‑Lagɔ 'yɩlɩa Izlaɛlɩnyɩma nyazɩ
11
We ‑ka 'sa ‑mɩ,
na 'dɛ na yɩbhaa la 'lee,
‑Lagɔ ka ɔ nyɩma sɔ zɔlasalɩ 'kuteyii?
‑Ɩnnya,
we 'nɩ 'sa ‑mɩ!
Izlaɛlɩnyɩmɛ na 'dɛ ‑mɩa.
Nɩɩ,
Ablaamʋʋ 'yuoyu ɩn ‑mɩa,
'ɩn ɩn mɩa Bɛzamɛɛɛ ‑glɩgbɔ 'yli ‑nyɩmɛ nya.
2 ‑Lagɔ 'nɩ ɔ nyɩma ɔ ‑saa ‑bha we gwedɩda sɔ zɔlasalɩ 'kuteyii.
‑Lagɔsɛbhɛ 'wʋ,
da Elii mɩa Izlaɛlɩnyɩmaa gbʋ lapalɩda ‑Lagɔ ‑yla,
wɛlɩ ‑we ɔ gbaa,
amɩaa 'dɛ ‑yi we.
3 Ɔ nɛɛ:
«Jejitapɛ,
wa ka ‑na gbʋʋ ‑falɩpanya 'bha,
wa ka ‑na bʋbɔlʋda lasa.
Na 'dɛbhlogbɔɔ ‑tʋa ‑bha,
wa 'yɩbha wa 'ka 'ya 'mɩ 'bha.»
4 'Ɩn sa ‑Lagɔ 'palɩ we 'bɩgʋa?
Ɔ nɛɛ:
«Nyɩma 'wlu glʋ ‑bhlo 'wlu kugbua lɛ gbu ɩn zʋa la na ‑nʋ nya.
‑Maa 'nɩ yoyolagɔ ‑Baalɩ 'yu 'kukolu 'sibhli.»
5 Mʋ ‑bhlokpadɛ mɩ 'yaa ‑zɛɛn ylɩ nya.
Nyɩma ‑sɛlɛ ‑tʋa 'wʋ,
'nanɩdlɩ nya ‑Lagɔ ‑saa ‑bha wa.
6 Nɩɩ,
‑Lagɔ ‑ka ‑bha wa ‑sa 'nanɩdlɩ nya,
we 'nɩ wa lɛnʋgbʋʋ gbʋ.
We 'nɩ ‑mʋʋ,
‑Lagɔɔ 'nanɩdlɩ mɩa,
we bhe.
7 ‑We mɩa dɛ nɩ,
sa ‑mʋʋ 'ji mɩa?
‑We ka da Izlaɛlɩnyɩma talɩa,
wa 'nɩ we 'yɩ.
'Ɩn ‑wa ‑Lagɔ ‑saa ‑bha,
ma ‑bhlogbɔɔ 'yɩa we.
Nyɩma ‑putu mɩa,
‑maa 'nɩ mneni ‑maa 'ka we 'wʋlanʋ.
8 Nɩɩ,
we mɩ cɛlɩda ‑Lagɔsɛbhɛ 'wʋɛ:
«‑Lagɔ ka wa dlɩ 'ylaa 'wʋpalɩ.
Ɔ ka nikpise wa 'yliya 'wʋkpalɩ wa yi layɩ,
'ɩn ɔ yia wa yukwli 'wʋsulu wa yi 'nʋ,
'sa ‑bhlokpadɛ we mɩa we 'ka ‑zɛɛn ylɩ.»
9 Nyɩmaa 'wlulapɩlɩnyɔ ‑Davidɩ nɛɛ 'yaɛ:
«Wa 'fɛtɩ ‑sasɩe ‑zɛ lubhu yabhlo we 'ka wa 'dɛ kpa.
'Ɩn we 'ka 'bhʋka yabhlo ‑zɛ,
wa 'ka ‑mɔ bhlili,
'ɩn we 'ka ‑kaslʋ ‑zɛ wa ‑yla.
10 Wa ‑zɛ 'lɔlɔnya,
wa 'na 'yɩlɩ ‑lu yabhlogbɔɔ ‑yɔ ‑nɩ.
Kwlanɩ wa kaʋn 'wʋ 'kɔmʋʋ.»
11 ‑We mɩa dɛɛ 'gbʋ,
ɩn yia layɩbhaɛ:
'lee,
Zuifʋ mɩa nɩ,
bhli wa bhlia dɛ weee yɩ?
‑Ɩnnya,
we 'nɩ 'sa ‑mɩ,
nɩɩ,
wa gbʋnyuuu 'gbʋ,
'lakpanya yia gbʋ 'wʋbhʋ.
'Ɩn we 'ka Izlaɛlɩnyɩma zenyi palɩ.
12 Zuifʋʋ gbʋnyuu nʋa we lɛ,
'ɩn zʋzɔnʋ 'kadʋ yia dʋdʋ ‑gʋ lɛnʋ.
'Ɩn wa bhlibhlie yia nyɩma ‑wa 'nɩa Zuifʋ zʋzɔnʋ 'kadʋ 'nyɛ.
