سَنت لُوقا نِي طرف ٿِي لِکل خوشي نِي کٻيرِ 8

شيواڌاري ٻايُون

‏1 اين چيڙِ پرڀُو يسوع شھر شھر ھانَ ڳام ڳام زائِينَ پرچار ڪرتو ھانَ اِيشوَر نِي بادشاھي نِي خوشِي نِي کٻيرِ ھنمڀۯاوَتو ريو۔ پرڀُو يسوع نا ٻارھان مُک سيلا پَڻ اين ڀيۯا ھتا۔ ‏2 پرڀُو يسوع ڀيۯيُون ڪانڪ وشواسي ٻايُون پَڻ ھتِيُون زين مانئين ٿِي پرڀُو يسوعئي ڀُوت ڪاڍيان تان ھانَ بيماريان مانئين ٿِي ٺيڪ ڪريُون تيُون۔ اِي ٻايان مانئين ٿِي ايڪ نُون نام مريم هتُون، زين نين مريم مگدليني پَڻ ڪيتان۔ زين مانئين ٿِي پرڀُو يسوعئي ھات ڀُوت ڪاڍيان تان، ‏3 گهڻيُونئي ٻايُون ھتيُون زي پوت پوتان نا ڌن ڌولت ٿِي پرڀُو يسوع ھانَ اين نان سيلان نِي مدد ڪرتيُون۔ زين مان ھيروديس بادشاھ نا صلاحڪار خوزا نِي ٻائيڙِي يوعانا، سوسنا ھانَ ٻيزيُون پَڻ گھڻيُون هتيُون۔

ٻيز چٽيا واۯا نِي مثال

‏4 ايڪ ۮاڙو پرڀُو يسوع ڪنين شھر شھر نان اَلاهي مَنک آوِينَ ڀيۯان ڇان۔ تار پرڀُو يسوعئي اِيئان نين ايڪ مثال هنمڀۯاوِي ڪي، ‏5 ”ايڪ ھاۯِي ٻيز ڇٽوا جھو۔ ٻيز چٽتان ڪانڪ ۮانڻا ٻنا ماٿي پڙيا زي پڳانئي ٿِي لتڙائي جھا ھانَ پَکي کائِي جھان۔ ‏6 ڪانڪ ۮانڻا پڪِي زمين ماٿي پڙيا زي اُوڳتانز ھُوڪائِي جھا چمڪي اِيئان نين پاڻِي نا مۯيو۔ ‏7 ڪانڪ ۮانڻا ڪانڍيران مان پڙيا ھانَ اُوڄا پَڻ ڪنڍيرانئي اِيئان نين وَڌوا نا آليا ‏8 ھانَ ڪانڪ ۮانڻا ھڌرِي زمين مان پڙيا ھانَ اِي اَلاھي ھڌرا اُوڄا ھانَ ايڪُوڪا ڪرھيڻا مانئين ھو ھو ۮانڻا ڇا۔“ اِي مثال هنمڀۯاوِينَ اُونسي هاۮي ڪيڌُون ڪي، ”زين نين ڪانَ هوئي اِي هانمڀۯي لي۔“

ٻيز ڇٽيا واۯا نِي مثال نُون مطلب

‏9 پرڀُو يسوع نان سيلانئي اين ڪنَ ٿِي پُوسيُون ڪي، ”آ مثال نُون شُون مطلب سي؟“ ‏10 پرڀُو يسوعئي ڪيڌُون ڪي، ”اِيشوَرئي تمان نين تو پنهنجي بادشاھي نا ڀيدان نِي ھمزڻ آلي سي پَڻ ٻيزان نين مُون مثالان مان اين هارُو ھنمڀۯاوون سُون ڪي اِي ڀاۯتان هوئي هانَ ھانمڀۯتان هوئي پَڻ ھمزي نا۔

