Wa 'bhaa 'Zake, 'ɩn wa yia Piɛlɩ ‑kaslʋ 'wʋpa
12
We bhla,
nyɩmaa 'wlulapɩlɩnyɔ Ewlodʋ bhlia leglizɩɩ nyɩma tɔlʋa 'klɩyɩe 'wʋpalɩe.
2 'Ɩn ɔ yia Zaaan bheli 'Zake 'bha tʋgʋgblɛ nya.
3 'Ɩn da ɔ 'yɩa we ‑yɔ nɩɩ,
we nanɩ Zuifʋ dʋdʋ,
'ɩn ɔ yi 'yaa Piɛlɩ kpa,
'Floo ‑we 'nɩa gɔɔ ‑yɔ ‑kaa 'fɛtɩɩ bhla.
4 Ewlodʋ kpaa Piɛlɩ,
'ɩn ɔ yia ɔ ‑kaslʋ 'wʋpa.
'Ɩn ɔ nɛɛ 'slʋja ‑mnʋaa ‑zakpa ‑mnʋa ‑yla,
‑maa ‑kʋ ɔ ŋwɛ.
Ɔ 'yɩbha ɔ 'ka ɔ ‑yɔgbʋ 'wʋbhu nyɩma 'yu,
'Wʋzɩtɩylɩɩ 'fɛtɩɩ bhɩa zlɩ.
5 'Slʋja mɩ Piɛlɩ ŋwɛkʋda ‑kaslʋbudu zɔ,
'ɩn leglizɩ yia ‑Lagɔ bhubhoeda ‑tʋ tɩklɩɩ ɔ 'gbʋ.
‑Lagɔɔ 'anzɩ ‑saa Piɛlɩ ‑kaslʋbudu zɔ
6 Ylɩ ‑we nya Ewlodʋ 'kaa Piɛlɩɩ ‑yɔgbʋ 'wʋbhu,
we sabɔ,
‑zugba Piɛlɩ mɩ 'ylaa 'wʋ 'slʋja 'sɔ nyɩdɩ.
Ɔ mɩ nɛtɛllukpe 'sɔ 'wʋ gbʋanda,
‑zugba ‑kaslʋbuduu ŋwɛkʋnya 'yligbe ‑kaslʋbudu ŋwɛɛ.
7 ‑Bha ‑bhlokpadɛ Jejitapɛɛ 'anzɩ 'tlalɩa ‑bha ‑kaslʋbudu zɔ,
'ɩn zlɩ yia ‑mɔ slo.
Ɔ zɩa Piɛlɩɩ bɛta yabhlo kwɛ,
ɔ ganɔa ɔ,
'ɩn ɔ nɛɛ ɔ ‑ylaɛ:
«‑Ɩn ‑sɔ 'wʋ slʋɩ!»
Tɔʋn,
nɛtɛllukpenya yia Piɛlɩɩ sɔ 'wʋbhʋ,
'ɩn we yia laslo.
8 'Ɩn ‑Lagɔɔ 'anzɩ nɛɛ ɔ ‑ylaɛ:
«‑Ɩn jɩ ‑na ‑jlaa,
‑ɩn ‑pla ‑na ‑sakwla 'bhʋ 'wʋ,
‑ɩn ‑gba we 'llukpe!»
Piɛlɩ yia we 'nʋŋwɛ zʋ.
'Ɩn ‑Lagɔɔ 'anzɩ yia we ‑gʋdɩ ɔ ‑ylaɛ:
«‑Ɩn ‑pla ‑na ‑bana 'wʋ,
'ɩn ‑ɩn yi 'mɩ 'bɩ.»
9 Piɛlɩ mɩ ‑Lagɔɔ 'anzɩ 'bɩ,
'ɩn ɔ yia ‑kaslʋbudu zɔ 'tla.
‑We ‑Lagɔɔ 'anzɩ mɩa lɛnʋda,
ɔmɔ dlɩɩ we 'nɩ gbʋzɔnʋ,
'ylaa ‑ylada ɔ mɩa.
10 Wa zia ‑kaslʋbuduu ŋwɛkʋnyaa tɩanʋ ‑yɔ 'sɔnʋ ‑gʋ,
'ɩn nɛtɛ ‑klolo ‑we ‑galɩa 'gbe,
'ɩn wa yia we ‑yɔ nyni.
Wee klolo ‑kalɩa we 'dɛ nya wa 'yu,
'ɩn wa yia 'tla.
Wa kwaa yoo yabhlo ‑sɛ,
tɔʋn,
'ɩn ‑Lagɔɔ 'anzɩ yia Piɛlɩ kwesi 'bhʋ.
11 Tɔʋn,
‑we 'plɩa Piɛlɩ yibhelia we 'ji,
'ɩn ɔ nɛɛ ɔ dlɩ zɔɛ:
«‑Slɛɛn na yɩ we ‑yɔ nɩɩ,
gbʋzɔnʋ ‑wa:
Jejitapɛ ka ɔ 'anzɩ tie,
'ɩn ɔ yia 'mɩ Ewlodʋʋ 'tɩtɛ kwɛɛ ‑sa.
Gbʋnyuu Zuifʋ pʋpalɩa na 'gbʋ,
'ɩn ɔ yi 'yaa 'mɩ ‑mʋʋ zɔ ‑sa.»
