ 'dɛbhlogbɔɔ:
ɔ 'nɩ kɔlʋ ‑ka.
21 ‑Mʋʋ gbaa nɩɩ,
‑li ‑we ‑Lagɔ gbaa ɔ 'ka wla,
tite mɩ we ‑yɔtʋ nya yɩ?
‑Ɩnnya!
We ‑ka nɩɩ,
‑Lagɔ ka tite yabhlo palɩ,
we mneni we 'ka nyɩma 'yliyɔgagɩe 'nyɛ,
‑zugba nyɩmɛ mneni yaa ɔ 'ka nyɩmɛ tɩklɩɩ ‑zɛ ‑Lagɔ 'yliya 'wʋ,
titee 'nʋŋwɛzʋzʋee sɔlʋ.
22 We 'nɩ 'sa ‑mɩ,
nɩɩ,
‑Lagɔsɛbhɛ nɛɛ,
dʋdʋgʋli weee mɩ gbʋnyuuu 'tɩtɛ zɔ.
'Ɩn ‑lu ‑we ‑Lagɔ gbaa ɔ 'ka wla,
nyɩma ‑wa ŋwnua ‑Zezuu gbʋ ‑yɔ,
‑maa 'ka we 'yɩ,
wa dlɩzʋzʋe ‑Zezu Klisɩ ‑gʋʋ 'gbʋ.
23 Da ‑Zezu Klisɩɩ dlɩgʋzʋ bhla 'nɩa ‑slɔ nyni,
‑zugba ‑a mɩ ‑kaslʋcɩan nya tite kwɛɛ,
wee dlɩzʋzʋe ‑Lagɔ 'kaa ‑aɩn 'klʋslolu we wʋwʋe nya.
24 Sanɛɛ 'sa,
tite ‑zɛa ‑amɩaa 'yliyɔzʋnyɔ tɩklɩɩ,
'bhie,
Klisɩ yia yi,
'ɩn ‑a 'ka nyɩma tɩklɩɩ ‑zɛ ‑Lagɔ 'yliya 'wʋ,
ɔ dlɩgʋzʋzʋee 'gbʋ.
25 ‑Slɛɛn,
‑Zezu Klisɩɩ dlɩgʋzʋ bhla ka nynii 'gbʋ,
‑a 'nɩ 'maslɛɛn ɔɔ 'yliyɔzʋnyɔ ‑mɔnɩ kwɛɛ ‑mɩ.
26 Nɩɩ,
a 'dɛ weee mɩ ‑Lagɔɔ 'yua nya ‑Zezu Klisɩɩ dlɩgʋzʋzʋee 'gbʋ.
27 Nɩɩ,
amɩa weee ‑wa wa batizea Klisɩ 'wʋ,
a ka Klisɩɩ 'wʋwlʋ ‑zɛ.
28 We 'gbʋ,
‑Lagɔ 'yliya 'wʋ,
'wʋsɩsalɩda 'nɩ Zuifʋ ‑yɔ ‑wa 'nɩa Zuifʋ nyɩdɩ ‑mɩ,
we 'nɩ galɩ ‑yɔ nyɩma ‑zɔnʋ nyɩdɩ ‑mɩ,
'ɩn we 'nɩ nʋkpasi ‑yɔ 'ŋwnɩ nyɩdɩ ‑mɩ.
Nɩɩ,
a 'dɛ weee ‑bhlo ‑Zezu Klisɩ 'wʋ.
29 A mɩ Klisɩɩ ‑nʋ nyaa 'gbʋ,
a mɩ Ablaamʋʋ 'yuoyua nya.
'Bɩ ‑Lagɔ gbaa ɔ 'ka wla,
'yɩa a yia we.