ٻيز ڇٽيا واۯا نِي مثال نُون مطلب

‏11 پسي پرڀُو يسوئي ڪيڌُون ڪي، ”آ مثال مان ٻيز نُون مطلب سي، اِيشوَر نُون وَچن۔ ‏12 زي ٻنا ماٿي ۮانڻا پڙيا اِي ٻنو ايوان مَنک سي زي اِيشوَر نُون وَچن ھانمڀۯي سي پَڻ شيطان آوِينَ اِيشوَر نا وَچن نين اِيئان نا منَ مانئين ٿِي ڪاڍِي لاکي سي اِي اين ھارُو ڪي اُو اِيشوَر ماٿي وشواس نا لاوي رو ھانَ اِيشوَر اِيئان نين مُڳتي آلي۔ ‏13 زي پڪي زمين ماٿي ۮانڻا پڙيا اِي پڪي زمين ايوان مَنک سي زي آ وَچن ھانمڀۯي سي ھانَ اين نين خوشِي ٿِي مانِي تو لي سي پَڻ اُو ايوا زاڙکا نا زَم هوئي سي زين نِي پاڍيُون پڪي زمين مان نٿِي لاڳتيُون۔ اين هارُو اُو توڙِي ڌير ھُوڌِي وشواس راکي سي ھانَ زار ڪوئي آزمائيش آوي سي تار اُو ڦرِي زائي سي۔ ‏14 زي ڪانڍيران مان ۮانڻا پڙيا اِي ڪانڍيرا ايوان مَنک سي زي اِيشوَر نُون وچنَ ھانمڀۯي تو سي پَڻ ھۯوي ھۯوي جِيونَ نيُون ڳڻتيُون، ڌن ھانَ عيش آرام مان ڦاسي زائي سي۔اِي اُو زاڙکا نا زَم سي زين نُون ڦل ڪۮِي نٿِي پاڪتُون۔ ‏15 پَڻ زي ۮانڻا ھڌرِي زمينَ مان پڙيا اِي هڌرِي زمين ايوان مَنک سي زي اِيشوَر نُون وَچن ھانمڀۯي سي ھانَ پسي اين نين سُٺي نموني ٿِي ھانَ ھاسا منَ ٿِي ھنمڀاۯِينَ راکي سي۔ اِي اُو زاڙکا نا زَم سي زي پوتان نِي موسم پرماڻي پورُون ڦل لئِينَ آوي سي۔“

ۮيوا نِي مثال

‏16 پسي پرڀُو يسوعئي اِيئان نين ايڪ ٻيزي مثال هنمڀۯاوِي ڪي،”ڪوئي اِيوون مَنک نٿِي زي ۮيوا نين ڌُکاوِينَ اين نين ٺانٻڙا نيسو ڍانچِينَ ميلي يان وَرِي اين نين ڍوليا نيسو ميلي پَڻ اُو ۮيوا نين ايوي جڳا ماٿي ميلشي زين ٿِي گھر مان آيا واۯان هارُو اَزواۯُون ٿائي۔ ‏17 چمڪي ڪوئي پَڻ ھتال شيزِ ايوي نٿِي زي ساوِي نا ڪرِي زائي ھانَ ڪوئي ايوو ڀيۮ نٿِي زين نِي کٻيرِ نا پڙي ھانَ اُو ساوو نا ٿائي۔ ‏18 اين ھارُو تمين مارِي واتان نين ڌيان ٿِي هانمڀۯو چمڪي زين ڪنين اِيشوَر نا وچنَ نِي همزڻ سي اين نين وڌيڪ همزڻ مۯشي پَڻ زين ڪنين اِيشوَر نا وچنَ نِي همزڻ نٿِي اين ڪنين ٿِي اِي همزڻ پَڻ ڦرِي ليشي زين نين اُو پوتان نِي ھمزي سي۔“

پرڀُو يسوع نِي ما ھانَ ڀائِي

‏19 زار پرڀُو يسوع مَنکان ٿِي واتُون ڪرتو تو اَڃين اين نِي ما ھانَ اين نا ڀائِي اين ڪنين آيان پَڻ گھڻان مَنکان ٿِي ڪرِينَ اين ڪنين پوتِي نا چا۔ ‏20 ڪوئي مَنکئي آوِينَ پرڀُو يسوع نين ڪيڌُون ڪي، ”تمارِي ما ھانَ ڀائِي تمان ٿِي مۯوا آيان سي۔“ ‏21 پرڀُو يسوعئي اين نين ڪيڌُون ڪي، ”مارِي ما ھانَ ڀائِي اُو سي زي اِيشوَر نُون وچنَ ھانمڀۯي سي ھانَ اين ماٿي ھينڏي سي۔“