12 Da Piɛlɩ 'nʋa wee gbʋ 'wʋla,
'ɩn ɔ yia Zaan wa laa Malɩkɩɩ 'nyaa Maliii ‑buduŋwɛɛ mnɩ.
Da ‑Lagɔnyɩma duun gbelia 'wlu,
‑zugba wa bhubhoe ‑Lagɔ ɔ 'gbʋ.
13 Piɛlɩ bhlɩa ‑buduu klolo,
lubhonʋŋwnɔ wa laa Wlodʋ,
'ɩn ‑mɔɔ yia ‑bha ‑talɩa yi.
14 Ɔ yibhelia Piɛlɩɩ wɛlɩ,
ɔ mɩ 'mʋna lidaa 'gbʋ,
ɔ 'nɩ ‑budu ‑kalɩ.
'Ɩn ɔ ‑yɔ gwagwɩe yia gbaa mnɩ nyɩma tɔlʋa ‑ylaɛ:
«Piɛlɩ mɩ ‑buduŋwɛɛ!»
15 Wa nɛɛ ɔ ‑ylaɛ:
«‑Sabhɛ bhaa aɩn yɩ?»
'Ɩn ɔ nɛɛ wa ‑yla:
«Gbʋzɔnʋ ‑wa!»
Tɔʋn,
'ɩn wa nɛɛ:
«‑Zugba ɔ zuzu ‑wa!»
16 ‑Mʋʋ bhla,
‑zugba Piɛlɩ bhlɩa klolo ‑bhloo 'dɛ.
Da wa ‑kalɩa ‑bha,
wa 'yɩa ɔ ‑yɔ,
'ɩn ŋwɛgaga yia wa sʋbha.
17 'Ɩn Piɛlɩ yia wa ‑yla sɔ 'pa,
a 'mu ŋwɛ.
'Ɩn sa Jejitapɛ wlelia ɔ ‑kaslʋbudu zɔ,
'ɩn ɔ yia we 'bɩgʋ gba wa ‑yla.
'Ɩn ɔ nɛɛ 'ya wa ‑ylaɛ:
«A gba we 'Zake ‑yɔ ‑Lagɔbhelia tɔlʋa ‑yla.»
'Bhie,
ɔ 'tlaa,
'ɩn ɔ yia da ‑putu mnɩ.
18 Da zlɩ zlɩa,
'ɩn 'slʋja yia gbugblolu,
‑zugba wa yɩbhalɩa yɩbhalɩa laɛ,
lɛɛ ‑lu ylɩ Piɛlɩa.
19 Ewlodʋ nɛɛ wa ‑talɩ ɔ da.
Wa ‑talɩa ɔ da,
wa 'nɩ ɔ 'yɩ.
'Ɩn Ewlodʋ yia waa ‑buduu ŋwɛkʋ ‑slʋja layɩbha,
'ɩn ɔ nɛɛ wa 'bha wa.
‑Mʋʋ 'bɩgʋ,
ɔ 'bhʋa Zudee,
'ɩn ɔ yia Sezalee ladɩa mnɩ bhla ‑sɛlɛɛ ‑nʋ nya.
Ewlodʋ ka tlɩ
20 Tilɩ ‑yɔ Sidɔɔn ‑nyɩmaa lililu mɩa,
Ewlodʋʋ dʋdʋ ‑gʋ we bhʋa.
‑Mʋʋ bhla,
Ewlodʋ ka wa ‑yɔ 'cɛ 'palɩ.
Wa bhlɩa wɛlɩ ‑bhlo,
'ɩn wa yia ɔ komii ŋwɛkʋnyɔ Blasɩtusɩ ɔ 'wʋkulu.
'Ɩn wa nɛɛ Ewlodʋ ‑ylaɛ:
«'Wʋtʋtʋe ‑dlɔɔ ‑tʋ ‑aɩn nyɩdɩ.»
21 'Ɩn Ewlodʋ yia wa ‑yla 'ylɩ zʋ.
Wee 'ylɩ nynia,
ɔ yia ɔ 'ŋnɩmnɩ ‑bana 'wʋpla,
'ɩn ɔ yia ɔ gbʋwʋbhukpe 'wʋ ladɩ.
'Bhie,
ɔ yia wa ‑yla gbʋ lapalɩ ‑zejila 'wʋ.
22 'Ɩn nyɩma yia 'wʋkpɩ:
«‑Lagɔ yabhlo mɩa dɛ gbada,
‑mɔɔ 'nɩ nyɩmɛ!»
23 Wee bhla ‑bhloo 'dɛ nya,
Jejitapɛɛ 'anzɩ yia Ewlodʋ bhɩtɩ,
ɔ 'nɩ ‑Lagɔɔ 'ŋnɩ ‑mnɩnɩɩ 'gbʋ.
'Ɩn ‑mna yia ɔ li,
'ɩn ɔ yia tlɩ.
24 We bhla,
‑zugba ‑Lagɔwɛlɩ ‑yɔ ‑gʋwʋlaylimanɩe mnɩ,
'ɩn nyɩma nyɛ wa 'dɛ ‑Lagɔ yoo.
25 Da Banabasɩ ‑yɔ Sɔlʋ bhɩa wa lubho,
'ɩn wa yia ‑Zeluzalɛmʋ lʋbhiti.
Wa yia 'Zan Malɩkɩ 'wʋbhu,
'ɩn wa ‑yɔ ɔ 'sɔ yia mnɩ.