గొర్రియఁ గోడు
10
1 “గొర్రియఁ హఅల్లత దువ్వెరిటి హోడఅన, ఓరొ జియ్యుటి హోడ్డ వానసి, డొఙెఎసి దూహినసి.
2 దువ్వెరిటి బిత్ర హోడ్డనసి గొర్రియఁ గోడు.
3 దువ్వెరిత కాఅనసి ఏవణకి దార దెఎనెసి. గొర్రియఁ ఏవణి గిఁయఁ వెన్ను. ఏవసి తన్ని సొంత గొర్రీఁణి దోర్క అసిఁ హాటహఁ, ఏవఅఁతి పంగత తాకి కిన్నెసి.
4 ఏవసి తన్ని సొంత గొర్రీఁణి బర్రెతి పంగత తన్నటి తాను ఏవఅఁ కిహఁ నోకిత తాకినెసి. ఏ గొర్రియఁ ఏవణి గిఁయఁ పుచ్చఇ ఇంజెఎ ఏవి ఏవణి జేచ్చొ హన్ను.
5 ఎట్కతణి గిఁయఁ ఏవి పున్నఉ. ఇంజెఎ ఎట్కతణి జేచ్చొ హల్లఅన, ఏవణితాణటి హొడుతుహ్ను ఇంజిఁ అస్సలెఎ మిమ్మఅఁ వెస్సీఁజఇఁ” ఇచ్చెసి.
6 యేసు ఈ బఅన ఏవరఇఁ వెస్తెసి. గాని ఏవసి తమ్మఅఁ వెస్తయి ఏనయిఎనొ ఏవరి అర్దొమి కిహకొడ్డఅతెరి.
యేసు గొర్రీఁకి నెహిఁ గోడు
7 ఇంజఁ యేసు, ఏవరఇఁ ఓడె ఇల్లె ఇచ్చెసి. “నానుఎ గొర్రీఁకి దువ్వెరి.
8 నా కిహఁ తొల్లి వాత్తరి బర్రెజాణ డొఙయఁ, దూహినరి ఆహ మన్నెరి. గొర్రియఁ ఏవరి గిఁయఁ వెన్నఅతు.
9 నానుఎ దువ్వెరితెఎఁ, నా తాణటి ఎంబఅసిపట్టెఎ బిత్ర వాతిసరి, ఏవసి జీణ ఆహఁ, ఏవసి బిత్ర వాహిఁ పంగత హజ్జిహిఁ హర్రమెయిఁ మన్నసి ఆనెసి.
10 డొఙెఎసి దూహలితక్కి, పాయలితక్కి, హేడి కియ్యలితక్కిఎ వానెసి, గాని ఓడె ఏనఅఁతక్కివ ఆఎ. ఏవరి జీవుగట్టరి అయ్యలితక్కి, ఓడె కాలేతిజీవు పుస్టినంగ బెట్ట ఆనిలేఁకిఁ నాను వాతెఎఁ ఇంజిఁ మిమ్మఅఁ అస్సలెఎ వెస్సీఁజఇఁ.”
11 “నాను నెహిఁ గోడుతెఎఁ. నెహిఁ గోడు గొర్రియఁ బాట తన్ని జీవు హీనెసి.
12 కూలిగట్టి గోడుకి గొర్రియఁ సొంతతఇ ఆఎ. ఇంజెఎ గొద్దొబాగయఁ వానని ఏవసి మెస్సహఁ, గొర్రియఁణి పిస్సహఁ హొడుతుహ్నెసి. గొద్దొబాగయఁ ఏ గొర్రీఁణి అస్సహఁ బురుబర్ర కిన్ను.
13 ఏవసి కూలిగట్టసి, కూలితక్కి కమ్మ కిన్నెసి, ఇంజెఎ గొర్రీఁణి కేరఅన పిస్స హొడుతుహ్నెసి.”
14 “నాను గొర్రీఁకి నెహిఁ గోడుతెఎఁ. నా చంజి నన్నఅఁ ఏనికిఁ పుంజనెసినొ, నానువ నా చంజిఇఁ ఎల్లెకీఁఎ పుఇఁ.
15 ఎల్లెకీఁఎ నా గొర్రియఁ నన్నఅఁ పుంజను. నాను ఏవఅఁతి పుఇఁ. ఇంజెఎ ఏ గొర్రియఁ బాట నా జీవు హీహిమఇఁ.
16 ఈ హఅల్లత హిల్లఅగట్టి ఎట్కతి గొర్రీఁవ నంగొ మన్ను. ఏవఅఁస్కెఎ నాను తాకఇఁ. ఏవివ నా గిఁయఁ వెంజను. ఎచ్చెటిఎ రొండిఎ మంద ఆనె. గొరియఁ గొడు రొఒసిఎ ఆనెసి.
17 ఓడె వెండె రీసకొడ్డిలితక్కిఎ నా జీవుతి నాను హీహిమఇఁ, ఈదఅఁ బాటెఎసఁ నా చంజి నన్నఅఁ జీవునోహాఁజనెసి.
18 నా జీవుతి ఎంబఅరి రెజొఒరి, గాని నంగొతక్కి నానుఎ ఏదఅఁ హీహిమఇఁ. ఏదఅఁ హియ్యలితక్కి నంగొ హుక్కొమి మన్నె. ఓడె రీసలితక్కివ నంగొ హుక్కొమి మన్నె. నా చంజిఎ ఈ ఆడ్రతి నంగొ హీహాఁజనెసి.”
19 ఈ కత్తయఁ బాట యూదుయఁ ఓడె బాదిబాద ఆవి ఆహఁ గొచ్చిగొచ్చియఁ ఆతెరి.