Nɩɩ,
da Zuifʋ weee ‑ka 'wʋsɔ,
zʋzɔnʋ 'kadʋ yi 'yaa ‑gʋwʋlaylimanɩa.
‑Wa 'nɩa Zuifʋ, sa ‑Lagɔ ‑saa wa gbʋ 'wʋ
13 Amɩa 'nɩa Zuifʋ,
amɩa na salɩa da 'dɩ ‑slɛɛn.
‑Wa 'nɩa Zuifʋ,
wa ‑gbɛ ‑Lagɔ tiea 'mɩ.
'Ɩn wee lubho ‑mɩnɩ mɩ na 'mʋna nya.
14 Ɩn 'yɩbha wee na lubho 'nyɛ na bhelia Zuifʋ zenyidlɩ,
'ɩn wa tɔlʋa 'ka gbʋ 'wʋbhʋ.
15 Nɩɩ,
da ‑Lagɔ palɩa wa sɔlʋ la,
'ɩn ɔ ‑yɔ dʋdʋgʋ ‑nyɩma yia 'wʋsuslolu.
Ɔ ‑ka Zuifʋ kpa 'nanʋʋ nɩ,
'lee,
lɛɛ ‑lu we 'ka lɛnʋa?
‑Wa tlɩa ma yia 'yliyɔgagɩe 'yɩa.
‑Fliisu ‑yɔ fafasu
16 Nɩɩ,
'floo kibhee tɩanʋ ‑ka ‑Lagɔɔ ‑nʋ nya ‑mɩ,
we ‑kpabhie mɩ 'ya ɔ ‑nʋ nya.
'Ɩn suu somi ‑ka ‑Lagɔɔ ‑nʋ nya ‑mɩ,
we 'klɩyanya mɩ 'ya ɔ ‑nʋ nya.
17 Izlaɛlɩnyɩma 'wlʋ fafasu ‑we ka 'klɩya tɔlʋa wa ‑dɩ.
‑Mɩ,
‑ɩn 'wlʋ sa ‑fliisu yabhloo 'klɩya ‑we wa ‑dɩ,
'ɩn wa yi we fafasuu 'klɩyaa 'bɩgʋ lagbʋanɩ.
‑Slɛɛn mɩa,
‑mɩ,
‑fliisuu 'klɩya,
fafasuu somii 'nyu ‑na ‑yɔ we 'klɩyanya dlilia.
18 ‑Ɩn 'na 'ylimanɩ ‑na 'dɛ fafasuu 'klɩyanya ‑yɔ ‑nɩ.
‑Ɩn mɩ ‑fliisuu 'klɩya nya,
'ɩn we 'nɩ ‑mɩ nyɛ somi 'nyu,
nɩɩ,
somi nyɛa ‑mɩ 'nyu.
We 'dɛɛ 'gbʋ,
‑ɩn 'nɩ mneni ‑ɩn 'ka ‑na 'dɛ 'ylimanɩ.
19 'Ɩn ‑mɩ,
gbaa ‑na yia 'mɩ ‑ylaɛ:
«Nɩɩ,
wa ka wee fafasuu 'klɩya tɔlʋa ‑dɩ,
wa 'ka 'mɩ we 'bɩ 'wʋlagbʋanɩ.»
20 Gbʋzɔnʋ ‑wa,
wa 'nɩ dlɩ zʋʋ 'gbʋ wa yia wa ‑dɩ.
'Ɩn ‑mɩ,
‑na dlɩzʋzʋee 'gbʋ wa yia ‑mɩ we 'bɩ 'wʋ lagbʋanɩ.
‑Ɩn 'na 'ylimanɩ ‑na 'dɛ ‑nɩ,
‑ɩn sɔ ‑Lagɔ.
21 Nɩɩ,
‑Lagɔ ‑ka fafasuu 'klɩya 'wʋdɩ nɩ,
ɔ mneni ɔ 'ka 'sa ‑mɩ nʋ.
22 ‑Ɩn ‑talɩ,
‑Lagɔɔ dlɩ nanɩ 'yli,
'ɩn ɔ ‑suŋwɛ.
‑Wa bhlia,
ɔ ‑suŋwɛ wa ‑nʋ nya,
nɩɩ,
ɔ dlɩ nanɩ 'yli ‑na gbɛgbɛɩn.
‑Tʋ ɔ dlɩɩ 'ylinanɔ zɔ.
We 'nɩ 'sa ‑mɩ,
sa ɔ ‑dɩa dɛ fafasuu 'klɩya,
'sa ɔ dɩ 'yaa ‑mɩ.
23 Nɩɩ,
'ylɩ yabhlo nya,
Zuifʋ ‑ka dlɩzʋzʋee gbʋ ‑yɔŋwnu nɩ,
‑Lagɔ ka 'tɩtɛ ɔ 'ka wa wa 'bɩgʋ lagbʋanɩ lʋ.
