‑Zezuu tietienyaa lɛnʋgbʋnya
‑Zezu nɛɛ, ɔ 'ka ‑Lagɔɔ Zuzu 'Pʋpa yoo 'pa
1
Na bheli Teofilɩ,
‑na fʋʋ!
Na 'sɛbhɛ tɩanʋ 'wʋ,
‑we weee ‑Zezu nʋa lɛ,
'ɩn ɔ ‑slolua,
we 'ka we gwedɩda 'bhʋ,
we 'ka ɔ yalɩmnɩbhla ylɩ,
ɩn ka we cɛlɩ.
2 Nyɩma ‑wa ɔ ‑saa ‑bha ɔ tietienya nya ɔ 'kaa yalɩ mnɩ,
‑we ɔ gbaa wa ‑yla Zuzu 'Pʋpaa 'tɩtɛ nya,
mʋ nɩ.
3 ‑Zezu tlɩa,
we 'bɩgʋ,
ɔ yia ɔ 'dɛ ɔ tietienya 'klʋslolu ‑zakpa duun,
wa we slolue nya nɩɩ,
ɔ 'nɩ tlɩ,
ɔ ‑ga 'yliyɔ.
Ɔ li 'ylɩ glʋ 'sɔ,
‑zugba ɔ tlalɩ wa 'klʋ,
ɔ gba ‑Lagɔɔ nyɩmaa 'wlulapɩlɩgbʋ wa ‑yla.
4 'Ylɩ yabhlo nya,
‑Zezu ‑yɔ ɔ tietienya 'sɔ mɩ lida,
'ɩn ɔ nɛɛ wa ‑ylaɛ:
«A 'na 'bhʋlʋ ‑Zeluzalɛmʋgbe nʋkplɛ ‑nɩ.
‑We Dide gbaa ɔ 'ka aɩn yoo 'pa,
‑we ka gbʋ ɩn gbaa zlɩmɛ aɩn ‑yla,
a wʋ we.
5 Nɩɩ,
Zaan ‑mɔɔ ka nyɩma batizee 'nyu nya,
‑bha ‑tʋ 'wʋ ‑sɛ,
'ɩn ‑Lagɔ 'ka aɩn batizee Zuzu 'Pʋpa nya.»
Da ‑Zezu mnɩa yalɩ
6 ‑Mʋʋ 'bɩgʋ,
‑wa gbelia 'wlu ‑Zezu kwesi,
wa yia ɔ layɩbha,
wa nɛɛ ɔ ‑ylaɛ:
«‑Amɩaa ‑Kanyɔ,
wee bhla ‑mɩnɩ nya,
‑na yia Izlaɛlɩnyɩma wa dʋdʋʋ 'wlulapɩlɩe yoo 'nyɛa lʋ yɩ?»
7 ‑Zezu yia we 'bɩgʋpalɩ wa ‑ylaɛ:
«We bhla ‑yɔ we ylɩ mɩa nɩ,
we 'nɩ amɩanʋʋ gbʋ.
Na Dide ka we zʋ.
'Ɩn ɔ 'dɛbhlogbɔɔ mnenia ɔ 'ka we lɛnʋ ɔ 'dɛɛ se nya.
8 Nɩɩ,
amɩa yia 'tɩtɛ 'yɩa,
Zuzu 'Pʋpa yia aɩn ‑gʋ lasibhlia,
'ɩn a zɛa na gbʋdayɩnya ‑Zeluzalɛmʋgbe nʋkplɛ,
Zudee ‑yɔ Samalii ‑dʋdʋ ‑gʋ,
'ɩn we 'ka dʋdʋʋ bhloluda nyni.»
9 Da ɔ bhɩa wee gbʋnya ‑mɩnɩ gbagbɩe,
'ɩn ‑Lagɔ yia ɔ 'wʋbhu yalɩ,
‑zugba ɔ tietienya mɩ ɔ 'bɩ ylada sa tenyii.
‑Mʋʋ 'bɩgʋ,
yalɩpʋpa yia ɔ 'wʋzize.
Wa'a 'yɩ 'maslɛɛn ɔ ‑yɔ.
10 Da ‑Zezu mɩa ‑mɔ 'yu bɛda,
'ɩn ɔ tietienya mɩa ɔ 'bɩtalɩda yalɩ,
‑bha ‑bhlokpadɛ,
nʋkpasia sɔ kaa ‑bana 'pʋpa 'wʋ,
'tlalɩa wa 'klʋ.
11 ‑Maa nɛɛ wa ‑ylaɛ:
«Galilee ‑nyɩma,
‑bhadɛ a 'yligbea,
‑zugba a yla yalɩ yɩ,
lɛɛ ka 'gbʋa?
Ɔɔ ‑Zezu,
‑Lagɔ ka ɔ 'wʋbhu aɩn glaa,
ɔ ka yalɩ mnɩ.
Sa a 'yɩa da ɔ mnɩda yalɩ,
'sa ‑bhlokpadɛ ɔ yia lʋyia.»
12 Tɔʋn,
‑Zezuu tietienya 'bhʋa ‑gɔgɔ wa laa Olivʋsunyaa ‑gɔgɔ 'wlu,
'ɩn wa yia ‑Zeluzalɛmʋ lʋmnɩ.
Wee ‑gɔgɔ mɩ ‑Zeluzalɛmʋ kwesi,
we 'dɛ 'sɔ nyɩdɩ ka sa kilo ‑bhloo ‑kpʋa nyni.
13 Wa plaa ‑Zeluzalɛmʋ nɩ,
'ɩn wa yia komi yabhlo,
‑we mɩa ‑budu 'wlu zɔ mnɩ.
‑Mɔ wa dɩlɩa la ‑benyi.
