سَنت لُوقا نِي طرف ٿِي لِکل خوشي نِي کٻيرِ 11

پرڀُو يسوع پوتان نان سيلان نين پراٿنا ڪروا شيکاڙي سي

‏1 ايڪ ۮاڙو پرڀُو يسوع ايڪ ٺڪاڻي پراٿنا ڪرتا تا. زار اِيئانئي پراٿنا ڪرِي لِيڌِي تار اِيئان نان سيلان مانئين ٿِي ايڪئي ڪيڌُون ڪي، ”ڳرُو زِي، زم پوِيتر سنانَ آليا واۯي سنت يوحنائي پوتا نان سيلان نين پراٿنا ڪروا شِيکاڙِي تِي، ايمز تمين پَڻ اَمان پراٿنا ڪروا شِيکاڙو.“ ‏2 پرڀُو يسوعئي اِيئان نين ڪيڌُون ڪي، ”زار تمين پراٿنا ڪرو، تار آم ڪيزو،

اي پتا،

تمارُون نام پوِيتر منائي.

تمارُون راز آوي.

‏3 اَمارو روز نو روٽلو ھر روز اَمان نين آلو.

‏4 اَمارا ۮوه اَمان نين معاف ڪرو

چمڪي اَمين پَڻ اَماران ۮوهاريان نين معاف ڪران سان۔

اَمان نين پاپ ڪريا نِي ڪوئي آزمتا مان نا پڙوا آلو.“

‏5 پسي پرڀُو يسوعئي اِيئان نين ڪيڌُون ڪي، ”زي تمان مانئين ٿِي ڪوئي آۮمي اَرڌِي راچ نان پوتان ڌوست ڪنين زائي هانَ اين نين ڪي ڪي، ’ادا،منين ترينڻ روٽلا اُوڌارا آلِ، ‏6 چمڪي ماري ايڪ ڌوست سيٽي ٿِي مُون ڪنين آيو سي هانَ اين نين کوَرايا هارُو مُون ڪنين ڪانئين نٿِي.‘ ‏7 تو اِي گھر مانئين ٿِيز آم ڪيشي ڪي، ’منين تنڳ نا ڪرِ. همڻي ڌروازو بند سي هانَ سوڪران پَڻ اُونجھا سي اين هارُو همڻي مُون اُوٺِينَ تُون نين ڪانئين نين آلِي ڪُون.‘ ‏8 پَڻ مُون تمان نين کاترِي آلُون سُون ڪي زي اُو ڌوستِي هارُو نا پَڻ اُوٺي توئي گھڙي گھڙي مانڄا ٿِي ڪرِينَ اُوٺِينَ زيٽلا روٽلا مانڳشي ايٽلا ضرُور اين نين آلشي.

‏9 اين هارُو مُون تمان نين ڪُون سُون ڪي اِيشوَر ٿِي مانڳتان رو تو اُو تمان نين ضرُور آلشي. ڳوتتان رو تو اُو تمان نين ضرور زڙشي۔ڌروازو کڙکڙاوتان رو تو اُو تمان هارُو کولشي. ‏10 چمڪي زي ڪوئي ماڳشي اين نين مۯشي هانَ زي ڳوتشي اين نين زڙشي هانَ زي ڌروازو کڙکڙاوَشي اين هارُو ڌروازو کوليو زاشي. ‏11 شُون تمان مانئين ٿِي ڪوئي ايوو ٻاپ سي زين نو سوڪرو روٽلو مانڳي تو اِي اين نين پٿرو آلي؟ يان مسي مانڳي تو اين نين هاپ آلي؟ ‏12 يان وري اينڏُون مانڳي تو وِينسُو آلي؟ ‏13 زار تمين پاپِي هوتان پَڻ همزرو سو ڪي پوتا نان سوڪران نين هڌريُون شيزُون آلويُون سي تو پسي ياد راکو، آڪاشي پِتا پوتان ڪنين مانڄا واۯان نين پوِيتر آتما ضرور آلشي۔“

