4
1 Zugdaannama,
niŋimi linɛ an sʋm nɛ linɛ zemisi tisi ya yammis.
Ka baŋi ya pʋtɛnda ni ye ya mɛ mɔr Zugsɔb onɛ bɛ arezana ni.
Sa'alʋg
2 Kpɛn sɔsimi Wina'am saŋa wʋsa ka gu'usidi ka pʋ'ʋsid o bareka.
3 La'am sɔsi tisinɛ ti ye Wina'am na tisi ti suor ka ti mɔɔli o labaar la,
ka nie o yɛlsu'adir linɛ an Kristo yɛla la tis nidib;
ka li yɛla,
ka ba lɔɔm nɛ bana.
4 Sɔsimi Wina'am ye m nyaŋi pian' nie li nyain wʋʋ lin nar ye m niŋ si'em la.
5 Mɔri ya'am nɛ yanamɛ niŋid si'em tisid banɛ ka' yadda niŋidib la,
ka nɔki ya saŋa la tʋm linɛ an sʋm.
6 Kɛlli ka ya nɔɔr pian'ad mɔri mimilim wʋʋ yaarim nɛ,
ka baŋ yanamɛ na lɛbis lin nar si'em tis sɔ' mɛkama wʋsa.
Pʋ'ʋsʋg
7 Tikikus onɛ aan ti ba'abinɔŋir nɛ ti sʋŋid amɛŋa nɛ ti tʋmtʋm tiraan onɛ an yinne nɛ ti Zugsɔb la na yɛli ya m yɛla.
8 Lin yɛla ka m tʋm o ya san'an na,
ye ya baŋ tinamɛ an si'em,
ka kpɛ'ɛŋi ya sʋnya.
9 On nɛ Onesimus onɛ aan ti ba'abinɔŋir asida ka aan ya teŋ nid la ka m tʋm o ya san'an na.
Ba na yɛli ya linɛ wʋsa maan kpɛla.
10 Aristarkus onɛ ka tinam nɛ on la'am bɛ sanrega ni la pʋ'ʋsidi ya.
Mak onɛ an Barnabas ansiŋ la mɛ pʋ'ʋsidi ya.
M pʋn dɛŋim pa'ali ya o yɛla,
ka o ya'a kena yanam on di'em o nɛ nu'us ayi'.
11 Josua onɛ ka ba buon Justus la mɛ pʋ'ʋsidi ya.
Nidib atan' bama ma'aa an Jew dim banɛ la'am tʋm nɛ mam ye Wina'am sʋ'ʋlim la yɛla keŋ tuon.
Ban niŋid si'em la bʋgʋnnɛ m sʋʋnr.
12 Epafras onɛ aan ya teŋ nid ka an Yesu Kristo tʋmtʋm la mɛ pʋ'ʋsidi ya.
O tɛn'ɛsidi ya yɛla saŋa mɛkama ka sɔsid Wina'am nɛ nimmua,
ye ya zi'en kiŋ-kiŋ ka bi' ka baŋ linɛ ka Wina'am bɔɔd sʋ'ʋŋa.
13 M nyɛ on tʋm namis yanam nɛ Laodisea dim nɛ Hierapolis dim wʋsa yɛla si'em.
14 Luk onɛ an du'ata kanɛ ka ti nɔŋ la nɛ Demas pʋ'ʋsidi ya.
15 Pʋ'ʋsimi ti ba'abiis banɛ bɛ Laodisea teŋin,
nɛ Nimfa nɛ Wina'am nimbanɛ la'asid o yin la.
16 Ya ya'a karim gbauŋ kaŋa naae,
kɛlli ka ba karimi lii tis Wina'am nimbanɛ bɛ Laodisea la mɛn.
Ka yanam mɛ karim Laodisea dim gbauŋ la.
17 Yɛlim Arikipus ye,
“Mɔɔm ka naae tʋʋm kanɛ ka fʋ di'e Zugsɔb san'an la.”
18 Mam Paul n sɔb pʋ'ʋs kaŋa nɛ m mɛŋ nu'ug.
Tɛn'ɛsimi ban lɔɔm nɛ bana la yɛla.
Wina'am yɛlsʋm na bɛ nɛ ya.