Piɛlɩ klaa,
Zaan klaa,
'Zake ‑yɔ Andlee klaa,
Filipʋ ‑yɔ Toma klaa,
Batlemii ‑yɔ Matie klaa,
Alɩfeee 'yu 'Zake klaa,
'Simɔ Zelɔtʋ ‑yɔ 'Zakee 'yu Zudasɩ klaa,
‑maa mɩ 'ya wee ‑budu zɔ.
14 Wamɩa klaa,
'ŋwnɩ klaa,
‑Zezuu 'nyaa Malii ‑yɔ ‑Zezuu bhelia klaa,
'zlabhue zɔ wa 'dɛ weee gbelia 'wlu,
'ɩn wa bhubhoea ‑Lagɔ dlɩ ‑bhlogbɔɔ nya dabʋdʋ.
Matiasɩ wa ‑saa ‑bha Zudasɩɩ 'bɩgʋ
15 'Ylɩ yabhlo nya,
‑Lagɔbhelia gbelia 'wlu,
wa mneni wa 'ka nyɩmaa glʋ gbelibhlo nyni.
Piɛlɩ ‑sɔa 'wʋ,
ɔ 'yligbea wa nyɩdɩ,
'ɩn ɔ nɛɛ wa ‑ylaɛ:
16 «Na bhelia,
wɛlɩ ‑we Zuzu 'Pʋpa gbaa 'cɩn,
'ɩn wa cɛlɩa ‑Lagɔsɛbhɛ 'wʋ,
we mɩ nɩɩ,
we nʋ lɛ.
Zuzu 'Pʋpa ka Zudasɩɩ gbʋ gba nyɩmaa 'wlulapɩlɩnyɔ ‑Davidɩɩ ŋwɛ nya 'cɩn.
Nyɩma ‑wa kpaa ‑Zezu,
ɔɔ Zudasɩ ‑galɩa wa 'yu.
17 Zudasɩ mɩ zlɩmɛ ‑amɩaa lʋnyɩmɛ yabhlo nya.
Tietie ‑lubho ‑a nʋa,
ɔ yia ɔ ‑nʋ 'yɩ.» (
18 'Gwɛzi wa 'pɛnɩa ɔ,
ɔ gbʋnyuuu 'gbʋ,
'ɩn ɔ yia we kpaa yabhlo 'wʋzɔlʋ,
'ɩn ɔ yia ɔ 'dɛ 'bha.
Ɔ 'sibhlia 'wlu,
ɔ nʋkpla yia ŋwanɩ,
'ɩn ɔ 'mʋɩ weee yia 'pipee 'mni.
19 ‑Zeluzalɛmʋ ‑nyɩma weee yia we 'nʋ.
We 'gbʋ,
wa yia wee kpaaa 'ŋnɩ zʋ wa wɛlɩ 'wʋ,
«Akɛlɩdama.»
We ji ‑wa «'Pɩɔn ‑Kpaa.»)
20 «Nɩɩ,
we mɩ Lʋʋsɛbhɛ 'wʋ cɛlɩdaɛ:
‹Ɔ ‑budu ‑tʋ klo nya,
nyɩmɛ yabhlogbɔɔ 'na ‑dɩlɩ we zɔ la ‑nɩ.›
'Ɩn we mɩ 'ya cɛlɩdaɛ:
‹Nyɩmɛ ‑putu nʋ ɔ 'bɩgʋ lubho.›
21 We 'gbʋ,
nyɩmɛ yabhlo ‑bho ‑aɩn glaa,
'ɩn sa Nyɩmaa ‑Kanyɔ ‑Zezu ‑sɔa 'wʋ tlɩtlɩe lʋ,
‑a ‑yɔ ɔ 'sɔ 'ka we dayɩnya ‑zɛ.
Nyɩma ‑wa ‑yɔ ‑aɩn 'sɔ nɔa,
‑zugba ‑amɩaa ‑Kanyɔ ‑Zezu ‑yɔ ‑aɩn 'sɔ mɩ dʋdʋ weee ‑gʋ 'plɩlɩda,
ɔɔ nyɩmɛ ‑zɛ wa lʋnyɩmɛ yabhlo,
22 'ylɩ ‑we nya Zaan batizea ‑Zezu,
we 'bhʋ we ‑yɔ,
'ɩn we 'ka ‑Zezuu yalɩ ‑mnɩ bhla ylɩ.»
23 'Ɩn wa yia nyɩma 'sɔ wla:
Matiasɩ ‑yɔ ‑Zɛzɛfʋ wa laa Balɩsabasɩ,
'ɩn wa la 'yaa Zutusɩ.
24 'Bhie,
'ɩn wa 'dɛ weee yia ‑Lagɔ bhubhoe dabʋdʋ,
wa nɛɛ:
«Jejitapɛ,
‑mɩ ‑yia nyɩma weee dlɩ,
waa nyɩma sɔ nɩ glaa,
‑ɔ ‑ɩn ‑saa ‑bha,
‑ɩn ‑slolu ɔ ‑aɩn 'klʋ,
25 ɔ 'ka tietienyɔ ‑zɛ Zudasɩɩ 'bɩgʋ.
'Ɩn lubho ‑we ‑mɔɔ 'tidea 'yi,
ɔ 'ka we nʋ.
Nɩɩ,
'bɩ ‑we ka 'klʋ Zudasɩ kaa,
'ɩn ɔ yia ‑mʋʋ ‑gʋ mnɩ.»
26 ‑Mʋʋ 'bɩgʋ,
wa yia ‑nɩgbɩ 'pa,
we yia Matiasɩ ‑gʋ bhlili.
'Ɩn ɔ yia ‑Zezuu tietienya kugbua lɛ ‑bhlo glaa ‑bho.