پرڀُو يسوع ڳُونڳا ڀُوت نين ڪاڍي سي

‏14 ايڪ ۮاڙو پرڀُو يسوع ايڪ آۮمي مانئين ٿِي ڳُونڳون ڀُوت ڪاڍيُون۔ زا ڀُوت نيهرِي جھُون تو اِي آۮمي ٻولوا مانڏيو هانَ مَنک اِي زوئِينَ اَلاهِي حيرانَ ڇان. ‏15 اِيئان مانئين ٿِي ڪانڪ مَنک آپس مان ڪيوا مانڏيان، ”آ تو ڀُوتان نا مُک ڀُوت بعل زبُول نِي طاقت ٿِي ڀُوت ڪاڍِي سي،“ ‏16 اين هارُو ڪانڪ مَنکانئي پرڀُو يسوع نين ڦسواڙيا هارُو اِيئان نين ڪيڌُون ڪي، ”اَمان نين ڪوئي ايوو چمتڪار ڪرِي وَتاڙو زين ٿِي کاترِي ٿائي ڪي تمين اِي ڪام اِيشوَر نِي طاقت ٿِي ڪرو سو.“ ‏17 پرڀُو يسوع نين کٻير هتي ڪي اُو شُون سوچي را سي تين هارُو اِيئان نين ڪيڌُون ڪي، ”زي بادشاهئي مان ڦڙ ڦوٽِ پڙي اِي برباد ٿئي زائي سي هانَ زي گھر مان ڦڙ ڦوٽِ پڙي اِي پَڻ گھر برباد ٿئي زائي سي. ‏18 ايوِي رِيچ زي شيطانَ نِي بادشاهي مان ڦڙ ڦوٽِ پڙي هانَ اين نا سيلا ايڪ ٻيزا نين خلاف ٿئي زائي تو شيطان نِي بادشاهئي برباد ٿئي زائي سي۔ پَڻ توئي تمين منين سو ڪي مُون ڀُوتان نين اين نا مُک بعل زبُول نِي طاقت ٿِي ڪاڍُون سُون. ‏19 زي تمين همزو سو ڪي مُون ڀُوت نين بعل زبُول نِي مدد ٿِي ڪاڍُون سُون تو پسي تماران مَنک پَڻ ڀُوتان نين بعل زبُول نِي مدد ٿِي ڪاڍتان هشي۔ اين هارُو اِيز مَنک فيصلو ڪري ڪي تمين ڪوڙا سو۔ ‏20 پَڻ مُون تو ڀُوتان نين اِيشوَر نِي شڳتي ٿِي ڪاڍُون سُون، زين ٿِي کٻير پڙي سي ڪي اِيشوَر نِي بادشاهي تمارا وَس مان آوي ري سي. ‏21 زار ڪوئي طاقت واۯو آۮمي ھٿيار لئِينَ پوتا نا گھر نين پاهرو آلشي تو اين نو مال ملڪيت محفوظ ري سي. ‏22 پَڻ زي اين ٿِيئي پَڻ ڪوئي طاقت واۯو آۮمي حملو ڪرِينَ اين نين ڪاٻُو ڪري لي سي تو پسي اين نان ٻڌانئين ھٿيار زين ماٿي اين نين ڀروسو هتو ڦُرِي لي هانَ اين نو مال ملڪيت ڦُرِينَ ويراوِي لاکشي. ‏23 ياد راکو ڪي زي ماري پاسي نٿِي اِي ماري خلاف سي هانَ زي مَنک مُون ڀيۯُون ٿئين مَنکان نين اِيشوَر ڪنين نٿي لاوَتُون اِي اُو مَنکان نين اِيشوَر ٿِي سيٽي ڪري سي.“

