यीसु लोगन से पाप छोड़ के परमेस्वर देने फिरावे के बात कहत हथीन
13
1 उ घरी यीसु के इ बतिया के जानकारी देवल जा हई कि जखनी गलील के कुछ लोगन यरूसलेम के मंदिर में बली चढ़ावत हलथीन, तखनी पिलातुस ओकिन के मूवा देलई । 2 इ सुन के यीसु कहलथीन, “का तोहिन समझत हां कि इ गलील के अदमिनियन दूसर सब गलीलियन से जादे पापी हलथीन ? का इहेला ओकिन परे अइसन विपत्ति अलई ? 3 हम तोहिन से कहत हियऊ, "नई, बाकि अगर तोहिन आपन पाप के छोड़ के परमेस्वर देने नई घुरबा, त तोहिन सब अइसही नास हो जइबा ।" 4 तोहिन उ अठारह लोगन के बारे में का समझत हां जेकिन के उपरे सिलोह के गोमज गिरलई, आऊ ओकिन जताके मू गलथीन; का ओकिन यरूसलेम के सब रहेवोलन से जादे पापी हलथीन ? 5 हम तोहिन से कहत हियऊ, "नई, बाकि अगर तोहिन पाप छोड़ के परमेस्वर देने नई फिरइबे, त तोहिन सब अइसही नास हो जइबे ।फर देवेवोला बना
6 फिन यीसु इ उदाहरन देके ओकिन से कहलथीन, “एगो आदमीन आपन बगइचा में एगो अंजीर के रुख लगउलई; आऊ ओकर में फर फरलई कि नई, इ देखेला उ रोज-रोज अलई, बाकि कुछो नई पउलई । 7 त आखरी में उ बगइचा के रखवरवन से कहलई, ‘हम तीन साल तक इंतजार करलियई, बाकि एको अंजीर इ रूख परे नई फरलई । इहेसे एकरा काट देहीं ताकी जवन जमीन परे इ रुख तोपले हई, उहां हम आऊ कुछ रोपबई ।’ 8 उ बगइचा के रखवार जबाब देलई, ‘इ रुख के एगो आऊ मोका दिहूं । एक साल तक आऊ इंतजार करू । हम एकरा में चारो करे कोड़ के खाद-पानी डलबई । 9 अगर अगिला साल इ रुख परे अंजीर फरतई त ठीक, आऊ नई फरतई त रउवा एकरा काट सका हिये ।
यीसु पबितर दिन में चंगा करत हथीन
10 एगो पबितर दिन में यीसु यहूदी धरम सभा घर में सिक्छा देवत हलथीन । 11 उहां एगो अउरत के देखलथीन जेकरा दुस्टात्मा कुबरी बना देले हलई । उ अठारह साल से कुबरी हलई, आऊ सोझ डीड़ी नई हो सका हलई । 12 जखनी यीसु ओकरा देखलथीन, त उ ओकरा बोला के कहलथीन, “तू आपन बीमारी से ठीक हो गइल हां ।” 13 फिन यीसु ओकरा छुलथीन, आऊ उ कुबरी तुरतिये सोझ हो गलई । उ परमेस्वर के बढ़ाई आऊ धन्यबाद करे लगलई । 14 यीसु पबितर दिन में उ अउरत के ठीक करले हलथीन, इहेला उ धरम सभा घर के सरदार यीसु परे गोसा गलथीन । उ लोगन से कहलई, “हपता में काम करेला छव दिन देवल गइल हई, त इहे दिना में ठीक होवेला आवल करा, पबितर दिन में नई ।" 15 इ सुन के परभु जबाब देलथीन, ”हे कपटियन, का पबितर दिन में तोहिन में से कोई आपन बइल चाहे गदहा के खुटा से खोल के पानी पियावे नई ले जा हां ? 16 त का हमर खातिर इ जरूरी नई हई कि इ पबितर दिन में इ अउरतa जे अबराहम के बेटी हई, ओकरा सइतान के बान्हल से छोड़ाबई, जेकरा उ अठारह साल बान्हल रखले हलई ?” 17 इ सुन के उनकर बिरोधीयन सरमा गलथीन । आऊ सब लोगन उनकर अजगुत काम के देख के खुसी मनावे लगलथीन।
सरसो के दाना के उदाहरन
(मत्ती 13:31,32; मरकुस 4:30-32)