24 Nɩɩ,
‑mɩ,
‑ɩn mɩ zlɩmɛ ‑fliisuu 'klɩya nya,
wa ka ‑mɩ ‑dɩ,
'ɩn wa yia ‑mɩ fafasu ‑yɔlagbʋanɩ,
we 'nɩ 'sa ‑ɩn 'wlʋ.
We ‑ka 'sa ‑mɩ,
Zuifʋ ‑wa mɩa,
wee fafasuu 'klɩya nya,
‑Lagɔ mneni ɔ 'ka ‑maa wee suu da ɔ ‑dɩa wa lagbʋanɩ lʋ.
Izlaɛlɩnyɩma weee yia gbʋ 'wʋbhʋa
25 Na bheliaɩn,
‑Lagɔɔ zizelu yabhlo mɩa,
ɩn 'yɩbha a yibheli we,
a yi amɩaa 'dɛ 'wʋbhu gbʋyilonya 'bhisa.
Izlaɛlɩnyɩmaa falʋ yabhlo ka dlɩ 'wʋkla bhla ‑sɛlɛɛ ‑nʋ nya ‑Lagɔ ‑yla.
'Sa we yia ‑mɩa,
we 'ka 'lakpanya ‑wa 'kaa gbʋ 'wʋbhʋʋ ŋwɛ ‑gbalɩ bhla ylɩ.
26 We bhla mɩa,
Izlaɛlɩnyɩma weee yia gbʋ 'wʋbhʋa.
'Sa we mɩa cɛlɩda ‑Lagɔsɛbhɛ 'wʋ nɩɩ:
«Gbʋwʋsanyɔ yia Siɔn 'bhʋa.
Mɔ yia Zakɔbʋʋ ‑glɩgbɔ 'yli ‑nyɩmaa 'ylinyunogbʋ wa ‑gʋsaa.
27 A yla!
Ɩn ‑ka ‑bha wa gbʋnyuu ‑sa,
'ɩn na nʋa wee 'wʋsuslolue nɩ lɛ wa nya.»
28 Wa 'nɩ ‑Lagɔgbʋ ‑yɔŋwnu,
we 'dɛɛ 'gbʋ wa yia ‑Lagɔɔ tʋnyɩma ‑zɛ.
'Ɩn ‑mʋʋ yia aɩn 'wʋsa.
Nɩɩ,
wa dʋkpasɩɩ 'gbʋ ‑Lagɔ ‑kalɩ wa zɛ,
'ɩn ɔ yia ‑bha wa ‑sa wa 'ka ɔ nyɩma ‑zɛ.
29 'Ɩn ‑we ‑Lagɔ 'nyɛa nyɩma,
ɔ'ɔ 'bhu we 'wʋ lʋ:
‑wa ɔ laa,
ɔ'ɔ 'tide wa 'yi.
30 Tɩada,
a 'nɩ ‑Lagɔ 'nʋŋwɛ zʋ.
Nɩɩ,
‑slɛɛn mɩa,
‑Lagɔ ka aɩn nyazɩ 'yɩlɩ Zuifʋ 'nɩ ɔ 'nʋŋwɛ zʋʋ 'bɩgʋ.
31 'Sa ‑bhlokpadɛ,
wanʋʋ ‑Lagɔ wa 'nɩa 'nʋŋwɛ zʋ,
we ‑ka amɩanʋʋ ɔ nyazɩdlɩɩ 'yɩyɩe ‑zɛ nɩɩ,
ɔ 'ka wa nyazɩ 'yɩlɩ 'yaa gbʋ ‑wa.
32 Nɩɩ,
sa nyɩma 'na 'kaa ‑Lagɔ 'nʋŋwɛ zʋ,
ɔ ka we wa kwɛɛ tɩ,
'ɩn ɔ 'ka wa 'dɛ weee ɔ nyazɩdlɩ ‑slolu.
‑A 'ylimanɩ ‑Lagɔɔ 'ŋnɩ
33 ‑Lagɔɔ 'nanɩdlɩ 'yli ‑gʋwʋla.
Ɔ gbʋyilo ‑yɔ ɔ 'wlukʋʋn ‑tɔ 'wʋ.
Nyɩmɛ 'nɩ mneni ɔ 'ka ‑we mɩa ɔ dlɩ 'wʋ 'wʋlanʋ.
Sa ɔ nʋa gbʋ lɛ,
nyɩmɛ 'nɩ mneni ɔ 'ka we 'wʋlanʋ.
34 ‑Lagɔwɛlɩ nɛɛ:
«Nyɔɔ ‑yi Jejitapɛɛ 'wlukʋʋn lapʋpalɩ gbʋa?
Nyɔɔ 'ka ɔ 'dɩzʋa?
35 Nyɔɔ 'nyɛ ‑Lagɔ ‑lu tɩada,
'ɩn ɔ yi we 'bɩgʋpalɩa?»
36 Cɩɩn,
‑lu weee mɩa,
ɔ ‑gbɛ we bhʋa.
Mɔ ‑laa ‑lu weee la,
'ɩn we mɩa ɔ ‑nʋ nya.
‑Lagɔɔ 'ŋnɩ 'ylimanɩ 'ylɩ weee nya.
‑Amɛnɩ.