ڀُوت ورِي وۯينَ آوي سي اين نِي مِثال

‏24 پسي پرڀُو يسوعئي آ مثال آلِي ڪي،”زار ڀُوت مَنک مانئين ٿِي نيهري سي تو اِي رڻ وڳڙا مان آرام ڪريا هارُو جڳا ڳوتيا هارُو ڀٽڪتُون ري سي هانَ زار اين نين آرام هارُو ڪوئي ماڳ نٿِي زڙتو تو اِي ڪي سي ڪي ’مُون وري اِيز مَنک مان واپس زايوش زين مانئين ٿِي نيهريُون تُون.‘ ‏25 تار اِي واپس آوِينَ زووي سي تو اُو مَنک ايوا گھر نا زَم هوئي سي زي صاف سٿرُون هانَ ريا هارُو تيار هوئي سي. ‏26 پسي اِي زائِينَ پاڻ ٿِيئي ڀُونڏان هات ٻِيزان ڀُوتان نين تيڙِي آوي سي هانَ اِي ٻڌانئين اين نين وۯڳي سي. پسي اِي مَنک نِي حالت اڳي ٿِيئي وڌِيڪ کراٻ ٿئِي زائي سي.“

حقيقي ڀاڳواۯان

‏27 زار پرڀُو يسوع اِي واتُون ڪرتا تا تو ايٽليڪ کلڪ مان ٿِي ايڪ ٻائيئي پرڀُو يسوع نين اُونسي هاڄي ڪيڌُون ڪي، ”ڀاڳوارِي سي اُو ما زين نا پيٽ مان تمين ريا هانَ زينڻئي تمان نين ۮوڌ ڌوَرايُون،“ ‏28 پَڻ پرڀُو يسوعئي اين نين ڪيڌُون ڪي، ”اِي ٺيڪ سي، پَڻ اين ٿِيئي وڌيڪ ڀاڳواۯان اُو سي زي اِيشوَر نُون وچنَ هانمڀۯي سي هانَ اين ماٿي هينڏي سي.“

مَنک پرڀُو يسوع نين چمتڪار ڪريا نُون ڪي سي

‏29 زار پرڀُو يسوع نين آس پاس اَلاهِي مَنک ڀيۯان ٿئي جھان تو اِي ڪيوا مانڏيا ڪي، ”آ زمانا نان مَنک ڀُونڏان سي چمڪي اِي چمتڪار زووا مانڳي سي پَڻ اِيئان نين سنت يونا نا نِشانَ شوائي ٻيزُو ڪوئي چمتڪار نين وَتاڙيُون زائي. ‏30 چمڪي زم سنت يونا نينوا شهر نان مَنکان هارُو ايڪ نِشانَ ڇو ايمز مُون يعني جڳت نو ست ڳُرو پَڻ آ زمانا نان مَنکان هارُو نِشانَ ٿايوش. ‏31 ڏکڻ نا ملڪ سَبا نِي راڻِي اَلاهِي سيٽي ٿِي سليمانَ بادشاه نيُون عقل واۯيُون واتُون هانمڀۯوا آوِي تِي، پَڻ مُون تو سليمانَ ٿِيئي موٽو سُون، توئي پَڻ تمين منين نٿِي مانتا. اين هارُو قيامت نين ۮاڙي ڏکڻ نا ملڪ سَبا نِي راڻِي آ زمانا نان مَنکان ڀيۯي زِيوِي اُوٺشي هانَ اِيئان ماٿي الزام لڳاوشي ڪي آ ۮوهارِي سي۔ ‏32 نينوا شهر نان مَنکانئي سنت يونا نو نياپو هانمڀۯِينَ پاپان ٿِي توبان ڪري ليڌي تي پَڻ مُون تو سنت يونا ٿِيئي موٽو سُون، پَڻ توئي تمين مارِي واتُون هانمڀڙِينَ شاهارُو پاپ ٿِي توبان نٿِي ڪرتان۔ اين هارُو قيامت نين ۮاڙي نينوا شهر نان مَنک آ زمانا نان مَنکان ڀيۯان زِيوِي اُوٺشي هانَ آ زمانا نان مَنکان ماٿي الزام هڻشي ڪي آ ۮوهارِي سي۔“

