पउलुस कुरिन्थुस नगर में
18
1 फिन पउलुस अथेना सहर से कुरिन्थुस नगर में अलई । 2 उहां ओकरा अक्विला नाम के एगो आदमीन से मुलकात होलई, जेकर जन्म पुन्तुस सहर में होइल हलई । उ आपन मेहारू पिरिस्किल्ला संगे इतालिया से हाले में अइल हलई, काहेकि कलउदियुस सामराट सबे यहूदियन के रोम सहर से निकलेला हुकुम देले हलई । इहेसे पउलुस ओकिन भीरा गलई । 3 आऊ देखलई कि ओकिन तम्बु बनावेवोला हथीन । इहेसे पउलुस ओकिन संगे रह के उहे धान्हा करे लगलई । काहेकि ओकरो धान्हा तम्बुवे बनावे के हलई ।4 उ हर एक पबितर दिन यहूदी धरम सभा घर में जाके यहूदियन आऊ यूनानी लोगन के बढिया तरी से समझा के बतावत हलई । 5 जखनी सीलास आऊ तीमुथियुस मकिदुनिया इलाका से अलथीन, त पउलुस वचन सुनावे में आपन पूरा समय बितउलई; आऊ यहूदीयन भीरा अइसन गोवाही देलई कि यीसु ही मसीह हथीन । 6 बाकि जखनी ओकिन बिरोध आऊ सिकायत करे लगलथीन, त पउलुस आपन कपड़ा फार के ओकिन से कहलई, “तोहिन के खून तोहिने के कपार पर परतऊ ! एकर में हमर कवनो दोस नखऊ । अभिये से हम गेइर-यहूदियन भीरा जबई ।”
7 फिन पउलुस धरम सभा घर से हिठ के तितुस-यूस्तूस नाम के एगो आदमीन घरे गलई । उ परमेस्वर के आराधना करेवोला एगो युनानी हलई । ओकर घर यहूदी धरम सभा घर से सटले हलई । 8 एकर बाद धरम सभा घर के मुखिया किरिसपोस आपन पूरे घराने संगे परभु परे बिसवास कलथीन; किरिन्थियुस सहर के ढेरे अदमिनियनो पउलुस के बतिया सुन के बिसवासी बनलथीन आऊ बपतिस्मा लेलथीन ।
9 एक रात दरसन देखा के परभु पउलुस से कहलथीन, “नई डेरो, बाकि कहते जो आऊ चुपचाप नई रह; 10 काहेकि हम तोहरा संगे हियऊ, आऊ कवनो तोहरा परे चढ़ के कोई-कुछो बिगाड़ नई सका हथून । काहेकी इ नगर में हमरा ढेरे अदमिनियन हथीन । 11 इहेसे पउलुस उहां परमेस्वर के वचन डेढ़ साल तक सिखउते रहलई ।
12 बाकि जखनी गल्लियो अखाया इलाका के राजपाल हलई, त यहूदी लोगन जमा होके पउलुस परे चढ़लथीन, आऊ ओकरा फइसला करेला राजपाल भीर लान के कहे लगलथीन, 13 “इहे आदमीन लोगन के अइसन तरी से परमेस्वर के आराधना करेला समझावत हई जे नियम के बिरोध में हई ।
14 बाकि जखनी पउलुस बोलेला सुरु कलई, त गल्लियो यहूदी लोगन से कहलई, “हे यहूदियन, अगर इ आदमीन कुछ गलती चाहे कवनो बड़हन अपराध कइले रहतियई, त ठीक रहतियई कि हम तोहिन के सिकायत के सुनतियऊ । 15 बाकि अगर इ बकझक त बोली के, आऊ नाम के आऊ तोहिन के नियम के बारे में कुछ हई, त तोहिने सुलझावा; हम एकर फइसला करेवोला बनेला नइखी चाहत ।” 16 फिन उ ओकिन के फइसला करेवोला जगह से निकलवा देलई । 17 तखनी सबे अदमिनियन धरम सभा घर के मुखिया सोस्थिनेस के धर के फइसला करेवोला जगह भीरा मारे लगलथीन । बाकि गल्लियो एकरा परे कुछ गउर नई देलई ।
अंताकिया सहर में पउलुस के लउटल
18 पउलुस ढेरे दिना तक कुरुन्थियुस सहर में रहलई । फिन बिसवासियन से विदा होके किंखरिया सहर में कपार छोलवउलई, काहेकि उ यहूदी धरम के मोताबिक गछले हलई । फिन जहाज परे चढ़ के सीरिया देस में चल गलई । ओकरा संगे अक्विल्ला आऊ ओकर मेहरारू पिरिस्किल्ला हलथीन । 19 जखनी ओकिन इफिसुस सहर पहूँचलथीन, त पउलुस पिरिस्किल्ला आऊ अक्विल्ला के उहंई छोड देलई, आऊ खुदे यहूदी धरम सभा घर में जाके यहूदियन से बहस करे लगलई । 20 जखनी ओकिन पउलुस से आऊ कुछ दिना उहंई रहेला बिन्ती कलथीन, त उ मंजूर नई कलई; 21 बाकि इ कह के ओकिन से विदा होलई, “अगर परमेस्वर चाहतथीन त हम तोहिन भीर फिन अबई ।” फिन उ इफिसुस सहर से जहाज पर चढ़ के चल देलई । 22 जखनी जहाज कइसरिया सहर में पहूँचलई, त पउलुस उतर के यरूसलेम सहर गलई आऊ उहां के मसीही मंडली के जोहार कर के अंताकिया सहर में अलई ।
पउलुस के तीसरका परचार-यात्रा
23 अंताकिया सहर में कुछ दिना रुके के बाद पउलुस उहां से निकल के एके तरफ से गलातिया आऊ फुरगिया इलाका में जाके सब बिसवासियन के बिसवास में मजमुत कलई ।
अपुल्लोस इफिसुस सहर में
24 अपुल्लोस नाम के एगो आदमीन इफिसुस सहर में अलई । ओकर जन्म सिकंदरिया सहर में होइल हलई । उ भासण देवे में बड़ी तेज हलई आऊ पबितर किताब के बढ़िया गेयानीयो हलई । 25 उ खाली यूहन्ना के बपतिस्मा के बारे में जानत हलई तबो में उ परभु के रास्ता के सिक्छा पउले हलई, आऊ मन लगा के यीसु के बारे में सही सही सुनावत आऊ सिखावत हलई । 26 उ उहूदी धरम सभा घर में बेडर के बोले लगलई, बाकि जखनी पिरिसकिल्ला आऊ अक्विला ओकर बतिया सुनलथीन, त ओकिन ओकरा आपन भीरा लान के परमेस्वर के रास्ता आऊ बढ़िया तरी से सही सही समझउलथीन । 27 जखनी अपुल्लोस अखाया इलाका जायला तय कलई, त इफिसुस के बिसवासियन ओकरा उहां जायला ढाढ़स देलथीन । ओकिन अइसन एगो चिट्ठीयो लिखलथीन कि अखाया के बिसवासियन ओकरा बढ़िया तरी से सवागत करतथीन । जखनी उ उहां पहूँचलई, त उ उहां के बिसवासियन के ढेर मदत कलई, जेकिन किरपा के चलते बिसवास कइले हलथीन । 28 उ आपन बोली के ढेर साम्रथ से सब के सामने यहूदियन के मूंह बंद करत रहलई । उ पबितर किताब से साबुत देके ओकिन के समझउलई कि यीसु ही मसीह हथीन ।