پرڀُو يسوع طوفان نين ڀنڌ ڪري سي

‏22 ايڪ ۮاڙو پرڀُو يسوعئي اين نا سيلا نين ڪيڌُون ڪي، ”ھينڏو، ڍنڍ نين اُولي پاسي ھينڏا۔“ پسي پرڀُو يسوع ھانَ اين نا سيلا ٻيڙي مان سڙيا هانَ روانا ٿئي جھا۔ ‏23 زار اِي ٻيڙِي مان زاتا تا تار پرڀُو يسوع نين اُونگھ آوِي ري۔ تار ڍنڍ مان اوچتو موٽو طوفان آيو رو۔ ٻيڙِي پاڻي ٿِي ڀراوا مانڏِي ھانَ اِي ڏوٻوا مانڏيا۔ ‏24 پسي اِي پرڀُو يسوع ڪنين جھا ھانَ اين نين زَڳاڙِينَ ڪيڌُون ڪي، ”ڳرو زي، آپي ٻڌائي ڏُوٻيا واۯا سان۔“ تار پرڀُو يسوع اُوٺيو ھانَ اينڻي طوفان ھانَ پاڻِي نِي ڇوليان حڪم آلِينَ ڌڙڪو آليو تو طوفان اِيز ٽانڻي بند ٿئِي جھو ھانَ شانتِي ٿئِي جھئِي۔ ‏25 پسي پرڀُو يسوعئي سيلان نين ڪيڌُون ڪي، ”تمارو وشواس چان سي؟“ سيلا ٻيئائِي جھا هانَ حيران ٿئِينَ آپس مان ڪيوا مانڏيا ڪي، ”آ ڪُونڻ سي؟ آ تو طوفان ھانَ پاڻِي نين حڪم آلي سي ھانَ اُو اين نِي وات ماني سي۔“

پرڀُو يسوع ڀُوت واۯا آۮمِي نين ٺيڪ ڪري سي

‏26 پسي پرڀُو يسوع هانَ اين نا سيلا ٻيڙِي مان گراسينيون نا علاقا مان زائِينَ رسيا زي گليل نِي ڍنڍ نين اُولي پاسي سي۔ ‏27 زار پرڀُو يسوع ڪناري ماٿي اُتريو تو اين نين اِي شھر نو ايڪ آۮمِي مۯيو زين نين ڀُوت وَۯڳل ھتُو۔ اِي اَلاھي ۮاڙان ٿِي نا لُگھڙان پيرتو ھانَ نا گھر مان ريتو پَڻ اِي مقامان مان ريتو۔ ‏28 زار اِي آۮمئي پرڀُو يسوع نين ڀاۯيو تو اِي راڙِ ڪرِينَ اين نا پَڳان مان پڙيو ٺو هانَ زور ٿِي راڙِ ڪرِينَ ڪيوا مانڏيو ڪي، ”اي يسوع، اِيشوَر نا پُتر، تارُون مُون ٿِي شُون ڪام؟ مُون تُون نين وينتِي ڪرُون سُون ڪي منين ۮُک مان نا لاڇِ۔“ ‏29 اينڻي پرڀُو يسوع نين اين هارُو ايم ڪيڌُون تُون ڪي پرڀُو يسوعئي ڀُوت نين اِي آۮمِي مانئين ٿِي نيهري جھا نو حڪم آليو تو۔ ڀُوت اِي آۮمِي نين گھڙِي گھڙِي سانٽتُون تُون اين ھارُو مَنک اين نين ھانڪۯان ھانَ رانڍوان ٿِي ٻانڌِي لاکتا پَڻ اُو ھانڪۯان نين توڙِي لاکتو ھانَ ڀُوت اين نين رَڻ وَڳڙا مان ڌوڙاوَتُون ريتُون۔

‏30 پرڀُو يسوعئي اين ڪنين ٿِي پُوسيُون ڪي، ”تارُون نام شُون سي؟“ اينڻي وَۯتِي آلِي ڪي، ”لشڪر۔“ چمڪي اين نين کُوٻ ڀُوت وۯڳل ھتان۔ ‏31 ڀوت پرڀُو يسوع نين وينتِي ڪرِينَ ڪيوا مانڏيان ڪي، ”اَمان نين نرڳ مان زايو نو حڪم نا آلِ۔“ ‏32 اَڃين جبل ماٿي ھُوئران نُون موٽُون ڌڻ سرتُون تُون۔ ڀُوت پرڀُو يسوع نين وينتِي ڪرِينَ ڪيوا مانڏيان ڪي، ”اَمان نين اُو ھُوئران مان زاوا آلو۔“ تو پرڀُو يسوعئي ايمز ڪريُون۔ ‏33 پسي ڀُوت اِي آۮمِي مانئين ٿِي نيھرِينَ ھُوئران نين زائِينَ وَۯڄان۔ اِي ٻڌائي ھُوئر جبل ماٿي ٿِي ڌوڙتان نيسا ڍنڍ مان زائِينَ پڙيا هانَ ڏُوٻِينَ مرِي جھا۔