ۮيوا نِي مثال

‏33 پسي پرڀُو يسوعئي ڪيڌُون ڪي،”ڪوئي پَڻ مَنک ۮِيوو ٻاۯِينَ اين نين هتاڙينَ نٿي راکتُون يان ٺانٻڙا نيسو نٿِي ميڪتُون پَڻ اين نين ايوي جڳا ماٿي ميڪي سي ڪي گھر مان آيا واۯان هارُو انزُوئاۯُون ٿائي. ‏34 تارِي آنڇ تارا ڏيل هارُو ۮيوا نا زَم سي۔ زي تارِي آنڇ ٺيڪ سي تو تمارا ٻڌائي ڏيل مان اَزواۯُون سي هانَ زي تارِي آنڇ کراٻ سي تو تارا پورا ڏيل مان اَنڌارُون سي. ‏35 تين هارُو تمين خيال راکو ڪي زي انزُوئاۯُون تمان مان سي اِي چائين اَنڌارُون تو نٿِي. ‏36 اين هارُو زي تمارُون پورُون ڏيل انزُوئاۯُون ٿِي ڀرل هوئي هانَ چانئين اَنڌارُون نا هوئي تو تمارُون ڏيل اُو ۮيوا نا زَم هوئي سي زي تمان نين پورُون انزُوئاۯُون آلي سي.“