18 तखनी यीसु कहलथीन, “परमेसर के राज केकर जइसन हई ? हम ओकर तुलना केकर से करियई ? 19 उ सरसो के एगो दाना के तरी हई जेकरा कोनो आदमीन आपन बारी में बुनलई आऊ उ बढ़के रुख हो गलई आऊ चिरइँयन ओकर डोल्ह परे खोता बनउलथीन ।
खमीर के उदारहन
(मत्ती 13:33)
20 यीसु कहलथीन, "हम परमेस्वर के राज के तुलना केकर साथे करबई ? 21 उ खमीरb के जइसन हई, जेकरा कोनो अउरत ले जाके तीन पसेरी आटा में मिला देलई, आऊ सब आटा सीझ के खटा हो गलई ।"
कोसाइत डहर
(मत्ती 7:13,14, 21-23)
22 यीसु सहर-सहर आऊ गांव-गांव सिक्छा देवत जात हलथीन, आऊ उ यरूसलेम देने जात हलथीन । 23 कोनो उनकरा से पूछलई, “हे परभु, का मुक्ती पावेवोलन थोड़ही हथीन ? 24 यीसु ओकरा से कहलथीन, परमेस्वर के राज में कोसाइत दुहारी से घुसे खातिर कोसिस करा, काहेकि हम तोहिन से कहत हियऊ कि ढेरे लोगन घुसे के कोसिस करतथीन, बाकि घुसे नई परतथीन । 25 जखनी घर के मालिक उ दुहारी के बन कर देतई, तखनी ढेरे देर हो चुकल होतऊ । तखनी तोहिन बहरी डीड़ी होके ठोक-ठोका के कहबा, ‘हे परभु, हमिन खातिर दुहारी खोलू !’ बाकि उ जबाब देतथीन, ‘हम तोहिन के नइखियऊ जानत कि तोहिन कहां के हां । 26 तोहिन कहबा, ‘बाकि हमिन रउवा साथे खइले हिये आऊ पिले हिये, आऊ रउवा हमिन के गलियन में सिक्छा देले हिये । 27 बाकि उ तोहिन से कहतथीन, ‘हम तोहिन से कहत हियऊ, हम तोहिन के नइखियऊ जानत कि तोहिन कहाँ के हां । हे बुरा काम करेवोलन, तोहिन सब हमरा से दूर हो जो । 28 जखनी तोहिन अबराहम आऊ इसहाक आऊ याकूब आऊ परमेस्वर देने से बोलेवोलन सब के परमेस्वर के राज में देखबा, तखनी उहां तोहिन रोइबा आऊ दांत पीसबा ! बाकि तोहिन के बाहरी निकाल देवल जइबे । 29 आऊ पुरबे आऊ पछिये; उत्तरे आऊ दखिने से सब लोगन आन के परमेस्वर के राज के भोज में सामिल होतथीन । 30 आऊ सुना, कुछु लोगन पीछाड़ी हथीन ओकिन अगाड़ी हो जतथीन, आऊ कुछु लोगन अगाड़ी हथीन ओकिन पीछाडी हो जतथीन ।
31 उहे घरी कुछु फरीसी लोगन आके यीशु से कहलथीन, “इहां से निकल के चल जाऊं, काहेकि हेरोदेस-अंतिपास राजा रउवा के मुवावेला चाहत हई ।” 32 यीसु ओकिन से कहलथीन, “जाके उ सियार से कह दा कि हम आझु आऊ काल्हू भूतवन के निकालत आऊ बेमरियन के ठीक करते रहबऊ; आऊ तीसरका दिन हम आपन काम के पूरा करबई । 33 बाकि आझु आऊ काल्हू आऊ परसो हमरा आपन रास्ता में होवेला जरुरी हई, काहेकि अइसन नई हो सका हई कि परमेस्वर देने से बोलेवोला कवनो यरूसलेम सहर के बाहरी मुवावल जाई ।
यरूसलेम खातिर यीसु के बिलाप
34 “हे यरूसलेम, हे यरूसलेम, तू अइसन नगर हें कि परमेस्वर देने से बोलेवोलन के मूवा देवा हें, आऊ जेकिन के तोहर भीर पेठावा हियई ओकिन परे पखलमारल करा हें । केतना खांवा हम अइसन चाहलियई कि जइसे मुरगी आपन बच्चवन के पखिंया के नीचे लुका के रखा हई, ओइसही हमहुं तोहर बच्चवन के जमा करबई, बाकि तू हमरा अइसन नई करेला देले । 35 सुना, तोहिन के घर के पूरा तरी से खाली कर देवल गइल हई, आऊ हम तोहिन से कहत हियऊ : जबला तोहिन नई कहबा,
“धन्य हई उ जे परभु के नाम से आवा हई,'तबला तोहिन हमरा फिन कहियो नई देखबा ।"