‏34 اِي واقعو زوئِينَ هُوئر ساريا واۯا ڌراڙ شهر هانَ اين نان آس پاس نان علاقان هانمي ڌوڙِي جھا ھانَ مَنکان نين زائِينَ اِي وات ھنمڀۯاوِي۔ ‏35 پسي زي مَنکانئي اِي وات هانمڀۯِي تِي اِي پرڀُو يسوع ڪنين آيان۔زار مَنکانئي زويُون ڪي زين آۮمي مان ڀُوت هتان، اِي لُگھڙان پيرِي ھانَ پورا ھوش حواس ٿِي پرڀُو يسوع نان پَڳان ڪنين ٻيٺو سي تو اِي ٻيئائي جھان۔ ‏36 اِي پورا واقعا نين ڀاۯيا واۯيانئي ٻيزان مَنکان نين پَڻ ھنمڀۯايُون ڪي چچم ڀُوت وَۯڳل آۮمي ٺيڪ ٿئي جھو۔ ‏37 گراسينيون نا آس پاس نا علاقا نان ٻڌانئين مَنک اَلاهي ٻيئائي جھا۔ اين هارُو پرڀُو يسوع نين وينتِي ڪرِينَ ڪيڌُون ڪي، ”تُون اَمارا مُلڪ مانئين ٿِي زاتو ري۔“ تار پرڀُو يسوع ٻيڙِي مان سڙِينَ واپس روانو ٿئِي جھو۔ ‏38 تار ڀُوت نيهرل آۮميئي، پرڀُو يسوع نين وينتِي ڪرِينَ ڪيڌُون ڪي، ” ڳرو زي، منين پَڻ تمان ڀيۯو لئي رو۔“ پَڻ پرڀُو يسوعئي اين نين روانو ڪرِينَ ڪيڌُون ڪي، ‏39 ”تُون پنهنجي گھرِي واپس زا هانَ مَنکان نين ھنمڀۯائي ڪي، اِيشوَرئي تُون ماٿِي چيوڙِي موٽِي ۮيا ڪرِي سي۔“ پسي اِي آۮمِي واپس جھو ھانَ زائِينَ ٻڌانئين شھران مان مشھور ڪريُون ڪي، ”پرڀُو يسوعئي مُون ماٿِي چيوڙِي موٽِي ۮيا ڪرِي سي۔“

پرڀُو يسوع يائرس نِي سوڪرِي نين زيوتِي ڪري سي هانَ ايڪ بيمار ٻائيڙِي ٺيڪ ڪري سي

‏40 زار پرڀُو يسوع ٻيڙِي مان واپس آيو تو مَنک اين نين ڀاۯِينَ کُوٻ خوش ڇان چمڪي ٻڌانئين مَنک پرڀُو يسوع نِي واٽ زوتا تان۔ ‏41 پسي يائرس نام نو ايڪ آۮمِي آيو زي ڀڳتِي گھر نو اَڳواڻ ھتو۔ اِي پرڀُو يسوع نان پَڳانئين پڙيو ھانَ پنهنجِي گھري ھينڏيا نِي وينتِي ڪرِي۔ ‏42 چمڪي اين نِي ايڪز سوڪرِي ھتِي زين نِي عمر ٻار سال ھتِي ھانَ اِي مريا واۯِي ھتِي۔

زار پرڀُو يسوع يائير نِِ گھري زاتو تو تار اين نِي چاري ڪورِ اَلاهي مَنکان رَش ھتِي۔ ‏43 اَڃين رَش مان ايڪ بيمار ٻائيڙِي ھتِي زين نين ٻار سالان ٿِي خُون نِي بيمارِي ھتِي۔ اين ڪنين زي ڪانئين پئيشا ھتا اِي حڪيمان ڪنين علاج مان خرچ ڪرِي لاڇا تا پَڻ توئي ڪوئي اين نين ٺيڪ نا ڪرِي چو۔

