Pɔlʋ mnɩa ‑Zeluzalɛmʋ
21
‑A 'bhʋa Efɛzɩɩ ‑Lagɔnyɩma kpasɩɩ ‑gbɛ,
‑a ‑gblaa 'glʋ 'wʋ,
'ɩn ‑a yia 'nyunyɩdɩdʋdʋ wa laa Kɔsʋ ‑gʋ mnɩ tɩklɩɩ.
‑Mʋʋ zlɩ zlɩa,
‑a nynia Wlodʋ,
'bhie,
‑a yia Patalaa mnɩ.
2 'Glʋ yabhlo mɩa Fenisi dʋdʋ ‑gʋ mnɩda,
‑mɔ ‑a ylɩa we.
Tɔʋn,
‑a ‑gbla we 'wʋ,
'ɩn ‑a yia mnɩ.
3 ‑A nynia gumunyuu nyɩdɩ,
'ɩn ‑a yia 'nyunyɩdɩdʋdʋ wa laa Siplʋ ‑yɔyɩ kɔpɛsɔlʋ.
‑A mnɩa Silii ‑dʋdʋ ‑gʋ ‑gbɛɩn,
'ɩn ‑a yia Tilɩgbe nʋkplɛ lasibhli,
‑bha 'glʋ 'kaa we nʋkpla ‑gba weee lasibhli.
4 ‑Mɔ Tilɩ ‑a ylɩa ‑Zezuu 'bɩnɔnya,
'ɩn ‑a yia wa ‑gbɛ ‑tʋ lɔkɔwlu ‑bhlo.
Gbʋ ‑we 'kaa Pɔlʋ ylɩ,
‑Lagɔɔ Zuzu gbaa we wa ‑yla,
'ɩn wa nɛɛ ɔ ‑yla,
ɔ 'na mnɩnɩ ‑Zeluzalɛmʋ ‑nɩ.
5 Da wee lɔkɔwlu ‑bhlo bhɩa,
'ɩn ‑a yia 'yoo 'wʋbhu,
wa 'dɛ weee yia ‑aɩn yoo kwa.
Wa ‑yɔ wa 'ŋwnɩ ‑yɔ wa 'yua,
'ɩn ‑a yia 'gbe nʋkplɛ 'tla,
'bhie,
‑a yia 'kukolu 'sibhli gumunyuu ‑gɔgɔ ‑gʋ,
'ɩn ‑a yia ‑Lagɔ bhubhoe.
6 ‑Mʋʋ 'bɩgʋ,
‑a 'pʋpalɩa wɛlɩ,
'bhie,
‑amɩa ‑gblaa 'glʋ 'wʋ,
'ɩn ‑Zezuu 'bɩnɔnya yia ‑buduŋwɛɛ lʋbhiti.
7 ‑A 'bhʋa Tilɩgbe 'wʋ 'glʋ nya,
'ɩn ‑a yia Pʋtolemaisɩ ‑amɩaa nɔnʋe 'wlubha.
‑A ‑saa wee 'gbe nʋkplɛɛ ‑Lagɔbhelia fʋ,
'ɩn ‑a yia 'ylɩ ‑bhlo li wa nya.
8 ‑Mʋʋ 'bɩgʋ zlɩ zlɩa,
‑a 'bhitia lʋ,
'ɩn ‑a yia Sezalee nyni.
‑Bha ‑a plaa ‑Lagɔɔ gbʋgbanyɔ Filipʋʋ ‑budu zɔ,
'ɩn ‑a yia ɔ ‑gbɛ ladɩlɩ.
Nɩɩ,
ɔɔ Filipʋ mɩ nyɩma gbesɔ ‑wa ‑a ‑saa zlɩmɛ ‑bha ‑Zeluzalɛmʋ,
wa lʋnyɩmɛ yabhlo nya.
9 Ɔ ka 'ŋwnɩyua ‑mnʋa,
'yieslɔŋwnɩ nya,
wa 'nɩ ylɩ ‑mɩ.
‑Lagɔgbʋʋ ‑falɩ wa paa.
10 ‑A ka ‑bha 'ylɩ duun li,
'bhie,
‑Lagɔgbʋʋ ‑falɩpanyɔ yabhlo 'bhʋa Zudee,
wa laa Agabusɩ,
'ɩn ɔ yia ‑bha yi.
11 Ɔ yia ‑aɩn 'yɩa,
ɔ 'bhua Pɔlʋʋ ‑jlaa 'wʋ,
ɔ gbʋan ɔ 'dɛɛ bhʋ 'sɔ ‑yɔ sɔ 'sɔ,
'ɩn ɔ nɛɛ:
«Wɛlɩ Zuzu 'Pʋpa gbaa,
mʋ nɩ:
‹Nyɩmɛ ka ‑jlaa mɩa da,
sa ɩn gbʋan da na 'dɛ,
'sa Zuifʋ yia ɔ gbʋaan ‑Zeluzalɛmʋ.
