12
Na bheliaɩn,
‑Lagɔ mɩ yeda 'nanɩ nya ‑amɩaa ‑nʋ nya.
We 'dɛɛ 'gbʋ,
‑we ɩn 'yɩbha a nʋ lɛ,
mʋ ‑wa nɩɩ,
a wla amɩaa ku 'yliyɔga ‑slaka nya.
Mʋ ‑wa ‑mɔwlʋ ‑slaka ‑we nanɩa ‑Lagɔ dʋdʋ.
‑We mɩa da,
mʋ ‑wa amɩaa ‑Lagɔbʋbʋe tɩklɩɩ.
2 A 'na mnɩnɩ dʋdʋgʋ gbʋ 'bɩ ‑nɩ,
nɩɩ,
a 'tide ‑Lagɔ 'yi,
ɔ 'ka amɩaa 'wlukʋʋn lapʋpalɩe 'bhiti.
Ɔ ‑ka we 'bhiti nɩ,
'ɩn a yibhelia ‑we ɔ 'yɩbhaa 'ji:
mʋ nanɩa 'yli,
mʋ nanɩa ɔ dʋdʋ,
mʋ'ʋ bɔa ‑lu yabhlogbɔɔ 'wʋ.
3 ‑Lagɔ ka 'mɩ ɔ zʋzɔnʋ 'nyɛ sa bhe.
We 'dɛɛ 'gbʋ ɩn nɛɛ aɩn ‑yla ‑bhlo ‑bhloɛ:
a 'na 'bhulu amɩaa 'dɛ 'wʋ 'kadʋʋ ‑nɩ,
nɩɩ,
‑mɔmɔ ‑ka ‑mɩ,
dlɩzʋzʋe ‑we ɔ 'yɩa ‑Lagɔ kwɛɛ,
ɔ 'bhu 'sa ɔ 'dɛ 'wʋ.
4 Nyɩmɛ mɩa,
ɔ ka 'lali duun,
'ɩn wee 'lali wee'e nʋ lubho ‑bhlo.
5 'Sa we mɩa ‑amɩaa ‑nʋ nya.
‑A ‑zu 'wʋ,
'ɩn ‑a mɩa nyɩmɛ ‑bhlogbɔɔ nya,
‑we ka gbʋ ‑wa,
‑a ‑yɔ Klisɩ 'sɔ ‑bhlo.
‑A 'dɛ weee mɩ 'wʋsusloluda,
'ɩn,
‑ɔ ‑ka ‑mɩ,
ɔ ka ɔ 'bɩ,
kuu 'lali 'bhisa.
6 ‑Lagɔ ka ‑aɩn lubho 'nyɛ 'nanɩdlɩ nya.
‑Lubho ‑we ɔ 'nyɛa ‑aɩn we 'yli ‑bhlo ‑bhlo.
'Ɩn ‑ɔ ɔ ‑ka ‑Lagɔgbʋʋ gbagba ‑lubho 'nyɛ,
ɔ nʋ we lɛ ‑Lagɔɔ dlɩgʋzʋzʋe nya.
7 ‑Ɔ ‑ka nyɩmaa 'wʋsa dlɩ ‑ka nɩ,
ɔ ‑sa wa 'wʋ.
‑Ɔ ‑ka nyɩmaa ‑slolu ‑lubho ‑ka nɩ,
ɔ ‑slolu wa.
8 ‑Ɔ ‑ka nyɩmaa 'kʋayli ‑papɩee 'tɩtɛ ‑ka,
ɔ 'pa wa 'kʋayli.
‑Ɔ ‑ka nyɩmaa ‑lu ‑nyɛ dlɩ ‑ka,
ɔ 'na zɛlɩ we ‑nɩ,
ɔ nʋ we lɛ.
‑Ɔ ‑ka nyɩmaa 'yugalɩnyɔ nya ‑mɩ,
ɔ nʋ we lɛ ‑gʋladolue nya.
‑Ɔ ‑ka bobabhanyaa 'wʋsa dlɩ ‑ka nɩ,
ɔ nʋ we lɛ 'mʋna nya.
9 Zɛkalɩe mɩa,
we ‑mɩ sa tɩklɩɩ,
we'e nʋnʋ ‑dawli lɛ ‑nɩ.