پرڀُو يسُوع شاستر نين زاڻيا واۯا هانَ فريسي پنٿ نان مَنکان ماٿي افسوس ڪري سي

‏37 زار پرڀُو يسوعئي اِي واتُون ڪرِي لِيڌيُون تو فريسي پنٿ نا ايڪ آۮمئي اِيئان نين ڌاوَت آلِي. اين هارُو پرڀُو يسوع اين نِي گھري زائين کاوا زموا ٻيٺا. ‏38 فريسي پنٿ نو اِي آۮمي اِي زوئينَ اَلاهِي حيرانَ ڇو ڪي يهوڌِيان نِي ڌرمِي رِيچ پرماڻي پرڀُو يسوعئي زميا ٿِي مورِ ھاٿ نتا ڌويا. ‏39 پرڀُو يسوعئي اين نين ڪيڌُون ڪي، ”اي فريسي، تمين پنهنجو پاڻ نين ٺانٻڙان نا زم ٻاري ٿِي تو اُڳٽِينَ صاڦ ڪرو سو پَڻ تماران منَ تو لالچ هانَ ڀُونڏائِي ٿِي ڀرل پڙيان سي. ‏40 اي بيوقوف مَنکو، شُون اِيشوَرئي مَنک نين صرف ٻاري ٿي ٺاهيُون سي، شُون اينڻي اين نين مانئين ٿِي نٿِي ٺاهيُون؟ ‏41 زي ڪانڪ تمان ڪنين سي اِي ڳرِيٻان مان ويراوِي لاکو تو پسي تماران منَ پوِيتر ٿئِي زاشي. ‏42 پَڻ اي فريسي مَنکو، اَفسوس سي تمان ماٿي چمڪي تمين ڦُوڌنا، ڌاڻا هانَ ٻِيزي ڀاڄيان نو ۮوهمو حِصو تو اِيشوَر نا نام مان آلو سو پَڻ تمين نيا (انصاف) ڪريا نُون هانَ اِيشوَر ٿِي پريم راڇا نُون ملِي آليُون سي. پَڻ تمان نين پيهرِينَ اِي ٻيئي ڪام ڪروان تان، هانَ ۮوهمو حِصو پَڻ آلتُون ريوون سي. ‏43 اَفسوس سي تمان ماٿي چمڪي تمارِي مرضي هوئي سي ڪي تمان نين ڀڳتي گھران مان اُونسي جڳا ماٿي ٻيهاري هانَ مَنک بازاران مان تمان ٿِي عِزت ٿِي مۯي.‘ ‏44 اَفسوس سي تمان ماٿي چمڪي تمين بي نشان مقامان نا زَم سو زين نِي کٻير نٿي هوتي هانَ مَنک اين ماٿي ٿِي لتاڙِينَ مٽِي زائي سي.“ ‏45 تار ايڪ شاستر نين زاڻيا واۯيان مانئين ٿِي ايڪئي پرڀُو يسوع نين ڪيڌُون ڪي، ”ڳرُو زِي، تمين آ واتُون ڪرِينَ اَمارِي پَڻ ڀيعِزتِي ڪرو را سو.“ ‏46 تار پرڀُو يسوعئي ڪيڌُون ڪي، ”اي شاستر نين زاڻيا واۯو، تمان ماٿي پَڻ اَفسوس سي ڪي تمين ڌرمي ڪام مَنکان ماٿي لاکو سو زي ڪروان گھڻا مشڪل سي پَڻ توئي اِي ڪام ڪريا مان اِيئان نِي مدد پَڻ نٿِي ڪرتا. ‏47 تمام ماٿي اَفسوس، چمڪي تمين اِيشوَر نو نياپو آليا واۯان نيُون هماۮيُون ٺهراوو سو زار ڪي تماران ٻاپ ڏاڏانئي اِيئان نين ماريا تا. ‏48 هوي تمين اِيئان نِي هماۮيُون ٺهراوِينَ اِي وات نو ثبوت آلو سو ڪي تمين پاڻ تماران ٻاپ ڏاڏان نا ڪامان نين پسند ڪرو سو چمڪي اِيئانئي تو اُويان نين ماريا تا. ‏49 تين هارُو اِيشوَرئي ٺِيڪ ڪيڌُون تُون ڪي، ’مُون مارا نياپو آليا واۯا هانَ ٻِيزا چُونڍل مُک سيلان نين اِيئان ڪنين ميليوش. پَڻ مَنک اِيئان مانئين ٿِي ڪانڪ نين تنڳ ڪرشي هانَ ڪانڪ نين مارِي لاکشي.‘ ‏50 اين هارُو جڳت نِي شُروع ٿِي زيٽلا پَڻ اِيشوَر نو نياپو آليا واۯان نا خُون ڇا سي، اِيئان نو بدلو آ زمانا نان مَنکان ڪنين ٿِي ليڌو زاشي. ‏51 يعني ڪي هابل نا خون ٿِي لئين اُو زڪريا نا خون هُوڌِي زين نين ٻلِيۮانَ ڪريا نِي جڳا هانَ اِيشوَر نا گھر نِي وس مان ماريو جھو تو، اِي ٻڌانئين نا خون نو بدلو آ زمانا نان مَنکان ليڌو زاشي. ‏52 اي شاستر نين زاڻيا واۯو تمان ماٿي اَفسوس، چمڪي ڪي تمين مَنکان هارُو اِيشوَر نِي واتُون همزِيا نو ڌروازو بند ڪري لاڇو سي. تمين پوتي پَڻ اِيشوَر نين نٿي اُوۯکتا هانَ ٻِيزان نين پَڻ روچان زين نِي مرضي هتِي ڪي اُو اِيشوَر نين اُوۯکي.“ ‏53 زار پرڀُو يسوع اَڃين ٿِي هينڏيا تو شاستر نين زاڻيا واۯا هانَ فريسي پنٿ نان مَنک اِي ۮاڙا ٿِي پرڀُو يسوع نا ويري ٿئي جھا هانَ اِيئان نين ڦسواڙيا هارُو اين ڪنين ٿِي اَلاهِي آڏا اوۯا سوال ڪروا مانڏيا۔ ‏54 اُو اِي گھات مان ريا ڪي پرڀُو يسوع نين ڪوئي وات مان ڦسواڙي.