'Ɩn wa 'ka ɔ nyɩma ‑wa 'nɩa Zuifʋ yoo 'nyɛ.› »
12 Da ‑a 'nʋa gbʋ ‑mɩnɩ,
'ɩn ‑amɩaa 'dɛ ‑yɔ Sezaleee ‑Lagɔbhelia yia Pɔlʋ bhubhoe,
nɩɩ,
ɔ 'na mnɩnɩ ‑Zeluzalɛmʋ ‑nɩ.
13 'Ɩn Pɔlʋ yia we 'bɩgʋpalɩɛ:
«Lɛɛ ka 'gbʋ a wi,
'ɩn a sumanɩ na dlɩa?
Wa 'ka 'mɩ gbʋan ‑Zeluzalɛmʋoo,
wa 'ka 'mɩ 'bha 'dɛbhie ‑gbolu Nyɩmaa ‑Kanyɔ ‑Zezuu 'ŋnɩɩ 'gbʋoo,
ɩn mɩ 'cɩn lamnazɩda.»
14 Nɩɩ,
ɔ 'nɩ ‑amɩaa wɛlɩ 'wʋŋwnuda ‑mɩɩ 'gbʋ,
‑a yia ɔ bhubhoe 'yitide.
'Ɩn ‑a nɛɛ:
«Nyɩmaa ‑Kanyɔɔ dʋmagbʋ nʋ lɛ!»
15 ‑A lia 'ylɩ sanɩmɛ wee da,
'ɩn ‑a yia ‑amɩaa 'gbanya ‑mɔzʋ,
‑a yia ‑Zeluzalɛmʋ mnɩ.
16 ‑Zezuu 'bɩnɔnya tɔlʋa mɩa Sezalee,
‑maa yia ‑aɩn yoo kwa.
'Ɩn wa yia ‑aɩn Siplʋ ‑nyɩmɛ yabhlo,
‑ɔ 'kaa ‑aɩn ‑gʋda 'nyɛ,
‑ɔ wa laa Mnasɔɔɔn ‑buduŋwɛɛ kwa.
‑Zezuu 'bɩnɔnyɔ ‑wa,
we 'bɩ ka 'wʋgwlɛ.
Pɔlʋ ‑yɔ ‑Lagɔnyɩma kpasɩ gbelia 'wlu ‑Zeluzalɛmʋ
17 Da ‑a nynia ‑Zeluzalɛmʋ,
‑Lagɔbhelia yia ‑amɩaa 'lakpasu kpa 'mʋna nya.
18 ‑Mʋʋ 'bɩgʋ zlɩ zlɩa,
Pɔlʋ ‑yɔ ‑aɩn 'sɔ yia 'Zakee ‑gbɛ mnɩ.
‑Mɔ leglizɩɩ nyɩma kpasɩ weee gbelia 'wlu.
19 Pɔlʋ ‑saa wa fʋ,
'bhie,
‑we weee ‑Lagɔ nʋa lɛ nyɩma 'nɩa Zuifʋʋ ‑gbɛ,
'ɩn ɔ yia we 'dɩ ‑sa wa ‑yla kpɛɛn kpɛɛn.
20 Da wa 'dɛ weee 'nʋa wɛlɩ ‑mɩnɩ,
'ɩn wa yia ‑Lagɔɔ 'ŋnɩ ‑mnɩnɩ.
'Ɩn wa nɛɛ Pɔlʋ ‑ylaɛ:
«Bheli ‑ɩn ‑talɩ,
Zuifʋʋ 'wlu sanɩmɛ ka ‑Zezu dlɩ ‑gʋ zʋ,
'ɩn wa mɩa Moizɩɩ tite ‑yɔlanɛda.
21 ‑We wa mɩa gbada wa ‑yla ‑na daa mʋ nɩ:
Zuifʋ ‑wa mɩa 'lakpanya glaa,
‑ɩn nɛɛ wa ‑yla wa palɩ Moizɩɩ tite ‑blɩgʋ,
wa 'na 'palɩ wa 'yua knɩ 'wʋ ‑nɩ,
'ɩn wa 'bhʋ ‑Zuifʋʋ lɛnʋgbʋ 'cɩn 'bɩ.
22 Sa ‑a 'ka we nʋa?
'Nʋa wa yia we ‑kpɔ,
nɩɩ,
‑ɩn ka yi.
23 We 'gbʋ,
‑we ‑a yia da ‑mɩ ‑yla gbaa,
‑ɩn nʋ we lɛ.
Nʋkpasia ‑mnʋa ‑wa bia ‑Lagɔ ‑yla mɩ ‑aɩn glaa ‑seli.
