एगो चल्हाक बराहिल के कथा
16
1 यीसु आपन चेलवन के इ कथा सुनउलथीन, “एगो धनइता ओकर काम-धन्हा देखेला एगो बराहिल के रखलई । बाकि जलदीये ओकर परे इ दोस लगावल गलई कि उ आपन मलिकवा के सब सम्पती जने-तने करत हई । 2 इहेसे ओकर मलिकवा ओकरा बोला के कहलई, "हम इ का सुनत हियऊ कि तू हमर सम्पती के जने-तने करत हही ? तू आपन हिसाब-किताब ठीक-ठीक दे, काहेकी अब हम तोहरा बरहिली से निकाले जात हियऊ ।3 तखनी बरहिलवा आपन मनवा में सोचे लगलई, "अब हम का करियई ? हमर मलिकवा त हमरा बरहिली से निकालत हई । हम त मटियो के कोड़े नई परबई, आऊ हमरा भीख मांगे में लाज लागा हई । 4 हमरा भीर एगो उपाय हई । अगर ओकरे अनुसार हम करबई त हमरा ढेरे साथीवन हो जतथीन, आऊ हमरा इहां से निकाले जाने पर ओकिन हमरा संभाल लेतथीन ।
5 इहेला उ एक-एक आदमीन के बुलउलई जेकिन ओकर मलिकवा से करजा लेले हलथीन, आऊ पहिलका आदमीन से पूछलई, 'तू मलिकवा से केतना करजा लेले हही ?' 6 उ जबाब देलई, 'हमरा भीर एक सव मनa जइतून के तेल उधार हई ।' तखनी बरहिलवा ओकरा से कहलई, 'उहे खाता-बही के फाड़ देही आऊ ओकर जगह में पचास मन खाता-बही में लिख दे ।'
7 फिन बरहिलवा दूसरका आदमीन से पूछलई, 'तू हमर मलिकवा से केतना करजा लेले हही ?' उ कहलई, ‘एक सव मन गोहुम,’ तखनी बरहिलवा कहलई, 'आपन खाता-बही लेके एक सव के बदले में असी लिख दे ।’ 8 मालिक उ बइमान बरहिलवा के इ चल्हाकी पर बढ़ाई कलई । फिन यीसु कहलथीन, 'इ सच हई कि इ दुनिया के लोगन जेकिन परमेस्वर के नई माना हथीन, ओकिन इंजोत के बेटवन मतलब धरमी लोगन से दुनियादारी में जादे चल्हाक हथीन ।' 9 हम तोहिन से कहत हियऊ कि इ दुनिया के चीजवन के दूसर के भलाई खातिर काम में लावा । आऊ ओकिन के साथी बना लेही । जखनी उ खतम होतई त तोहिन के सरग के अमर घर में बढ़ी खुसी से मंजूर कइल जतई । 10 तोहिन छोट्हन-छोट्हन बतिया में बिसवास-जोग रहबा, त तोहिन बड़का बतियो में बिसवास-जोग रह सका हही । अगर तोहिन छोटहनो में धोखेबाजी करबही, त तोहिन ढेर बढ़का जिमेवारी में इमनदार नई रहबा । 11 इहेसे जखनी तू दुनिया के धन में बिसवास-जोग नई होहीं, त सच्चा धन तोहरा कवन देतऊ ? 12 आऊ तू दूसरका के धन में बिसवास-जोग नई होही, त तोहरे धन के कवन तोहरा देतऊ ?