A nyɛ gbʋnyuu 'wʋ,
a nɛ 'nanɩ ‑nʋnʋe ‑yɔla.
10 A 'yɩbhalɩ ‑yɩbhalɩ,
dlɩ weee nya nɛɛ ‑Lagɔbhelia.
A 'yɩ 'klɩ a 'dɛkpʋa 'ka ‑bhazʋzlʋ.
11 A nʋ ‑amɩaa ‑Kanyɔɔ lubho ‑gʋladolue ‑yɔ dlɩ weee nya,
nɩɩ,
a 'na 'yamanɩ ‑nɩ.
12 A li 'mʋna,
‑we ka gbʋ ‑wa,
a mɩ ‑Kanyɔ wʋda.
A ‑ka sɩasɩe 'wʋ ‑mɩ,
a nʋ dlɩtie,
a bhubhoe ‑Lagɔ 'zlabhue zɔ.
13 Amɩa ‑Lagɔnyɩma sɩsalɩ 'wʋ,
'ɩn ‑wa ‑ka amɩaa ‑gbɛ yi nɩ,
a kpa wa sa 'nanʋʋ.
14 ‑Wa ‑ka aɩn 'klɩyɩe 'wʋpalɩda ‑mɩ,
a bhubhoe ‑Lagɔ ɔ 'ka wa 'nyulaŋwna.
A ŋwna wa 'nyu la,
a 'na bhlɩlɩ wa gwɛzɛ ‑nɩ.
15 ‑Wa mɩa 'mʋna lida,
a ‑yɔ wa 'sɔ li 'mʋna.
‑Wa mɩa wida,
a ‑yɔ wa 'sɔ wi.
16 A ‑ka wɛlɩ ‑bhlo a 'dɛkpʋa nyɩdɩ.
A 'na 'bhulu amɩaa 'dɛ 'wʋ 'kadʋʋ ‑nɩ,
a ŋwnu lubho ‑ylaasɩɩ nʋnʋe ‑yɔ.
A 'na 'bhulu amɩaa 'dɛ 'wʋ gbʋyilonya 'bhisa ‑nɩ.
17 Nyɩmɛ ‑ɔ ‑ka aɩn gbʋnyuu ‑yla lɛnʋ,
a 'na nʋnʋ we 'lɛɛji lɛ ‑nɩ.
Nɩɩ,
a 'yɩ 'klɩ a 'ka gbʋzɔnʋ gbʋ lɛnʋ nyɩma weee 'yliya 'wʋ.
18 We ‑ka yaa amɩaa ‑gbɛ we bhʋ nɩ,
sa a mnenia a ‑yɔ nyɩma weee 'ka 'wʋtʋ ‑dlɔɔ,
a nʋ 'sa.
19 Na 'talea,
a 'na ‑salɩ amɩaa 'dɛɛ kpa ‑nɩ,
nɩɩ,
a 'tide ‑Lagɔɔ 'cɛ 'yi,
we 'ka amɩaa kpasa.
‑We ka gbʋ ‑wa,
we mɩ cɛlɩda ‑Lagɔsɛbhɛ 'wʋɛ,
Jejitapɛ nɛɛ:
«Kpasasɩe mɩa,
na ‑nʋ ‑wa.
‑We ka 'klʋ nyɩmɛ kaa,
‑amɩ wlaa we.»
20 'Ɩn ‑Lagɔ nɛɛ 'yaɛ:
«Ŋwɔ ‑ka ‑na tʋnyɩmɛ 'bhada ‑mɩ,
‑ɩn 'nyɛ ɔ lililu,
'nyumatʋ ‑ka ɔ 'bhada ‑mɩ,
‑ɩn 'nyɛ ɔ 'nyu ɔ 'ka 'ma.
‑Ɩn ‑ka 'sa nʋ nɩ,
we 'wlʋ ‑kapʋ ‑ɩn slu ɔ 'wluo.»
21 Gbʋnyuu 'na pɩlɩ ‑mɩ 'wlu la ‑nɩ,
nɩɩ,
‑ɩn pɩlɩ gbʋnyuu 'wlu la zʋzɔnʋ nya.