20 ఏవరి తాణటి కొచ్చెజాణ, “ఏవసి పేను బ్డూతసి, బయర ఈవణి కత్తయఁ ఏనఅఁతక్కి వెంజీఁజెరి?” ఇచ్చెరి.
21 ఓడె కొచ్చెజాణ, “ఈవి పేను బ్డూతణి కత్తయఁ ఆఎ. పేను కాణఇఁ కణ్క మెస్పి కియ్యలి ఆడ్డినెకి?” ఇచ్చెరి.
నమ్మకొము హిల్లఅగట్టి యూదుయఁ
22 యెరూసలేము గాడత, మహపురుగూడితి రీ బేడె నెహిఁ కిత్తి పాయిఁ కిహీఁచి* పర్బు ఆహిఁచె.
23 ఏది పెన్నీఁ వేడ. ఎచ్చెటిఎ యేసు మహపురుగూడిత మన్ని సొలొమోను, సమ్‍డ ఇల్లుత రేజిఁచెసి.
24 యూదుయఁ ఏవణి సుట్టు కూడి ఆహఁ, “ఎచ్చొర దిన్న మమ్మఅఁ నమ్మలి ఆడ్డఅరేటు కియ్యది? నీను క్రీస్తుతి ఇచ్చిహిఁ మమ్మఅఁ తేరెతెగె వెస్తము” ఇచ్చెరి.
25 యేసు, “మిమ్మఅఁ వెస్తతెఎఁ గాని మీరు నమ్మఅతెరి. నా చంజి దోరుతొల్లె కిహీని బమ్మ ఆతి కమ్మఁయెఎ నా బాట రుజువి కిహీఁజను.
26 ఇచ్చిహిఁ మీరు నా గొర్రీఁణ హెల్లితతెరి ఆఎ. ఇంజెఎ మీరు నమ్మొఒతెరి.
27 నా గొర్రియఁ నా గిఁయఁ వెంజను. ఏవఅఁ నాను పుఇఁ. ఏవి నా జేచ్చొ వాను.
28 నాను ఏవఅఁతక్కి కాలేతిజీవు హీహిమఇఁ. ఇంజెఎ ఏవి ఎచ్చెలవ హేడఉ. ఏవఅఁ నా కెయ్యుటి ఎంబఅరివ మీంజలి ఆడ్డొఒరి.
29 ఏవఅఁతి నంగొ హియ్యతి నా చంజిఎ బర్రెతి కిహఁ కజ్జసి. ఇంజెఎ నా చంజి కెయ్యుటి ఎంబఅరివ ఏవఅఁ మీంజలి ఆడ్డొఒరి.
30 నానుఎ నా చంజిఎ రొండిఎ కోటి ఆహనొమి” ఇంజిఁ ఏవరఇఁ వెస్తెసి.
31 యూదుయఁ ఏవణఇఁ ఇర్హలితక్కి ఓడె వల్క పెర్హకొడ్డితెరి.
32 యేసు, “నా చంజి తాణటి ఉచ్చెక నెహిఁ బమ్మ హోపెతి కమ్మయఁ కిహఁ తోస్తతెఎఁ. ఈవఅఁటి ఎమ్మిని కమ్మ బాట నన్నఅఁ వల్కతొల్లె ఇర్హదెరి?” ఇంజిఁ ఏవరఇఁ వెచ్చెసి.
33 యూదుయఁ, “నెహిఁ కమ్మతక్కి నిన్నఅఁ వల్కతొల్లె ఇర్హొమి, గాని నీను మణిసితి ఆహఁవ నానుఎ మహపురుతెఎఁ ఇంజిఁ, మహపురుఇఁ దుసొవి ఆహిఁ వెస్సకొడ్డీఁజి, ఇంజెఎ మాంబు వల్కతొల్లె ఇర్హనొమి” ఇంజిఁ యేసుఇఁ వెస్తెరి.
34 యేసు ఏవరఇఁ, +“మీరు మహపురుఁతెరి ఇంజిఁ మహపురు వెస్తిలేఁకిఁఎ మహపురు హియ్యతి ఆడ్రత రాచ్చితయి హిల్లెఎకి?” ఇచ్చెసి.
35 “మహపురుకత్త లేనిఎతయి ఆఎమ, మహపురుకత్త ఎంబఅరితాణ వాత్తెనొ, ఏవరిఎ మహపురుయఁ ఇంజిఁ మహపురు ఇచ్చెసి. ఏనఅఁతక్కి ఇచ్చిహిఁ నాను మహపురుమీరెఎణతెఎఁ ఇంజిఁ వెస్తతక్కి,
36 చంజి ఏర్సహఁ ఈ తాడెపురు పండతి నన్నఅఁ, నీను మహపురుఇఁ దుసొవి ఆహిఁజి ఇంజదెరికి?
37 నా చంజి కిహీని కమ్మయఁ నాను కిఅసరి, నన్నఅఁ నమ్మఅదు.
38 ఏ కమ్మాణిఎ నాను కిత్తిసరి, నన్నఅఁ నమ్మఅతివ, నా చంజి నా తాణ, ఓడె నాను చంజి తాణ మన్నెరిగట్టె ఇంజిఁ, మీరు పుంజహఁ అర్దొమి కిహకొడ్డినిలేఁకిఁ, బమ్మ ఆతి ఏ రుజువి కమ్మాణిఎ నమ్మదు” ఇంజిఁ ఏవరఇఁ వెస్తెసి.
39 ఓరొ బేడె ఏవరి ఏవణఇఁ అస్సలి హేరికిత్తెరి, గాని ఏవసి, ఏవరి కెస్కటి పిట్టొవి కిహకొడ్డహఁ హతుస్తెసి.