24 ‑Ɩn ‑yɔ wa mnɩ,
‑ɩn ‑yɔ wa 'ka wa ‑yɔwɔlʋgbʋ lɛnʋ,
‑ɩn plʋlʋ wa 'wlu,
'ɩn wa 'ka wa 'nyi ‑sa.
‑Ɩn ‑ka 'sa nʋ,
'ɩn nyɩma weee yibhelia we 'ji nɩɩ,
‑we wa gbaa ‑na daa,
we 'nɩ gbʋzɔnʋ.
'Ɩn wa 'ka we ‑yɔyɩ,
nɩɩ,
Moizɩɩ tite ‑mɩ ‑na zʋ 'ya 'nʋŋwɛ.
25 We ‑ka nyɩma ‑wa 'nɩa Zuifʋ,
‑wa zʋa ‑Zezu dlɩ ‑gʋ,
gbʋ ‑we ka wɛlɩ ‑a bhlɩa,
‑a ka we cɛlɩ,
'ɩn ‑a yia we wa yoo 'pa:
‹A 'na lili ‑zila ‑bʋbɔnɩmɛ ‑nɩ,
we ka pʋɩn.
Nɩmɛɛ 'pɩɔn ‑tʋkpa ‑yɔ nɩmɛ ‑we 'pɩɔn 'nɩa 'wʋtla,
a 'na lili we ‑nɩ.
'Ɩn a 'na nʋnʋ mʋtnɩgbʋ lɛ ‑nɩ.› »
26 ‑Mʋʋ zlɩ zlɩa,
tɔʋn,
Pɔlʋ ‑yɔ waa nyɩma ‑mnʋa yia mnɩ.
'Ɩn ɔ ‑yɔ wa yia ‑yɔwɔlʋgbʋ lɛnʋ dabʋdʋ.
‑Mʋʋ 'bɩgʋ,
'ɩn ɔ mnɩa ‑Lagɔbudu 'kadʋ zɔ,
'ɩn 'ylɩ ‑we nya wee ‑yɔwɔlʋgbʋ 'kaa bhɩa,
ɔ yia we gba.
We ji ‑wa nɩɩ,
bhla ‑we nya wa 'kaa wa ‑zila bʋbɔ ‑bhlo ‑bhlo.
Pɔlʋ wa kpaa ‑Lagɔbudu 'kadʋ zɔ
27 Wee ‑yɔwɔlʋ ylɩ gbesɔ 'ka bhɩa mnɩ,
'ɩn ‑Azii ‑dʋdʋ ‑gʋʋ Zuifʋ yia Pɔlʋ ‑yɔyɩ ‑Lagɔbudu 'kadʋ zɔ.
Tɔʋn,
wa 'paa nyɩma ‑zloo dlɩ yalɩ,
'ɩn wa yia ɔ kpa,
'wʋkpɩkpɩe nyaɛ:
28 «Izlaɛlɩɩ nyɩma,
a bɛ ‑aɩn ‑yɔ!
Nyɩmɛ ‑ɔ mɩa da,
da weee ‑yɔ nyɩma weee ɔ slolua gbʋ ‑we ‑wa Izlaɛlɩnyɩma klaa,
we ‑yɔ Moizɩɩ tite ‑yɔ ‑Lagɔbudu 'kadʋʋ ‑yɔ ‑tʋ.
'Ɩn ‑slɛɛn,
nyɩma ‑wa 'nɩa Zuifʋ,
ɔ ka wa ‑Lagɔbudu 'kadʋ zɔ ‑la,
sanɛɛ 'sa ɔ plalɩa wee ‑mɔwlʋ da pʋɩn ‑llɛllɛ!»
29 ‑We ka 'gbʋ,
wa yia 'sa nʋ,
wa ka Efɛzɩyu Tlofimʋ 'yɩ Pɔlʋ nya ‑Zeluzalɛmʋgbe nʋkplɛ.
Nɩɩ,
wamɩa dlɩɩ,
Pɔlʋ ‑yɔ ɔ 'sɔ ka ‑Lagɔbudu 'kadʋ zɔ pla.
30 'Ɩn wee 'gbee nʋkpla ‑nyɩma weee gbugblolua,
'ɩn wa ‑yɔ ‑gwagwɩe yia da weee 'bhʋ.
'Ɩn wa yia Pɔlʋ kpa,
wa ‑yɔ ɔ lagbizelie yia ‑Lagɔbudu 'kadʋ zɔ 'tla,
'ɩn wa yia ‑bha kla,
‑bha ‑bhlokpadɛ.