‏44 اِي ٻائيڙِي پرڀُو يسوع نِي چيڙي ٿِي آوِي هانَ اين نان لُگھڙا نين ھاٿ اَڏاڙيو تو اِي اِيز ٽانڻي ٺيڪ ٿئِي جھئِي۔ ‏45 تار پرڀُو يسوعئي پُوسيُون ڪي، ”منين ڪڻين ھاٿ اَڏاڙيو سي؟“ زار ٻڌانئين ناپاڙيو تار پطرس هانَ ٻيزان زي پرڀُو يسوع ڀيۯا هتان اِيئان ئي ڪيڌُون ڪي، ”ڳُرو زي، کلڪت اَلاھي سي اين ھارُو مَنک تمان ماٿي سڙتان آوي ران سي۔“ ‏46 پَڻ پرڀُو يسوعئي ڪيڌُون ڪي، ”نا، ضرور ڪڻينڪ منين ھاٿ اَڏاڙيو سي چمڪي منين کٻيرِ سي ڪي مُون مانئين ٿِي شڪتِي نيھرِي سي۔“ ‏47 زار ٻائيڙيئي زويُون ڪي هوي مُون ھتائِي نٿِي ڪيتي تار اِي ٻيئاتِي ٻيئاتِي آوِينَ پرڀُو يسوع نا پَڳانئي پڙِي ٺِي ھانَ ٻڌانئين نِي آڳۯ پرڀُو يسوع نين ھنمڀۯايُون ڪي، ” اينڻئي شاهارُو پرڀُو يسوع نين ھاٿ اَڏاڙيو ھانَ چچم ايز ٽانڻي ٺيڪ ٿئِي جھئي۔“ ‏48 پرڀُو يسوعئي ڪيڌُون ڪي، ”ٻچا زا، تاري وشواسي تُون نين ٺيڪ ڪرِي سي اِيشوَر تُون نين سُکي راکي۔“

‏49 پرڀُو يسوع ھزِي اِي واتُون ڪرتو تو ڪي ڀڳتِي نا گھر نا اَڳواڻ يائرس نِي گھري ٿِي ڪوئي آيُون ھانَ اين نين ڪيڌُو ڪي، ”تمارِي سوڪرِي مرِي جھئِي سي۔ ھوي ڳرُو زي نين اَڃين ھينڏيا نِي تڪليف نا آلزو۔“ ‏50 پَڻ پرڀُو يسوعئي اِي واتُون ھانمڀۯِينَ يائرس نين ڪيڌُون ڪي، ”پريشان نا ٿا، رُڳو وشواس راڇ تو اِي بچِي زاشي۔“

‏51 زار اِي يائرس نِي گھري پوتيا تو پرڀُو يسوعئي پطرس، يوحنا، يعقُوب ھانَ سوڪرِي نان ما ٻاپ ٿِي اعلاوا ٻيزا چائيني گھر مان نا آوَوا آليان چمڪي ‏52 ٻڌانئين مَنک سوڪرِي ھارُو روتا تا هانَ زار پرڀُو يسوعئي ڪيڌُون ڪي، ”روئو نا، چمڪي اِي مرِي نٿِي پَڻ اُونجھِي سي۔“ ‏53 تار اِي مَنک پرڀُو يسوع ماٿِي کُوٻ ريشي ٻۯيا۔ چمڪي اِيئان نين کٻيرِ ھتِي ڪي سوڪرِي مرِي جھئِي سي۔ ‏54 پرڀُو يسوعئي سوڪرِي نين ھاٿي ڳرِينَ اين نين ڪيڌُون ڪي، ”ٻچا، اُوڀِي ٿا۔“ ‏55 تار اِي سوڪرِي مان ھاھ واپس آيو رو ھانَ اِي اُوٺِينَ ٻيٺي ٺي۔ پسي پرڀُو يسوعئي حڪم آليو ڪي، ”سوڪرِي نين ڪانڪ کاڌا نُون آلو۔“ ‏56 اِي پرسا ٿِي سوڪرِي نان ما ٻاپ اَلاهي حيران ڇا۔ پَڻ پرڀُو يسوعئي اِيئان نين ھمزايان ڪي، ”آئين زي ڪانئين ڇُون، اِي چائي نين نا هنمڀۯاو زو۔“