13 कोनो नउकर दूगो मालीक के सेवा नई कर सका हई । काहेकि उ एगो से दुसमनी रखतई आऊ दूसरका से परेम रखतई; चाहे एगो से इमंदार रहतई आऊ दूसरका के तिरस्कार करतई । तोहिन परमेस्वर आऊ धन दूयो के सेवा नई कर सका हां ।
यीसु के कुछ सिक्छा
(मत्ती 11:12,13; 5:31,32; मरकुस 10:11,12)
14 फरीसी लोगन जे पइसा के लोभी हलथीन, इ सब बात सुन के यीसु के मजाक उड़ावे लगलथीन । 15 यीसु ओकिन से कहलथीन, “तोहिन त अदमिनियन भीरा अपने आप के धरमी समझा हां, बाकि परमेस्वर तोहिन के मन के जाना हथीन, काहेकि जे चीज अदमिनियन के नजर में महान हई, उ परमेस्वर के सामने तुछ जाने के लायक हई ।
16 बपतिस्मा देवेवोला यूहन्ना के परचार सुरु होवे तक मूसा के नियम आऊ परमेस्वर देने से बोलेवोलन के बतियन रास्ता देखावेवोला हथीन; बाकि अबही परमेस्वर के राज के बढ़िया खबर सुनावल जात हई आऊ हर कोई ओकरा में ढेर खुसी से घुसा हथीन । 17 आसमान आऊ धरती मिट जतई, बाकि परमेस्वर के नियम के एक छोटहन बतिया कहियो नई मिटतई ।
18 जे कवनो आपन मेहरारु के छोड़ के दूसर अउरत से सगाई करा हई, उ बेबिचार करा हई, आऊ जे कवनो अइसन छोड़वा अउरत से सगाई करा हई, उहो बेबेचार करा हई ।
एगो धनइता अदमीन आऊ गरीब लाजर
19 एगो धनइता आदमीन हलई जे ढेरे दाम के मकमल कपड़ा पेन्हले हलई । आऊ उ रोज दिन सुख-आराम आऊ ठाट-बाट के साथे रहा हलई । 20 ओकर दुहारी परे लाजर नाम के एगो ढेर गरीब आदमीन रहा हलई; ओकर देह ढेरे घाव से भरले हलई । 21 आऊ उ लाजर धनइता आदमीन के मेज से गिरल जुठा से आपन पेठ भरेला चाहा हलई । इहां तक कि कुकुरवन आके ओकर घाव के चाटा हलथीन । 22 अइसन होलई कि उ गरीब लाजर मू गलई, आऊ सरगदूत ओकर आत्मा के ले जाके अबराहम के गोद में पहूँचा देलथीन । आऊ उ धनइता भी मू गलई आऊ गाड़ल गलई । 23 आऊ आधलोक में जखनी उ पिड़ा में पड़ल हलई, त आपन आंख उठउलई, आऊ दूरे से अबराहम के गोद में लाजर के देखलई ।
24 तखनी उ चाल कर के कहलई, ‘हे पिता अबराहम हमरा पर दया कर के लाजर के पेठा दा, ताकि उ आपन अंगुरिया के पानी में भिंजा के हमर जीभ के ठंढा करतई, काहेकि हम इ आग में तड़पत हियई । 25 बाकि अबराहम कहलई, ‘हे बेटा, इयाद कर कि तू आपन जिन्गी में बढ़ियां चीज पउले हें, आऊ ओइसही लाजर बुरा चीज पउले हई : बाकि लाजर इहां सांति पावत हई आऊ तू आगी में तड़पत हें । 26 इ बात छोड़ के हमर आऊ तोहार बीच में एगो बड़का गहड़ा बनावल गइल हऊ; जवन इहां से उ पार तोहर भीर जायला चाहतऊ, उ नई जाय परतऊ आऊ नई कोनो उहां से इ पार हमर भीर आवे परतई । 27 उ धनइता आदमीन कहलई, ‘हे पिता, हम रउवा से बिन्ती करा हिये कि रउवा लाजर के हमर बाबुजी घरे भेज दिहूं । 28 काहेकि हमर पांचगो भाई हथीन; उ ओकिन भीरा इ बात के गोवाही दिहें कि अइसन नई होखे कि ओकिनो इहे पीड़ा के जगह में अतथीन । 29 अबराहम ओकरा से कहलई, 'ओकिन भीर मूसा आऊ परमेस्वर देने से बोलेवोलन के किताब हई उ ओकरे सुनतई । 30 उ धनइता आदमीन कहलई, ‘नई, हे पिता अबराहम, अगर मूवलकन में से कोनो ओकिन भीर जतई, त ओकिन पाप छोड़ के परमेस्वर देने फेरतथीन । 31 अबराहम उ धनइता से कहलई, 'उ मुसा आऊ परमेस्वर देने से बोलेवोलन के नई सुना हथीन, त अगर मूवलकन में से कोनो जी जतई, तबो में ओकर बात नई मानतथीन ।