31 Zuifʋ mɩ 'klɩ 'yɩda,
wa 'ka Pɔlʋ 'bha,
'ɩn nyɩma yia wɛlɩ Wlɔmʋʋ 'slʋjaa ‑zloo ‑kanyɔ 'kadʋ kwa,
nɩɩ,
‑Zeluzalɛmʋ ‑nyɩma weee ka gbugblolu.
32 ‑Bha ‑bhlokpadɛ,
ɔ 'bhua 'slʋja ‑yɔ 'slʋjaa glʋ gbuu 'yugalɩnya 'wʋ,
'ɩn ɔ ‑yɔ ‑gwagwɩe yia nyɩmaa ‑zloo gbɛgbɛɩn mnɩ.
Da wa 'yɩa ɔ ‑yɔ 'slʋja 'sɔ ‑yɔ,
'ɩn wa yia Pɔlʋʋ bhɩtɩe 'yitide.
33 Ɔɔ 'slʋjaa ‑kanyɔ 'kadʋ bɛa Pɔlʋ ‑yɔ,
ɔ kpaa ɔ,
'ɩn ɔ nɛɛ,
wa gbʋan ɔ nɛtɛllukpe 'sɔ nya.
'Bhie,
ɔ yia wa layɩbhaɛ:
«Nyɔɔ nyɩmɛ ‑mɔnɩ ‑mɩa?
Lɛɛ ‑lu ɔ nʋ lɛa?»
34 'Ɩn nyɩmaa ‑zloo glaa,
‑zakpa ‑bhlo kpɩ 'wʋ ‑maa 'dɛɛ sa,
'ɩn tɔlʋa kpɩa 'wʋ,
wɛlɩ ‑putu nya.
Nɩɩ,
'slʋjaa ‑kanyɔ 'kadʋ 'nɩ mneni ɔ 'ka wɛlɩ yabhlogbɔɔ 'wʋlanʋ,
wee ‑zlɛ duun glaa.
'Ɩn ɔ nɛɛ,
wa ‑yɔ Pɔlʋ 'sɔ mnɩ 'slʋjaa ‑budu 'kadʋ zɔ.
35 Da Pɔlʋ ‑yɔ wa nynia wee ‑buduu sɩkalie kwesi,
'ɩn 'slʋja yia ɔ 'wʋbhu nyɩma 'wlu yalɩ,
nyɩmaa ‑zlo glaa,
'cɛ 'kadʋ wa mɩa 'padaa 'gbʋ.
36 Nɩɩ,
nyɩma weee mɩ ɔ 'bɩ,
'wʋkpɩkpɩe nya:
«A 'bha ɔ!»
Pɔlʋ gbaa ɔ 'dɛɛ ‑gʋgbʋ
37 Bhla ‑we nya wa ‑yɔ Pɔlʋ 'kaa 'slʋjaa ‑budu 'kadʋ zɔ pla,
ɔ nɛɛ 'slʋjaa ‑kanyɔ 'kadʋ ‑ylaɛ:
«Ɩn mneni ɩn 'ka ‑mɩ ‑yla wɛlɩ yabhlo gbaa?»
'Ɩn ‑mɔɔ yia we 'bɩgʋpalɩ ɔ ‑ylaɛ:
«Ɩ'ɩn,
aya!
Glɛkɩwɛlɩ ‑na gbaa?
38 Ezipʋtʋyu ‑ɔ 'bhua nyɩmaa dlɩ 'wʋ,
nyɩmaa 'wlulapɩlɩnyɔ ‑yɔ,
we 'bɩ 'nɩ ‑slɔ 'wʋgwlɛ,
'ɩn ɔ ‑yɔ 'bɩnɔnya 'wlu glʋ ‑bhlo (4.000) yia da bɛblɛɛ ladɩlɩa mnɩ,
we 'nɩ ‑mɩɩ?»
39 Pɔlʋ yia we 'bɩgʋpalɩɛ:
«Zuifʋ ɩn ‑mɩa,
Talɩsɩgbe nʋkplɛ,
Silisi ‑dʋdʋ ‑gʋ.
Gbe ka 'ŋnɩ mɩa mnɩda,
we nʋkpla ‑nyɩmɛ ɩn ‑mɩa.
‑Mɩ na bhubhoea,
‑ɩn 'nyɛ 'mɩ 'yoo,
ɩn 'ka nyɩma ‑yla gbʋ gba.»
40 'Slʋjaa ‑kanyɔ 'kadʋ yia ɔ 'yoo 'nyɛ.
Pɔlʋ 'yligbea sɩkalie 'wlu,
'ɩn ɔ yia sɔ 'pa nyɩma ‑yla,
nɩɩ,
wa 'mu ŋwɛ.
Da wa 'dɛ weee 'mua ŋwɛ blenyii,
'ɩn Pɔlʋ yia wa ‑yla gbʋ gba zuifʋwɛlɩ 'wʋ: